Ontopolwa ontine

Ngoka aaprofeti ayehe ye mu hokolola

1. Ooshili kombinga yokukala po kwaJesus manga inaa ninga omuntu kombanda yevi otadhi tu ulukile shike shi na ko nasha nekwatathano lye naJehova?

“HE E HOLE Omwana note mu ulukile ayihe mbyoka te yi longo.” (Johannes 5:20) Omwana ka li tuu nekwatathano ewanawa naHe, Jehova! Ekwatathano ndyoka lyopothingo olya tameke pethimbo lyokushitwa kwe, omayuvimimvo itaaga vulu okuyalulwa manga inaa valwa e li omuntu kombanda yevi. Okwa li Omwana gwaKalunga omuvalwa awike, ngoka oye awike a shitwa kuJehova mwene shu ukilila. Kehe shimwe megulu nokombanda yevi osha shitwa okupitila mOmwana nguka omuholike gwosheeli. (Aakolossa 1:15, 16) Okwa longo wo e li Ohapu yaKalunga nenge Omupopikalelipo, Ngoka okupitila muye ehalo lyaKalunga lya li lya tseyithilwa aantu yalwe. Nguka, e li Omwana ngoka Kalunga a kala e hole unene, okwa ningi omuntu Jesus Kristus.—Omayeletumbulo 8:22-30; Johannes 1:14, 18; 12:49, 50.

2. Omahunganeko gOmbimbeli ogu ulike shi thike peni kuJesus?

² Manga Omwana gwaKalunga gwosheeli inaa tulwa moshivalelo pashikumithalonga opo a valwe e li omuntu, omahunganeko ogendji ga nwethwa mo oga li ga nyolwa kombinga ye. Omuyapostoli Petrus okwe shi hokololele Kornelius ta ti: “Oye nguka aaprofeti ayehe ye mu hokolola.” (Iilonga 10:43) Onkandangala yaJesus oya tsuwa omuthindo omunene mOmbimbeli nomolwashoka omuyengeli a lombwele omuyapostoli Johannes a ti: “Ehokololo lyaJesus olyo ombepo yuuprofeti.” (Ehololo 19:10) Omahunganeko ngoka oge mu holola sha yela kutya oye Messias. Ogu ukitha eitulomo koonkandangala dhi ili nodhi ili ndhoka a li ta ka dhana mokugwanitha omalalakano gaKalunga. Ayihe mbika oyi na okukala tayi ti sha noonkondo kutse nena.

Shoka omahunganeko ga holola

3. (a) Mehunganeko lyomuGenesis 3:15, olye ta thanekwa keyoka, ‘komukiintu’ ‘nokoluvalo lweyoka’? (b) Omolwashike ‘okunyanyagulwa kwomutse gweyoka’ ku li oshinima shihokitha unene kaapiya yaJehova?

³ Lyotango lyomomahunganeko ngoka olya li lya popiwa konima yoshipotha muEden. Jehova okwa lombwele eyoka a ti: “Etondathano tandi li tula [po] opokati keni nomukiintu nopokati koluvalo lwoye nopokati koluvalo lwe; olwo talu ku nyanyagula po omutse gwoye, ongoye oto mu nyanyagula po oshithi shompadhi ye.” (Genesis 3:15) Ehunganeko ndyoka olya li tali popi lela Satana, ngoka a li ta thanekwa keyoka. ‘Omukiintu’ oye ehangano lyaJehova edhiginini lyomegulu, ndyoka kuye lya fa omukiintu omudhiginini. ‘Oluvalo lweyoka’ olwa kwatela mo aayengeli ayehe naantu ayehe mboka hayu ulike ombepo yaSatana, mboka haya pataneke Jehova noshigwana She. ‘Okunyanyagulwa kwomutse gweyoka’ otaku ti ehanagulo lyahugunina lyaSatana omunashipotha, ngoka a lundile Jehova nokwe etele aantu oluhodhi olunene. Ihe olye naanaa e li oshilyo sha simanenena ‘sholuvalo’ ndoka talu ke mu nyanyagula? Shoka osha kala uule womathelemimvo shi li ‘oshiholekwa oshiyapuki.’—Aaroma 16:20, 25, 26, NW.

