Ontopolwa 14

Omolwashike tu na okukala hatu dhimine po yalwe?

MBELA owa ningilwa sha nale kugumwe sha puka?— Okwa li e ku ehameka mbela nenge okwa li e ku ula nayi?— Mbela nangoye oto ku ungaunga naye momukalo ngono a li u ungaunga nangoye?—

Aantu oyendji ngele ye ehamekwa kugumwe, ohaya kambadhala oku mu shunithila uuwinayi. Ihe Jesus okwe tu longa kutya otu na okudhimina po mboka ya yono kutse. (Mateus 6:12) Mbela ongiini ngele gumwe okwe tu ningi nayi olundji? Olungapi tu na oku mu dhimina po?—

Shono osho Petrus a li a hala okutseya. Onkee ano, esiku limwe okwa li a pula Jesus a ti: “Olungapi ndi na okudhimina po mukwetu a yono kungame”? Inashi gwana owala okudhimina po yalwe lwiikando iheyali. Jesus okwe mu yamukula a ti kutya ngele omuntu gwontumba okwa yono kungoye olundji owu na oku mu dhimina po “lwomilongo heyali luheyali.”

Mbyoka iikando oyindji. Nokuli itatu ka dhimbulukwa uuwinayi mboka e tu ningila, otatu ke shi ninga mbela? Shika osho Jesus te tu lombwele. Katu na okukambadhala tu kale hatu dhimbulukwa uuwinayi mboka yalwe ye tu ningila. Ngele oye tu pula tu ya dhimine po, otu na oku ya dhiminapo.

Jesus okwa li a hala okuulukila aalongwa ye kutya osha simana okudhimina po yalwe. Konima sho Jesus a yamukula epulo lyaPetrus, okwa hokololele aalongwa ye ehokololo. Mbela owa hala oku li uva?—

Nalenale okwa li ku na omukwaniilwa omwaanawa noku na ohenda. Ngele aapiya ye ya pumbwa ekwatho, oya li nokuli haya yi ya ka lye oongunga dhiimaliwa kuye. Ihe esiku limwe omukwaniilwa okwa li a hala aapiya ayehe mbono ye na oongunga dhe ye dhi fute. Okwa li e etelwa omupiya gumwe ngoka a li e mu lila oongunga dhiimaliwa oomiliyona 60, mbyoka ya li iimaliwa oyindji.

Ihe omupiya okwa li a longitha po iimaliwa ayihe yomukwaniilwa nokali ta vulu oku yi futa. Onkee ano, omukwaniilwa okwa gandja elombwelo opo omupiya gwe ngoka a landithwe po. Omukwaniilwa okwa popi wo kutya omukulukadhi gwomupiya ngoka naanona ye nosho wo iinima yawo ayihe mbyoka ye na, nayi landithwe po. Opo iimaliwa mbyoka tayi zi mokulandithwa po kwawo nosho wo kwiinima, yi futile po iimaliwa yomukwaniilwa. Mbela oto dhiladhila kutya omupiya nguno okwa li e uvite ngiini?—

Omupiya okwa tsu oongolo koshipala shomukwaniilwa nokwe mu indile ta ti: ‘Tala ndje onteni, otandi ku futile oongunga adhihe ndhono nde ku lila.’ Ando ongoye wa li omukwaniilwa, mbela ando omupiya owe mu ningile shike?— Omukwaniilwa okwe etele ohenda omupiya gwe. Onkee ano, okwe mu dhimine po. Omukwaniilwa okwa lombwele omupiya gwe kutya ina galula we iimaliwa yoomiliyona 60 mbyoka a lya oongunga kuye. Omupiya ka li tuu a nyanyukwa!

Mbela omupiya nguka okwa li a ningi po shike? Okwa yi pondje nokwa a dha po omupiya omukwawo, ngoka a li e na oongunga dhe dhiimaliwa ethele limwe owala. Okwa kwata omupiya omukwawo pothingo nokwa tameke oku mu ponda ta ti: “Futa oongunga dhandje!” Dhiladhila owala komuntu ngoka opo a li a dhiminwa po oongunga dhe odhindji komukwaniilwa, ihe ota ningi mukwawo ngaaka!—

Omupiya nguka a li e na owala oongunga dhethele limwe okwa li a hepa noka li ta vulu oku dhi futa pethimbo opo tuu mpoka. Onkee ano, okwa tsu oongolo poompadhi dhe nokwe mu hehela a ti: “Tala ndje onteni, otandi ku futile.” Mbela omulumentu nguno ka li e na oku pa omupiya omukwawo ethimbo?— Ando ongoye, ando owa ningi po shike?—

Omulumentu nguno ka li a sile omupiya omukwawo ohenda ngaashi omukwaniilwa a li e mu sile ohenda. Okwa li a hala owala a pewe iimaliwa ye pethimbo mpoka. Molwaashoka omupiya omukwawo ka li ta vulu okufuta oongunga dhe, okwe mu tulitha mondholongo. Aapiya ooyakwawo oya mono ashihe shoka sha ningwa po nokaya li ye shi panda. Oya li yu uvitile ohenda omupiya ngono a li mondholongo. Onkee ano, oya yi ya ka hokololele omukwaniilwa gwawo ayihe mbyoka ya ningwapo.

