Ontopolwa 39

Kalunga oha dhimbulukwa Omwana

JESUS okwa li a lili sho kuume ke Lasarus a si. Mbela oto dhiladhila kutya Jehova okwa li u uvite nayi sho Jesus a li ta mono iihuna nokusa?— Ombiimbeli otayi ti kutya Kalunga oha vulu ‘okunika oluhodhi’ noha ‘geyithwa’ nokuli kiinima mbyoka hayi ningwa.—Episalomi 78:40, 41; Johannes 11:35.

Mbela oto dhiladhila kutya Jehova okwa li a yemata shi thike peni sho a li ta tala Omwana omuholike ta si?— Jesus okwa li e na uushili kutya Kalunga ite ke mu dhimbwa. Osho molwaashoka manga inaa sa a li a popi oohapu dhe dhahugunina a ti: “Tate, omwenyo gwandje otandi gu gandja miikaha yoye.”—Lukas 23:46.

Jesus okwa li e na uushili kutya ota ka yumudhwa, ita ka kala nando “muusi” nenge mombila. Konima sho Jesus a yumudhwa kuusi, omuyapostoli Paulus okwa totha mo shoka sha nyolwa mOmbiimbeli kombinga yaJesus taku ti: “Kalunga ine mu ethela [muusi, OB-1954], olutu lwe inalu vula okwoola.” (Iilonga 2:31; Episalomi 16:10) Olutu lwaJesus inalu yonukila mombila, sha hala okutya, inalu ola.

Sho Jesus a li kombanda yevi, okwa li a lombwele aalongwa ye kutya ita ka kala a sa ethimbo ele. Okwa li e ya fatululile kutya ‘ota ka dhipagwa, ihe mesiku etitatu ota ka yumudhwa.’ (Lukas 9:22) Onkee ano, aalongwa kaya li ye na okukala ya kumwa sho Jesus a yumudhwa. Ihe mbela oya li ye shi kuminwa?— Natu tale.

Omulongi Omunene okwa li a sile komuti gwomahepeko lwopondatu yomutenya mEtitano. Omulumentu gumwe omuyamba gwedhina Josef ngoka a li oshilyo shOmpangu yopombanda yOshijuda okwa li i itaala Jesus, ihe omeholamo. Sho a mono kutya Jesus okwa sa, okwa yi kuPilatus, omupangeli gwaRoma. Okwe mu pula ngele ota vulu okukutha ko omudhimba gwaJesus komuti opo e ke gu fumvike. Konima yethimbo Josef okwa fala omudhimba gwaJesus koshikunino hoka ku na ombila moka hamu fumvikwa oonakusa.

Konima sho omudhimba gwa tulwa mombila, posheelo shombila opwe edhilwa nemanya enene. Osha li Osoondaha esiku etitatu. Okwa li kwa luudha molwaashoka etango kalya li lya pita natango. Pombila opwa li pu na aalumentu ya langela po. Aasaaseri aakuluntu oyo ya li ye ya tumu ya ka langele ombila. Mbela ou shi kutya omolwashike?—

Aasaaseri nayo oya li yu uva kutya Jesus okwa ti kutya ota ka yumuka. Opo aalongwa yaJesus kaaya yake mo omudhimba gwe yo ya tye okwa yumuka, aasaaseri mboka oya li ya tula aalangeli pombila. Ombadhilila manga aakwiita ya langela ombila, evi olya tameke okukakama. Opwa monika uuyelele womuyengeli gwaJehova tawu minikile momilema. Aakwiita oya li ya tila noonkondo nomolwaashoka kaya li taya vulu okwiinyenga. Omuyengeli okwa yi nokwa kandula po emanya pombila. Jesus okwa li a yumudhwa.

Eeno, Jesus okwa li a yumuka ngaashi naanaa omuyapostoli Petrus e ke shi popya konima yethimbo a ti: “OJesus tuu nguka Kalunga e mu yumudha kuusi.” (Iilonga 2:32) Kalunga okwa yumudha Jesus kuusi nokwe mu pe olutu lwa fa ndoka a li e na nale manga inee ya kombanda yevi. Jesus okwa li a yumudhwa nolutu lwopambepo lwa fa ndoka lwaayengeli. (1Petrus 3:18) Onkee ano, opo aantu ye mu mone Jesus okwa li e na okulundululila olutu lwe molupe lwopanyama. Mbela osho a li a ningi ngaaka?— Natu shi tale ano.

Sho etango lya li li li pokupita, aakwiita mboka ya li ya langela ombila oya adhika ya za po nale. Maria Magdalena nosho wo aakiintu yalwe mboka ya li aalongwa yaJesus oya li mondjila okuya kombila. Manga ya li mondjila oya pulathana ya ti: ‘Olye te ke tu kandulila po emanya ndiyaka edhigu posheelo shombila?’ (Markus 16:3) Ihe sho ya thiki pombila, emanya olya li lya kandulwa po nale, nombila oya li owala. Omudhimba gwaJesus kagwa li mo mombila. Mbalambala, Maria Magdalena okwa matuka opo a ka konge yamwe yomaayapostoli yaJesus.

