Ontopolwa 32
Ongiini Jesus a li a gamenwa?
OMATHIMBO gamwe Jehova oha longo iilonga momukalo omukumithi opo a gamene aanona nosho wo mboka ihaaya vulu okwiigamena. Ngele to endaenda pomudhingoloko gweni, otashi vulika wu mone omukalo gumwe moka Jehova he shi ningi. Ihe tango otashi vulika itoo ku uva ko naanaa shoka tashi ningwapo.
Otashi vulika wu mone okadhila ka nambela pevi popepi nangoye. Otashi vulika ka kale taka monika ka fa ke ehamekwa. Otaka kookolola ewawa lyako notaka hedha ko sho to kambadhala okuya kuko. Sho to ka landula otake ende owala ke li komeho goye. Opo nduno oka tuka po ombaadhilila. Ewawa lyako kalya li lye ehamekwa nando. Mbela owu shi kutya okadhila oka li taka ningi shike?—
Oka li ka holeka uudhilona wako moshihwa popepi nangoye mpoka ka li ka nambela. Yina okwa li a tila kutya otashi vulika wu wu mone e to wu ehameke. Onkee ano, okadhila hoka oka li taki iningitha ka fa take ehama opo ke ku fale kokule nehala ndyoka. Mbela owu shi ngoka ta vulu oku tu gamena ngaashi okadhila hoka ka li taka gamene uudhilona wako?— MOmbiimbeli, Jehova oku li ta yelekanithwa nondhila ndjoka hayi ithanwa ontsa, ndjoka hayi gamene uudhilona wayo.—Deuteronomium 32:11,12.
Okanona kaJehova ke na ongushu oko Omwana omuholike, Jesus. Sho Jesus a li megulu, okwa li omuntu gwopambepo omunankondo ngaashi He. Okwa li ha vulu okwiisila oshimpwiyu. Ihe sho a valwa e li okahanona kombanda yevi, ka li ta vulu okwiikwathela. Okwa li a pumbwa egameno.
Opo a gwanithe po ehalo lyaKalunga kombanda yevi, Jesus okwa li e na okukoka nokuninga omuntu omukuluntu a gwanenena. Onkee ano, Satana okwa kambadhala okudhipaga Jesus omanga shoka inaashi ningwa. Oonkambadhala dhe dhokudhipaga Jesus manga a li okanona nomomikalo moka Jehova a kala noku mu gamena odha ningitha ehokololo li kale tali hokitha. Mbela owa hala okuuva ehokololo ndyoka?—
Konima yethimbo sho Jesus a valwa, Satana okwa holokitha po oshinima sha fa onyothi tayi adhima ndjoka ya li kiilongo yokUuzilo. Aalumentu mboka haya konakona oonyothi, oya li ya landula onyothi oshinano shookilometa omathele okuya kuJerusalem. Hoka oya li ya pula kutya ngoka ta ka ninga omukwaniilwa gwAajuda okwa valelwa peni. Sho aalumentu mboka ya li ye shi shoka Ombiimbeli tayi ti kombinga yaashika ya pulwa, oye ya yamukula ya ti: “OmuBetlehem.”—Mateus 2:1-6.
Konima yethimbo omukwaniilwa omukwanyanya gwaJerusalem, Herodes, sho u uvu onkundana kombinga yomukwaniilwa nguka omupe, ngoka opo a valelwa moshilando shopopepi Betlehem, okwa lombwele aakoneki yokuuzilo a ti: ‘Ka kongeni okanona; ngele mwe ka mono, ileni mu lombwele ndje.’ Mbela owu shi kutya omolwashike Herodes a li a hala okutseya kutya openi tapu adhika Jesus?— Omolwaashoka Herodes okwa li a sa ondumbo nokwa hala okudhipagitha Jesus.
Ongiini Jehova a li a gamene Omwana?— Sho aakoneki yokuuzilo ya mono Jesus, oye mu pe omagano. Konima yethimbo Kalunga okwa li a londodha aakoneki yokuuzilo okupitila mondjodhi opo kaaya shune we kuHerodes. Onkee ano, oya shuna kegumbo nondjila yilwe noinaya shuna we kuJerusalem. Sho Herodes a mono kutya aakoneki oya yi, okwa li a geya noonkondo. Mokuninga oonkambadhala dhokudhipagitha Jesus, Herodes okwa li a dhipagitha uunona auhe wuumati muBetlehem mboka wa li kohi yoomvula mbali. Ihe pethimbo mpoka Jesus okwa adhika a za mo nale muBetlehem.
Mbela owu shi shi kutya Jesus okwa li a hupu ngiini?— Konima aakoneki sho ya li taya shuna kegumbo, Jehova okwa li a londodha omusamane gwaMaria, Josef, ya ye ontuku kuEgipiti. Hoka Jesus okwa li a gamenwa opo kaa ningilwe uuwinayi kuHerodes omukwanyanya. Konima yoomvula dhontumba, sho Maria naJosef ya li ya galuka kuEgipiti pamwe naJesus, Kalunga okwa li ishewe a londodha Josef. Okwe mu lombwele mondjodhi opo a ye kuNazaret hoka Jesus ta ka kala a gamenwa.—Mateus 2:7-23.
