Ontopolwa ontimulongo nontihetatu
“Oyo yaa shi yomuuyuni”
1. (a) Jesus manga inaa sa, okwa galikana shike omolwaalongwa ye? (b) Omolwashike sha simana noonkondo okwaakala ‘twomuuyuni’?
UUSIKU manga Jesus inaa dhipagwa, okwa li a galikana molwaalongwa ye. Molwashoka Jesus okwa tseya kutya oya li taya ka tulwa methininiko enenenene kuSatana, okwa ti kuHe: “Itandi galikana, u ya kuthe mo muuyuni, aawe, u ya gamene kuuwinayi. Oyo yaa shi yomuuyuni ngaashi nangame ndaa shi gwomuuyuni.” (Johannes 17:15, 16) Omolwashike mbela sha simana noonkondo okuyooloka ko kuuyuni? Omolwashoka Satana oye omupangeli guuyuni mbuka. Aakriste itaya ka kala ya hala okukala ye li oshitopolwa shuuyuni mboka u li kohi yepangelo lye.—Lukas 4:5-8; Johannes 14:30; 1 Johannes 5:19, OB-1986.
2. Omomikalo dhini Jesus a li kee shi oshitopolwa shuuyuni?
2 Okukala kwaJesus kee shi oshitopolwa shuuyuni itaku ti kutya okwa li kee hole yalwe. Mepingathano naashoka, okwa li a aludha aavu, a yumudha aasi nokwa longo aantu kombinga yUukwaniilwa waKalunga. Okwa li a gandja nokuli omwenyo gwe molwaantu. Ihe ina kala e hole iikala niilonga yokwaanakalunga yaamboka yu ulike ombepo yuuyuni waSatana. Onkee ano a londodha kombinga yiinima ngaashi uuhalu wiipala, onkalamwenyo yokuhola omaliko nokulalakanena etumbalo. (Mateus 5:27, 28; 6:19-21; Lukas 20:46, 47) Ano itashi kumitha sho Jesus a yanda wo oopolitika dhuuyuni. Nonando okwa li Omujuda, ina kutha ombinga moontamanana dhopapolitika pokati kAaroma nAajuda.
“Uukwaniilwa wandje kau shi womuuyuni mbuka”
3. (a) Aawiliki yelongelokalunga lyOshijuda oya lundile Jesus ngiini koshipala shaPilatus, nomolwashike? (b) Oshike tashi ulike kutya Jesus ka li e na ohokwe okuningwa omukwaniilwa gwopantu?
3 Dhiladhila shoka sha ningwa po sho aawiliki yelongelokalunga lyOshijuda ya kwatitha po Jesus noye mu fala kuPontius Pilatus, omupangeli Omuroma. Muushili wo wene, aawiliki mboka oya li ya yemata molwashoka Jesus okwa li a tula pomutenya iihelele yawo. Opo omupangeli a katukile Jesus onkatu, oye mu lundile taya ti: “Nguno otwe mu mono ta tsitha aantu oondumbo noti indike okugandja iifendela komukesari noti itile, oye Kristus, omukwaniilwa.” (Lukas 23:2) Osha yela kutya shoka osha li iifundja molwashoka omuvo gwa tetekele sho aantu ya li ya hala okuninga Jesus omukwaniilwa, okwa li e shi tindi. (Johannes 6:15) Okwa li e shi kutya ota ka ninga Omukwaniilwa gwomegulu monakuyiwa. (Lukas 19:11, 12) Niishewe koshipundi shuukwaniilwa ka li e na okutulwa ko kaantu, ihe okuJehova.
4. Jesus okwa tala ko ngiini okufuta iifendela?
4 Omasiku owala gatatu manga Jesus inaa kwatwa, Aafarisayi oya li ya kambadhala oku mu yula moohapu opo a popye sha shoka tashi ke mu petha ondjo shi na ko nasha nokufuta iifendela. Ihe okwa ti: “Ulukilii ndje oshimaliwa [oshikukutu shomuRoma]. Efano ndi nenyolo ndika olyalye?” Sho ya ti kutya “olyomukesari,” okwa yamukula a ti: “Peni ano omukesari shono shomukesari, naashika shaKalunga shi peni Kalunga.”—Lukas 20:20-25.
