Ontopolwa 30

Oshike tashi vulu oku tu kwathela tu sinde uumbanda wokutila aantu?

MBELA oho mono oshipu okulongela Jehova?— Omulongi Omunene ina tya kutya otashi ka kala oshipu oku shi ninga. Ongulohi ya tetekele eso lye, Jesus okwa li a lombwele aayapostoli ye a ti: “Uuyuni ngele otau mu tondo, dhimbulukweni kutya ongame wa tondo tango.”—Johannes 15:18.

Petrus okwa li i inomo kutya ita ka thiga po nando Jesus, ihe Jesus okwa ti kutya Petrus ote ke mu idhimbika lwiikando itatu ongulohi ndjoka. Shika osho naanaa Petrus a li a ningi. (Mateus 26:31-35, 69-75) Mbela oshe ende ngiini opo shika shi ningwe?— Osha li sha ningwa molwaashoka Petrus naayapostoli ooyakwawo oya li ya tila.

Mbela owu shi kutya omolwashike aayapostoli ya li ya tila?— Oya li ya tila molwaashoka oya li inaaya ninga oshinima shimwe sha simana noonkondo. Okwiilonga kombinga yoshinima shika, otaku vulu oku tu kwathela tu longele Jehova, kutya nduno yalwe otaya ti ngiini nenge otaye tu ningile shike. Ihe opo tu tameke oku shi ninga, otwa pumbwa okutala shoka sha li sha ningwa po ongulohi yahugunina ndjoka Jesus a li pamwe naayapostoliye.

Tango, Jesus okwa li a dhana Opaasa pamwe naayapostoli ye. Opaasa oya li uulalelo wi ikalekelwa hawu liwa omvula kehe okudhimbulukitha oshigwana shaKalunga nkene sha li sha mangululwa muupika waEgipiti. Opo nduno Jesus okwa toto po uulalelo wulwe wi ikalekelwa mboka a li a li pamwe nayo. Otatu ka kundathana kombinga yuulalelo mboka montopolwa yi li komeho noku tu yelithila nkene tawu tu kwathele okudhimbulukwa Jesus. Konima yokulya uulalelo mboka nokuladhipika aayapostoli ye, Jesus okwe ya fala moshikunino shaGetsemane. Oshikunino shoka osha li ehala hoka ya li ye hole okuya olundji.

Jesus okwa li a zi po puyo a ka galikane. Okwa li wo a lombwele Petrus, Jakob naJohannes ya galikane, ihe oya kotha. Iikando ayihe itatu Jesus a li a zi po puyo a ka galikane, sho a galuka okwa adha Petrus naayapostoli ooyakwawo ya kotha. (Mateus 26:36-47) Mbela owu shi kutya omolwashike ya li ye na okukala ya tonata taya galikane?— Natu kundathane kombinga yaashoka.

Judas Iskariot naye opo a li puulalelo wOpaasa pamwe naJesus naayapostoli yalwe ongulohi ndjoka. Ngaashi to shi dhimbulukwa, Judas okwa li a ningi omufuthi. Ihe ongulohi ndjoka okwa ningi wo omugwaaleki. Okwa li e shi ehala moshikunino shaGetsemane mpoka Jesus a li ha tsakanene olundji naayapostoli ye. Onkee ano, Judas okwa fala aakwiita mboka kehala hoka opo ya ka kwate po Jesus. Sho aakwiita ya thiki hoka, Jesus okwe ya pula a ti: “Otamu kongo lye?”

Aakwiita oya yamukula ya ti: “OJesus.” Jesus ka li a tila, onkee ano, okwe ya yamukula a ti: “Ongame nguka.” Aakwiita oya li ya kuminwa noonkondo uulaadhi waJesus e taya shuna lwanima nokwi ihata pevi. Opo nduno Jesus okwa ti: ‘Ngele ongame tamu kongo, nena etheni aayapostoli yandje ya ye.’—Johannes 18:1-9.

Sho aakwiita ya kwata po Jesus e taye mu manga, aayapostoli ye oya tila e taya fadhuka po. Ihe Petrus naJohannes oya li ya hala okumona shoka tashi ningilwa Jesus, onkee ano, oya landula mo ye li kokule. Lwahugunina, Jesus okwa falwa megumbo lyaKajafas, omusaaseri omukuluntu. Molwaashoka Johannes okwa li e shiwike komusaaseri nguka omukuluntu, omukeeleli gwoposheelo okwe etha Johannes naPetrus ya ye molugumbo.

Aasaaseri oya adhika ya gongala nale megumbo lyaKajafas opo ya pangule Jesus. Oya hala Jesus a dhipagwe. Onkee ano, oye eta mo oonzapo dhokupopya iifundja kombinga yaJesus. Aantu oya dhenge Jesus noongonyo nosho wo nomankawa. Petrus okwa li popepi sho iinima ayihe mbyoka tayi ningwa.

Omukadhona omukeeleli gwoposheelo ngoka a li e etha Petrus naJohannes ya ye molugumbo, okwa dhimbulula Petrus nokwa ti: “Nangoye wo owa li pamwe naJesus.” Ihe Petrus okwi idhimbike Jesus. Konima yokathimbo omukadhona gulwe okwa dhimbulula Petrus nokwa lombwele mboka ya li ya thikama mpoka a ti: “Naanguka wo okwa li pamwe naJesus.” Natango Petrus okwi idhimbike Jesus. Konima yethimbo ongundu yaantu oya mono Petrus noye mu lombwele ya ti: “Kapu na omalimbililo, nangoye wo gumwe gwaambeyaka.” Petrus okwa li i idhimbike Jesus oshikando oshititatu a ti: “Omulumentu ngoka kandi mu shi.” Petrus okwa li nokuli a gana kutya ota popi oshili, opo nduno Jesus okwa punguluka e te mu tala.—Mateus 26:57-75; Lukas 22:54-62; Johannes 18:15-27.

