Ontopolwa 3

Ngoka a shita iinima ayihe

ONDI shi oshinima shimwe oshiwanawa. Mbela owa hala oku shi uva?— Tala koshikaha shoye. Gonya ominwe dhoye. Ngashingeyi kutha sha. Iikaha yoye ohayi vulu okuninga oshindji nohayi shi ningi nawa. Mbela owa tseya kutya olye a shita iikaha yetu?—

Eeno, oye Ngoka a shita omakana getu, omayulu nosho wo omeho getu. OKalunga, He yOmulongi Omunene. Mbela inatu nyanyukwa sho Kalunga e tu shita tu na omeho?— Ohatu vulu okumona iinima oyindji nago. Ohatu vulu okutala oongala. Ohatu vulu okutala omwiidhi gwa ziza negulu embulawu. Ohashi vulika nokuli tu mone uudhilona wa sa ondjala ngaashi mboka wu li methano muka. Mbela kashi shi oshikumithi sho hatu vulu okumona iinima mbika?—

Ihe mbela olye a shita iinima mbika? Mbela oya shitwa komuntu gwontumba? Aawe. Omuntu oha vulu owala okutunga egumbo. Ihe kapu na omuntu ta vulu okukokeka omwiidhi. Aantu itaya vulu okushita okadhilona, oongala nenge iinima yilwe yi na omwenyo. Mbela owe shi tseya?—

Kalunga oye a shita iinima ayihe mbika. Okwa shita egulu nevi. Okwa shita wo aantu. Okwa shita omulumentu nomukiintu gwotango. Jesus, Omulongi Omunene, okwa li a longo aantu kutya Kalunga oye a shita omulumentu nomukiintu gwotango.—Mateus 19:4-6.

Mbela Jesus okwa tseya ngiini kutya Kalunga oye a shita omulumentu nomukiintu? Mbela Jesus okwa li a mono Kalunga sho te ya shiti?— Eeno, okwe mu mona. Jesus okwa li pamwe naKalunga sho ta shiti omulumentu nomukiintu. Jesus oye omuntu gwotango a shitwa kuKalunga. Jesus okwa li omuyengeli nokwa li a kala megulu pamwe naHe.

Ombiimbeli otayi tu lombwele kutya Kalunga okwa tile: “Natu shiteni aantu.” (Genesis 1:26) Mbela owa tseya kutya Kalunga okwa li ta popi nalye?— Okwa li ta popi nOmwana. Okwa li ta popi naangoka konima yethimbo a li e ya kombanda yevi nokwa li a tseyika nedhina Jesus.

Shika kashi tuntula tuu! Dhiladhila kwaashika. Uuna tatu pulakene kuJesus, otatu longwa kwaangoka a li pamwe naKalunga sho a shiti evi niinima ayihe mbyoka yi li ko. Jesus okwi ilonga oshindji mokulonga pamwe naHe megulu. Onkee ano, itashi kumitha sho e li Omulongi Omunene.

Mbela oto dhiladhila kutya Kalunga okwa li kee shi uvitile ombili sho a li oye awike manga inaa shita Omwana?— Aawe, hasho. Ngele okwa li e shi uvitile ombili, omolwashike ano a shiti iinima yilwe yi na omwenyo?— Shika okwe shi ningi molwaashoka oye Kalunga kohole. Okwa hala aantu ya kale nomwenyo noye gu nyanyukilwe. Otu na okupandula Kalunga sho e tu pa omwenyo.

Kehe shimwe shoka Kalunga a ninga otashi ulike ohole ye. Kalunga okwa shita etango. Etango ohali tu pe uuyelele nohali tu pe uupyu. Ando kapwa li etango, ando kombanda yevi okwa kala kwa talala niinima ayihe yi na omwenyo ando kayi ko. Mbela ino nyanyukwa sho Kalunga a shita etango?—

Kalunga oha lokitha wo omvula. Omathimbo gamwe otashi vulika wu kale inoo hala omvula yi loke molwaashoka ito vulu okuya wu ka dhane pondje. Ihe omvula ohayi kokeke oongala. Onkee ano, ngele tatu tala oongala oombwanawa, olye tu na okupandula?— OKalunga. Ngele tatu li iiyimati niikwamboga iitoye olye mbela tu na okupandula?— Otu na okupandula Kalunga molwaashoka etango lye nomvula oyo ya kokeka iinima.

Natu tye nduno gumwe ote ku pula ta ti: ‘Mbela Kalunga oye a shita aantu nosho wo iinamwenyo?’ Ando oto ka tya ngiini?— Oshi li mondjila okutya: “Eeno, oye e yi shita.” Ihe ongiini ngele gumwe ini itaala kutya Kalunga oye shili a shita aantu? Ongiini ngele ota ti kutya aantu oya za miinamwenyo? Ombiimbeli hasho tayi popi ngawo. Otayi ti kutya Kalunga oye a shita iinima ayihe yi na omwenyo.—Genesis 1:26-31.

