Ontopolwa 25

Mbela mboka haya longo uuwinayi otaya vulu ngaa okulunduluka?

MBELA itashi ka kala ngaa oshiwanawa ngele aantu ayehe oya kala haya longo uuwanawa?— Ihe kapu na nando omuntu ha longo aluhe uuwanawa. Mbela owu shi shi kutya omolwashike atuheni hatu longo uuwinayi omathimbo gamwe, nokuli nuuna twa hala okulonga shoka oshiwanawa?— Omolwaashoka atuheni otwa valwa nuulunde. Ihe aantu yamwe ohaya ningi iinima oyindji iiwinayi noonkondo. Oye tonde yalwe nohaye ya ningi nayi owina. Mbela oto dhiladhila kutya otaya vulu okulunduluka e tayi ilongo okukala ye li nawa?—

Tala komulumentu omugundjuka ngoka ta tonatele oonguwo dhaamboka taya dhenge Stefanus nomamanya. Edhina lye lyOshihebeli oSaulus, ihe edhina lye lyOshiroma olyo Paulus. Okwa nyanyukwa sho Stefanus omulongwa gwOmulongi Omunene ta dhipagwa. Natu tale kutya omolwashike Saulus a li a longo iilonga iiwinayi ya tya ngaaka.

Saulus okwa li gumwe gwomongundu yelongelokalunga lyOshijuda hayi ithanwa Aafarisayi. Aafarisayi oya li ye na Oohapu dhaKalunga, ihe oya li haya gandja eitulomo komalongo gaalongi yamwe yomalongelokalunga gawo. Shika osho sha li sha ningitha Saulus a longe uuwinayi.

Sho Stefanus a kwatwa po muJerusalem, Saulus opo a li. Stefanus okwa li a falwa kompangu, hoka aapanguli yamwe ya li Aafarisayi. Nonando oya li ye mu popile muuwinayi, Stefanus ka li a tila. Okwa popi nomukumo noku uvithile aapanguli kombinga yaJehova Kalunga naJesus.

Ihe aapanguli mboka kaya li ya panda shoka taya lombwelwa. Oya li ye shi nale oshindji kombinga yaJesus. Oya adhika owala opo ya dhipagitha Jesus. Ihe konima yaashoka Jehova okwa fala Jesus megulu. Pehala lyokulundulula iikala yawo, aapanguli mbaka oya kala nokukondjitha aalongwa yaJesus.

Aapanguli oya kwata Stefanus e taye mu fala pondje yoshilando. Oye mu dhenge ya dhiginina e ti ihata pevi noya tameke oku mu dhenga nomamanya. Saulus opo a li ta tala sho Stefanus ta dhipagwa ngaashi wu shi wete mefano muka. Okwa li ta dhiladhila kutya oshi li mondjila okudhipaga Stefanus.

Mbela owu shi kutya omolwashike Saulus a li ta dhiladhila ngaaka?— Saulus okwa kala onkalamwenyo ye ayihe Omufarisayi nokwa li i itaala kutya omalongo gAafarisayi oge li mondjila, nomolwaashono a li he ya holele.—Iilonga 7:54-60.

Saulus okwa li a ningi po shike konima sho Stefanus a dhipagwa?— Okwa kala ta kambadhala okuhulitha po aalongwa yaJesus ayehe. Okwa yi momagumbo gawo shu ukilila e ta hili mo aalumentu naakiintu nokwe ya tulitha mondholongo. Oyendji yomaalongwa oya thigi po Jerusalem, ihe inaye etha okupopya kombinga yaJesus.—Iilonga 8:1-4.

Shika osha ningitha nokuli Saulus a kale e tonde aalongwa yaJesus shi vulithe nale. Onkee ano, okwa yi komusaaseri omukuluntu Kajafas e ta pewa epitikilo a ka kwate po Aakriste yokuDamaskus. Saulus okwa li a hala oku ye eta ye li oonkwatwa kuJerusalem ya pewe egeelo. Ihe manga a li mondjila yokuya kuDamaskus, oshinima oshikumithi osha ningwa.

Uuyelele owa adhima okuza megulu noku uvu ewi tali ti: “Saulus, Saulus, omolwashike to tidhagana ndje?” Ewi olya li lyaJesus ta popi okuza megulu. Uuyelele owa li wa tsa unene nowa tsikitha Saulus, naantu mboka ya li naye oya li ye na oku mu kwata keti ye mu fale kuDamaskus.

Konima yomasiku gatatu Jesus okwa li i iholololele memoniko gumwe gwomaalongwa ye Ananias gwomuDamaskus. Jesus okwa lombwele Ananias a ka talele po Saulus opo e ke mu tsikulule ye a popye wo naye. Sho Ananias a popi naye, Saulus okwa taamba ko oshili kombinga yaJesus nomeho ge oga tsikuluka. Okukalamwenyo kwe akuhe okwa li kwa lunduluka nokwa ningi omulongeli gwaKalunga omudhiginini.—Iilonga 9:1-22.

