Ontopolwa 33

Jesus ota vulu oku tu gamena

SHO Jesus a koko nokwa tseya nkene a li a gamenwa sho a li omushona, mbela oto dhiladhila kutya okwa li a galikana kuJehova noku mu pandula?— Mbela oto dhiladhila kutya konima yethimbo Jesus okwa li a lombwele shike Maria naJosef sho a tseya kutya oya li ya hupitha omwenyo gwe sho ye mu fala kuEgipiti?—

Dhoshili, Jesus ke shi we okahanona. Ke li we kombanda yevi ngaashi nale. Ihe mbela owa ndhindhilika ngaa kutya aantu kunena ohaya dhiladhila Jesus e li owala okahanona ke li metemba lyokulila iimuna?— Shika ohashi imonikila pethimbo lyOkrismesa sho pomahala ogendji hapu monika pwa tsilikwa omathano gaJesus e li okahanona.

Ihe nonando Jesus ke li we kombanda yevi, mbela owi itaala kutya oku na omwenyo?— Eeno, Jesus okwa yumudhwa kuusi noku li ngashingeyi Omukwaniilwa omunankondo megulu. Mbela oto dhiladhila kutya ota vulu okuninga po shike opo a gamene mboka haye mu longele?— Pashiholelwa, sho Jesus a li kombanda yevi, okwa li u ulike kutya ongiini ta ka gamena mboka ye mu hole. Natu tale kutya okwa li e shi ningi ngiini sho esiku limwe a li mowato pamwe naalongwaye.

Osha li ethimbo lyokomatango. Jesus oku uhala ta longo aantu esiku alihe komunkulo gwefuta lyaGalilea ndyoka li na uule wookilometa 20 nuunene wookilometa 12. Jesus okwa lombwele aalongwa ye ta ti: “Tu taagulukileni handiyaka yetale.” Oyo noya yi mowato noya tameke okudhuga ya taguluke efuta. Jesus okwa li a vulwa noonkondo, onkee ano, okwa yi kosindo yowato e ta kotha a lala koshigwilo. Mbalambala okwa pwile moomposi.

Aalongwa oya kala ya tonata opo ya dhuge owato. Petameko iinima oya li tayi ende nawa, ihe konima yethimbo ombepo yoshikungulu oya tukuluka. Oya li tayi pepe noonkondo, nomakuthikuthi oga kala nokuninga omanene. Omakuthikuthi oga tameke okwiiyundulila mowato e tayi udha omeya.

Aalongwa oya li ya tila, taya dhiladhila kutya owato otayi ningine. Ihe Jesus ka li a tila. Okwa li a kotha natango kosindo yowato. Hugunina aalongwa oya li ye mu pendula, taya ti: ‘Muhongi, Muhongi tu hupitha; otu li pokusila moshikungulu.’ Opo nduno Jesus okwa penduka nokwa ganda ombepo nomakuthikuthi a ti: “Mwena!”

Mbalambala oshikungulu osha kodha nefuta olya gundjile. Aalongwa oya li ye shi kuminwa. Inaya mona nando onale oshinima sha fa mpoka. Oya pulathana ya ti: “Nguka olye ano, sho ta ganda ombepo nomakuthikuthi, oyo notayi vulika kuye?”—Lukas 8:22-25; Markus 4:35-41.

Mbela owu shi kutya Jesus oye lye?— Mbela owu shi kutya openi a adha oonkondo dhe oonene?— Aalongwa kaya li ye na okukala ya tila sho Jesus a li pamwe nayo, molwaashoka Jesus okwa li omuntu i ikalekelwa. Okwa li ha longo iikumithalonga mbyoka ya li ihaayi vulu okulongwa komuntu gulwe. Nandi ku lombwele kombinga yoshima shilwe shoka a li a ningi sho mefuta mwa li mwa tukuluka oshikungulu.

Esiku lya landula ko, kongulohi, Jesus okwa lombwele aalongwa ye ya tetekele nowato handiyaka yefuta. Opo nduno Jesus okwa londo kondundu oye awike. Olya li ehala lya mwena hoka ta vulu okugalikana He, Jehova Kalunga.

