Ontopolwa 17

Oshike tashi vulu oku tu etela enyanyu?

ATUHENI otwa hala okukala twa nyanyukwa, hasho mbela?— Ihe aantu oyendji inaya nyanyukwa lela. Mbela owu shi kutya omolwashike?— Osho molwaashoka kaye shi shoka tashi vulu oku ye etela enyanyu. Ohaya dhiladhila kutya okwiikongela iinima oyindji oko taku vulu oku ye etela enyanyu. Ihe ngele oya mono iinima mbyoka, enyanyu lyawo ihali kala po sigo aluhe.

Omulongi Omunene okwa popi oshinima shimwe sha simana shoka tashi vulu oku tu etela enyanyu a ti: “Okugandja oku na elago ku vule okutaamba.” (Iilonga 20:35) Ano oshike mbela tashi vulu oku tu etela enyanyu?— Eeno, osho okugandja sha kuyalwe noku ya ningila sha. Mbela owa kala nale wu shi shi?—

Natu dhiladhile muule kombinga yaashika. Mbela Jesus okwa ti kutya omuntu ngoka ta pewa omagano ita ka kala a nyanyukwa?— Aawe, ine shi popya. Mbela iho kala wa nyanyukwa ngele gumwe e ku pe omagano?— Kehe gumwe oha kala a nyanyukwa ngele e ga pewa. Ohatu kala twa nyanyukwa ngele twa pewa sha oshiwanawa.

Ihe Jesus okwa ti kutya ngele tatu gandja otashi tu etele enyanyu olindji. Mbela oto ti kutya olye a pa aantu iinima oyindji e vule kehe gumwe?— Eeno, oJehova Kalunga.

Ombiimbeli otayi ti kutya Kalunga oha “pe aantu ayehe omwenyo nomufudho niinima ayihe.” Ohe tu lokithile omvula okuza kegulu nohe tu pitithile wo etango, opo iimeno yi koke notu kale tu na iikulya. (Iilonga 14:17; 17:25) Onkee ano, itashi kumitha sho Ombiimbeli tayi ti kutya Jehova ‘oKalunga omunelago.’ (1 Timoteus 1:11, OB-1954) Okugandja sha kuyalwe oko shimwe shomiinima mbyoka hayi nyanyudha Kalunga. Uuna tatu gandja, otashi vulu wo oku tu nyanyudha.

Oshike mbela tatu vulu okupa yalwe? Oto ti ngiini?— Omathimbo gamwe omagano ohaga landwa niimaliwa. Ngele omagano ngoka oto ga kutha mositola, owu na oku ga futa. Onkee ano, ngele owa hala okugandja omagano ga tya ngaaka, oto vulu okugongela iimaliwa sigo ya gwana oku ga futa.

Ihe hamagano agehe ge na okulandwa kositola. Pashiholelwa, ngele oku na uupyu esiku ndyoka, gumwe e te ku pe okakopi komeya omatalala, oto kala wu uvite nawa lela. Onkee ano, ngele owa gandja omagano gomeya omatalala komuntu a sa enota, oto vulu okumona enyanyu ndyoka hali zi mokugandja.

Esiku limwe otashi vulika meme gwoye e ku kwathele wu ninge oshikwiila. Otashi ka kala shinyanyudha okuninga oshikwiila pamwe nameme gwoye. Ihe mbela otashi ke ku etela ngaa enyanyu ngele owa li po oshikwiila shono ongoye awike?— Eeno, oto vulu okupa ko ookuume koye. Mbela ino hala oku shi ninga esiku limwe?—

Omulongi Omunene naayapostoli ye ayehe oya li ye shi kutya okugandja ohaku etele omuntu enyanyu. Mbela owu shi kutya oshike ya li ya pe aantu?— Oya li ye ya pe oshinima shoka shi li dhingi muuyuni. Oya li ye shi oshili kombinga yaKalunga noya li yu uvithile aantu nenyanyu onkundana ndjika ombwanawa. Oya li ye shi ningi noinaya pitika aantu ye ya pe iimaliwa.

Esiku limwe omuyapostoli Paulus nakuume ke omwaanawa omulongwa Lukas oya li ya tsakaneke omukiintu ngoka a li a hala wo okukala e na enyanyu ndyoka hali zi mokugandja. Oya li ya tsakanene naye pomulonga. Paulus naLukas oya li ya yi komulonga hoka molwaashoka oya li yu uva kutya oko kehala lyokugalikanena. Shilishili, sho ya thiki hoka, oya adha ko aakiintu yamwe taya galikana.