5. (a) Oshiilongomwa shini Jesus a longo aalongwa ye pethimbo lyokukwatwa kwe? (b) Jesus okwa yelitha ngiini etompelo lyaashoka a ningi? (c) Oshizemo shompangu ndjoka osha li shini?
5 Ihe Jesus ina longa aantu okutsa ondumbo naapangeli. Sho aakwiita naalumentu yalwe ye ya okukwata Jesus, Petrus okwa li a pweya mo egongamwele lye nokwa dhenge nalyo gumwe gwomaalumentu e ta tete ko okutsi kwe. Ihe Jesus okwa ti: “Shuna mo egongamwele lyoye molumpangwa; oshoka ayehe mboka taa kwata kegongamwele, oyo taa si kegongamwele.” (Mateus 26:51, 52) Esiku lya landula Jesus okwa yelithile Pilatus iilonga ye, ta ti: “Uukwaniilwa wandje kau shi womuuyuni mbuka, andola uukwaniilwa wandje womuuyuni mbuka, ando aamati yandje ya kondjo, ndaa gandjwe miikaha yAajuda.” (Johannes 18:36) Pilatus okwa zimine kutya ‘ina mona oondjo muJesus ndhoka ta tamanekelwa.’ Ihe mokwiigandja kethininiko lyokuthininikwa kongundu yaantu, Pilatus okwa gandja Jesus a alelwe komuti.—Lukas 23:13-15; Johannes 19:12-16.
Aalongwa taya landula ewiliko lyaJesus
6. Aakriste yonale oyu ulike ngiini kutya yo oya yanda ombepo yuuyuni ihe oya kala ye hole aantu?
6 Ano aalongwa yaJesus oya li yu uvite ko shoka okukala kaaye shi oshitopolwa shuuyuni tashi ti. Otashi ti kutya oye na okuyanda ombepo yokwaanakalunga nosho wo iilonga yuuyuni, mbyoka ya kwatela mo omainyanyudho ga nyata noge na ko nasha nelongithonkondo puupale nopomahala gomaudhano gaRoma. Molwashoka aalongwa oya li ya yanda omainyanyudho ga tya ngaaka, oya lukwa aatondi yaantu. Ihe pehala lyokutonda aantu ooyakwawo, oya kambadhala nuudhiginini okukwathela yalwe ya mone uuwanawa momasiloshimpwiyu gaKalunga ge na ko nasha nehupitho.
7. (a) Aalongwa yonale oya li ya ningilwa shike molwashoka kaaye shi oshitopolwa shuuyuni? (b) Oya li ya tala ko ngiini aapangeli yopapolitika nosho wo okufuta iifendela, nomolwashike?
7 Aalanduli yaJesus oya li ya hepekwa ngaashi ye, olundji kaakwanepangelo mboka ya pewa uuyelele wa puka. Ihe mo 56 E.N. lwaampono, omuyapostoli Paulus okwa li a nyolele Aakriste muRoma e te ya ladhipike ya “vulike kaapangeli [yopapolitika] mboka haye [ya] pangele. Oshoka epangelo alihe olyomuKalunga.” Jehova haye a tota po omapangelo, ihe okwe etha ga kale po sigo Uukwaniilwa we tau tameke okupangela ombanda yevi ayihe owo awike. Paulus okwa gandja she eleka omayele kAakriste ya simaneke aakwanepangelo noya fute iifendela.—Aaroma 13:1-7; Titus 3:1, 2.
8. (a) Osigo opondondo yini Aakriste ye na okuvulika kaapangeli? (b) Aakriste yonale oya landula ngiini oshiholelwa shaJesus?
