Ekelahi elongelokalunga lyiifundja; kutha ombinga melongelokalunga lyashili

1. Shi na ko nasha nelongelokalunga, aantu oya taalelwa kehogololo lini nena?

JESUS okwa ti: “Oongoka kee li pamwe nangame, oye e na ondumbo nangame.” (Mateus 12:30) Otashi vulika tu li kombinga yaJehova nenge kombinga yaSatana. Aantu oyendji otaya dhiladhila kutya otaya longele Kalunga momukalo ngoka a hokwa, ihe Ombimbeli otayi ti kutya Satana ota “hongolola evi alihe.” (Ehololo 12:9) Aantu omamiliyona oyi itaala kutya otaya longele Kalunga, ihe muushili wo wene otaya longele Satana Ondiaboli. Aantu nena oya taalelwa kehogololo ndika: Oye na okulongela Jehova, “Kalunga koshili,” nenge Satana, ‘he yiifundja.’—Epsalmi 31:5, NW; Johannes 8:44.

Manguluka ko kelongelokalunga lyiifundja

2. Omukalo gumwe oguni mono Satana ta kambadhala okukeelela aantu kaaya longele Jehova?

² Okuninga etokolo okulongela Jehova oko ehogololo lyopandunge, ehogololo ndyoka tali eta okuhokiwa kuYe. Ihe Satana ina nyanyukilwa shaa ngoka ta longele Kalunga; ohe etele omaupyakadhi mboka taye mu longele. Omukalo gumwe moka he shi ningi ogwo okweeta omasheko nenge omapataneko okuza kuyalwe, nokuli okuza kookuume nokiilyo yuukwanegumbo. Jesus okwa londodha ta ti: “Naanegumbo lyomuntu mwene otaa ningi aatondi ye.”—Mateus 10:36.

3. Ngele uukwanegumbo waandjeni nenge ookuume koye taya pataneke okulongela Kalunga kwoye, oto ka ninga shike?

³ Ngele shika tashi ku ningilwa, mbela oto ki inyenga ngiini? Aantu oyendji oye shi kutya omukalo gwawo gwokulongela Kalunga ogwa puka, ihe ohaya kala taya kakadhala okumanguluka ko kugwo. Otaya dhiladhila kutya oku shi ninga otashi ka kala okwaanuudhiginini komaukwanegumbo gaandjawo. Mbela shika oshi li tuu pandunge? Ngele ou shi kutya iilyo yuukwanegumbo otayi longitha iingangamithi ya nika oshiponga, mbela ito ke yi londodha kutya iingangamithi mbyono otayi ke yi etela oshiponga? Ito ka longitha nando pamwe nayo iingangamithi mbyoka, hasho mbela?

4. Josua okwa ti shike kombinga yAaisrael shi na ko nasha nelongelokalunga pethimbo lye?

⁴ Josua okwa ladhipikile Aaisrael ye ethe omikalo dhomalongelokalunga ga puka nosho wo omithigululwakalo dhooyinakulululwa. Okwa ti: “Ngashingeyi kaleni nokutila Omuwa, ne mu mu longele, mwa kala mu na uuyuuki noshili, ne mu kokololii po iimenka yookuku yeni, ye yi simanekele [handiyaka] yomulonga nomuEgipiti, ne mu longele Omuwa.” (Josua 24:14) Josua okwa li omudhiginini kuKalunga, Jehova nokwe mu laleke nuuyamba. Ngele otu li aadhiginini kuJehova, ote ke tu laleka wo nuuyamba.—2 Samuel 22:26.

Ekelahi iinima mbyoka hayi longithwa momalongelokalunga giifundja

5. Omolwashike tu na okweekelahi iinima yuumpulile?

⁵ Okumanguluka ko komalongelokalunga giifundja otaku ti wo otu na okuhanagula po oshinima kehe shuumpulile shoka tashi vulika tu na, ngaashi iiketi nosho wo iinima ya fa mpoka. Shika osha simana molwaashoka otashi ulike kutya otwi inekela muJehova thiluthilu.

6. Aakriste yonale oya ningi shike nomambo gawo ge na ko nasha nuumpulile?

⁶ Tala shoka Aakriste yamwe yonale ya li ya ningi sho ya tokola okukutha ombinga melongelokalunga lyashili. Ombimbeli otayi ti: “Noyendji yomwaamboka ya li haa simaneke uumpulile, oye eta ooraamata dhawo dhuunganga dha ndumbilwa ondumba noye dhi fike po montaneho yaantu.”—Iilonga 19:19.

