Oshike tashi ka ningilwa omalongelokalunga?

1. Mbela omalongelokalunga agehe oga hokiwa kuKalunga?

Momalongelokalunga agehe omu na aantu ye na omitima omiwanawa. Onkundana ombwanawa oyo ndjika kutya Kalunga oku ya wete noku na ko nasha nayo. Shiyemateka, opu na aantu oyendji mboka haya yi koongeleka, ihe ohaya ningi iinima iiwinayi. (2 Aakorinto 4:3, 4; 11:13-15) Aatoolinkundana ohaya kundaneke kutya omalongelokalunga gamwe ohaga kutha ombinga nokuli miinima ngaashi uukulo, omadhipago gomihoko, iita, nehepeko lyaanona. Shika ohashi yemateke aanamitima omiwanawa mboka yi itaala Kalunga. — Lesha Mateus 24:3-5, 11, 12.

Elongelokalunga lyashili ohali simaneke Kalunga, omanga omalongelokalunga giifundja hage mu yemateke. Ohaga longo aantu omalongo giifundja ngoka kaage li mOmbiimbeli, ngaashi kombinga yaKalunga nokombinga yoonakusa. Ihe Jehova okwa hala aantu ya tseye oshili kombinga ye. — Lesha Omuuvithi 9:5, 10; 1 Timoteus 2:3-5.

2. Oshike tashi ka ningilwa omalongelokalunga?

Otashi nyanyudha okutseya kutya Kalunga ita fundjalekwa komalongelokalunga ngoka taga ti kutya oge mu hole, ihe nani haye ge hole shili oge hole owala uuyuni waSatana. (Jakob 4:4) MOmbiimbeli omalongelokalunga giifundja agehe oga lukwa “Babiloni oshinene.” Babiloni oshilando sha li ko nale konima yEyelu lyaNoowa moka mwa tamekela omalongelokalunga giifundja. Masiku, Kalunga ota ka hulitha po omalongelokalunga ngoka haga kengelele aantu nohage ya thindile kongudhi; naashika otashi ka ningwa manga inaage shi tegelela. — Lesha Ehololo 17:1, 2, 5, 16, 17; 18:8.

Ihe nonando oongawo, opu na onkundana ombwanawa. Jehova ina dhimbwa aanamitima omiwanawa mboka yi ihanena momalongelokalunga giifundja muuyuni awuhe. Ohe ya hanganitha mehangano limwe moku ya longa oshili. — Lesha Mika 4:2, 5.

3. Aanamitima omiwanawa oye na okuninga po shike?

Jehova oku hole aantu mboka ye hole oshili noye hole uuwanawa. Ohe ya ladhipike ya ze mo momalongelokalunga giifundja neendelelo. Aantu mboka ye hole Kalunga oye na ehalo lyokuninga omalunduluko opo ye mu nyanyudhe. — Lesha Ehololo 18:4.

Oomvula 1 900 dha pita, sho aanamitima omiwanawa ya lombwelwa onkundana ombwanawa kaayapostoli oye yi taamba ko nenyanyu. Oya li ya longwa kuJehova omukalo omupe gwokukalamwenyo; okukalamwenyo hoka kwe ya etela enyanyu shi vulithe nale, kwe ya kwathela ya kale ye na elalakano noye na etegameno. Oye tu tulila po oshiholelwa oshiwanawa molwaashoka oya li ya taamba ko onkundana ombwanawa sho ya pititha Jehova komeho moonkalamwenyo dhawo. — Lesha 1 Aatessalonika 1:8, 9; 2:13.

Jehova oha taamba ko ayehe mboka taya thigi po omalongelokalunga giifundja ya ninge oshitopolwa shegumbo lye, moka mu na mboka taye mu longele. Ngele owa taamba ko ehiyo lyaJehova, oto ka ninga kuume ke, noto ka kala wu na ooho noonyoko naamwanyoko aape ye ku hole mboka nayo ye li aalongeli yaJehova, noto ka mona wo omwenyo gwaaluhe. — Lesha Markus 10:29, 30; 2 Aakorinto 6:17, 18.

4. Kalunga ota ka ninga po shike opo moshilongo kehe mu kale enyanyu?

Onkundana kutya masiku omalongelokalunga giifundja otaga ka hanagulwa po oyi li onkundana ombwanawa shili. Okuhanagulwa po kwago otaku ke etela aantu muuyuni awuhe epepelelo nemanguluko. Okuza mpoka omalongelokalunga giifundja kage na we esiku ga ka pukithe aantu nenge ge ya topole. Ayehe mboka taya ka kala ye na omwenyo otaya ka longela Kalunga awike kashili ya hangana. — Lesha Ehololo 18:20, 21; 21:3, 4.