Aagundjuka—Otamu ka longitha ngiini onkalamwenyo yeni?

ONDA hala okukala nonkalamwenyo ombwanawaelela.” Osho omukadhona gumwe omugundjuka gwoomvula omulongo nasha ta ti. Kapu na omalimbililo ngoye wo oyo wa hala. Ihe onkalamwenyo “ombwanawaelela” oto yi mono naanaa ngiini? Iikundaneki noomakula yoye, tashi vulika nokuli aalongi yoye, taya ti kutya oto yi mono mokwiilikolela iimaliwa oyindji nokukala u na eithanolongo lyontumba lya simana​—⁠sha hala okutya, we shi pondola!

Ihe Ombimbeli otayi londodha aagundjuka kutya okulalakanena omaliko okwa fa owala ‘okukwata ombepo.’ (Omuuvithi 4:⁠4) Etompelo limwe olyo kutya aagundjuka owala aashona haye shi pondola okwiilikolela uuyamba nokukala aanedhina. Mboka haye shi ningi olundji ohaya kala ya yemata unene. Omugundjuka gumwe Omubritania ngoka a li a lalakanene eithano lya simana lyelongo lyokoakademi ota ti: “Osha fa owala oshipakete kaashi na sha. Ngele to tala mo, kamu na sha.” Dhoshili, omathimbo gamwe iilonga otayi vulu okweeta uuyamba netumbalo. Ihe itayi vulu okumbilipaleka ‘ompumbwe yoye yopambepo.’ (Mateus 5:​3, New World Translation) Kakele kaashono, 1 Johannes 2:​17 ota londodha kutya ‘uuyuni otau hulu po.’ Nokuli nonando iinima mbino ou kale we shi pondola oku yi ilikolela muuyuni mbuno, otayi ka kala po owala ethimbo efupi.

Omuuvithi 12:⁠1 ota ladhipike ano aagundjuka ta ti: “Dhimbulukwa wo omushiti gwoye opomasiku guugundjuka woye.” Eeno, omukalo dhingi to vulu okulongitha onkalamwenyo yoye ogwo oku yi longitha mokulongela Jehova Kalunga. Ihe tango, ou na okukala wa gwana okukala miilonga yaKalunga. Ongiini mbela to vulu oku shi ninga? Noshike mbela onkalamwenyo yokulongela Kalunga ya kwatela mo?

Kala wa gwana okuninga Onzapo yaJehova

Tango, ou na okukokeka ehalo lyokulongela Kalunga​—⁠nehalo ndyoka ihali ya kulyo lyene, nokuli nonando aavali yoye oye li Aakriste. Ou na okukala u na ekwatathano lyopaumwene naJehova. Omukadhona gumwe gwoomvula omulongo nasha ota ti: “Okugalikana otaku ku kwatha u kale u na ekwatathano lyopaumwene naJehova.”​—⁠Epsalmi 62:⁠9; Jakob 4:⁠8.

Aaroma 12:⁠2 otaya tsu omuthindo onkatu yilwe ndjoka u na okukatuka. Otaya ti: “Mu konakone, ehalo lyaKalunga olini, naashoka oshiwanawa, sho opalelela nosha gwana.” Yimwe yomiinima mbyoka wa longwa mbela oya kala ye ku limbilika? Opo nduno landula ekumagidho lyOmbimbeli, e to ‘konakona’ ngele iinima mbyoka oyoshili! Konga mwene uuyelele. Lesha Ombimbeli niileshomwa ya kankamena kOmbimbeli. Nonando ongaaka, okwiilonga kombinga yaKalunga inaku kwatela mo owala okulongitha omadhiladhilo goye. Kutha ethimbo lyokutedhatedha kwaashono to lesha opo shi ningine momutima gwoye gwopathaneko. Shika otashi ki indjipaleka ohole yoye yokuhola Kalunga.​—⁠Epsalmi 1:​2, 3.

Opo nduno, kambadhala okutseyithila yalwe inaashi longekidhwa shoka to ilongo, tashi vulika kaanasikola ooyakweni. Okuuvitha egumbo negumbo oko onkatu ya landula ko. Otashi vulika omathimbo gamwe to tsakaneke omunasikola omukweni manga to uvitha, naashika otashi vulika shi ku mbandapaleke oshikando shotango. Ihe Ombimbeli otayi tu ladhipike twaa ‘se ohoni evaangeli.’ (Aaroma 1:​16) Oto uvitha etumwalaka lyomwenyo netegameno! Omolwashike u na oku li sa ohoni?

Ngele aavali yoye oyo Aakriste, otashi vulika ho yi nale nayo miilonga mbika. Ihe oho vulu ngaa mbela okuninga sha kaashi shi owala okuthikama pomweelo wa mwena nenge okugandja owala iifo nuufo uushona? Oho vulu mbela okupopya mwene nomunegumbo, to longitha Ombimbeli oku mu longa? Ngele hasho, opo nduno mona ekwatho lyontumba kaavali yoye nenge koshilyo shegongalo sha pyokoka. Shi ninga elalakano lyoye u kale wa gwana okukala omuuvithi gwonkundana ombwanawa inaa ninginithwa!

