Oshilongo shaKalunga oshike?

SHOKA OMBIIMBELI TAYI TI

‘Kalunga komegulu ota ka dhika po oshilongo, [nenge uukwaniilwa] mboka waa na hulilo.’​— Daniel 2:44, yelekanitha NW.

‘Otwa pewa omumati! Epangelo lye, oli li komapepe ge.’​— Jesaja 9:6.

UUWANAWA MBOKA TO VULU OKUMONA UUNA WU SHI KUTYA UUKWANIILWA WAKALUNGA OSHIKE

• Oto ka mona kutya uukwaniilwa owu li epangelo ndyoka tali vulu oku ku etela uuwanawa paumwene.​— Jesaja 48:17, 18.

• Muuyuni uupe mboka tawu ya, sho uukwaniilwa waKalunga tawu ka pangela, oto ka kala wu na uukolele wi ihwapo nowu na ombili.​— Ehololo 21:3, 4.

MBELA OTU NA NGAA SHILI OKWIITAALA SHOKA OMBIIMBELI TAYI TI?

Eeno, opu na omatompelo ogendji, ihe natu tale owala gaali gomugo:

• Jesus okwa popya shoka Uukwaniilwa waKalunga tawu ka ninga. Jesus okwa longa aalanduli ye ya galikane oshilongo shaKalunga shi ye, nenge tu tye, Uukwaniilwa waKalunga wu ye nosho wo ehalo lyaKalunga li gwanithwe kombanda yevi. (Mateus 6:9, 10) Jesus okwa li e shi ulike sho a li kombanda yevi nkene egalikano ndyoka tali ka gwanithwa.

  Okwa li a kutitha aasindjala, a aludha aavu nokuyumudha aasi. (Mateus 15:29-38; Johannes 11:38-44) Jesus oye a li ta ka ninga omukwaniilwa, gUukwaniilwa waKalunga gwomonakuyiwa. Sho a li kombanda yevi okwe shi ulika nawa kutya Uukwaniilwa waKalunga otawu ka ningila shike aalelwa yawo.​— Ehololo 11:15.

• Iinima mbyoka tayi ningwa muuyuni otayi ulike kutya masiku Uukwaniilwa waKalunga owu li pokuya. Jesus okwa hunganeka kutya sho Uukwaniilwa waKalunga wu li pokweeta ombili kombanda yevi, muuyuni otamu ka kala iita, ondjala nosho wo omakakamo gevi.​— Mateus 24:3, 7.

  Iinima mbyoka ohatu yi mono nohatu yi uvu tayi ningwa kunena. Onkee ano, otatu vulu okukala neinekelo lya kola kutya masiku Uukwaniilwa waKalunga otawu ka hulitha po omaupyakadhi agehe ngoka.