Ontopolwa 34

Oshike tashi ke tu ningilwa ngele otwa si?

OTASHI vulika wu shi shi nawa kutya kunena aantu ohaya kulupa, ohaye ehama nohaya si. Nokuli naanona ohaya si. Mbela owu na okutila eso nenge gumwe ngoka a sa?— Mbela owu shi kutya oshike hashi ningwa po ngele otwa si?—

Kapu na ngoka e na omwenyo kunena a sile e ta yumuka opo e tu lombwele kombinga yaashoka hashi ningwa po ngele omuntu a si. Ihe Jesus Omulongi Omunene sho a li kombanda yevi, okwa li ku na omulumentu a yumukile. Otatu vulu okwiilonga kombinga yaashoka hashi ningilwa aantu mboka ya sa ngele otwa lesha kombinga yomulumentu ngoka. Omulumentu ngoka okwa li kuume kaJesus nokwa li a kala muBetania, omukunda omushona popepi naJerusalem. Edhina lye oLasarus nokwa li e na aamwayinakadhona yaali, Marta naMaria. Natu tale shoka Ombiimbeli tayi popi kombinga yaashoka sha ningwapo.

Esiku limwe Lasarus okwa li te ehama unene. Pethimbo mpoka Jesus okwa li kokule. Onkee ano, Marta naMaria oya tumu omutumwa a ka lombwele Jesus kutya omumwayina gwawo Lasarus ote ehama. Shika oye shi ningi molwaashoka oye shi kutya Jesus ota vulu okuya nokwaaludha omumwayina. Jesus ke shi ndohotola, ihe okwa pewa oonkondo kuKalunga opo a vule okwaaludha omukithi kehe.—Mateus 15:30,31.

Ihe manga Jesus inaa ya kuLasarus, Lasarus okwa li te ehama noonkondo nokwa si. Ihe Jesus okwa lombwele aalongwa ye kutya Lasarus okwa kotha notayi e ke mu pendule. Aalongwa kaya li yu uvite ko shoka Jesus a hala okutya. Onkee ano, Jesus okwe ya lombwele sha yela a ti: ‘Lasarus okwa sa.’ Mbela shika otashi ulike shike kombinga yeso?— Eeno, otashi ulike kutya eso olya fa omuntu a kotha oomposi oondhigu. Eso olya fa omuntu a kotha oomposi oondhigu noita vulu nokuli okuyaguma sha.

Konima yethimbo Jesus okwe ke ya okutalela po Marta naMaria. Ookuume kaMarta naMaria oya li ye ya okuhekeleka aamwayinakadhona yaLasarus ngoka a sa. Sho Marta u uvu kutya Jesus oku li mondjila te ya, okwa yi e ke mu tsakaneke. Maria mbalambala naye okwa ka tsakaneka Jesus. Marta okwa li a sa oluhodhi noonkondo nokwa li ta lili e ta tsu oongolo poompadhi dhaJesus. Ookuume yalwe mboka ya li ya landula Maria nayo oya li taya lili.

Omulongi Omunene okwe ya pula kutya openi ya fumvika Lasarus. Aantu oya li ya fala Jesus kekololo hoka ya fumvika Lasarus. Sho Jesus a mono aantu ayehe taya lili, naye okwa tameke okulila. Oku shi shi kutya ohashi kala shinikitha oluhodhi ngele omuntu a silwa ngoka e hole.

Posheelo shekololo opwa li pwe edhilwa nemanya, onkee ano, Jesus okwe ya lombwele a ti: “Kuthii po emanya.” Mbela aantu oya li ngaa ye li kutha po?— Marta okwa li ta dhiladhila kutya ka li na okukuthwa po. Marta okwa ti kuye: “Omuwa, okwa nika nokuli, oshoka okwa ningi ngashingeyi omasiku gane a sa.”

Ihe Jesus okwa ti kuye: “Inandi ku lombwela kutya ngele owi itaala, oto ka mona eadhimo lyaKalunga?” Jesus okwa li a hala okutya Marta ota ka mona oshinima shontumba shoka tashi ka simanekitha Kalunga. Mbela Jesus okwa li ta ka ninga po shike? Sho emanya lya kuthwa po posheelo shombila, Jesus okwa li a galikana muule kuJehova. Opo nduno Jesus okwi igidha newi enene a ti: “Lasarus, za mo!” Mbela Lasarus okwa li ngaa ta ka za mo? Mbela okwa li ngaa ta vulu okuza mo?—

Mbela oto vulu okupendula omuntu a kotha?— Eeno, ngele owe mu ithana mokule, ota penduka. Mbela oto vulu okupendula omuntu a sa?— Aawe. Kashi na nduno mbudhi kutya owi ithane mokule shi thike peni, omuntu a sa ite ku uvu. Kapu na shoka ngame nenge ngoye nenge aantu yalwe kombanda yevi kunena tatu vulu okuninga po opo tu yumudhe aasi.

