OSHITOPOLWA OSHI-5

Galukileni ‘komusita nomutekuli gwoomwenyo dheni’

Mbela owa li wi iyadha to nyengwa okutaaguluka eshongo limwe, nenge gamwepo ngoka ga kundathanwa mokambo hano? Ngele osho hangoye awike. Aapiya yaKalunga oyendji aadhiginini oya li ya taalelwa komashongo ga fa ngoka. Yamwe oyo mboka ya li ko pethimbo lyOmbiimbeli nayalwe oyopethimbo lyetu. Mbela Jehova okwa li e ya kwathele? Eeno, okwe ya ambidhidha ya pite momashongo moka ya li. Nangoye ota vulu oku ku kwathela.

“Onda tameke oku shi mona mo kutya Jehova ine etha ndje nando, onda li owala ndi na okukonga ondjila ndjoka tayi galulile ndje kuye ishewe”

KALA wu shi kutya Jehova ota ka kala a gama kungoye sho to galukile kuye. Ote ke ku kwathela wu kondjithe omalimbililo nenge iimpwiyu nosho wo omaiyuvo omawinayi ngoka wu na. Ote ke ku pa ombili yopamadhiladhilo noyokomutima ndjoka hayi zi mokukala wu na eiyuvo lya yela. Shono otashi ke ku inyengitha wu longele Jehova pamwe naapiya ye mboka haye mu hambelele. Onkalo mono wu li oya fa ndjoka mwa li Aakriste yamwe yomethelemumvo lyotango. Omuyapostoli Petrus okwa li e ya nyolele a ti: “Omwa li mwa fa oonzi dha kana, ihe ngashingeyi omwa galulilwa kegumbo, opo mu landule omusita nomutekuli gwoomwenyo dheni.” — 1 Petrus 2:25.

Okugalukila kuJehova oku li oshinima oshiwanawa kaaku na we shoka to vulu okuninga. Omolwashike tatu tile ngawo? Oku shi ninga otaku nyanyudha omutima gwaJehova. (Omayeletumbulo 27:11) Jehova naye ohu uvu nayi, molwaashoka oku na omaiyuvo. Onkee ano, shoka tatu ningi ohashi mu gumu. Kakele kaashono, ye ihe tu thiminike tu kale tu mu hole notu mu longele. (Deuteronomium 30:19, 20) Omulumentu gumwe omulongwantu gwOmbiimbeli okwa ti: “Kapu na sha shoka tashi vulu okweegulula omutima gwomuntu okuziilila kombanda. Ohagu egululwa owala okuziilila meni.” Otatu ka egulula omweelo ngoka gwopathaneko, ngele otatu longele Jehova nomutima gu udha ohole. Uuna tatu shi ningi, otatu mu pe omagano dhingi, sho tatu mu simaneke. Tse otatu nyanyudha wo omutima gwe shimwe to nyengwa. Mbela opu na ngaa sha shoka hashi tu etele enyanyu ndyoka hali tu zile mokugandja kuJehova esimaneko ndyoka a gwana oku li pewa? Nando wu ke ende, ito shi mono. — Iilonga 20:35; Ehololo 4:11.

Omumwameme ngoka ini ipyakidhila ta hambelelwa nohamu sho a galukile kegongalo

Shimwe ishewe, uuna wa tameke niilonga yoye megongalo lyopaKriste, nena oompumbwe dhoye dhopambepo otadhi ka gwanithwa po. (Mateus 5:3) Omomukalo guni? Aantu muuyuni ohayi ipula kutya omolwashike tu li kombanda yevi? Ohaya kala ya halelela okuuva kutya elalakano lyonkalamwenyo olyashike. Jehova oye a shita aantu ye na ompumbwe ndjoka. Okwa hala tu mone enyanyu ndyoka hali zi moku mu longela. Ombili yokomwenyo otatu ke yi mona owala uuna tatu mu longele sho tu mu hole shili. — Episalomi 63:1-5.