Aakiintu yalwe oya kala pombila. Oya li tayi ipula taya ti: ‘Olutu lwaJesus olu li peni?’ Ombaadhilila puyo opwa holokele aalumentu yaali ya zala oonguwo tadhi adhima. Aalumentu mboka oya li aayengeli. Oya pula aakiintu mboka ya ti: ‘Omolwashike tamu kongele Jesus mpaka? Okwa yumudhwa kuusi. Endeleleni mu ka lombwele aalongwa ye kutya okwa yumudhwa kuusi.’ Aakiintu mboka kaya li tuu taye endelele noonkondo! Mondjila oya tsakanene nomulumentu gumwe. Mbela owu shi kutya oye lye?—

Omulumentu ngoka oye Jesus, ngoka a li molutu lwopanyama. Jesus okwa li wo a lombwele aakiintu a ti: ‘Indeni mu ka lombwele aalongwa yandje.’ Aakiintu oya li ya nyanyukwa noonkondo. Oya yi kaalongwa noye ya lombwele ya ti: ‘Jesus oku na omwenyo. Otwe mu mona.’ Maria okwa li a lombwele Petrus naJohannes kombinga yombila ndjoka ya li owala. Oya yi ya ka tale kombila, ngaashi naanaa wu shi wete methano ndika. Oya li taya tala omalapi moka Jesus a li a dhiingilwa noya li ya kumwa sho inaaya adha mo omudhimba gwe mombila. Oya li ye wete kutya Jesus okwa yumuka, ihe osha li oshidhigu okwiitaala.

Konima yethimbo mOsoondaha oyo tuu ndjoka, Jesus okwa holokele aalongwa ye yaali mboka ya li taya yi kuEmaus. Jesus okwe ende pamwe nayo nokupopya nayo, ihe kaya li ye mu dhimbulula molwaashoka ka li e na olutu lwopanyama ndoka a li e na nale. Kaya li ye mu dhimbulula kutya oye Jesus, oye ke mu dhimbulula owala konima sho a li ta galikana ya lye uulalelo. Aalongwa oya li ya nyanyukwa noonkondo noya li ye endelele ya shune kuJerusalem mpoka pu na oshinano oshile. Otashi vulika Jesus a li i ihololele Petrus konima owala yaashika opo e mu ulukile kutya oku na omwenyo.

Osoondaha oyo tuu ndjoka kongulohi, aalongwa oyendji oya li ya gongala mondunda yontumba. Omiyelo odha li dha pata. Ombaadhilila, Jesus okwa holokele mondunda moka ya li. Okuza mpoka oya li ye shi kutya Omulongi Omunene oku na shili omwenyo. Kaya li tuu ya nyanyukwa!—Mateus 28:1-15; Lukas 24:1-49; Johannes 19:38–20:21.

Jesus okwa kala nokwiihololela aalongwa ye uule womasiku 40 e li momalutu gopanyama ga yoolokathana opo e yu ulukile kutya oku na omwenyo. Opo nduno okwa thigi po evi nokwa shuna kuHe megulu. (Iilonga 1:9-11) Mbalambala aalongwa oya tameke okulombwela kehe gumwe kutya Kalunga okwa yumudha Jesus. Nokuli naasho aasaaseri ye ya dhenge nokudhipagitha yamwe yomuyo, aalongwa oya tsikile owala nokuuvitha. Oye shi shi kutya ngele oya si, Kalunga ote ke ya dhimbulukwa ngaashi owala a li a dhimbulukwa Omwana.

Aalanduli yaJesus yonale kaya li tuu ya yooloka ko kaantu oyendji kunena! Aantu oyendji kunena ngele taya thiki lwopethimbo mpoka Jesus a li a yumudhwa, ohaya kala owala taya dhiladhila kombinga yiinima mbyoka hayi longithwa pethimbo lyoshituthi sho-Easter, ngaashi uulimba nomayi gomalwaala gi ili nogi ili. Ihe Ombiimbeli inayi popya sha kombinga yuulimba nomayi go-Easter. Oya popya owala kombinga yokulongela Kalunga.

Otatu vulu okukala twa fa aalongwa yaJesus mokulombwela aantu kutya Kalunga okwa longa oshikumithalonga sho a yumudha Omwana. Katu na nando okukala twa tila nokuli nando aantu oya tye kutya otaye tu dhipaga. Ngele otwa si, Jehova ote ke tu dhimbulukwa noku tu yumudha, ngaashi naanaa a yumudha Jesus.

Mbela inatu nyanyukwa okutseya kutya Kalunga oha dhimbulukwa mboka haye mu longele note ke ya yumudha nokuli kuusi?— Okutseya iinima mbika oku na oku tu ningitha tu kale twa hala okutseya kutya ongiini tatu vulu okunyanyudha Kalunga. Mbela owu shi ngaa kutya otatu vulu lela okunyanyudha Kalunga?— Natu ka kundathane kombinga yaashika montopolwa tayi landula.

Okwiitaala meyumuko lyaJesus oku na okukoleka etegameno lyetu. Lesha Iilonga 2:22-36; 4:18-20 nosho wo 1 Aakorinto 15:3-8, 20-23.

[Ethano pepandja 202]

Omolwashike ombila yi li owala? Oshike sha ningwapo?

[Ethano pepandja 205]

Mbela Petrus naJohannes otashi vulika ya li taya dhiladhila shike?

[Ethano pepandja 206]

Aantu oyendji kunena ngele taya thiki lwopethimbo mpoka Jesus a li a yumudhwa, ohaya kala taya dhiladhila kombinga yashike? Ihe mbela ngoye oho kala to dhiladhila kombinga yashike?