Ontopolwa omulongo nontitatu
Ongundu onene ya taalela oshipangelapundi shaJehova
1. (a) Oshike shi na okuningilwa aapiya yaKalunga yopethimbo lya tetekele Uukriste nenge 144 000 manga inaaya pewa ondjambi yawo? (b) Oshike tashi ka kala tashi wapa ‘kongundu onene’ yaamboka ye li ko ethimbo ndino?
AAPIYA yaKalunga aadhiginini okuza kuAbel sigo okuJohannes Omuninginithi oya li ya pititha komeho okulonga ehalo lyaKalunga monkalamwenyo yawo. Ihe nando ongaaka, yo ayehe oya sa, noya tegelela eyumuko okuyumukila omwenyo kombanda yevi muuyuni uupe waKalunga. Aantu 144 000, mboka taya ka pangela pamwe naKristus mUukwaniilwa waKalunga womegulu, oye na wo okusa manga inaaya pewa ondjambi yawo. Ihe Ehololo 7:9 otali ulike kutya momasiku ngaka gahugunina, otapu ka kala “ongundu onene” yomiigwana ayihe yaamboka itaaya ka sa ihe oye na etegameno lyoku ka kala nomwenyo sigo aluhe kombanda yevi. Ou li mbela gumwe gwomuyo?
Nkene ongundu onene tayi dhimbululwa
2. Oshike sha fala meuvoko lya yela lyokudhimbulula mo ongundu onene yomEhololo 7:9?
2 Mo 1923, aapiya yaJehova oye shi mono mo kutya “oonzi” dhomeyele lyaJesus tali adhika muMateus 25:31-46 ‘noonzi dhilwe’ ndhoka a popya muJohannes 10:16, oyo aantu mboka ya li taya ka kala ye na ompito okukala nomwenyo sigo aluhe kombanda yevi. Mo 1931 oya mono kutya mboka ya hokololwa muHesekiel 9:1-11 (OB-1986) ya ndhindhilikwa miipala yawo, oyo wo mboka ye na etegameno lyokukala kombanda yevi. Opo nduno mo 1935 osha li sha monika mo kutya ongundu onene oya thikama po moshitopolwa shongundu yoonzi dhilwe ndhoka Jesus a popi. Nena ongundu onene ndjoka ya hokiwa oyi thike pomamiliyona.
3. Omolwashike uutumbulilo “ya thikama ya taalela oshipangelapundi” itaau ulike kongundu yomegulu?
3 MEhololo 7:9, ongundu onene inayi monika yi li megulu. Inayi pumbwa okukala megulu opo yi kale “ya thikama ya taalela oshipangelapundi” shaKalunga. Mpoka yi li Kalunga ota vulu owala oku yi mona. (Epsalmi 11:4) Uushili kutya ongundu onene, “ya nyenge okuyalulwa,” kayi shi ongundu yomegulu otau monika mokuyelekanitha omwaalu gwayo inagu tumbulwa kondandalunde naashoka sha nyolwa mEhololo 7:4-8 nomEhololo 14:1-4. Moka otamu hololwa kutya omwaalu ngoka gwa kuthwa kombanda yevi okuya megulu ogu thike po 144 000.
4. (a) ‘Uudhigu uunene’ uni ongundu onene tayi ka hupa muwo? (b) Ngaashi sha popiwa mEhololo 7:11, 12, oolye haya kutha ombinga pamwe nongundu onene mokulongela Kalunga?
4 Ehololo 7:14 otali popi ongundu onene tali ti: “Mbaka oyo mboka ya zi [muudhigu, NW] mbo uunene.” Oya hupu muudhigu uunenenene inaau monika nando onale mondjokonona yaantu. (Mateus 24:21) Uuna taya popi nolupandu kutya ehupitho lyawo otali zi kuKalunga nokuKristus, iishitwa ayihe iidhiginini megulu otayi ka tya pamwe nayo: “Amen! Esimaneko neadhimo nuunongo netango nesimano nepangelo noonkondo odhaKalunga ketu aluheluhe! Amen!”—Ehololo 7:11, 12.
