Ontopolwa 37

Dhimbulukwa Jehova nosho wo Omwana

NATU tye nduno omuntu gumwe okwe ku pe omagano omawanawa. Mbela oto ka kala wu uvite ngiini?— Mbela oto ka tya owala tangi e to dhimbwa ngoka e ge ku pe? Nenge mbela oto ke mu dhimbulukwa nosho wo shoka e ku ningila?—

Jehova Kalunga okwe tu pa omagano omawanawa. Okwa li a tumu Omwana kombanda yevi opo e tu sile. Mbela owu shi kutya omolwashike Jesus a li e na oku tu sila?— Shika osho oshinima sha simana noonkondo shoka twa pumbwa okuuvako.

Ngaashi twi ilongo mOntopolwa 23, Adam okwa li a yono sho inaa vulika kompango yaKalunga ya gwanenena. Natse otwa thigulula uulunde kuAdam, ngoka e li tate yetu atuheni. Onkee ano, mbela oto dhiladhila kutya otwa pumbwa shike?— Oku shi popya pathaneko, otwa pumbwa tate gumwe a gwanenena, ngoka a kala a kakatela uudhiginini we kombanda yevi. Mbela sho to dhiladhila olye ta vulu okukala tate yetu?—OJesus.

Jehova okwa li a tumu Jesus kombanda yevi opo a ninge tate yetu pehala lyaAdam. Ombiimbeli otayi ti: “‘Omuntu gwotango Adam okwa ningi omunamwenyo.’ Adam ngoka a hugunine oye ombepo tayi gandja omwenyo.” Mbela olye a li Adam gwotango?— Eeno, oye ngoka Kalunga a shiti okuza montsi yevi. Mbela olye Adam omutiyali? OJesus. Ombiimbeli oye shi ulike sho ya ti: ‘Adam gwotango okwa shitwa mevi; Adam omutiyali, Jesus okwa zi megulu.’—1 Aakorinto 15:45, 47; Genesis 2:7.

Molwaashoka Kalunga okwa li a kutha omwenyo gwaJesus megulu noku gu lundululila moshivalelo shaMaria, Jesus ka li a thigulula nando uulunde washa kuAdam. Osho molwaashoka Jesus a li omuntu a gwanenena. (Lukas 1:30-35) Osho molwaashoka wo sho Jesus a valwa, omuyengeli a li a lombwele aasita yiimuna a ti: “Nena tuu ndjika mwa valelwa Omukulili.” (Lukas 2:11) Ihe opo okanona haka Jesus ka kale Omukulili gwetu, oka li ke na okuninga po shike tango?— Oka li ka pumbwa okukoka nokuninga omukuluntu ngaashi naanaa Adam. Opo nduno Jesus okwa li a vulu okuninga “Adam omutiyali.”

Jesus, Omukulili gwetu ota ka ninga wo ‘Tate gwetu gwomuukwaaluhe.’ Osho ti ithanwa ngaaka mOmbiimbeli. (Jesaja 9:6,7) Eeno, Jesus a gwanenena ota vulu okuninga tate gwetu peha lyaAdam, ngoka a kanitha egwaneneno sho a yono. Momukalo moka otatu vulu okuhogolola okukala tu na “Adam omutiyali” e li tate gwetu. Ihe nando ongawo, Jesus Omwana gwaJehova Kalunga.

Otatu vulu okutaamba ko Jesus e li Omukulili gwetu, mokwiilonga kombinga ye. Mbela oto dhimbulukwa kutya otwa pumbwa okuhupithwa kushike?— Eeno, okuulunde neso mboka twa thigulula kuAdam. Jesus okwa yamba po omwenyo gwe gwa gwanenena omolwetu, shoka hashi ithanwa iikulila. Jehova okwa gandja iikulila opo tu vule okudhiminwa po oondjo dhetu.—Mateus 20:28; Aaroma 5:8; 6:23.

Dhoshili, inatu hala okudhimbwa shoka Kalunga nOmwana ye tu ningila, hasho mbela?— Jesus oku ulukile aalanduli ye omukalo gumwe gwi ikalekelwa ngoka tagu vulu oku tu kwathela tu dhimbulukwe shoka a longo. Natu kundathane kombinga yaashoka.

Kala andola wa fa wu wete Jesus naayapostoli ye, ye li megumbo mondunda yopombanda muJerusalem. Osha li uusiku. Oya li ye li poshitaafula. Poshitaafula opwa li pu na onyama yonzi ya yothwa, iikwiila inaayi tulwa efulika nomaviinu. Oya li taya li uulalelo wi ikalekelwa. Mbela owu shi kutya omolwashike?—

Uulalelo mbuno owa li oku ya dhimbulukitha shoka Jehova a li a ningi oomvula omathele manga oshigwana she Israeli, sha li muupika muEgipiti. Pethimbo mpoka Jehova okwa li a lombwele oshigwana she a ti: ‘Egumbo kehe nali dhipage onzigona nokugwayeka ombinzi yayo piikulo yomiyelo dhomagumbo gawo.’ Opo nduno okwe ya lombwele a ti: ‘Indeni meni lyomagumbo geni ne mu lye onyama yonzigona.’

Aaisraeli oya li ya ningi ngaashi ya lombwelwa. Uusiku owo tuu mboka, omuyengeli gwaKalunga okwa li a taakana nevi lyaEgipiti. Omuyengeli okwa li a dhipaga iisheeli momagumbo ogendji. Ihe ngele omuyengeli a mono ombinzi yonzigona piikulo yomiyelo, oha piitilile po pegumbo ndyoka. Onkee ano, aanona yomomagumbo ngoka kaya li ya dhipagwa. Farao, omukwaniilwa gwaEgipiti, okwa li a tilithwa unene kwaashoka omuyengeli gwaJehova a longo. Onkee ano, Farao okwa lombwele oshigwana shaIsraeli a ti: ‘Omwa manguluka okuya. Zii mo moshilongo shandje.’ Okuza mpoka oya londeke iinima yawo koongamelo nokoondoongi noya thigi po Egipiti.

