Ontopolwa 42
Omolwashike twa pumbwa okulonga?
OSHIKE mbela wu hole unene, okulonga nenge okudhana?— Dhoshili, okudhana inaku puka. Ombiimbeli oya popya kutya ‘omapandaanda gaJerusalem oga li gu udha aamati naakadhona taa dhana.’— Sakaria 8:5.
Omulongi Omunene okwa li ha nyanyukilwa okutala aanona taya dhana. Manga inee ya kombanda yevi okwa li a popi a ti: “Oko nda li nale engomba nda tegama [naKalunga].. naaluhe nda dhanene koshipala she.” Ndhindhilika kutya Jesus okwa li ha longo pamwe naJehova megulu. Sho a li megulu okwa li a ti: ‘Enyanyu lyandje olya li okunyanyukilwa aana yaantu.’ Eeno, ngaashi twi ilonga nale, Omulongi Omunene okwa kala e na ohokwe naantu ayehe mwa kwatelwa naanona aashona.—Omayeletumbulo 8:30,31.
Mbela oto dhiladhila kutya Jesus okwa li ha dhana sho a li okanona?— Otashi vulika a li he shi ningi. Ihe molwaashoka okwa li “engomba” megulu, mbela okwa li ngaa ha longo naasho a li kombanda yevi?— Jesus okwa li hi ithanwa “omuna gwomuhongi gwiipilangi.” Ihe okwa li wo hi thanwa “omuhongi gwiipilangi.” Mbela shika otashi ulike shike?— Josef ngoka a putudha Jesus e li omwanamati, otashi vulika a li e mu longo okuhonga iipilangi. Onkee ano, Jesus naye okwa ningi wo omuhongi gwiipilangi.—Mateus 13:55; Markus 6:3.
Jesus okwa li omuhongi gwiipilangi a tya ngiini?— Molwaashoka okwa li engomba megulu, mbela ito dhiladhila nando kutya okwa li wo engomba mokuhonga iipilangi kombanda yevi?— Dhiladhila owala nkene sha li oshidhigu pethimbo ndyoka okukala omuhongi gwiipilangi. Otashi vulika Jesus a li ha yi a ka tete omiti e te dhi tete miintimbu, noku yi fala kegumbo opo nduno te yi hongo yi ninge iitaafuula niipundi yoombaanga nosho wo iinima yilwe.
Mbela oto dhiladhila kutya Jesus okwa li a nyanyudhwa kiilonga mbyoka?— Mbela ando ongoye, oto ka kala wa nyanyukwa ngele owa ningile aantu iitaafula niipundi nosho wo iinima yilwe?— Ombiimbeli otayi ti kutya oshi li mondjila omuntu a ‘nyanyukilwe iilonga ye.’ Okulonga ohaku eta enyanyu ndyoka ihaali monika mokudhana.—Omuuvithi 3:22.
Dhoshili, iilonga otayi vulu oku tu etela uuwanawa palutu nopamadhiladhilo. Aanona oyendji ohaya kala owala ya kuutumba taya tala o-TV nenge taya dhana omaudhano govideo. Shoka ohashi ya ningi ya kale yo ondoka nayi, kaaye na oonkondo nokaaye na naanaa enyanyu. Aanona ya tya ngaaka ihaya nyanyudha nokuli aantu yalwe. Mbela otwa pumbwa okuninga shike opo tu kale twa nyanyukwa?—
Otwa li twi ilongo mOntopolwa 17 yembo ndika kutya okugandja nokukwathela yalwe ohaku eta enyanyu. (Iilonga 20:35) Ombiimbeli otayi popi Jehova e li “Kalunga omunelago.” (1 Timoteus 1:11, OB-1954) Ngaashi naanaa twa li twa lesha mOmayeletumbulo, Jesus “okwa li ha kala ta dhanene koshipala she ethimbo alihe.” Omolwashike Jesus a li ha kala a nyanyukwa?— Okwa li a gandja etompelo limwe kutya omolwashike sho a ti: “Tate ota longo aluhe, nangame wo ondi na okulonga.”—Johannes 5:17.
Sho Jesus a li kombanda yevi, ka li omuhongi gwiipilangi onkalamwenyo ye ayihe. Jehova Kalunga okwa li e mu nine iilonga yi ikalekelwa mbyoka a li e na okulonga kombanda yevi. Mbela owu shi kutya oshike a li e na okulonga?— Jesus okwa ti: ‘Onkundana ombwanawa yUukwaniilwa waKalunga ondi na oku yi uvitha wo miilando yilwe, oshoka osho naanaa shika Kalunga a tumu ndje, ndi shi ninge.’ (Lukas 4:43, yelekanitha KB.) Omathimbo gamwe sho Jesus a li u uvithile aantu, oya li ye mu itaale noya li ya lombwele yalwe kombinga yiinima mbyoka e ya lombwele, ngaashi naanaa omukiintu Omusamaria nguka wu wete mpaka a li a ningi.—Johannes 4:7-15, 27-30.