Oyi na okuulika kutya oya gwana okuhupa
5. Ongiini tatu vulu okutseya shoka tashi pulwa opo tu kale oshitopolwa shongundu onene?
5 Ehupitho lyongundu onene muudhigu uunene otali ningwa metsokumwe nomithikampango dhaJehova dhuuyuuki. Omaukwatya ngoka taga ndhindhilikitha mboka taya ka hupa oga kundathanwa sha yela mOmbimbeli. Onkee ano otashi wapa kwaamboka ye hole uuyuuki opo ya katuke ngashingeyi nelalakano okuulika kutya oya gwana okuhupa. Oye na mbela okuninga shike?
6. Omolwashike she eleka opo ongundu onene yi yelekanithwe noonzi?
6 Oonzi odhi na ombili nohadhi vulika. Onkee ano sho Jesus a ti kutya oku na oonzi dhilwe ndhoka kaadhi shi dhomongundu yomegulu, okwa li ta popi aantu mboka inaaya hala owala oku ka kala nomwenyo kombanda yevi sigo aluhe, ihe oomboka taya ka vulika wo komalongo ge. Okwa ti: “Oonzi dhandje ohadhi uvu ewi lyandje, nangame ndi dhi shi, nohadhi landula ndje.” (Johannes 10:16, 27) Mboka oyo aantu mboka haya pulakene lela koohapu dhaJesus nohaya vulika kudho nokungawo otaya ningi aalongwa ye.
7. Omaukwatya geni aalanduli yaJesus ya pumbwa okukokeka?
7 Omaukwatya galwe geni kehe gumwe gwomaalanduli mbaka yaJesus a pumbwa okukokeka? Oohapu dhaKalunga otadhi yamukula tadhi ti: “Mu na okwiihula omuntu omukulu, ngoka mwe mu landula nale . . . Ne mu zale omuntu omupe, a shitwa a fe Kalunga omuuyuuki nomuuyapuki washili.” (Aaefeso 4:22-24) Ohaya kokeke omaukwatya ngoka taga koleke uukumwe waapiya yaKalunga—“ohole, enyanyu, ombili, ontalanteni, uukuume, uuwanawa, uudhiginini, engungumano, eidhidhimiko.”—Aagalati 5:22.
8. Ongundu onene otayi ka ningilwa shike manga tayi yambidhidha oshihupe?
8 Ongundu onene otayi yambidhidha omwaalu omushona gwaamboka ye na etegameno lyokuya megulu, mboka taya kwatele komeho miilonga yokuuvitha. (Mateus 24:14; 25:40) Oonzi dhilwe otadhi gandja eyambidhidho ndika, nonando odhi shi kutya otadhi ka patanekwa molwashoka petameko lyomasiku ngaka gahugunina, Kristus Jesus naayengeli ye oyu umbu mo Satana noompwidhuli dhe megulu. Shoka otashi ti kutya “[oyaye kevi] oshoka ondiaboli ya kulukile kune, e na ondjahi onene, oshoka e shi shi, e na ethimbo efupi lyowala.” (Ehololo 12:7-12) Onkee ano, Satana oti indjipaleke omapataneko ge okupataneka aapiya yaKalunga sho ehulilo lyonkalelo ndjika tali hedha popepi.
9. Aapiya yaKalunga ohaye shi pondola ngiini mokuuvitha onkundana ombwanawa, nomolwashike?
9 Nonando opu na omahepeko gonyanya, iilonga yokuuvitha otayi tsikile yu uka komeho. Kehulilo lyIita Yotango yUuyuni opwa li owala aauvithi yUukwaniilwa omayuvi gontumba, ihe ngashingeyi opu na omamiliyona, mboka Jehova u uvanekela ta ti: “[Oshikondjitho] kehe tashi hambulwa, shi ku kondjithe, tashi nyengwa.” (Jesaja 54:17) Nokuli noshilyo shompangu yopombanda yOshijuda osha zimina kutya iilonga yaKalunga itayi vulu okusindika. Osha lombwelele Aafarisayi methelemumvo lyotango shi na ko nasha naalongwa sha ti: “Etheni aalumentu mbaka, ya kale ngaaka, euvaneno ndika noshilonga shika ngele sha za maantu, otashi hulu po; ihe ngele sha za muKalunga, ne kamu vulu oku ya yona po. Itaaleni, mwaa monike nokuli, one aakondjithi yaKalunga mwene.”—Iilonga 5:38, 39.
