Otwa nyanyangidhile shike Ombiimbeli yo-New World Translation?

Uule woomvula omilongo, Oonzapo dhaJehova odha kala tadhi longitha, tadhi pilinta nokutopolela aantu Oombiimbeli ndhoka dha tolokwa kaantu yi ili noyi ili. Ihe konima otwa li twa mono kutya otwa pumbwa Ombiimbeli ya tolokululwa ndjoka tayi ka kwathela aantu ya “tseye oshili” ndjoka Kalunga a hala ya tseye. (1 Timoteus 2:3, 4) Omolwetompelo ndyoka, mo-1950 otwa tameke okunyanyangidha iitopolwa yOmbiimbeli yo-New World Translation ya nyolwa melaka ngaashi hali popiwa ngashingeyi. Ombiimbeli ndjika oya tolokwa ya tolokekeka momalaka ge vulithe pe-100 noya popya naanaa ngaashi Ombiimbeli ya li ya popya momalaka gopetameko.

Opwa li pwa pumbiwa Ombiimbeli melaka ndyoka epu okuuviwa ko. Omalaka ohaga ende taga lunduluka, nomolwaashono Oombiimbeli odhindji odhi na uutumbulilo inaawu yela nawa nenge ihaawu longithwa we melaka nenge ihaawu uviwa ko nuupu. Opwa li wo pwi itsuwa omanyolo gonale ga faathana lelalela naangeyaka gotangotango, nomanyolo ngaka oga li ge shi ningitha oshipu okuuva ko nawa Oshihebeli, Oshiaramea nOshigreka shoka tashi adhika momanyolo gonale gopaMbiimbeli.

Opwa li pwa pumbiwa Ombiimbeli ndjoka inaayi lundulula oohapu dhaKalunga. Mboka taya toloka Ombiimbeli oye na oku yi toloka itaaya gwedha mo, yo itaya kutha mo sha opo yi kale ngaashi ya li sho ya nyolwa petameko. Ihe mOombiimbeli odhindji edhina lyaKalunga, Jehova, inali longithwa mo.

Opwa li pwa pumbiwa Ombiimbeli ndjoka tayi simanekitha Omunyoli gwayo. (2 Samuel 23:2) Edhina Jehova olya longithwa mo ishewe lwiikando 7 000 mOmbiimbeli yo-New World Translation ngaashi lya li momanyolo gOmbiimbeli gonalenale, ngaashi shu ulikwa moshiholelwa shoka shi li pevi. (Episalomi 83:18) Molwaashono momukokomoko gwoomvula opwa li pwa ningwa omapekapeko nomakonakono gomuule, oshe tu kwathela tu toloke Ombiimbeli ompu okuleshwa, ndjoka tayi holola thiluthilu omadhiladhilo gaKalunga. Kutya nduno owu na Ombiimbeli yo-New World Translation melaka lyoye nenge ku yi na, otatu ku ladhipike wu kale ho lesha Oohapu dhaJehova esiku kehe.—Josua 1:8; Episalomi 1:2, 3.

• Oshike she tu ningitha tu tokole kutya otwa pumbwa Ombiimbeli ya tolokululwa?

• Omuntu kehe ngoka a hala okutseya ehalo lyaKalunga oku na okukala ha ningi shike esiku kehe?