4. Ongiini oluvalo moka mwa za Jesus lyu ulike kutya oye Oluvalo lwu uvanekwa?

⁴ Konima yoomvula 2 000 lwaampono dhondjokonona yaantu, Jehova okwa li a gandja uuyelele natango. Okwa li u ulike kutya Oluvalo olwa li talu ka za mezimo lyaAbraham. (Genesis 22:15-18) Ihe ezimo moka mwa li tamu ka za Oluvalo kalya li tali ka kala li ikolelela kokuvalwa panyama, ihe okwaangoka a hogololwa kuKalunga. Nonando Abraham okwa li e hole omwanamati Ismael, ngoka a valwa kuHagar, Jehova okwa ti: “Ondjuvanena yandje otandi yi uvanenene otse naIsaak, Sara te mu vala.” (Genesis 17:18-21) Konima yethimbo ehangano ndyoka olya shilipalekelelwa omwana gwaIsaak, Jakob, moka muye mwa zi omazimo 12 gaIsrael, ihe hamwana gwosheeli, Esau. (Genesis 28:10-14) Konima yethimbo, osha li shu ulikwa kutya Oluvalo otalu ka valwa mezimo lyaJuda, moluvalo lwaDavid.—Genesis 49:10; 1 Ondjalulahokololo 17:3, 4, 11-14.

5. Uunake Jesus a tameke uukalele we wokombanda yevi, noshike shu ulike kutya oye Messias?

⁵ Omauyelele galwe geni ga li ga gandjwa shi na ko nasha nokuulika kutya Oluvalo ndoka olwo lye? Oomvula 700 manga shika inaashi ningwa, Ombimbeli oya li ya popi Betlehem shi li ehala moka Oluvalo lwu uvanekwa lwa li talu ka valelwa lu li omuntu gwokombanda yevi. Oyu ulike wo kutya Oluvalo olwa kala po nale okuza ‘muuyuni waaluheluhe,’ sha hala okutya, okuza ethimbo ndyono lwa shitwa megulu. (Mika 5:1) Ethimbo lyothaatha lyokuholoka po kwalyo kombanda yevi lu li Messias olya li wo lya hunganekwa komuprofeti Daniel. (Daniel 9:24-26) Sho Jesus a gwayekwa nombepo ondjapuki kuJehova a ninge lelalela Messias, ewi Lye okuza megulu olya popi sha yela kutya Jesus oku li Omwana. (Mateus 3:16, 17) Oluvalo olwa li lwa hololwa. Onkee ano Filippus okwa li a vulu okupopya e na uushili ta ti: “Otse twa mono ngoka a shangwa kuMoses mompango nokaaprofeti, Jesus.”—Johannes 1:45.

6. (a) PaLukas 24:27, aalanduli yaJesus oya tseya shike? (b) Olye oshilyo sha simanenena ‘sholuvalo lwomukiintu,’ nokunyanyagula omutse gweyoka kwe otaku ti shike?

⁶ Konima yaashoka, aalanduli yaJesus oya li ya mono kutya mOmanyolo ga nwethwa mo omu na omapopyo gopahunganeko ogendji taga popi kombinga ye. (Lukas 24:27) Osha li nokuli sha yela mo nawa kutya Jesus oye oshilyo sha simanenena ‘sholuvalo lwomukiintu,’ shoka tashi ka nyanyagula omutse gweyoka, shoka tashi ka nyanyagula po Satana kaa kale po we. Okupitila muJesus, omauvaneko agehe gaKalunga ngoka u uvanekela aantu, iinima ayihe mbyoka twa kala twa yuulukwa unene, otayi ka gwanithwa.—2 Aakorinto 1:20.

