Oshiholekwa shoka tatu ka kala twa nyanyukwa ngele otwe shi uvu

Owa lombwelwa ngaa nale oshiholekwa?— a Ombiimbeli otayi popi kombinga ‘yoshiholekwa’ shi ikalekelwa sha popiwa kuKalunga. Otaku tiwa kutya oshiholekwa, oshoka aantu kaya li ye shi tseya. Naayengeli oya li ya hala oku shi uva. Mbela ino hala nando okuuva oshiholekwa shika?— 

Nalenale, Kalunga okwa li a shiti omulumentu nomukiintu gwotango. Omadhina gawo oAdam naEva. Kalunga okwe ya pe egumbo ewanawa hali ithanwa oshikunino shaEden. Andola Adam naEva oya vulikile kuKalunga, andola yo noyana oya ka ninga evi alihe oparadisa, li li ngaashi oshikunino shaEden. Ando oya kala mOparadisa sigo aluhe. Ihe mbela oto dhimbulukwa kutya Adam naEva oya li ya ningi shike?— 

Adam naEva inaya vulika kuKalunga nomolwaashono evi kaali shi oparadisa kunena. Ihe Kalunga okwa ti kutya ota ka ninga evi alihe ewanawa, naantu ayehe otaya ka kala nomwenyo sigo aluhe noya nyanyukwa. Ote ke shi ninga ngiini? Aantu oya kala ethimbo ele kaaye shi shi. Osha li oshiholekwa.

Sho Jesus a li kombanda yevi, okwa li a longo aantu kombinga yoshiholekwa shika. Okwa popi kutya oshi na ko nasha nUukwaniilwa waKalunga. Jesus okwa li a longo aantu ya galikane Uukwaniilwa mbuka wu ye. Owo tawu ka ninga evi oparadisa ombwanawa.

Mbela owa halelela okutseya oshiholekwa shika?—  Oomboka owala haya vulika kuJehova taya ka kala mOparadisa. Ombiimbeli oyi na omahokololo ogendji kombinga yaalumentu naakiintu mboka ya li ya vulika kuJehova. Ino hala oku ya tseya?—  Natu tale kutya yamwe yomuyo oolye nonkene tatu vulu oku ya holela.