Omikalo ndhoka hadhi longitha okuuvitha onkundana ombwanawa
AAKRISTE oya lombwelwa ya ‘ninge aantu yomiigwana ayihe aalongwa,’ ihe shika itashi ti kutya oye na okuthininika nenge okwiitedhululitha yalwe koonkondo. Elombwelo lyaJesus olya li kutya yu “uvithile oohepele onkundana ombwanawa,” ya “aludhe mboka ye na omwenyo gwa nyanyagulwa,” ya “hekeleke ayehe mboka taya lili.” (Mateus 28:19, NW; Jesaja 61:1, 2, OB-1986; Lukas 4:18, 19) Oonzapo dhaJehova ohadhi kambadhala oku shi ninga mokuuvitha onkundana ombwanawa okuza mOmbimbeli. Ngaashi naanaa omuprofeti gwonale Hesekiel, Oonzapo dhaJehova nena ohadhi kambadhala okumona mboka “haa fudhaganene nohaa takumine iihuna ayihe, hayi hunwa.”—Hesekiel 9:4.
Omukalo gwa tseyika nawa ngoka hadhi longitha okumona mboka ya nikithwa oluhodhi koonkalo dhonena, ogwo okuya egumbo negumbo. Kungeyi dho ohadhi ningi oonkambadhala oombwanawa okuthika kaantu, ngaashi naanaa Jesus a li a ningi sho a li “e endaenda ihe niilando nomikunda noku uvitha [onkundana ombwanawa yuukwaniilwa waKalunga, NW].” Aalongwa ye yonale osho ya li ya ningi wo. (Lukas 8:1; 9:1-6; 10:1-9) Mpoka tashi wapa, Oonzapo dhaJehova nena ohadhi kambadhala okutalela po egumbo kehe iikando yi ili noyi ili momvula, okukundathana nomunegumbo uule wominute dhontumba kombinga yasha, shoka aantu pomudhingoloko nenge muuyuni ye hole nenge tayi ipula nasho. Enyolo limwe nenge gaali otali vulu okukundathanwa, nongele omukwanegumbo otu ulike ohokwe, Onzapo otayi vulu okuninga elongekidho lyokugaluka pethimbo tali opalele okutsikila noonkundathana. Oombimbeli niileshomwa tayi fatulula Ombimbeli otayi vulu okumonika, nongele omunegumbo oku na ehalo, ekonakonombimbeli lyopegumbo otali vulu okuningwa naye oshali. Omakonakonombimbeli ngaka omamiliyona taga tungu ohaga ningwa itaaga faula naantu nosho wo nomaukwanegumbo muuyuni auhe.
Omukalo gulwe moka “onkundana ombwanawa yuukwaniilwa” hayi tseyithilwa yalwe ogwo okupitila mokugongala haku ningilwa pIinyanga yUukwaniilwa yopuyo. Oonzapo ohadhi ningi mpoka okugongala kwoshiwike kehe. Okugongala kumwe okwoshipopiwa shomontaneho kombinga yoshipalanyolo shontumba shoka shi li pethimbo, hashi landulwa kekonakono lyoshipalanyolo shontumba shOmbimbeli nenge ehunganeko lyontumba okuza moshifo shOshungonangelo. Okugongala okukwawo oko osikola yokudheula Oonzapo dhi kale dhi li aauvithi yonkundana ombwanawa ye li nawa, hayi landulwa koshitopolwa tashi kundathana kombinga yiilonga yokugandja uunzapo moshitopolwa shopomudhingoloko. Oonzapo ohadhi gongala wo lumwe moshiwike momagumbo gopaumwene muungundu uushona okukonakona Ombimbeli.
Okugongala akuhe huno okwe egulukila aantu ayehe. Ihapu umbwa nando oongalo. Okugongala kwa tya ngaaka oku na uuwanawa kwaayehe. Ombimbeli otayi ti: “Tu silathaneni oshimpwiyu, tu kwathathaneni mokuholathana nomokulongelathana uuwanawa. Inatu etha po okugongala pamwe, ngaashi yamwe haa ningi. Ihe natu kumagidhathaneni, unene sho tu wete esiku lyOmuwa tali hedha popepi.” Osha pumbiwa tu konakone paumwene nokukonga uuyelele kutse yene, ihe okugongala pamwe nayalwe okutuntula: “Oshiyela tashi upike oshiyela oshikwawo, nomuntu tu upike omukwawo.”—Aaheberi 10:24, 25; Omayeletumbulo 27:17.