Mbela owu wete nkene Jehova a li a gamene Omwana?— Mbela olye to ti kutya okwa fa uudhilona mboka wa li wa holekwa kuyina moshihwa nenge a fa Jesus sho a li okanona okashona? Mbela inoya fa?— Opu na mboka ya hala oku ku ehameka wo. Mbela owu shi kutya oolye?—
Ombiimbeli otayi ti kutya Satana okwa fa onkoshi tayi pumbu ya hala oku tu lya po. Ngaashi omathimbo gamwe oonkoshi hadhi ningi uunamwenyo uushona iihakanwa yadho, Satana noompwidhuli dhe ohaya ningi aanona iihakanwa yawo. (1 Petrus 5:8) Ihe Jehova omunankondo e vule Satana. Jehova oha gamene oyana nenge a kuthe po uuwinayi mboka Satana e ya ningila.
Mbela oto dhimbulukwa shoka Ondiaboli noompwidhuli dhayo hadhi kambadhala oku tu ningitha ngaashi twa mona mOntopolwa 10?— Eeno, ohaya kambadhala oku tu yitha momilalo ndhoka inaadhi hokiwa kuKalunga. Ihe mbela oolye owala ye na okuya momilalo?— Eeno, omulumentu nomukiintu mboka ya hokanathana.
Ihe shiyemateka osho kutya aakuluntu yamwe oye hole okuya momilalo naanona. Ngele oya ningi ngawo, uumati nuukadhona otashi vulika wu tameke okulonga iilonga iiwinayi mbyoka yi ilonga kaakuluntu mboka. Ohaya tameke wo okulongitha iilyo yawo yoluvalo momukalo gwa puka. Shoka osho sha li sha ningwa methimbo lyonale moshilando shaSodom. Ombiimbeli otayi ti kutya aantu yamo, ‘aagundjuka naakokele’ oya li ya kambadhala okuya momilalo naayenda mboka ya li ye ya okutalela po Lot.—Genesis 19:4,5.
Ngaashi naanaa Jesus a li a pumbwa egameno, nangoye owa pumbwa okugamenwa opo aakuluntu nokuli naanona mboka tashi vulika ya kambadhale okuya nangoye momilalo kaaye shi ninge. Aantu mbaka ohayi iningi ya fa ookuume koye. Otashi vulika ye ku pe oshinima shontumba ngele owu uvaneke kutya ito ka lombwela aantu yalwe kombinga yaashoka ya hala ye ku ningile. Ihe aantu mbaka oyi ihole owala yo yene, ngaashi Satana noompwidhuli dhe noya hala owala okwiiyuvitha nawa. Ohaya kambadhala okwiiyuvitha nawa mokuya momilalo naanona. Shika osha puka noonkondo.
Mbela owu shi kutya ohaya ningi shike opo yi iyuvithe nawa?— Ohaya kambadhala okuguma iilyo yoye yoluvalo nenge okugumitha iilyo yawo yoluvalo kuyoye. Ihe ino etha nando omuntu e ku dhanene kuulumentu woye nenge puukiintu woye. Nokuli nando ona kale omumwanyokomati nenge omumwanyokokadhona, meme gwoye nenge tate gwoye. Iitopolwa mbika yolutu lwoye oyopaumwene.
Mbela oto ka gamena ngiini olutu lwoye kaantu mboka haya ningi iinima iiwinayi ya fa mpoka?— Tango, ino pitika nando omuntu a dhanenene iilyo yoye yoluvalo. Ngele gumwe okwa kambadhala oku shi ninga mu lombwela newi lyomuule to ti: “Ino guma ndje! Otandi ke shi tya ko!” Ngele omuntu ngoka okwa ti kutya shoka sha ningwa po ondjo yoye, ino shi itaala. Kashi shi shoshili. Inda owala wu ke shi tye ko kashi na nduno mbudhi kutya omuntu ngoka oshike shoye. Owu na owala oku ke shi tya ko nonando ota ti kutya shoka mwa ningi naye oshiholekwa. Nokuli nando omuntu ngoka oku ku uvanekele iinima iiwanawa nenge e ku ningile omatilitho, owu na okuza po puye e to ke mu lopota.
Ku na okukala wa tila, ihe owu na okukala wa kotoka. Ngele aavali yoye oye ku londodha kombinga yaantu nomahala ngoka taga vulu okukala ga nika oshiponga kungoye, owa pumbwa okupulakena kuyo. Ngele owe shi ningi, oto ka yanda aantu aakolokoshi mboka taya vulu oku ku ehameka.
Lesha kombinga yankene to vulu okwiigamena waaha ye momilalo dha nyata muGenesis 39:7-12; Omayeletumbulo 4:14-16; 14:15, 16; 1 Aakorinto 6:18 nosho wo 2 Petrus 2:14.
[Ethano pepandja 167]
Ongiini okadhila haka taka gamene uudhilona wako?
[Ethano pepandja 168]
Konima sho aakoneki mbaka ya li ya talele po Jesus, elondodho lini Kalunga a li e ya pe ndyoka lya hupitha Jesus?
[Ethano pepandja 169]
Ongiini Jesus a hupithwa sho a li okanona?
[Ethano pepandja 171]
Owu na okutya shike nokuninga po shike ngele omuntu gwontumba okwa kambadhala oku ku guma momukalo gwa puka?