Aalongwa oya yi mowato noya taaguluka efuta lyaGalilea. Mbalambala ombepo ondhigu oya tameke okupepa. Oya li tayi pepe noonkondo. Molwaashoka okwa li kwa toka, aalongwa oya kulula oothayila noya tameke okudhuga owato. Ihe kaya li ya yi kokule molwaashoka ombepo oya li tayi pepe noonkondo. Owato oya li tayi ningi ya yi komeho ya shuna monima, nomeya oga li gi iyundulile mowato. Aalongwa oya li ya longo nuudhiginini opo ya adhe komunkulo gwefuta, ihe kaya li taya vulu.

Jesus okwa li natango kondundu oye awike. Okwa kala hoka ethimbo ele. Ihe okwa li e wete kutya aalongwa ye oye li muupyakadhi womakuthikuthi omanene.Onkee ano, okwa kuluka ko kondundu nokwe ya komunkulo gwefuta. Jesus okwa li a hala okukwathela aalongwa ye, onkee ano, okwa tameke okweenda kombanda yefuta lya pindjala, u uka kuyo.

Mbela oshike tashi ka ningwa po ngele owa kambadhala okweenda kombanda yomeya?— Oto ka ningina ko notashi vulika wu se omeya. Ihe Jesus ine tu fa. Oku na oonkondo dhi ikalekelwa. Jesus okwa li e na okweenda oshinano oshile opo a thike kowato. Sho eluwa lya li li pokutenda aalongwa oya mono Jesus te ende kombanda yomeya. Ihe kaya li yi itaala shoka ya li ya mono. Oya li ya tila noonkondo, noya li yi igidha omolwuumbanda. Opo nduno Jesus okwe ya popitha e ta ti: “Ikoleleni, inamu tila, ongame.”

Mbala sho Jesus a londo mowato, oshikungulu osha mwena. Oshinima shika osha li natango sha kumitha aalongwa. Oya tsu oongolo koshipala she e taya ti: “Oshili ongoye Omuna gwaKalunga.”—Mateus 14:22-33; Johannes 6:16-21.

Mbela ando inashi kala oshiwanawa ando owa li ko pethimbo ndyoka Jesus a li kombanda yevi, nokumona sho ta longo iilonga ya tya ngaaka?— Mbela owu shi kutya omolwashike Jesus a longo iikumithalonga mbyoka?— Okwa li a longo iikumithalonga mbyoka molwaashoka okwa li e hole aalongwa ye nokwa li a hala oku ya kwathela. Okwa li wo a longo iikumithalonga mbyoka opo u ulike oonkondo oonene ndhoka e na nonkene te ke dhi longitha monakuyiwa e li Omupangeli gwUukwaniilwa waKalunga.

Nokuli nokunena olundji Jesus oha longitha oonkondo dhe okugamena aalanduli ye koonkambadhala dhaSatana dhoku ya lombwela ye ethe po okulombwela yalwe kombinga yUukwaniilwa waKalunga. Ihe Jesus iha longitha oonkondo dhe okugamena aalongwa ye opo kaaye ehame nenge oku ya aludha ngele taye ehama. Nokuli naayapostoli yaJesus ayehe hugunina oya ka sa. Jakob omumwayina gwaJohannes okwa li a dhipagwa, naJohannes okwa li a tulwa mondholongo.—Iilonga 12:2; Ehololo 1:9.

Nokunena osho shi li ngawo. Kutya nduno aantu ohaya longele Jehova nenge ihaye mu longele, ayehe otaya vulu okweehama nokusa. Ihe masiku sho Jesus ta ka pangela evi e li Omukwaniilwa gwepangelo lyaKalunga, iinima hasho tayi ka kala ngawo. Kapu na ngoka ta ka kala a tila, molwaashoka Jesus ota ka longitha oonkondo dhe omolwuuwanawa waayehe mboka taya vulika kuye.—Jesaja 9:6,7.

Omanyolo galwe ngoka tagu ulike kutya Jesus ngoka Kalunga e mu ningi Omupangeli gwUukwaniilwa we, oku na oonkondo oonene, ogo Daniel 7:13, 14; Mateus 28:18 nAaefeso 1:20-22.

[Omathano pepandja 172]

Mbela oho tala ko Jesus e li Omukwaniilwa omunankondo nenge okahanona itaaka vulu okwiikwatha?

[Ethano pepandja 173]

Jesus ota lombwele ombepo nomakuthikuthi shike?

[Ethano pepandja 174]

Omolwashike Jesus a li a longo iikumithalonga?

[Ethano pepandja 176]

Jesus oha gamene ngiini aalanduli ye kunena?