Ihe gumwe otashi vulika e ku lombwele kutya ye ini itaala muKalunga. Oto ka tya ngiini?— Omolwashike itoo mu ulukile egumbo? Mu pula to ti: “Olye a tunga po egumbo ndyoka?” Kehe gumwe oku shi kutya opu na gumwe ngoka e li tunga po. Halyo lyene lyi itunga po.—Aahebeli 3:4.

Opo nduno mu fala moshikunino e to mu ulukile oongala. Mu pula to ti: “Olye e dhi shita?” Inadhi shitwa komuntu. Ngaashi naanaa egumbo inaali itunga po lyo lyene, osho wo noongala ndhika inadhi ishita dho dhene. Odhi na ngoka e dhi shita. Kalunga oye e dhi shita.

Omuntu ngoka mu pula a thikame a pulakene kewi lyokokadhila taka lili. Opo nduno mu pula to ti: “Olye a shita uudhila nolye e u longa okukala hawu lili?” OKalunga. Kalunga oye a shita egulu nevi nosho wo iinima ayihe yi na omwenyo. Oye a gandja omwenyo.

Ihe otashi vulika gumwe a tye kutya ohi itaale owala shoka ta vulu okumona. Otashi vulika a tye: ‘Ngele kandi shi wete, itandi vulu oku shi itaala.’ Osho molwaashono aantu yamwe haya ti kutya inayi itaala muKalunga molwashoka ihaye mu mono.

Oshoshili kutya Kalunga ihatu vulu oku mu mona. Ombiimbeli otayi ti: “Kaku na omuntu a mona Kalunga.” Kombanda yevi kaku na omulumentu, omukiintu nenge okanona ka mona Kalunga. Onkee ano, katu na okukambadhala okwiiningila ethano lyaKalunga. Kalunga okwe tu lombwela kutya katu na okwiiningila iiyelekelakalunga. Ano itashi ka nyanyudha Kalunga ngele tatu kala tu na iinima ya tya ngaaka momagumbo getu.—Eksodus 20:4,5; 33:20; Johannes 1:18.

Ihe ngele Kalunga ihatu vulu oku mu mona, ongiini tatu tseya kutya oko e li shili? Dhiladhila kwaashika tashi landula. Mbela ombepo otatu vulu oku yi mona?— Aawe. Kapu na ngoka ta vulu okumona ombepo. Ihe otatu vulu okumona sho tayi inyengitha iinima. Otatu vulu okumona omafo tagi inyenge sho ombepo tayi pepe iitayi yomuti. Kungawo otwi itaala kutya ombepo oko yili.

Otatu vulu wo okumona iinima mbyoka Kalunga a shita, ngaashi oongala dha temuna nenge uudhila. Kungawo otwi itaala kutya Kalunga oko e li shili.

Otashi vulika gumwe e ku pule ta ti: ‘Olye a shita etango nevi?’ Ombiimbeli otayi ti: “Kalunga okwa shiti egulu nevi.” (Genesis 1:1) Eeno, Kalunga oye a shita iinima ayihe mbika iiwanawa. Owu uvite ngiini kwaashino?—

Mbela kashi shi tuu oshinima oshikumithi sho tu na omwenyo? Ohatu vulu okuuva omawi omawanawa guudhila ngele tawu lili. Ohatu vulu okumona oongala niinima yilwe mbyoka Kalunga a shita. Ohatu vulu wo okulya iikulya mbyoka Kalunga e tupa.

Otu na okupandula Kalunga molwiinima ayihe mbika. Otu na oku mu pandula unene tuu sho e tu pa omwenyo. Ngele otwa pandula lela Kalunga, otu na okuninga po sha. Otu na okuninga shike?— Otu na okupulakena kuye nokuninga shoka te tu lombwele mOmbiimbeli. Komukalo nguka otatu ulike kutya otu hole Ngoka a shita iinima ayihe.

Otu na okuulika olupandu kuKalunga molwaayihe mbyoka e tu ningila. Ngiini? Lesha shoka sha nyolwa mEpisalomi 139:14; Johannes 4:23, 24; 1 Johannes 5:21 nosho wo Ehololo 4:11.

[Ethano pepandja 21]

Olye a shita iinima ayihe yi na omwenyo?

[Omathano pepandja 22]

Molwaashoka egumbo olya tungwa po komuntu, olye a shita oongala, omiti nosho wo iinamwenyo?

[Ethano pepandja 25]

Oho shi mono ngiini kutya oku na ombepo?