7. Oshike tatu vulu okuninga ngele oompwidhuli tadhi tu hepeke?

⁷ Yamwe mboka ya li ya tameke okulongela Jehova, ihe nale oya li haya kutha ombinga shu ukilila muulodhi nenge muumpulile otashi vulika taya hepekwa koompwidhuli. Ngele shika tashi ku ningilwa, ithana Jehova mokule megalikano, to longitha edhina lye. Ote ku kwatha.—Omayeletumbulo 18:10; Jakob 4:7.

8. Aakriste ohaya tala ko ngiini iiyelekela nomathano ngoka taga longithwa momalongelokalunga giifundja?

⁸ Mboka ya hala okulongela Jehova kaye na okukala ye na iiyelekela nenge ethano kehe ndyoka li li oshitopolwa shomalongelokalunga giifundja. Aakriste yashili ohaye “ende olweendo lweitaalo, haanduka lwokumona.” (2 Aakorinto 5:7) Ohaya simaneke ompango yaKalunga ndjoka tayi keelele elongitho lyoludhi kehe lyomathano megalikano.—Eksodus 20:4, 5.

Endathana noshigwana shaJehova

9. Omayele geni Ombimbeli tayi gandja kombinga yokuninga omunandunge?

⁹ Ombimbeli otayi ti: “Endathana nomunandunge e to indungike omunandunge.” (Omayeletumbulo 13:20) Ngele otwa hala okukala aanandunge, otwa pumbwa okweenda nenge okweendathana nOonzapo dhaJehova. Dho odhi li aantu mboka taye ende mondjila ndjoka tayi fala komwenyo.—Mateus 7:14.

10. Ongiini Oonzapo dhaJehova tadhi vulu oku ku kwathela u longele Kalunga?

¹⁰ Oonzapo odhi na ko nasha shili naantu. Iilonga yadho oyo okukwathela mboka ye na omutima omwaanawa yu uve ko oshili yOmbimbeli ndjoka tayi fala komwenyo gwaaluhe. Otadhi vulu oku ku kwathela tadhi konakona Ombimbeli nangoye oshali. Otadhi ka yamukula omapulo goye noku ku ulukila nkene u na okutula miilonga ontseyo yOmbimbeli monkalamwenyo yoye.—Johannes 17:3.

11. Okugongala kwopaKriste otaku ke ku kwathela ngiini?

¹¹ Pokugongala kwadho, hoka haku ningilwa unene tuu pOshinyanga shUukwaniilwa, oto ki ilonga oshindji kombinga yomikalo dhaJehova. Ehalo lyoye u kale melongelokalunga lyashili otali ka kolekwa. Noto ka mona wo edheulo lyankene to vulu okukwathela yalwe yi ilonge oshili yOmbimbeli.—Aaheberi 10:24, 25.

12. Egalikano otali vulu ngiini oku ku kwathela u longele Kalunga?

¹² Sho to ilongo oshindji kombinga yehalo nelalakano lyaJehova, olupandu lwoye okupandula omikalo dhe dhopahole otalu ki indjipala. Ehalo lyoye lyokulonga shoka tashi mu nyanyudha nokuyanda shoka tashi mu yematitha otali ka koka wo. Dhimbulukwa kutya oto vulu okupopya naJehova megalikano u mu pule e ku kwathe u longe shoka shu uka nokuyanda shoka sha puka.—1 Aakorinto 6:9, 10; Aafilippi 4:6.

13. Ongiini to vulu okunyanyudha omutima gwaJehova?

¹³ Konima yethimbo, sho wa koka pambepo, nopwaa na omalimbililo oto ka mona kutya osha pumbiwa u ninge Onzapo yaJehova ye mu iyapulila noya ninginithwa. Mokuya mumwe nongundu yoshigwana shaJehova, oto ka nyanyudha omutima Gwe. (Omayeletumbulo 27:11) Oto ka kala mokati koshigwana shi uvite elago, shoka Kalunga a popya ta ti: “Ongame nda hala okukala muyo notandi ende mokati kawo, ongame tandi kala Kalunga kawo, oyo notaa ningi aantu yandje.”—2 Aakorinto 6:16.