7. Kakele kokutseya kutya Ngoka ta popiwa momahunganeko oye lye, oshike ishewe shi na oshilonga okutseya?

⁷ Okutseya shika oku na oku tu nwetha mo ngiini? Ombimbeli otayi hokolola kombinga yelenga lyokuEtiopia ndyoka lya li tali lesha gamwe gomomahunganeko kombinga yaangoka te ya e li Omuhupithi noku li wo Messias. Kalya li li gu uvite ko nolya pula omuuvithi gwevaangeli Filippus tali ti: “Olye ngo omuprofeti te mu popi ngeyi?” Ihe elenga inali hulila owala mpoka sho lya yamukulwa. Konima yokupulakena nawa efatululo ndyoka Filippus e li pe, omulumentu ngoka okwa mono kutya okupandula ehunganeko ndyoka lya gwanithwa otaku ke mu pula a katuke onkatu. Oku uva ko kutya okwa li a pumbwa okuninginithwa. (Iilonga 8:32-38; Jesaja 53:3-9) Mbela ohatu inyenge sha faathana?

8. (a) Emakelo lyaAbraham okuyamba po Isaak olya li tali thaneke shike? (b) Omolwashike Jehova a lombwele Abraham kutya iigwana ayihe otayi ka yambekelwa mOluvalo lwe, nongiini shika tashi longo nena kutse?

⁸ Dhiladhila wo ehokololo tali gumu omutima li na ko nasha nemakelo lyaAbraham okuyamba po Isaak, omwanamati oye awike a valwa kuSara. (Genesis 22:1-18) Shoka osha li sha thaneke shoka Jehova a li ta ka ninga—kutya ota ka yamba po Omwana epona lye, ngaashi kwa tiwa: “Kalunga kwa li e hole uuyuni, oye a gandja Epona lye, opo shaa ngoka e mu itaale, kaa kane, ihe a mone omwenyo gwaaluhe.” (Johannes 3:16) Otashi tu pe einekelo kutya ngaashi naanaa Jehova a gandja Omwana epona lye okugwanitha elalakano Lye, ote ke tu ‘pa wo iinima ayihe.’ (Aaroma 8:32) Mbela oshike tatu pulwa tu ninge? Ngaashi sha nyolwa muGenesis 22:18, Jehova okwa lombwele Abraham kutya iigwana ayihe otayi ka yambekelwa mOluvalo lwe, ‘sho Abraham a vulika koohapu dhaKalunga.’ Tse wo otwa pumbwa okupulakena kuJehova nokOmwana, ngaashi taku tiwa: “Oongoka [e na eitaalo tali longo mOmwana, NW], oye e na omwenyo gwaaluhe; ihe oongoka [itaa] vulika kOmwana, ita ka mona ko omwenyo, ihe ondjahi yaKalunga otayi kala kombanda ye.”—Johannes 3:36.

9. Otatu ka ninga shike ngele otwa pandula etegameno lyomwenyo gwaaluhe ngoka gwa ningwa tagu wapa keyambo lyaJesus?

⁹ Ngele otwa pandula etegameno lyomwenyo gwaaluhe ndyoka lya ningwa tali wapa keyambo lyaJesus, otatu ka kala twa hala okuninga iinima mbyoka Jehova e tu lombwele okupitila muJesus. Iinima mbyoka oya kwatela mo ohole yetu yokuhola Kalunga nosho wo aantu ooyakwetu. (Mateus 22:37-39) Jesus oku ulike kutya ohole yetu yokuhola Jehova otayi ke tu inyengitha tu longe aantu yalwe “okudhiginina ayihe [mbyoka Jesus e tu] lombwele.” (Mateus 28:19, 20) Notwa hala okuulikilathana ohole ndjoka naapiya ooyakwetu yaJehova ‘mokugongala aluhe pamwe’ nayo. (Aaheberi 10:25, OB-1986; Aagalati 6:10) Uuna tatu pulakene kuKalunga nokOmwana, inatu dhiladhila nando kutya oya tegelela tu kale twa gwanenena. Aaheberi 4:15 otaya ti kutya Jesus, e li Omusaaseri Omukuluntu gwetu, ota vulu ‘okuuvila uunkundi wetu ohenda.’ Shoka kashi hekeleka tuu, unene tuu ngele tatu hedha kuKalunga megalikano okupitila muKristus e tu kwathele tu sinde omaunkundi getu!—Mateus 6:12.