10. (a) ‘Okundhindhilikwa’ kwaamboka yomongundu onene otaku ti shike? (b) Aapiya yaKalunga ohaya vulika ngiini ‘kewi lyomegulu’?
10 Mboka yomongundu onene otaya thanekwa ye li ya ndhindhilikwa omolwehupitho. (Hesekiel 9:4-6, OB-1986) “Endhindhiliko” ndyoka olyo euliko kutya oyi iyapulila Jehova, ya ninginithwa ye li aalongwa yaJesus notaya kambadhala okukala ye na uukwatya wa fa waKristus. Ohaya vulika ‘kewi lyomegulu’ ndyoka tali popi kombinga yuukwaniilwa waSatana womuuyuni auhe womalongelokalunga giifundja tali ti: “Zeni mo muyo, one aantu yandje, mwaa kwatathane noondjo dhayo, nomahepeko gayo gaaye mú kwate.”—Ehololo 18:1-5.
11. Omomukalo gwa simana guni mboka yomongundu onene tayu ulike kutya yo aapiya yaJehova?
11 Jesus okwa lombwele wo aalanduli ye a ti: “Opo mpoka ayehe taye mú dhimbulula, one aalongwa yandje, ngele mu holathane.” (Johannes 13:35) Mepingathano naashoka, iilyo yomalongelokalunga guuyuni mbuka ohayi dhipaga iilyo iikwawo miita, olundji omolwashoka owala ya yoolokathana momihoko! Oohapu dhaKalunga otadhi ti: “Opo tuu mpoka otapu holoka aana yaKalunga naana yondiaboli. Okehe tuu ngoka iha dhiginine uuyuuki, oye kee shi gwomuKalunga, naangoka wo kee hole omumwayina. . . . Otse tu na okuholathana, twaa fe Kain, nguka kwa li gwomomwiinayi nokwa dhipaga omumwayina.”—1 Johannes 3:10-12.
12. Puudhigu uunene, Jehova ota ka ningila shike ‘omiti’ dhopalongelokalunga ndhoka hadhi imi iiyimati iiwinayi?
12 Jesus okwa ti: “Omuti kehe omwaanawa hagu imi iiyimati iiwanawa, ihe omuti omwiinayi hagu imi iiyimati iiwinayi. Omuti omwaanawa kagu wapa okwiima iiyimati iiwinayi, nongaashi omuti omwiinayi kagu wapa okwiima iiyimati iiwanawa. Okehe tuu omuti ihaagu imi iiyimati iiwanawa, otagu kewa po notagu umbilwa momulilo. Onkee ano otamu ya dhimbulula kiiyimati yawo.” (Mateus 7:17-20) Iiyimati mbyoka hayi imikwa komalongelokalunga guuyuni mbuka otayi ga ndhindhilikitha ge li ‘omiti’ omiwinayi, ndhoka masiku tadhi ka hanagulwa po kuJehova puudhigu uunene.—Ehololo 17:16.
13. Ongundu onene otayi ulike ngiini kutya oya “thikama ya taalela oshipangelapundi” shaJehova ya hangana?
13 Ehololo 7:9-15 otali gandja eitulomo kiinima mbyoka tayi hupithitha ongundu onene. Otali ulike kutya oya “thikama ya taalela oshipangelapundi” shaJehova ya hangana, tayi yambidhidha uunamapangelo we weshito alihe. Oya “yogo oonguwo dhawo noye dhi yelitha [mombinzi] yOnzigona,” shoka tashi ulike kutya oya zimina eyambo lyaJesus lyokudhimina po oondjo. (Johannes 1:29) Oyi iyapulila Kalunga noye shi ulika mokuninginithwa momeya. Onkee ano otaya nyanyukilwa okuhokiwa kuKalunga, tashi thanekwa koonguwo oontokele notaye mu longele “iilonga iiyapuki, omutenya nuusiku.” (NW) Opu na mbela omikalo moka to vulu okutsitha kumwe thiluthilu onkalamwenyo yoye naashoka tashi hokololwa mpaka?