Konima yethimbo, oto ki inyengithwa okwiiyapulila Kalunga​—⁠to mu uvanekele kutya oto ke mu longela okuza mpono nokuuka komeho. (Aaroma 12:⁠1) Ihe eiyapulo kali shi owala oshinima shopaumwene. Kalunga ota pula ayehe ya ‘hempulule nokana opo ya hupithwe.’ (Aaroma 10:​10) Pethimbo lyeninginitho, tango oho hempulula nokana eitaalo lyoye. Eninginitho momeya ohali landula ko. (Mateus 28:​19, 20, yelekanitha NW.) Dhoshili, eninginitho olyo onkatu ya kwata miiti. Ihe ino li kaleka molwashoka to dhiladhila kutya ito ke shi pondola. Ngele owi ikolelela muKalunga e ku pe oonkondo, ote ku pe “oonkondo dhi vule ndhoka dhopaunshitwe” dhi ku kwathele u kale wa thikama wa kola.​—⁠2 Aakorinto 4:⁠7, NW; 1 Petrus 5:⁠10.

Pethimbo lyokuninginithwa, ngoye oto ningi gumwe gwomOonzapo dhaJehova. (Jesaja 43:​10, Ombimbeli yOshikwanyama) Shika oshi na okunwetha mo noonkondo nkene to ka longitha onkalamwenyo yoye. Eiyapulo olya kwatela mo ‘okwiidhimbwa mwene.’ (Mateus 16:​24, Ombimbeli yOshindonga yomo 1986) Otashi vulika to ke ekelahi omalalakano nomahalo gamwe gopaumwene e to ‘kongo tango uukwaniilwa waKalunga.’ (Mateus 6:​33, KB) Onkee ano eiyapulo neninginitho otayi egulula oompito odhindji dhoku shi ninga. Natu taleni dhimwe dhomudho.

● Uukokolindjila owo ompito yimwe ya tya ngaaka. Omuuvithi omukokolindjila oye Omukriste a ninginithwa e shi okuholelwa ngoka a ninga elongekidho okulonga oowili 70 omwedhi kehe mokuuvitha onkundana ombwanawa. Okulongitha ethimbo olindji momapya otaku ke ku kwatha u kokeke uunkulungu woye wokuuvitha nokulonga aantu. Aakokolindjila oyendji oya mona enyanyu mokukwathela aakonakonimbimbeli yawo ya ninge Oonzapo dha ninginithwa. Iilonga mbela yini yokwiikongela omboloto tayi vulu okukala yituntula noyinyanyudha ngaashi mbika?

Opo ya fute iifutwa yawo yonkalamwenyo, aakokolindjila oyendji oye na iilonga yokwiikongela omboloto yetatasiku. Oyendji ohaya ningi elongekidho manga kuyele omolwoshinakugwanithwa shika yi ilonge oshilonga shokomake shontumba mosikola nenge kaavali yawo. Ngele ngoye naavali yoye otamu dhiladhila kutya otashi kala oshiwanawa kungoye u mone edheulo lyontumba lya gwedhwa po konima yokumana osekundosikola, shilipaleka kutya einyengotompelo lyoye kali shi okumona iimaliwa oyindji, ihe olyo okuyambidhidha uukalele woye nongele tashi vulika okulonga u li omukalele gwethimbo lyu udha.

Ihe oshinima sha simana monkalamwenyo yomukokolindjila kashi shi iilonga ye yokwiikongela omboloto, ihe osho uukalele we​—⁠okukwathela yalwe ya mone omwenyo gwaaluhe! Omolwashike mbela ito itulile po elalakano lyopaumwene u ninge omukokolindjila? Uukokolindjila olundji ohau fala momauthembahenda galwe. Pashiholelwa, aakokolindjila yamwe ohaya tembukile kiitopolwa hoka ku na ompumbwe onene yaauvithi yUukwaniilwa. Yalwe ohayi ilongo elaka ekwiiilongo nokulonga nokuli megongalo moka hamu popiwa elaka ekwiilongo nenge nokuli moshilongo shaahe shi shawo. Eeno, uukokolindjila owo onkalamwenyo yi na ondjambi!

●Iilonga yuutumwa oyo natango ompito yimwe ndjoka ye ku egulukila. Okuza mo 1943 Osikola yOmbimbeli yoWatchtower yaGilead oya li ya pe aakokolindjila ya pyokoka okersesa ya dhenga mbanda yoku ya dheulila iilonga yuutumwa. Oonakupita ohaya pewa oshinakugwanithwa ya longe ye li aauvithi yethimbo lyu udha miilongo kaayi shi yawo. Moyindji yomiilongo mbika, omu na oonkalo dhokukala oondhigu, onkee ano uukolele uuwanawa nosho wo okukala nomatha oya pumbiwa miilonga yuutumwa. Nonando ongaaka, aatumwa otaya nyanyukilwa onkalamwenyo yituntula noyinyanyudha.