Kala wu shi kutya Jehova okwa hala wu galukile kuye. Oto shi mono nee ngiini kutya osho a hala? Dhiladhila owala kutya okambo hano oka longekidhwa nawa pamwe negalikano, opo wu kwathelwe. Otashi vulika we ka mono sho we ka etelwa komukuluntugongalo nenge komwiitaali omukweni. Oshe ku inyengitha wu ka leshe nowu tule miilonga etumwalaka ndyoka li li mo. Oonkambadhala adhihe ndhika odhi li euliko kutya Jehova ine ku ekelahi. Pehala lyaashono, okwa hala oku ku eta nenge oku ku galulila ishewe kuye. Onkee ano, ote ku indile nesimaneko enene wu galukile kuye. — Johannes 6:44.

Otashi tu hekeleke okutseya kutya Jehova iha dhimbwa nando aapiya ye mboka ya kana. Omumwameme Donna naye okwa pandula oshinima shoka. Okwa ti: “Onda li nde ende tandi zi moshili okaendanampadhi, ihe olundji onda li ndi iyadha tandi dhiladhila oohapu dhi li mEpisalomi 139:23, 24 tadhi ti: ‘Konakona ndje, Kalunga, ngoye u tseye omutima gwandje; tala ndje, u dhimbulule omadhiladhilo gandje. Tala ndje, ngele ndi li mondjila ndjoka yu uka kekano, u endithile ndje mondjila yaaluhe.’ Onda li ndi shi kutya ngame kandi shi gwomuuyuni, molwaashoka nando ndi iyeleke mo ite gwana mo, nonda li ndi shi kutya onda pumbwa owala okukala mehangano lyaJehova. Onda tameke oku shi mona mo kutya Jehova ine etha ndje nando, onda li owala ndi na okukonga ondjila ndjoka tayi galulile ndje kuye ishewe. Ngashingeyi onda nyanyukwa sho nde shi ningi.”

Jehova ota ka kala a gama kungoye sho to galukile kuye

Otatu galikana twa mana mo, opo nangoye wu mone natango “enyanyu ndyoka Omuwa te li gandja.” (Nehemia 8:10) Uuna wa galukile kuJehova ku na siku nando wu ki ipe uusama sho we shi ningi.

Omapulo kombinga yokugalukila kuJehova

OTANDI SHI ENDE NGIINI?

Omuntu ngele okwa ningi esiku a ala okwa pumbwa okweendela ko kashona nakashona, opo a tameke iilonga ye ngaashi shito. Nangoye oto vulu okukala ho itungu pambepo mokukala ho makele kashona miikulya yopambepo andola esiku kehe. Ino kala wu uvite kutya owa pumbwa okuninga oshindji polumwe. Oto vulu okulongitha ominute omishona to lesha Ombiimbeli, nenge to pulakene kelesho lyOmbiimbeli, to konakona shimwe shomiileshomwa yetu, to kongo uuyelele ko-jw.org, nenge wu tale ko opolohalama yetu yimwe ko-TV. Oshike ishewe tashi ke ku kwathela? Tameka nziya okukala ho yi kokugongala. Ihe komeho gaayihe, galikana kuJehova noku mu pula e ku kwathele. Ombiimbeli otayi ti: “Mu tsikeni iimpwiyu yeni ayihe, oshoka oye omusilishimpwiyu gweni.” — 1 Petrus 5:7.

Omumwameme Eeva okwa ti: ‘Konima sho nda li inaandi ipyakidhila we niinima yopambepo, onda kala nda sa ohoni noyokugalikana ko kwenekwene. Sho ndi ikumike ndi kale handi galikana, omukuluntugongalo gumwe okwa li a talele ndje po. Okwa kwathele ndje ndi mone kutya Jehova ine ekelahi ndje. Omukuluntugongalo okwa pe ndje eetopo ndi tameke okukala handi lesha Ombiimbeli esiku kehe. Sho nde shi ningi osha pe ndje oonkondo ndi kale handi yi kokugongala kehe. Mokweendela ko kwethimbo, onda tameke okuya muukalele. Onda nyanyukwa unene sho Jehova ine ekelahi ndje nando.’

EGONGALO OTALI KA TAAMBA NDJE KO NGAA?

Kala wu shi kutya iilyo yegongalo otayi ke ku hambelela nohamu. Itayi ke ku simonona nenge yi ku pangule. Pehala lyaashono, otayi ka ulika kutya oyi ku hole notayi ki idhipagela po, opo yi tale nkene tayi vulu oku ku ladhipika. — Aahebeli 10:24, 25.

