Ontopolwa 12

Jesus okwe tu longa nkene tu na okugalikana

MBELA oho popi ngaa naJehova Kalunga?— Okwa hala wu kale ho popi naye. Uuna to popi naye, shika ohashi ithanwa egalikano. Jesus okwa li aluhe ha popi naHe gwomegulu. Omathimbo gamwe okwa li ha kala a hala okwiikalela uuna ta popi naKalunga. Ombiimbeli otayi popi kutya “okwa li a londo kondundu oye awike, opo a galikane. Oye okwa kala ko awike sigo ongulohi.”—Mateus 14:23.

Openi to vulu okuya opo wu ka galikane kuJehova wu li ongoye awike?— Oto vulu okwiikalela opo wu popye naJehova kongulohi manga inoo ka lala. Jesus okwa ti: “Ngele to galikana, inda mondunda yoye, edhila po osheelo, u galikane Ho.” (Mateus 6:6) Mbela oho galikana ngaa kuJehova kongulohi kehe manga inoo ka lala?— Owu na okukala ho shi ningi.

Jesus naye okwa li a galikana nuuna a li pamwe naantu. Sho kuume ke Lasarus a si, Jesus okwa galikana pamwe nayalwe pombila yaLasarus. (Johannes 11:41, 42) Jesus okwa li wo ha galikana uuna a gongala pamwe naalongwa ye. Mbela oho yi kokugongala hoka haku galikanwa?— Hoka olundji omukuluntu oye ha galikana. Pulakena nawa kwaashoka ta popi molwaashoka ota galikana kuKalunga nopehala lyoye. Opo nduno oto ka vula okutya “Amen” kehulilo lyegalikano. Mbela owu shi kutya otashi ti shike okutya “Amen” kehulilo lyegalikano?— Otashi ti kutya owa hokwa egalikano ndoka. Otashi ti wo kutya owa tsa kumwe nalyo.

Jesus okwa li wo ha galikana pokulya. Okwa li ha pandula Jehova omolwiikulya. Mbela oho galikana ngaa aluhe manga inoo lya?— Oshi li mondjila tu kale hatu pandula Jehova omolwiikulya manga inaatu lya. Ngele to li pamwe nayalwe otashi vulika gumwe oye a galikane manga inaamu lya. Mbela ongiini ngele to li ongoye awike? Nenge ongiini ngele to li pamwe naamboka ihaaya pandula Jehova?— Owa pumbwa okugalikana paumwene.

Mbela owu na aluhe okugalikana mokule? Nenge mbela Jehova ote ku uvu ngaa ngele to galikana momwenyo?— Otatu vulu okumona eyamukulo kwaashoka sha li sha ningilwa Nehemia. Nehemia okwa li omulongeli gwaJehova ngoka a li ha longo mombala yomukwaniilwa gwaPersia, Artakserkses. Esiku limwe Nehemia okwa li a sa oluhodhi noonkondo molwaashoka okwa li u uvu kutya omadhingilokuma gaJerusalem, oshilando shawo oshinene, osha kumunwapo.

Sho omukwaniilwa a pula Nehemia kutya omolwashike a sa oluhodhi, Nehemia tango okwa galikana kuJehova momwenyo. Opo nduno Nehemia okwa lombwele omukwaniilwa kutya omolwashike a sa oluhodhi e te mu pula ngele ota vulu okuya kuJerusalem a ka tungulule omadhingilokuma. Oshike sha ningwa po?—

Eeno, Kalunga okwa yamukula egalikano lyaNehemia. Omukwaniilwa okwe mu lombwele kutya ota vulu okuya. Omukwaniilwa okwa li nokuli a pe Nehemia omiti odhindji dhokutunga omadhingilokuma. Onkee ano, Kalunga ota vulu shili okuyamukula omagalikano getu, nonando otatu galikana momwenyo.—Nehemia 1:2,3; 2:4-8.

Ngashingeyi dhiladhila kwaashika. Mbela owu na okunyongama ngele to galikana? Mbela owu na okutsa oongolo? Mbela oto dhiladhila ngiini?— Pomathimbo gamwe Jesus okwa li a galikana a tsa oongolo. Omathimbo gamwe okwa li e shi ningi a thikama. Omathimbo gamwe okwa li ha ligamene kegulu ngele ta galikana, ngaashi a li a ningi sho a li a galikana omolwaLasarus.