8 Ihe okuvulika kaapangeli yopapolitika kaku na okukala mukehe shimwe, ihe oku na okukala kwa ngambekwa. Uuna oompango dhaantu tadhi ipumu mumwe noompango dhaJehova, mboka taya longele Jehova oye na okuvulika koompango Dhe. Ndhindhilika shoka embo On the Road to Civilization—A World History tali popi kombinga yAakriste yonale tali ti: “Aakriste oya li ya tindi okukutha ombinga miilonga yontumba yuukwashigwana waRoma. Aakriste . . . oya li yu uvite kutya otashi yono eitaalo lyawo ngele taya longo iilonga yuukwiita. Kaya li ya longo iilonga yopapolitika. Kaya li haya galikana omukesari.” Sho ompangu yopombanda yOshijuda yi “indike shili” aalongwa kaayu uvithe we, oya yamukula taya ti: “Okuvulika kuKalunga ku vule okuvulika kaantu.”—Iilonga 5:27-29.
9. (a) Omolwashike Aakriste muJerusalem ya katuka onkatu mo 66 E.N.? (b) Okomukalo guni shoka shi li oshiholelwa oshiwanawa?
9 Aalongwa oya kala kaaye na nando ombinga moontamanana dhopapolitika nodhuukwiita. Mo 66 E.N., Aajuda muJudea oya li ya ningile Omukesari oshipotha. Etangakwiita lyaRoma olya li lya kondeke nziya Jerusalem. Aakriste mboka ya li moshilando oya ningi ngiini? Oya dhimbulukwa omayele gaJesus ya ze mo moshilando. Sho Aaroma ya shuna uule wokathimbo, Aakriste oya yi ontuku handiyaka yomulonga Jordan koshitopolwa shoondundu shaPella. (Lukas 21:20-24) Okwaanombinga kwawo okwa li oshiholelwa kAakriste aadhiginini mboka ya ka landula ko.
Aakriste yaa na ombinga ye li momasiku ngaka gahugunina
10. (a) Oonzapo dhaJehova odhi ipyakidhila niilonga yini, nomolwashike? (b) Odhi li kaadhi na ombinga mushike?
10 Mbela ondjokonona otayi ulike kutya momasiku ngaka gahugunina opu na ongundu yontumba ndjoka ya kala kaayi na nando ombinga tayi holele Aakriste yonale? Eeno, Oonzapo dhaJehova osho hadhi ningi. Ethimbo alihe ndyono odha tsikile okuuvitha kutya Uukwaniilwa waKalunga owo awike tau etele mboka ye hole uuyuuki ombili, ehepuluko nelago tali kalelele. (Mateus 24:14, KB) Ihe odha kala kaadhi na nando ombinga moontamanana dhomokati kiigwana.
11. (a) Okwaanombinga kwOonzapo okwa yooloka ko ngiini kwaashoka hashi ningwa kaawiliki yopambepo? (b) Oonzapo dhaJehova ohadhi tala ko ngiini shoka yalwe taya ningi shi na ko nasha noopolitika?
11 Mekondjithathano enene naashoka, aawiliki yopambepo yomalongelokalunga guuyuni mbuka oye na unene ombinga miinima yopapolitika. Miilongo yimwe, oya ningi iikonga iinene tayi popile nenge tayi pataneke aahogololwa yopapolitika. Aawiliki yamwe yopambepo oya taamba ko nokuli iilonga yopapolitika. Yalwe oya thininike aanapolitika ya ambidhidhe ooprograma ndhoka aawiliki yopambepo ye hole. Ihe Oonzapo dhaJehova ihadhi idhopo mopolitika. Noihadhi indike yalwe ngele ya hala ya kale ye na ombinga mongundu yopolitika, ya hogololwe ya kale iilyo yongundu yopolitika, nenge okuhogolola momahogololo. Jesus okwa ti kutya aalongwa ye itaya ka kala oshitopolwa shuuyuni, onkee ano Oonzapo dhaJehova ihadhi kutha ombinga moopolitika.
12. Oshizemo oshike sho omalongelokalunga guuyuni mbuka ga kutha ombinga miinima yopapolitika?
12 Ngaashi Jesus a hunganeke, iigwana ohayi lu olundji iita. Nokuli nuumpagangundu wiigwana owa kondjithathana. (Mateus 24:3, 6, 7) Aawiliki yomalongelokalunga konyala oya kala aluhe haya yambidhidha oshigwana shimwe nenge okampagangundu taka kondjitha kalwe, nokuladhipika aalanduli yawo ya ninge sha faathana. Oshizemo oshini? Iilyo yelongelokalunga limwe alike ohayi dhipagathana momalugodhi molwashoka owala ya yoolokathana muukwashigwana nenge momuhoko. Shoka otashi kondjithathana nehalo lyaKalunga.—1 Johannes 3:10-12; 4:8, 20.