Mbela owu shi kutya omolwashike Petrus a popi iifundja?— Eeno, omolwaashoka okwa li a tila. Ihe mbela omolwashike a li a tila? Oshike a li inaa ninga opo a kale e na uulaadhi? Dhiladhila kwaashoka. Mbela oshike Jesus a li a ningi po opo a kale e na uulaadhi?— Okwa li a galikana Kalunga, na Kalunga okwa li e mu kwathele a kale e na uulaadhi. Dhimbulukwa kutya Jesus okwa li a lombwele Petrus iikando itatu a galikane noku kale a tonata. Ihe mbela oshike sha li sha ningwa po?—

Oshikando kehe Jesus ta galuka, okwa li a adha Petrus a kotha. Ka li ta galikana, noka li a tonata. Onkee ano, sho Jesus a kwatwa po, Petrus ka li i ilongekidha. Konima yethimbo sho Jesus a li ta pangulwa nokudhengwa naashono aasaaseri ya li ya ningi oompangela oku mu dhipagitha, Petrus okwa li a tila. Ihe mbela Jesus okwa li a lombwele aayapostoli ye ya ninge shike konima yoowili dhontumba manga inaa kwatwa po?— Okwa li e ya lombwele kutya otaya ka tondwa kuuyuni ngaashi naanaa wu mu tonde.

Ngashingeyi natu dhiladhile koshinima shontumba shoka tashi vulu oku tu ningilwa ngaashi naanaa sha li sha ningilwa Petrus. Natu tye nduno owu li mongulu yosikola sho yalwe ya tameke okupopya iinima iiwinayi kombinga yaantu yalwe mboka ihaaya salutile epandela nenge ihaaya dhana Okrismesa. Ongiini ngele gumwe okwe ya kungoye e te ku pula ta ti: “Mbela oshoshili kutya iho salutile epandela?” Nenge yalwe taya ti: “Otu uva kutya iho dhana Okrismesa!” Mbela oto ka kala wa tila okupopya oshili?— Mbela oto ka makelwa wu popye iifundja, ngaashi Petrus a li a ningi?—

Konima yethimbo Petrus okwa li u uvite nayi noonkondo sho i idhimbika Jesus. Sho a dhimbulula shoka a ningi, okwa yi pondje nokwa tameke okulila. Eeno, Petrus okwa li a galukile kuJesus. (Lukas 22:32) Ngashingeyi dhiladhila kombinga yaashoka. Mbela oshike tashi tu kwathele opo twaa kale twa tila e tatu popi ngaashi Petrus a popi?—Dhimbulukwa kutya Petrus ka li a galikana noka li a tonata. Onkee ano, mbela oto dhiladhila kutya oshike twa pumbwa okuninga opo tu kale aalanduli yOmulongi Omunene?—

Otwa pumbwa okugalikana opo Jehova e tu kwathele. Mbela sho Jesus a li a galikana, owu shi kutya Kalunga okwa li e mu ningile shike?—Okwa li e mu tumine omuyengeli opo e mu pe oonkondo. (Lukas 22:43) Mbela aayengeli yaKalunga otaya vulu oku tu kwathela?—Ombiimbeli otayi ti: “Omuyengeli gwOMUWA ota tonatele mboka haa vulika kOMUWA note ya hupitha moshiponga.” (Episalomi 34:7) Ihe opo Kalunga e tu kwathele, otu na okuninga shike kaashi shi owala okugalikana. Mbela owu shi kutya oshike ishewe tu na okuninga?—Jesus okwa li a lombwele aalanduli ye ya kale ya tonata. Mbela oto ti oshike tashi vulu oku tu kwathela?—

Otwa pumbwa okupulakena nawa kwaashoka hashi popiwa kokugongala kwetu kwopaKriste nokugandja eitulomo kwaashoka hatu lesha mOmbiimbeli. Ihe otwa pumbwa wo okugalikana kuJehova olundji nokupula ekwatho opo tu vule oku mu longela. Ngele otwe shi ningi ote ke tu kwathela tu sinde uumbanda wokutila aantu. Otatu ka kala twa nyanyukwa sho tatu ka kala tu na ompito yokulombwela yalwe kombinga yOmulongi Omunene nosho wo yaHe.

Omanyolo ngaka otaga vulu oku tu kwathela opo kaatu ethe nando uumbanda wokutila aantu yalwe wu tu imbe okulonga shoka shi li mondjila: Omayeletumbulo 29:25; Jeremia 26:12-15, 20-24 naJohannes 12:42,43.

[Ethano pepandja 159]

Omolwashike Petrus, Jakob naJohannes ya li ye na okukala ya tonata?

[Ethano pepandja 160]

Omolwashike Petrus a li a tila noonkondo shoka she mu ningitha i idhimbike Jesus?

[Ethano pepandja 160]

Mbela ongiini ngele owi iyadha monkalo ya faathana naandjoka yaPetrus?