Omauwanawa ngoka taga vulu okumonika ngashingeyi
14. Omauwanawa gamwe gi ikalekelwa geni taga nyanyukilwa kaapiya yaJehova nokuli ngashingeyi?
14 Otashi vulika wa mona omauwanawa gi ikalekelwa ngoka taga nyanyukilwa nokuli ngashingeyi kwaamboka taya longele Jehova. Pashiholelwa, sho wi ilongo kombinga yomalalakano gaJehova gopauyuuki, owu uvu ko kutya opu na etegameno ewanawa li na ko nasha nonakuyiwa. Onkee ano ngashingeyi ou na elalakano lyolela monkalamwenyo yoye—okulongela Kalunga kashili u na etegameno linyanyudha lyokukala nomwenyo sigo aluhe moparadisa kombanda yevi. Eeno, Omukwaniilwa Jesus Kristus ota “fala [ongundu onene] koothithiya dhomeya gomwenyo.”—Ehololo 7:17.
15. Ongiini Oonzapo dhaJehova tadhi mono uuwanawa mokudhiginina omakotampango gOmbimbeli ge na ko nasha niinima yopapolotika noyopamikalo?
15 Uuwanawa uukumithi mboka tau nyanyukilwa kongundu onene owo ohole nuukumwe mbyoka tayi adhika mokati kaapiya yaJehova kombanda yevi alihe. Molwashoka atuheni ohatu ipalutha niipalutha yopambepo ya faathana, atuheni ohatu vulika koompango nomakotampango ga faathana ngoka taga adhika mOohapu dhaKalunga. Omolwashono inaatu topolwa komalongo gopapolotika nenge gopashigwana. Ohatu dhiginine wo omithikampango dha dhenga mbanda dhopamikalo ndhoka Kalunga ta pula oshigwana she. (1 Aakorinto 6:9-11) Onkee ano, pehala lyokukala shi na omahilathano, omatopauko nosho wo oluhondelo mbyoka yi li apuhe muuyuni, oshigwana shaJehova otashi nyanyukilwa shoka tashi vulu okwiithanwa oparadisa yopambepo. Tala nkene shika sha hokololwa muJesaja 65:13, 14.
16. Nonando opu na omaupyakadhi ngoka ge li apuhe monkalamwenyo, mboka yongundu onene oye na etegameno lini?
16 Oshoshili kutya aantu mboka ye li aapiya yaJehova inaya gwanenena. Yo nayo ohaya adhika komaupyakadhi ngoka ge li apuhe monkalamwenyo muuyuni mbuka, ngaashi okumona iihuna nenge okuninga iihakanwa kaayi na ondjo miita yiigwana. Nayo ohaye ehama, ohaya mono iihuna nohaya si. Ihe oyi itaala kutya Kalunga muuyuni uupe, “[ota ka] theta po omahodhi momeho gawo, neso kali kala [po] we nenge oluhodhi nenge elilagano, nenge uuwehame kau kala mo we.”—Ehololo 21:4.
17. Kutya nduno oshike tashi tu ningilwa ngashingeyi, onakuyiwa onkumithi yini ya tegelelwa kwaamboka taya longele Kalunga kashili?
17 Nokuli nonando ou kanithe omwenyo gwoye ngashingeyi molwuukulupe, omukithi, oshiponga nenge molwomahepeko, Jehova ote ke ku yumudhila omwenyo mOparadisa. (Iilonga 24:15) Opo nduno oto ka tsikila okunyanyukilwa oshituthi shopambepo pethimbo lyElelo lyOomvula Eyuvi lyaKristus. Ohole yoye yokuhola Kalunga otayi ki indjipala sho to mono omalalakano ge taga gwanithwa po thiluthilu. Nomayambeko gopalutu ngoka Jehova te ke tu pa ethimbo ndyoka otage ki indjipaleka ohole yoye yoku mu hola. (Jesaja 25:6-9) Oshigwana shaKalunga inashi tegelela tuu onakuyiwa onkumithi!
Oonkundathana dhokweendulula
• Oshiningwanima oshikumithi shini Ombimbeli tayi kwatakanitha kumwe nongundu onene?
• Ngele otwa hala shili okukala twa kwatelwa mongundu onene ndjoka ya hokiwa kuKalunga, otu na okuninga shike ngashingeyi?
• Omayambeko ngoka taga nyanyukilwa ngashingeyi kongundu onene notayi ke ga nyanyukilwa natango muuyuni uupe waKalunga oga simana ngiini kungoye?
[Ethano pepandja 123]
Aantu omamiliyona yongundu onene otaya longele Kalunga kashili muukumwe