Uuyuni uupe pauvaneko lyaKalunga
OMBIMBELI, Oohapu dhaKalunga dha nyolwa, otayi tu pe etegameno sho tayi ti: “Opauvaneko lye otse otatu tegelele omagulu omape nevi epe, moka tamu ka kala uuyuuki.”—2 Petrus 3:13.
“Omagulu omape” oshike? Ombimbeli otayi kwatakanitha kumwe egulu nepangelo. (Iilonga 7:49) “Omagulu omape” ogo epangelo epe ndyoka tali ka pangela evi alihe. Oli li epe molwashoka otali ka pingena po onkalelo yongashingeyi yomapangelo; oli li wo onkatu ompe mokugwanitha elalakano lyaKalunga. Olyo Uukwaniilwa mboka Jesus e tu longa tu galikane kombinga yawo. (Mateus 6:10) Molwashoka Kalunga oye Onzo yalyo noha kala megulu, ohali ithanwa ‘uukwaniilwa womegulu.’—Mateus 7:21, KB.
‘Evi epe’ oshike? Kali shi ongonga yevi ompe, molwashoka Ombimbeli otayi popi sha yela kutya evi otali ka kalwa sigo aluhe. ‘Evi epe’ olyo uulipamwe uupe waantu. Otali ka kala epe molwashoka aakolokoshi otaya ka kala ya kuthwa ko. (Omayeletumbulo 2:21, 22) Opo nduno ayehe mboka ye na omwenyo otaya ka simaneka Omushiti notaya ka vulika kuye notaya ka kala metsokumwe niitegelelwa ye. (Epsalmi 22:28) Aantu yomiigwana ayihe otaya hiwa yi ilonge iitegelelwa mbyoka nokutsitha kumwe onkalamwenyo yawo nayo ngashingeyi. Mbela osho to ningi?
Muuyuni uupe waKalunga, kehe gumwe ota ka simaneka epangelo Lye. Mbela ohole yokuhola Kalunga otayi ku inyengitha u vulike kuye? (1 Johannes 5:3) Mbela shika oshi iwetikile maandjeni? kiilonga nenge kosikola? momukalo moka to longitha onkalamwenyo yoye?
Muuyuni mboka uupe, uulipamwe waantu otau ka kala wa hangana mokulongela Kalunga kashili. Mbela oho longele Omushiti gwegulu nogwevi? Mbela okulongela Kalunga kwoye otaku ku hanganitha shili naalongelikalunga ooyakweni yomiigwana ayihe, yomomihoko adhihe nosho wo yomomalaka agehe?—Epsalmi 86:9, 10; Jesaja 2:2-4; Sefanja 3:9.
[Oshimpungu pepandja 17]
Kalunga ngoka tu uvaneke iinima mbika
Oye Omushiti gwegulu lyo lyenelyene nogwopulaneta yEvi. Oye ngoka a popiwa kuJesus Kristus e li “Kalunga awike gwashili.”—Johannes 17:3.
Aantu oyendji ohaya simaneke iikalunga mbyoka ya ninga yo yene. Omamiliyona ohaga galikana iihongwathano kaayi na omwenyo. Yalwe ohaya simaneke omahangano gopantu, uufilosofi u na ko nasha nokulalakanena omaliko, nenge omahalo gawo yene. Nokuli naamboka haya ti kutya ohaya longitha Ombimbeli, haayehe yomuyo haya simaneke edhina lyaangoka tayi popi e li ‘Kalunga kashili.’—Deuteronomium 4:35.
Shi na ko nasha naye mwene, Omushiti ota ti: “Ongame [Jehova, NW] olyo edhina lyandje.” (Jesaja 42:5, 8) Edhina ndyoka olya holoka mOmbimbeli lwiikwando 7 000 lwaampono momalaka gayo gopetameko. Jesus Kristus okwa longo aalanduli ye ya galikane taya ti: “Tate yetu megulu. Edhina lyoye nali yapulwe.”—Mateus 6:9.
Kalunga kashili omuntu a tya ngiini? Oti ihokolola ye mwene e li “omunamutimahenda nomunambili, omutalanteni gwokugeya, e na ohole nuudhiginini” noku li ngoka ihaa kala inaa geela mboka taya yonene owina iipango ye. (Eksodus 34:6, 7) Ondjokonona yi na ko nasha nokuungaunga kwe naantu otayi koleke uushili woohapu ndhoka.
Edhina nosho wo omuntu ngoka e lilwe po kedhina ndyoka oku na okuyapulwa nenge okutalika ko omuyapuki. E li Omushiti nOmunamapangelo gweshito alihe, otu na okuvulika kuye nokwa gwana okulongelwa kutse. Mbela ngoye ayihe mbyoka oho yi mu ningile?
[oshimpungu/Ethano pepandja 18]
Omalunduluko geni “omagulu omape nevi epe” tayi ke eta?
Evi otali ka lundulukila mOparadisa Lukas 23:43
Uulipamwe womuuyuni auhe moka Johannes 13:35;
aantu yomiigwana ayihe, yomomihoko Ehololo 7:9, 10
adhihe noyomomalaka agehe ya
hangana mohole
Ombili yomuuyuni auhe, egameno Epsalmi 37:10, 11;
lyashili kwaayehe Mika 4:3, 4
Iilonga tayi mbilipaleke, iikulya Jesaja 25:6; 65:17, 21-23
ya gwana
Omikithi, oluhodhi neso otayi ka Jesaja 25:8; Ehololo 21:1, 4
kuthwa po
Uuyuni wa hangana mokulongela Ehololo 15:3, 4
Kalunga kashili
[oshimpungu/Omathano pepandja 19]
Mbela oto ka mona mo uuwanawa?
Kalunga iha fundju!—Titus 1:2.
Jehova ota ti: “Oohapu dhandje . . . itadhi galukile kungame dhowala, aawe, otadhi longo shono sho opalela ndje, notadhi gwanitha shoka, nde dhi shi tuminine.”—Jesaja 55:11.
Jehova ota shiti nale “omagulu omape nevi epe.” Epangelo lyomegulu olya dhikwa po nale. Ekankameno ‘lyevi epe’ olya yalwa po nale.
Konima yokupopya kombinga yiinima yimwe iikumithi mbyoka “egulu epe nevi epe” tayi ke etela aantu, Ehololo otali totha moohapu dhaKalunga mwene, Omunamapangelo gweshito alihe, tali ti: “Tala, ayihe otandi yi shitukitha iipe.” Okwa ti wo: “Shanga, oshoka oohapu ndhika odha kola nodhoshili.”—Ehololo 21:1, 5.
Epulo lya simanenena olyo: Mbela tseni ohatu ningi ngaa omalunduluko ngoka ga pumbiwa opo tu kale twa gwana okukala oshitopolwa ‘shevi epe’ ndyoka li li mepangelo ‘lyomagulu omape’?