Omumwatate Javier okwa ti: ‘Onda li nda sa ohoni okugalukila kOshinyanga shUukwaniilwa. Onda li tandi ipula owala kutya ookuume kandje otaya ka tila ndje ngiini. Omumwameme gumwe omukokele ngoka a kala megongalo moka uule womimvo 30 okwa hambelele ndje a ti, iyaloo mumati gwandje sho wa galukile kegongalo. Shono osha gumu omutima gwandje. Onda li ndi uvite kutya onda galukila kegumbo shili.’

Omumwatate Marco okwa ti: “Sho nda yi kOshinyanga shUukwaniilwa onda li nda kuutumba konima lela, nelalakano opo kaandi dhimbululwe aniwa. Ihe aantu oyendji mboka ya kala ye shi ndje okuza kuunona oya dhimbulula ndje. Oya ningi po shike? Oya hambelele ndje nokupapatela ndje nuukuume. Onda li nda nyanyukwa shambishi megumbo mwa tselwa, nonda li ndi uvite uugumbo.”

AAKULUNTUGONGALO OTAYA KA KWATHA NDJE NGAA?

Aakuluntugongalo otaya ka ungaunga nangoye nolukeno. Otaye ke ku pupula kombunda sho wa hala okuhwameka ‘ohole ndjoka wa li wu na petameko.’ (Ehololo 2:4) Otaye ke ku kwathela nohenda wu opaleke omapuko goye. Taye shi ningi ngiini? Otaye shi ningi “nonge.” (Aagalati 6:1; Omayeletumbulo 28:13) Aakuluntugongalo otashi vulika ya ninge omalongekidho, opo gumwe a konakone nangoye membo Hedha popepi naJehova nenge ‘Ikalekeni mohole yaKalunga.’ Kala wu shi kutya aakuluntugongalo otaye ke ku hekeleka nokwaambidhidha onkatu kehe ndjoka to katuka. — Jesaja 32:1, 2.

Omumwatate Victor ota hokolola ta ti: ‘Aakuluntugongalo oya kala nokutalela ndje po, uule womimvo hetatu ndhoka nda kala inaandi ipyakidhila pambepo. Esiku limwe, omukuluntugongalo gumwe okwa li u ulukile ndje omathano ngoka e tu thanekele. Omathano ngoka oga li ga dhimbulukitha ndje omathimbo omawanawa ga pita. Shoka osha ningitha ndje ndi kale nda yuulukwa enyanyu ndyoka nda li handi kala ndi uvite sho tandi longele Jehova. Aakuluntugongalo oya kwathele ndje nombili ndi tamekulule nomaipyakidhilo gandje gopambepo.’

“Jehova ote ke ku koleka”

Meimbilo lyetu, Natu imbeleni Jehova, omu na omaimbilo ngoka taga vulu oku ku hekeleka noku ku ladhipika sho to tameke nomaipyakidhilo gopambepo. Oshiholelwa shimwe, oohapu dheimbilo 60 ndyoka lya kankamena kuPetrus gwotango 5:10. Eimbilo ndyoka oli na oshipalanyolo tashi ti: “Jehova ote ke ku koleka.”

Kalunga okwe ku pa uuyelele we.

Opo wu vul’ okweenda moshili.

Okwa mona kutya owa hala lela

Okutseya nokulong’ uuyuuki

Wu gwanithe po wo ehalo lye.

Ite ku etha; ote ku kwathele.
Kalung’ okwe ku pa Omwana awike;

Onkee, okwa hala wu pondole.

Ino limbililwa kuty’ ote ku kwatha;

Ote ke ku koleka ishewe.

Ita ka dhimbwa ohole yoye.

Ota kala te ku tonatele.

(OKAKOLASA)

Okwe ku landa ondilo nOmwana Jesus

Te ku ambidhidha note ku koleke.

Ote ke ku gamena note ku wilike.

Te ku ambidhidha note ku koleke.

Opo wu pulakene komusika yeimbilo ndika nosho wo komaimbilo galwe gUukwaniilwa, sikena okwoode ndjika nenge wu ye ko-www.jw.org/kj. Tala mpoka pwa nyolwa OISHANGOMWA > OMUSIKA.