Kala u na eitaalo muKristus

10. Omolwashike ehupitho tali vulu okumonika owala okupitila muJesus Kristus?

¹⁰ Konima sho omuyapostoli Petrus a yelithile ompangu yopombanda yOshijuda muJerusalem kutya omahunganeko gOmbimbeli oga gwanithilwa muJesus, okwa hulitha ta popi nomuthindo ta ti: “[Kaku] na omukwawo, ehupitho lya kala muye, oshoka kaku na edhina lilwe kohi yegulu, lya hololelwa aantu, moka tu na okuhupithilwa.” (Iilonga 4:12) Molwashoka oluvalo aluhe lwaAdam olwo olulunde, eso lyalyo itali vulu okulongithwa lu li iikulila okukulila omuntu nando ogumwe. Ihe Jesus okwa li a gwanenena nomwenyo gwe ogwa li gu na ongushu yopayambo. (Epsalmi 49:7-10; Aaheberi 2:9) Okwa gandja kuKalunga iikulila mbyoka yi thike pamwe lelalela mongushu nomwenyo gwa gwanenena ngoka Adam a kanitha. (1 Timoteus 2:5, 6) Shoka oshe shi ningi tashi wapa tu mone omwenyo gwaaluhe muuyuni uupe waKalunga.

11. Yelitha nkene tatu vulu okumona uuwanawa oundji meyambo lyaJesus.

¹¹ Iikulila oye shi ningi wo tashi wapa tu mone omauwanawa galwe nokuli nongashingeyi. Pashiholelwa, nonando otu li aalunde, eyambo lyaJesus otali shi tu ningile tashi wapa tu kale tu na eiyuvo lya yela molwashoka oondjo dhetu otadhi vulu okudhimwa po. Shoka oshi vule kokule shoka sha li sha ningilwa Aaisrael okupitila momayambo giinamwenyo ngoka ga li ga pulwa kOmpango yaMoses. (Iilonga 13:38, 39; Aaheberi 9:13, 14; 10:22) Ihe opo tu mone edhiminopo ndyoka, otu na okuzimina paushili kutya otwa pumbwa eyambo lyaKristus unene, tatu ti: “Otse ngele tatu ti, katu na oondjo, otatu ifundju otse yene, noshili yo yene katu yi na mutse. Ihe ngele tatu hempulula oondjo dhetu, nena oye omudhiginini nomuyuuki, ote tu kuthile po oondjo note tu yogo omayonagulo agehe.”—1 Johannes 1:8, 9.

12. Omolwashike okuninginithwa momeya ku li oshinima sha simana mokumona eiyuvo ewanawa koshipala shaKalunga?

¹² Ongiini aalunde taya vulu okuulika kutya oye na eitaalo muKristus nomeyambo lye? Sho aantu yomethelemimvo lyotango ya ningi ooitaali, oya li ye shi ulike montaneho. Ngiini? Oya ninginithwa. Omolwashike? Omolwashoka Jesus okwa ti kutya aalongwa ye ayehe oye na okuninginithwa. (Mateus 28:19, 20, NW; Iilonga 8:12, NW; 18:8, NW) Omuntu ita ka kakadhala ngele omutima gwe ogwi inyengithwa shili kesiloshimpwiyu lyopahole ndyoka Jehova a ningi okupitila muJesus. Ota ka ninga omalunduluko kehe ga pumbiwa monkalamwenyo ye, ti iyapulile Kalunga megalikano nokuulika eigandjo lye mokuninginithwa momeya. Mokuulika eitaalo komukalo nguno, oti ‘indile kuKalunga eiyuvo ewanawa.’—1 Petrus 3:21.