Jesus okwa li u uvitile ngiini okulonga iilonga mbika? Mbela oto dhiladhila kutya okwa li ngaa a hala oku yi longa?— Jesus okwa ti: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.” (Johannes 4:34) Mbela owu hole okulya shi thike peni iikulya mbyoka wu hole?— Shika otashi ku kwathele wu mone kutya Jesus okwa li e hole shi thike peni okulonga iilonga mbyoka Kalunga e mupa.
Kalunga okwe tu shita tu kale hatu nyanyukilwa iilonga. Okwa ti kutya omagano ngoka a pa omuntu ogo kutya oku na ‘okunyanyukilwa iilonga ye yuudhiginini.’ Onkee ano, ngele owi ilongo okulonga manga wu li omushona, oto ka nyanyukilwa noonkondo onkalamwenyo yoye ayihe.—Omuuvithi 5:19, NW.
Shoka inashi hala okutya aanona aashona otaya vulu okulonga iilonga mbyoka tayi longwa komukuluntu, ihe atuheni otatu vulu okulonga sha. Aavali yoye otashi vulika haya yi kiilonga esiku kehe opo uukwanegumbo weni wu mone iimaliwa yokulanda iikulya negumbo lyokukala. Owu na okukala wu shi kutya megumbo omu na iilonga oyindji mbyoka ya pumbwa okulongwa opo li kale monkalo yi li nawa nolya yela.
Iilonga yini to vulu okulonga mbyoka tayi etele uukwanegumbo auhe uuwanawa?— Oto vulu okutula iiyaha poshitaafula, okuyoga iiyaha, okutilahi iiyagaya, okwoopaleka ondunda yoye nokupungula nawa iidhanitho yoye. Otashi vulika yimwe yomiinima mbika ho yi ningi nale. Iilonga mbyoka otayi etele shili uukwanegumbo auhe uuwanawa.
Natu tale kutya ongiini iilonga ya tya ngaaka tayi etele uukwanegumbo uuwanawa. Owu na okupungula iidhanitho yoye konima ngele wa mana okudhana. Mbela sho to dhiladhila omolwashike naanaa sha simana?— Ohashi kaleke egumbo lya yela nawa nohashi keelele iidhanitho kaayi ete oshiponga. Ngele iho pungula iidhanitho yoye, esiku limwe meme gwoye otashi vulika e ende po a humbata iinima oyindji e ta lyata koshidhanitho shimwe. Otashi vulika a punduke nokwiihata po e ta mono oshiponga. Mbela shoka itashi ka kala ngaa sha nika oshiponga?— Onkee ano, ngele owa kala ho pungula iidhanitho yoye ngele wa mana okudhana, otashi etele uukwanegumbo uuwanawa.
Aanona ohaya longo wo iilonga yilwe. Pashiholelwa, ohaya longo iilonga yosikola. Kosikola oho ilongo okulesha. Aanona yamwe ohaya nyanyukilwa okulesha, ihe yalwe ohaya ti kutya okudhigu. Nokuli nando otashi vulika ku kale kwa fa okudhigu petameko, oto ka kala wa nyanyukwa ngele owi ilongo nawa okulesha. Ngele owu shi okulesha, opu na iinima oyindji yihokitha mbyoka to vulu okwiilonga. Oto ka kala nokuli to vulu okulesha kungoye mwene embo lyaKalunga, Ombiimbeli. Onkee ano, ngele owa kala ho longo iilonga yoye yosikola nawa, otashi ke ku etela uuwanawa, hasho mbela?—
Opu na aantu yamwe mboka haya kambadhala okuhenuka iilonga. Otashi vulika wu shi omuntu gumwe ngoka ha ningi ngaaka. Ihe molwaashoka Kalunga okwe tu shita tu kale hatu longo, otwa pumbwa okwiilonga nkene tu na oku yi nyanyukilwa. Omulongi Omunene okwa li ha nyanyukilwa iilonga ye shi thike peni?— Osha li owala sha fa ta li iikulya mbyoka e hole. Mbela okwa li ta popi kombinga yiilonga yini?— Oyokulombwela yalwe kombinga yaJehova Kalunga nosho wo nkene taya vulu okumona omwenyo gwaaluhe.
Mpaka opu na oshinima shimwe shoka tashi vulu oku tu kwathela tu nyanyukilwe okulonga. Ipula to ti: ‘Omolwashike iilonga mbika ya pumbwa okulongwa?’ Ngele wu shi kutya oshinima shontumba osha simana, ohashi kala oshipu oku shi longa. Kutya nduno iilonga oyindji nenge iishona, yi longa nuudhiginini. Ngele owe shi ningi, oto vulu okunyanyukilwa iilonga yiikaha yoye, ngaashi naanaa Omulongi Omunene a li a nyanyukilwa iilongaye.
Ombiimbeli otayi vulu okukwathela omuntu a kale omulongi omwaanawa. Lesha shoka tayi ti mOmayeletumbulo 10:4; 22:29; Omuuvithi 3:12, 13 nAakolossa 3:23.
[Ethano pepandja 217]
Omulongi Omunene okwa li ha nyanyukilwa shike manga inee ya kombanda yevi?
[Omathano pepandja 218]
Iilonga yopaali yini Jesus a li a longo sho a li kombanda yevi?
[Ethano pepandja 221]
Omolwashike sha simana okupungula iidhanitho yoye konima yokudhana?