13. Omaunzapo otagu ulike shike kombinga yokwaanombinga kwOonzapo dhaJehova?
13 Ihe Oonzapo dhaJehova odha kala kaadhi na nando ombinga momaipumomumwe agehe. Oshungonangelo (mOshiingilisa) ye 1 Novomba 1939, oya ti: “Ayehe mboka ya gama kombinga yOmuwa otaya ka kala kaaye na ombinga miita yiigwana.” Oonzapo dhaJehova miigwana ayihe nomoonkalo adhihe otadhi tsikile okudhiginina etaloko ndika. Ihadhi etha omatopauko guuyuni gopapolitika nosho wo iita yi teye po uumwayinathana wadho wopaigwana. Ohadhi ‘hambulula omagongamwele gadho omatemo nomagonga gadho iimwetho.’ Molwashoka kadhi na ombinga, ihadhi ilongo we iita.—Jesaja 2:3, 4; 2 Aakorinto 10:3, 4.
14. Oshike sha ningilwa Oonzapo dhaJehova molwashoka dha kala dha yooloka ko kuuyuni?
14 Oshizemo shimwe shokukala kwadho kaadhi na ombinga oshini? Jesus okwa ti: “Oshoka mwaa shi yomuuyuni, . . . uuyuni tau mú tondo.” (Johannes 15:19) Oyendji yomOonzapo dhaJehova oya li ya tulwa mondholongo molwashoka ye li aapiya yaKalunga. Dhimwe odha hepekwa, nokuli dha dhipagwa, sha faathana naashoka sha li sha ningilwa Aakriste yomethelemumvo lyotango. Shoka osha ningwa molwashoka Satana, ‘kalunga kuuyuni mbuka,’ ota kondjitha aapiya yaJehova mboka kaaye shi oshitopolwa shawo.—2 Aakorinto 4:4; Ehololo 12:12.
15. (a) Iigwana ayihe otayi katuka yu uka peni? (b) Omolwashike okuyooloka ko kuuyuni ku li oshinima sha kwata miiti?
15 Aapiya yaJehova oya nyanyukwa sho kaaye shi oshitopolwa shuuyuni, oshoka iigwana yamo ayihe otayi katuka yu uka kehulilo lyayo puHarmagedon. (Daniel 2:44; Ehololo 16:14, 16; 19:11-21) Itatu ka adhika koshiponga shoka molwashoka otwa yooloka ko kuuyuni. Tu li oshigwana sha hangana kombanda yevi alihe, otu li aadhiginini kUukwaniilwa waKalunga womegulu. Dhoshili, molwashoka katu shi oshitopolwa shuuyuni, ohatu shekwa nokuhepekwa kuwo. Ihe shoka masiku otashi ka hula po, molwashoka uuyuni mbuka wongashingeyi uuwinayi u li kohi yepangelo lyaSatana otau ka hanagulwa po sigo aluhe. Mepingathano naashoka, mboka taya longele Jehova otaya ka kala nomwenyo sigo aluhe muuyuni we uupe wuuyuuki kohi yUukwaniilwa waKalunga.—2 Petrus 3:10-13; 1 Johannes 2:15-17.
Oonkundathana dhokweendulula
• Jesus oku ulike ngiini shoka okukala kuu shi ‘gwomuuyuni’ taku ti?
• Aakriste yonale oya li ya tala ko ngiini (a) ombepo yuuyuni, (b) aapangeli nosho wo (c) okufuta iifendela?
• Omomikalo dhini Oonzapo dhaJehova dhopethimbo lyetu dha gandja uunzapo wokwaanombinga kwadho kwopaKriste?
[Ethano pepandja 165]
Jesus okwa yelitha kutya ye naalanduli ye ‘kaya li yomuuyuni’