●Osikola yOkudheula mUukalele oya totwa okudheula aakuluntugongalo naayakuligongalo ya pyokoka mboka inaaya hokana. Okersesa yokwakola yiiwike ihetatu ohayi longo iipalanyolo ngaashi mbyoka yi na ko nasha niinakugwanithwa yaakuluntugongalo naayakuligongalo, nokuunganeka nosho wo okupopya montaneho. Yamwe ohaya pewa ya longe miilongo yawo yene. Yalwe ohaya pulwa ya ka longe kiilongo kaayi shi yawo.

●Iilonga yaBetel oya kwatela mo okulonga u li omwiiyambi mushimwe shomiitayimbelewa yOonzapo dhaJehova. Iilyo yimwe yomuukwanegumbo waBetel ohayi longo shu ukilila mokunyanyangidha iileshomwa yOmbimbeli. Yalwe ohaya pewa iinakugwanithwa yokukwathela, ngaashi okukaleka po omatungo niilongitho nenge okusila oshimpwiyu oompumbwe dhopalutu dhuukwanegumbo waBetel. Iinakugwanithwa ayihe oyi li omauthembahenda omayapuki gokulongela Jehova. Kakele kaashono, mboka ye li moBetel oya nyanyukwa sho ye shi kutya shaashono taya longo, oshi na uuwanawa kaamwahe oyendji muuyuni auhe.

 Omathimbo gamwe aamwatate mboka ye na uunkulungu wi ikalekelwa ohaya hiywa ya ka longe koBetel. Ihe oyendji ohaya mono edheulo ngele ya yi mo. Mboka ye li moBetel ihaya longele omaliko ihe oya mbilipalelwa komasiloshimpwiyu ngoka ga ningwa shi na ko nasha niikulya, ehala lyokulala nokamaliwa okashona hono haya mono okufuta iipumbiwa yawo yopaumwene. Oshilyo shimwe oshigundjuka shuukwanegumbo waBetel otashi hokolola iilonga yasho momukalo nguka tashi ti: “Yo iiwanawa unene! Elandulathano lyamo kali shi epu, ihe onda mona omalaleko nuuyamba ogendji mokulonga muka.”

●Iilonga yopaigwana ohayi pe omuntu ompito a kuthe ombinga mokutunga iitayimbelewa nIinyanga yUukwaniilwa. Aakalele yopaigwana, ngaashi hayi ithanwa, ohaya yi kiilongo kaayi shi yawo oku ka kwathela miilonga yokutunga ya tya ngaaka. Mbika oyi li iilonga iiyapuki, ya fa iilonga yaamboka ya li ya tungu otempeli yaSalomo. (1 Aakwaniilwa 8:​13-18) Omalongekidho gokusila oshimpwiyu aakalele yopaigwana oga faathana naangoka giilyo yuukwanegumbo waBetel. Aamwatate naamwameme mbaka kaye na tuu uuthembahenda okulonga iilonga mbika yokuhambelela Jehova!

Longela Jehova nomutima aguhe

Okulongela Jehova oko omukalo dhingi gwokulongitha onkalamwenyo yoye. Omolwashike itoo dhiladhila okutula po elalakano lyopaumwene okulongela Kalunga ethimbo lyu udha? Kundathana iilonga yethimbo lyu udha naavali yoye, aakuluntugongalo yopune nosho wo omutonateli gwoshikandjo gweni. Ngele owu na ohokwe yokuya koBetel, kOsikola yOmbiimbeli yokudheula aamwatate inaaya hokana, nenge kOsikola yOmbiimbeli yokudheula aaihokani Aakriste, kala pokugongala kwaamboka ya hala okuninga omaindilo hoka haku kala piigongi yoshikandjo noyoshitopolwa.

Dhoshili, haayehe haya vulu okukala ya gwana nenge haya vulu okulonga ethimbo lyu udha. Omathimbo gamwe omaupyakadhi ge na ko nasha nuukolele, oonkalo dhopashimaliwa niinakugwanithwa yuukwanegumbo ohayi imbi omuntu kaa vule oku shi ninga. Nonando ongaaka, Aakriste ayehe yi igandja oye na okupulakena kelombwelo lyOmbimbeli tali ti: “Hola Omuwa Kalunga koye komwenyo gwoye aguhe nokomutima gwoye aguhe nokomadhiladhilo goye agehe.” (Mateus 22:​37) Jehova ota pula opo u ninge kehe shono to vulu ngaashi onkalo yoye tayi shi pitike. Onkee ano kutya nduno onkalo yoye oyi li ngiini, ninga okulongela Jehova oshinima sha simana unene monkalamwenyo yoye. Tula po omalalakano gopauteokratika ngoka taga vulu okwaadhika. Eeno, ‘dhimbulukwa omushiti gwoye opomasiku guugundjuka woye’​—⁠noto ka lalekwa nuuyamba sigo aluhe molwoku shi ninga!