Omukwaniilwa ka li a hokwa shoka sha ningwa po. Okwa li a geyela noonkondo omupiya ngono inaa dhimina po mukwawo. Okwe mu ithana e ta ti: ‘Mumati ngoye omwiinayi, oongunga dhoye inandi dhi ku dhimina po sho wa hehela ndje? Onkee ano, mbela nangoye kawa li wu na okudhimina po omupiya omukweni?’

Omupiya ngono inaa dhimina po omupiya omukwawo okwa li e na okwiilonga oshiilongomwa komukwaniilwa omwaanawa. Ihe ine shi ninga. Onkee ano, omukwaniilwa okwe mu tulitha mondholongo a kale mo sigo a futu iimaliwa mbyoka yoomiliyona 60. Dhoshili, sho e li mondholongo ka li nando ta vulu okumona oshimaliwa opo a shunithe iimaliwa yomukwaniilwa. Onkee ano, okwa li e na okukala moka sigo tasi.

Sho Jesus a mana okuhokololela aalanduli ye ehokololo ndika, okwe ya lombwele a ti: “Tate yomegulu osho te mu ningile wo, ngele itamu dhimine po omuntu kehe nomwenyo aguhe.”—Mateus 18:21-35.

Atuheni otu na oongunga odhindji kuKalunga. Dhoshili, Kalunga oye e tu pa omwenyo. Onkee ano, oongunga ndhoka tu na kuKalunga odhindji dhi vulithe ndhoka yalwe ye tu lila. Shoka ye tu lila otashi yelekwa niimaliwa mbyono yethele limwe mbyono ya li ya lilwa omupiya ngwiya kumukwawo. Ihe oongunga ndhono tu na kuKalunga omolwomapuko ngono hatu ningi, otadhi yelekwa niimaliwa oomiliyona 60 mbyono omupiya a li a lya oongunga komukwaniilwa.

Kalunga ohe tu sile ohenda. Nonando ohatu ningi iinima oyindji ya puka, ohe tu dhimine po. Ihe tu galulile uuwinayi moku tu dhipaga. Ihe oshiilongomwa shoka tu na okudhimbulukwa osho: Kalunga ohe tu dhimine po owala ngele hatu dhimine po mbono haya yono kutse. Shika osho oshiilongomwa sha simana shoka tu na okukala hatu dhiladhila kombinga yasho, hasho mbela?—

Ngele gumwe okwe ku ningi nayi e te ku pe ombili, mbela oto ka ninga po shike? Mbela oto ke mu dhimina po?— Ongiini ngele okwe shi ningi iikando oyindji? Mbela oto ke mu dhimina po natango?—

Mbela ando otse twa li twa hala gumwe e tu dhiminwe po, mbela ando omuntu ngono ite ke tu dhimina po?— Onkee ano, natse otu na oku mu dhimina po. Katu na owala okutya otwe mu dhimina po, ihe otu na oku mu dhimina po tashi zi komutima. Uuna tatu ningi ngawo, otatu ulike kutya otwa hala lela okukala aalanduli yOmulongi Omunene.

Opo tu uve ko esimano lyokukala hatu dhimine po, natu leshe Omayeletumbulo 19:11; Mateus 6:14, 15 nosho wo Lukas 17:3,4.

[Ethano pepandja 77]

Petrus okwa li a hala okutseya shike kombinga yedhiminathanopo?

[Ethano pepandja 78]

Oshike sha li sha ningwa po sho omupiya i indile omukwaniilwa e mu pe ethimbo lya gwana opo a fute oongunga dhe?

[Omathano pepandja 78]

Ongiini omupiya nguka a li uungaunga nomupiya omukwawo ngono a li itaa vulu okufuta oongunga dhe?

[Ethano pepandja 80]

Omukwaniilwa okwa ningile shike omupiya ngoka inaa dhimina po mukwawo?

[Ethano pepandja 81]

Mbela oto ka ninga po shike ngele gumwe okwe ku pula wu mu dhiminepo?