Jehova ka li a hala oshigwana she shi dhimbwe nkene a li e shi mangulula. Onkee ano, okwe shi lombwele a ti: ‘Omu na okulya uulalelo ngaashi mbuka mwa li ongulohi ndjika lumwe momvula.’ Oshigwana shaIsraeli osha li hashi ithana uulalelo mbuka wi ikalekelwa Opaasa. Owu shi kutya omolwashike?— Omolwaashoka omuyengeli gwaKalunga uusiku mboka okwa “pitilile” po omagumbo ngoka ga ndhindhilikwa nombinzi.—Eksodus 12:1-13, 24-27,31.

Jesus naayapostoli ye oya li taya dhiladhila kombinga yoshiningwanima shoka sho ya li taya li uulalelo wOpaasa. Konima yethimbo, Jesus okwa ningi oshinima sha simana noonkondo. Ihe manga inee shi ninga, omuyapostoli Judas ngoka a li kee shi omudhiginini okwa lalekwa mo. Opo nduno Jesus okwa kutha oshikwiila shoka sha hupu po, okwa hambelele, okwe shi pambula nokwe shi pe aalongwa ye e ta ti: “Kwateni, lyeni” nokwe ya lombwele a ti: ‘Oshikwiila shika osho olutu lwandje talu gandjwa omolweni.’

Jesus okwa kutha wo oshitenga shomaviinu. Okwa hambelele, nokwe shi ya pe e ta ti: “Nweni mo amuhe.” Nokwe ya lombwele a ti: ‘Omaviinu ngaka oge lile po ombinzi yandje. Masiku ombinzi yandje otayi ka tilwahi omolwoyendji okudhima po oondjo dheni. Shi ningeni nokudhimbulukwa ndje.’—Mateus 26:26-28; 1 Aakorinto 11:23-26.

Mbela owa ndhindhilika ngaa kutya Jesus okwa lombwele aalongwa ye kutya oye na okukala taye shi ningi noku mu dhimbulukwa?— Itaya ka kala we ye na uulalelo wOpaasa. Pehala lyaashono, omumvo kehe oya li ye na okukala ye na uulalelo mbuka wi ikalekelwa opo ya dhimbulukwe Jesus nosho wo eso lye. Uulalelo mbuka ohawu ithanwa Uulalelo wOmuwa. Olundji kunena ohatu wu ithana Edhimbuluko. Mbela omolwashike?— Omolwaashoka ohawu tu dhimbulukitha shoka Jesus naHe, Jehova Kalunga, ye tu ningila.

Oshikwiila oshi na oku tu dhiladhilitha kombinga yolutu lwaJesus. Jesus okwa li e na ehalo okuyamba olutu lwe lu li eyambo opo tu vule okumona omwenyo gwaaluhe. Mbela ongiini kombinga yomaviinu omatiligane?— Oge na oku tu dhimbulukitha ongushu yombinzi yaJesus. Ombinzi ye oyi na ondilo yi vule ombinzi yonzigona yOpaasa ndjoka ya dhipagelwe muEgipiti. Mbela owu shi kutya omolwashike?— Ombiimbeli otayi ti kutya ombinzi yaJesus otayi vulu okudhima po oondjo dhetu. Ngele oondjo dhetu adhihe odha dhimwa po, itatu ke ehama we, itatu ka kulupa we noitatu ka sa we. Otu na okudhiladhila kwaashoka uuna tu li pEdhimbuluko.

Mbela kehe gumwe oku na okulya oshikwiila nokunwa omaviinu pEdhimbuluko?— Jesus okwa li a lombwele mboka haya li nohaya nu a ti: ‘One tamu ka lya notamu ka nwa poshililo shandje omOshilongo shandje e tamu ka kuutumba kiipangelapundi megulu pamwe nangame.’ (Lukas 22:19, 20, 30) Shika otashi ti kutya oya li taya ka ya megulu ya ka ninge aakwaniilwa pamwe naJesus. Onkee ano, oomboka owala ye na etegameno oku ka pangela pamwe naJesus megulu ye na okulya oshikwiila nokunwa omaviinu.

Ihe nokuli naamboka ihaaya li oshikwiila nenge ihaaya nu omaviinu oye na okukala po pEdhimbuluko. Mbela owu shi kutya omolwashike?— Omolwaashoka Jesus okwe tu gandjela wo omwenyo gwe. Mokukala pEdhimbuluko, otatu ulike kutya inatu dhimbwa omagano ga dhenga mbanda ngoka Kalunga e tupa.

Omanyolo ngoka tagu ulike esimano lyeyambo lyaJesus oga kwatela mo 1 Aakorinto 5:7; Aaefeso 1:7; 1 Timoteus 2:5,6 nosho wo 1 Petrus 1:18,19.

[Omathano pepandja 193]

Mbela ongiini Adam naJesus ya li ya faathana, nomolwashike oshinima shoka sha simanenena?

[Ethano pepandja 194]

Ongiini ombinzi yonzigona ya li ya gamene oshigwana shaIsraeli?

[Ethano pepandja 194]

Ombinzi yaJesus ndjoka a li a faathanitha nomaviinu, otayi vulu oku tu ningila shike?