Oonzapo ohadhi longitha wo nawa oompito okupopya kombinga yonkundana ombwanawa uuna tadhi tsakaneke aantu yalwe mokukala kwadho kwesiku kehe. Otashi vulika shi kale oohapu dhontumba tadhi popiwa nomushiinda nenge nomweendi pamwe omukwawo mombesa nenge mondhila, oonkundathana dhi ihwa po nakuume nenge nomukwanezimo, nenge oonkundathana nomuniilonga omukwawo pethimbo lyomwiha. Sho Jesus a li kombanda yevi, uunzapo oundji osho a li e u gandja komukalo nguka—manga a li te ende komunkulofuta, a kuutumba koshikulundundu, ta li megumbo lyagumwe, a li pohango, nenge te ende mombautu yokukwata oohi pEfuta lyaGalilea. Okwa li a longo aantu moosinagoga nomotempeli muJerusalem. Shaampono a li, okwa li a mono oompito dhokupopya kombinga yUukwaniilwa waKalunga. Oonzapo dhaJehova ohadhi kambadhala okulandula wo oshinkoti she moshinima shino.—1 Petrus 2:21.
OHADHI UVITHA OKUPITILA MOSHIHOLELWA SHADHO
Kapu na gumwe gwomomikalo ndhino dhoku ku lombwela onkundana ombwanawa tagu ka kala tagu ti sha kungoye ngele ngoka e yi ku lombwele omalongo ihe ga longitha monkalamwenyo ye mwene. Ngele iilonga yomuntu itayi tsu kumwe noohapu dhe, osho uufudhime, nuufudhime wopalongelokalunga owa pilula ko aantu omamiliyona kOmbimbeli. Kashi li mondjila okupa Ombimbeli uusama. Aanongoraamata nAafarisayi oya li ye na Omanyolo gOshiheberi, ihe Jesus okwe ya pangula kutya oye li aafudhime. Okwa li a popi kombinga yokulesha kwawo Ompango yaMoses, opo nduno okwa lombwele aalongwa ye ta ti: “Shaa shoka taye mú lombwele, shi ningeni, ne mu shi dhiginine; ihe inamu holela iilonga yawo, oshoka oyo taa lombwele, yo ihaa gwanitha sha.” (Mateus 23:3) Ngele Omukriste ta kala e na onkalamwenyo yi shi okuholelwa, otayi ti sha oshindji shi vulithe euvitho lyuule woowili. Aakiintu Aakriste mboka ye na aasamane kaaye shi ooitaali oye shi lombwelwa noohapu ndhika: “Ya sindwe komikalo [dheni], nando oohapu dhaa po, sho taa tala, nkene hamu kala aayogoki.”—1 Petrus 3:1, 2.
Onkee ano Oonzapo dhaJehova ohadhi kambadhala wo okupopila onkundana ombwanawa puyalwe komukalo nguno: mokukala dhi shi okuholelwa meihumbato lyadho lyopaKriste ndyoka hadhi popile puyalwe. Ohadhi kambadhala ‘okuningila yalwe ngaashi dho dha hala dhi ningilwe.’ (Mateus 7:12) Ohadhi kambadhala okukala naantu ayehe komukalo nguno, hanOonzapo owala oonkwawo, ookuume, aashiinda, nenge aakwanezimo yadho. Molwashoka odhi li inaadhi gwanenena, haaluhe hadhi shi pondola naanaa. Ihe oshi li ehalo lyadho lyopamutima okuningila aantu ayehe uuwanawa, haku ya lombwela owala onkundana ombwanawa yUukwaniilwa, ihe oku ya kwathela wo mpoka tashi wapa.—Jakob 2:14-17.
[Ethano pepandja 19]
Hawaii
[Ethano pepandja 19]
Venezuela
[Ethano pepandja 19]
Yugoslavia
[Ethano pepandja 20]
Iinyanga yUukwaniilwa oya ndulukwa nawa nohayi longithwa okukundathana Ombimbeli
[Ethano pepandja 21]
Monkalamwenyo yomaukwanegumbo gadho nomomakwatathano gadho nayalwe, Oonzapo ohadhi kambadhala shili okuninga iinima mbyoka hadhi popile