Mbela ngashingeyi owu wete kutya omolwashike Saulus a li ha longo uuwinayi?— Omolwaashoka okwa li a longwa iinima iiwinayi. Okwa li a landula aantu mboka ya li kaaye shi aadhiginini kuKalunga. Ye okwa li ishewe gumwe gwomongundu yaantu mboka ya li ya pititha omadhiladhilo gopantu komeho yOohapu dhaKalunga. Ihe mbela omolwashike Saulus a li a lundulula onkalamwenyo ye e ta tameke okulonga uuwanawa, nonando Aafarisayi yalwe oya li ya tsikile okupataneka Kalunga?— Osho molwaashoka Saulus ka li e tonde lela oshili. Onkee ano, sho a mono kutya oshike shi li mondjila okuninga, okwa li e shi ningi.

Mbela owu shi kutya Saulus okwa ka ninga lye konima yethimbo?— Eeno, okwa ka ninga omuyapostoli Paulus, omuyapostoli gwaJesus. Dhimbulukwa wo kutya Paulus okwa nyola omambo ogendji gOmbiimbeli e vule yalwe.

Opu na aantu oyendji kunena taya vulu okulunduluka ngaashi Saulus. Ihe kashi shi oshipu molwaashoka opu na ngoka ta longo nuudhiginini opo a ningithe aantu ya longe uuwinayi. Mbela owu shi kutya oye lye?— Jesus okwa li a popi kombinga ye sho a li i ihololele Saulus mondjila yokuya kuDamaskus. Manga Saulus a li mondjila, Jesus okwa li a popi naye okuza megulu a ti: ‘Otandi ku tumu wu ka tonatithe omeho gaantu, opo ya ze momilema, ye ye muuyelele yo ya thige po epangelo lyaSatana ye ye kuKalunga.’—Iilonga 26:17,18.

Eeno, Satana Ondiaboli oye ta kambadhala okuningitha kehe gumwe a longe uuwinayi. Mbela oho mono oshidhigu omathimbo gamwe okulonga shoka shi li mondjila?— Atuheni osho hatu ningi. Satana ohe shi tu ningile oshidhigu. Ihe opu na natango etompelo limwe kutya omolwashike ihaashi kala aluhe oshipu okulonga shoka shi li mondjila. Mbela owu shi kutya omolwashike?— Osho molwaashoka otwa valwa nuulunde.

Uulunde owo hawu tu ningitha omathimbo gamwe tu longe shoka sha puka pehala lyokulonga shoka shi li mondjila. Onkee ano, mbela oshike twa pumbwa okuninga?— Eeno, otu na okukondja noonkondo opo tu longe shoka shi li mondjila. Ngele tatu ningi ngaaka, otatu ka kala tu na uushili kutya Jesus ngoka e tu hole ote ke tu kwathela.

Sho Jesus a li kombanda yevi, okwa li e hole aantu mboka ya li haya longo iilonga iiwinayi e taya lunduluka. Okwa li e shi shi kutya kasha li oshipu kuyo okulunduluka. Pashiholelwa, opwa li pu na aakiintu mboka ya li haya yi momilalo naalumentu oyendji. Dhoshili, shika osha li sha puka. Ombiimbeli otayi ithana aakiintu mbaka oohonda.

Esiku limwe, omukiintu gumwe ohonda okwa li u uvu kombinga yaJesus nokwe ya kuye kegumbo lyOmufarisayi hoka a li. Okwa gwayeke oompadhi dhaJesus omagadhi. Okwa li wo a theta omahodhi ge koompadhi dhaJesus nomafufu ge. Okwa li u uvite nayi omolwuulunde mboka a li a longa, onkee ano, Jesus okwe mu dhimine po. Ihe Aafarisayi kaya li ye wete a gwana okudhiminwa po.—Lukas 7:36-50.

Mbela owu shi kutya Jesus okwa li a lombwele yamwe yomAafarisayi shike?— Okwe ya lombwele a ti: ‘Oohonda otadhi mú tetekele okuya moshilongo shaKalunga.’ (Mateus 21:31) Jesus okwa li a popi ngaaka molwaashoka oohonda odha li dhe mu itaala e tadhi etha po okulonga iilonga iiwinayi. Ihe Aafarisayi oya li ya tsikile nokuningila aalongwa yaJesus uuwinayi.

Onkee ano, ngele Ombiimbeli oye tu ulukile kutya shoka tatu ningi osha puka, otu na okukala tu na ehalo lyokweetha po shoka sha puka. Ngele otwi ilongo kutya Jehova okwa hala tu ninge shike, otu na wo okukala twa halelela oku shi ninga. Opo nduno Jehova ota ka kala a nyanyukwa note ke tu pa omwenyo gwaaluhe.

Opo tu kwathelwe tu yande okulonga shoka oshiwinayi, natu leshe pamwe Episalomi 119:9-11; Omayeletumbulo 3:5-7 nosho wo 12:15.

[Ethano pepandja 133]

Omolwashike Saulus a li ta dhiladhila kutya oshi li mondjila Stefanus a dhipagwe?

[Ethano pepandja 135]

Olye ta popi naSaulus nokwa li a tumu Saulus a ka ninge shike?

[Ethano pepandja 136]

Omolwashike Jesus a li a dhimine po omukulukadhi nguka a li ha longo uuwinayi?