Ihe Jesus ine tu fa. Okwa pewa oonkondo dhi ikalekelwa kuKalunga. Onkee ano, sho Jesus i ithana Lasarus, opwa li pwa ningwa oshinima oshikumithi. Lasarus ngoka a li a sa uule womasiku gane okwa zi mo mombila. Okwa li a yumuka. Okwa li ta vulu ishewe okufudha, okweenda nokupopya. Eeno, Jesus okwa li a yumudha Lasarus kuusi.—Johannes 11:1-44.

Ngashingeyi dhiladhila kombinga yaashoka: Mbela oshike sha li sha ningilwa Lasarus sho a si? Mbela oshitopolwa she shimwe osha li sha thiga po olutu e tashi ka kala nomwenyo pehala limwe lyi ili? Mbela omwenyo gwaLasarus ogwa li gwa yi megulu? Mbela okwa li pamwe naKalunga nosho wo naayengeli ye aayapuki uule womasiku gane e na omwenyo?—

Aawe, Lasarus ka li a ningilwa iinima ya tya ngaaka. Dhimbulukwa kutya Jesus okwa ti kutya Lasarus okwa kotha. Mbela omuntu oha kala monkalo ya tya ngiini ngele a kotha? Ngele omuntu owu li moomposi oondhigu, iho kala wu shi shoka tashi ningwa momudhingoloko gwoye, hasho mbela?— Ngele wa penduka, iho kala wu shi kutya owa li wa kotha ethimbo li thike peni ngele ino tala kowili.

Oonakusa nayo osho ye li monkalo ya tya ngaaka. Oonakusa kaye na shoka ye shi. Kaye na omaiyuvo noihaya vulu okuninga sha. Lasarus naye okwa li e li monkalo ya tya ngaaka sho a li a sa. Eso otali yelekwa noomposi oondhigu moka omuntu itaa vulu okudhimbulukwa sha. Ombiimbeli otayi ti: “Aasi itaa tseya sha nando.”—Omuuvithi 9:5,10.

Dhiladhila kombinga yaashika: Ando Lasarus okwa li megulu uule womasiku ngoka gane, mbela ando ina popya sha kombinga yaashoka?— Mbela ando okwa yile megulu, mbela ando Jesus okwe mu ithana mo ngaa a galukile kombanda yevi a ze mehala ndyoka ewanawa?— Hasho nando.

Ihe aantu oyendji ohaya ti kutya otu na omwenyo nonokutya omwenyo ngoka ohagu tsikile okukala po konima ngele olutu lwa si. Ohaya ti kutya omwenyo gwaLasarus ogwa li pehala lyontumba inaagu sa. Ihe Ombiimbeli inayi popya ngaaka. Oya ti kutya Kalunga okwa shiti omuntu gwotango Adam “omunamwenyo.” Adam okwa li omwenyo. Ombiimbeli oya popya wo kutya sho Adam a yono, okwa si. Okwa ningi ‘omudhimba’ nokwa shuna montsi yevi moka a zile. Ombiimbeli otayi ti wo kutya oluvalo lwaAdam aluhe olwa thigulula wo uulunde neso.—Genesis 2:7; 3:17-19; Numeri 6:6; Aaroma 5:12.

Osha yela ano kutya katu na omwenyo gwa topoka ko kolutu lwetu. Kehe gumwe gwomutse oye omwenyo. Molwaashoka aantu oya thigulula uulunde komuntu gwotango, Adam, Ombiimbeli otayi popi tayi ti: ‘Omwenyo ngoka tagu yono, ogu na okusa.’—Hesekiel 18:4, OB-1954.

Aantu yamwe ohaya tila oonakusa. Ihaya hedha nando opopepi nomayendo molwaashoka ohaya dhiladhila kutya oonakusa oye na oomwenyo dha topoka ko komalutu gawo ndhoka tadhi vulu okweetela aanamwenyo oshiponga. Mbela omuntu a sa ota vulu ngaa okweetela oshiponga omuntu ngoka e na omwenyo?— Aawe, ita vulu.

Aantu yamwe oyi itaala kutya oonakusa ohaya vulu okugaluka ye li oombepo okutalela po aanamwenyo. Onkee ano, ohaye ya thigile iikulya. Ihe aantu mboka haya ningi ngaaka oomboka inaayi itaala lela shoka Kalunga a popya kombinga yoonakusa. Ngele otwi itaala shoka Kalunga a popya itatu ka kala twa tila oonakusa. Nongele otu na olupandu okupandula Kalunga omolwomwenyo, otatu ke shi ulika mokulonga iinima mbyoka ya hokiwa kuKalunga.

Ihe otashi vulika wu ipule to ti: ‘Mbela Kalunga ota ka yumudha ngaa aanona mboka ya sa? Mbela okwa hala ngaa shili oku ya yumudha? Natu ka kundathane kombinga yaashono montopolwa tayi landula.

Natu leshe ishewe mOmbiimbeli kombinga yonkalo yoonakusa mEpisalomi 115:17;146:3,4 nomuJeremia 2:34.

[Ethano pepandja 179]

Jesus okwa li a ningile shike Lasarus?

[Ethano pepandja 180]

Lasarus okwa li monkalo ya tya ngiini sho a li asa?

[Ethano pepandja 181]

Omolwashike kaatu na okukala twa tila oonakusa?