Paulus okwa li a tameke okulombwela aakiintu mbaka onkundana ombwanawa kombinga yaJehova Kalunga noyUukwaniilwa we. Omukiintu gumwe gwomuyo gwedhina Lidia, okwa li a pulakene neitulomo kuye. Konima yethimbo, Lidia okwa li a hala okuninga sha opo u ulike kutya okwa hokwa lela onkundana ombwanawa ndjoka a li u uvu. Onkee ano, Lidia okwa lombwele Paulus naLukas a ti: “Ngele omu uvite kutya ngame ondi itaala shili Omuwa, nena ileni, mu kale megumbo lyandje.” Okwe ya ladhipike ye ye kegumbo lye.—Iilonga 16:13-15.

Lidia okwa li a nyanyukwa sho aapiya yaKalunga mbaka ye mu talele po megumbo lye. Okwa li e ya hole molwaashoka oya li ye mu kwathele i ilonge kombinga yaJehova naJesus nosho wo kombinga yankene aantu taya vulu okukala nomwenyo sigo aluhe. Osha li she mu nyanyudha sho a li a mono ompito yokupa Paulus naLukas iikulya nosho wo ehala lyokukala. Onkee ano, okugandja okwa li kwe etele Lidia enyanyu molwaashoka okwa li e na lela ehalo oku shi ninga. Shika osho oshinima tu na okudhimbulukwa. Otashi vulika gumwe e tu lombwele kutya otu na okukala hatu gandja omagano. Ihe ngele ohatu gandja itaashi zi komutima, itashi ke tu etela enyanyu.

Pashiholelwa, ongiini ngele owu na uuleke mboka wa hala okulya. Ngele onde ku lombwele kutya owu na okugandja po wumwe kokanona kamwe, mbela oto ka kala ngaa wu na ehalo oku wu gandja?— Ihe ongiini ngele owu na uuleke e to tsakanene nakuume koye ngoka wu hole noonkondo? Ongiini ngele ongoye mwene wa tokola okupa mo kuume koye muuleke moka, mbela ito ka kala wa nyanyukwa?—

Omathimbo gamwe ohatu kala tu hole omuntu gwontumba noonkondo e tatu kala twa hala oku mu pa po kehe shimwe tu na. Shika osho tu na okukala hatu ningi shi na ko nasha naKalunga, sho ohole yetu yoku mu hola tayi ende tayi koko.

Omulongi Omunene okwa li e shi omukiintu gwontumba ohepele ngoka a li e uvite kutya osho e na okuninga. Okwa li e mu mono motempeli muJerusalem. Okwa li e na owala uumaliwa uyali owo auke. Ihe okwa li e wu tula awuhe moshiketha shomayambidhidho nenge shomagano gomotempeli. Ka li a ladhipikwa kugumwe e shi ninge. Aantu oyendji mboka ya li mo kaya li nokuli ye shi shoka a ningi. Okwa li e shi ningi molwaashoka okwa li e na ehalo oku shi ninga nomolwaashono okwa li e hole lela Jehova. Okwa li a nyanyukwa molwaashoka okwa li a gandja sha.—Lukas 21:1-4.

Opu na omikalo odhindji moka tatu vulu okugandja. Mbela oto vulu okudhiladhila po omikalo dhimwe moka tatu vulu oku shi ninga?— Ngele otwa kala hatu gandja kuyalwe tashi zi komutima, otatu ka kala twa nyanyukwa. Osho molwaashono Omulongi Omunene te tu lombwele ta ti: “Gandjeni.” (Lukas 6:38) Ngele tatu kala tatu shi ningi, otatu ka nyanyudha aantu ooyakwetu natse yene otatu ka kala twa nyanyukwa noonkondo.

Natu leshe Omanyolo gamwe kombinga yankene okugandja haku etele omuntu enyanyu, muMateus 6:1-4; Lukas 14:12-14 nosho wo 2 Aakorinto 9:7.

[Ethano pepandja 92]

Omolwashike Jehova e li ‘Kalunga omunelago’?

[Ethano pepandja 93]

Mbela oto ka kala ngaa wa nyanyukwa ngele owa li oshikwiila shoye ongoye awike?

[Ethano pepandja 94]

Lidia ota lombwele Paulus naLukas shike?

[Ethano pepandja 94]

Omolwashike Lidia a nyanyukwa sho ta sile oshimpwiyu Paulus naLukas?

[Ethano pepandja 96]

Omolwashike omukiintu nguka ohepele a nyanyukwa sho ta gandja po uumaliwa auhe mboka a li ena?