13. Oshike twa pumbwa okuninga ngele otwa zimina kutya otwa ninga epuko, nomolwashike?

¹³ Dhoshili, nokuli nokonima yokuninginithwa, omaukwatya guulunde otaga ka holoka po natango. Ongiini ano ngele otwa yono? Omuyapostoli Johannes okwa ti: “Ndhika otandi dhi mú shangele, mwaa yone; ihe ngele ku na ngoka a yono, nena otu na Omupopili, Jesus Kristus omuyuuki, a kala puTate. Oye ekulilo lyoondjo dhetu.” (1 Johannes 2:1, 2) Mbela shika otashi ti kutya kashi na nduno mbudhi kutya otatu ningi shike, ngele otwa galikana Kalunga omolwedhiminopo, ote tu dhimine po owala? Hasho naanaa. Oshipatululo shokudhiminwa po osho okwiiyela ombedhi kwoshili. Ekwatho otashi vulika li kale lya pumbiwa okuza kwaamboka ya pyokoka, mboka ye na owino oundji megongalo lyopaKriste. Otwa pumbwa okuzimina kutya shoka twa ninga osha puka e tatu ipe uusama shili molwasho opo tu ninge oonkambadhala dha mana mo okwaahe li endulula ishewe. (Iilonga 3:19; Jakob 5:13-16) Ngele tatu shi ningi, otatu vulu okukala nuushili kutya Jesus ote ke tu kwathela nonokutya Jehova ota ka kala ishewe e tu hokwa.

14. (a) Fatulula omukalo gwa simana moka hatu mono uuwanawa meyambo lyaJesus. (b) Ngele otu na shili eitaalo, oshike tatu ka ninga?

¹⁴ Eyambo lyaJesus olye shi ningi tashi wapa ‘koshigunda oshishona’ shi mone omwenyo gwaaluhe megulu, oshilyo oshitiyali sholuvalo lwa tumbulwa muGenesis 3:15. (Lukas 12:32; Aagalati 3:26-29) Olya ningi wo okukala nomwenyo sigo aluhe moparadisa kombanda yevi taku wapa kaantu yalwe omamiliyona omayuvi. (Epsalmi 37:29, OB-1986; Ehololo 20:11, 12; 21:3, 4) Omwenyo gwaaluhe ogwo “omaganohenda gaKalunga . . . omuKristus Jesus, Omuwa gwetu.” (Aaroma 6:23; Aaefeso 2:8-10) Ngele otu na eitaalo momagano ngaka notwa pandula omukalo moka ga ningwa taga wapa, otatu ke shi ulika. Otatu ka ninga uukalele wopaKriste u li shimwe shomiilonga mbyoka ya simanenena noonkondo monkalamwenyo yetu ngele tatu uvu ko nkene Jehova a longitha Jesus pashikumithi okugwanitha ehalo Lye nonkene sha simana noonkondo opo atuheni tu landule oshinkoti shaJesus thiluthilu. Eitaalo lyetu otali ki imonikila mokugandja uunzapo kwetu ngele tatu lombwele yalwe kombinga yomagano ngaka omakumithi ga za kuKalunga.—Iilonga 20:24.

15. Ongiini eitaalo okwiitaala Jesus Kristus li na oshizemo tashi hanganitha?

¹⁵ Eitaalo lya tya ngeyi kali na tuu oshizemo oshiwanawa tashi hanganitha! Okupitila mulyo, otatu hililwa popepi naJehova, nOmwana nosho wo nayakwetu megongalo lyopaKriste. (1 Johannes 3:23, 24) Otashi tu nyanyudha sho Jehova a kala nombili nOmwana moku mu pa “edhina li vule omadhina agehe [kakele kedhina lyaKalunga], opo ayehe ye na okutsa oongolo medhina lyaJesus naamboka yomegulu noyokombanda yevi noyomeni lyevi, nelaka kehe nali simaneke Kalunga He omokuhokolola, Jesus Kristus oye Omuwa.”—Aafilippi 2:9-11.

Oonkundathana dhokweendulula

• Sho Messias a holoka, omolwashike a dhimbulukiwa mo nuupu kwaamboka yi itaala shili Oohapu dhaKalunga?

• Iinima yimwe yini tu na okuninga okuulika olupandu lwetu okupandula eyambo lyaJesus?

• Omomikalo dhini twa mona nale uuwanawa meyambo lyaJesus? Ongiini shino tashi tu kwathele uuna tatu galikana Jehova e tu dhimine po oondjo dhetu?

[Ethano pepandja 36]

Jesus okwa lombwele aalanduli ye kutya oye na okulonga aantu yalwe ya dhiginine iipango yaKalunga