Shika otashi ulike shike?— Eeno, otashi ulike kutya momukalo moka omuntu e li ngele ta galikana hagwo gwa simana. Ethimbo limwe osha simana wu nyongame e to thithikile. Omathimbo gamwe otashi vulika wu tse oongolo ngaashi Jesus a li a ningi. Ihe dhimbulukwa kutya otatu vulu okugalikana kuKalunga pethimbo kehe note ke tu uva. Oshinima sha simana kombinga yegalikano osho kutya otu na okukala twi itaala lela kutya Jehova ota pulakene komagalikano getu. Mbela owi itaala kutya Jehova oha pulakene komagalikano getu?—

Otu na okupopya shike uuna tatu galikana kuJehova?— Lombwela ndje kutya oho popi shike naKalunga ngele to galikana?— Jehova ohe tu pe iinima oyindji iiwanawa noshi li mondjila tu kale hatu mu pandula, hasho mbela?— Otatu vulu oku mu pandula omolwiikulya mbyoka hatu li. Ihe mbela owe mu pandula ngaa nale omolwegulu embulawu, omiti dha ziza noongala oombwanawa?— Oye wo a shita iinima mbyoka.

Aalongwa yaJesus esiku limwe oya li ye mu pula e ya longe okugalikana. Onkee ano, Omulongi Omunene okwe shi ningi, nokwe yu ulukile iinima ya simana mbyoka ye na okugalikana kombinga yayo. Mbela owu shi kutya iinima mbika oyini?— Kutha Ombiimbeli yoye e to pandja muMateus ontopolwa 6. Movelise 9 sigo 13 otatu adha mo shoka aantu oyendji hayi ithana Tate Yetu nenge Egalikano lyOmuwa. Natu li leshe pamwe.

Mpaka otatu ilongo po kutya Jesus okwe tu lombwela tu galikane kombinga yedhina lyaKalunga. Okwa ti kutya natu galikane edhina lyaKalunga li yapulwe. Edhina lyaKalunga olye?— Eeno, olyo Jehova notu na okukala tu hole edhina ndyoka?

Oshitiyali, Jesus okwe tu longa tu galikane Uukwaniilwa waKalunga wu ye. Uukwaniilwa mbuka owa simana molwaashoka otawu ka e ta ombili kombanda yevi notawu ke li ninga oparadisa.

Oshititatu, Omulongi Omunene okwa ti kutya otu na okugalikana ehalo lyaKalunga li gwanithwe kombanda yevi ngaashi megulu. Ngele ohatu galikana ehalo lyaKalunga li gwanithwe, otwa pumbwa okuninga shoka te tu lombwele tu ninge.

Jesus okwe tu longa wo kutya otu na okugalikana tu pewe iikulya yesiku kehe. Okwa ti wo kutya otu na okukala hatu gandja ombili uuna twa ningi sha shapuka. Otu na okukala hatu pula Kalunga e tu dhimine po. Ihe manga inee shi ninga otu na okudhimina po yalwe ngele oye tu ningile sha oshiwinayi. Mbela shoka ohashi kala oshipu kungoye?—

Hugunina, Jesus okwa li a popi kutya otu na okugalikana Jehova Kalunga e tu gamene komwiinayi, Satana Ondiaboli. Ayihe mbika iinima iiwanawa mbyoka tatu vulu okulombwela Kalunga megalikano.

Otu na okukala twi itaala kutya Kalunga oha pulakene komagalikano getu. Kakele koku mu pula e tu kwathele, otu na okukala hatu mu pandula. Oha kala a nyanyukwa ngele tatu kala metsokumwe naashoka hatu galikana nongele tatu pula shoka shu uka. Kungawo, ota ka yamukula omagalikano getu. Mbela owe shi itaala?—

Omayele ogendji omawanawa kombinga yegalikano otaga adhika mAaroma 12:12; 1 Petrus 3:12 nosho wo 1 Johannes 5:14.

[Omathano pepandja 67]

Jesus okwa li ha galikana uuna e li oye awike nuuna a li nayalwe

[Ethano pepandja 68]

Omolwashike wu na okukala ho pulakene nawa ngele taku galikanwa pokugongala?

[Omathano pepandja 69]

Opoompito dhini to vulu okugalikana momwenyo ngaashi Nehemia a li a ningi?

[Ethano pepandja 70]

Oshike to vulu okulombwela Kalunga megalikano?