Dhimbulukwa omukulukadhi gwaLot

Lot okwa li a kala nahegona Abraham, moshilando shaKaanan. Molwaashoka Abraham naLot oya li ye na iimuna oyindji, kapwa li we omaunapelo ge ya gwanena. Onkee ano, Abraham okwa lombwele Lot a ti: ‘Itatu vulu okukala pamwe mehala ndika eshona. Hogolola ombinga yoshilongo ndjoka wa hala. Ngele to gama kombinga yimwe, ngame ote gama kombinga onkwawo.’ Abraham ka li tuu e na uukwatya uuwanawa wokwaaihola mwene!

Lot okwa mono ko ombinga ombwanawa popepi noshilando Sodom. Oya li yi na omeya ogendji nomwiidhi gwa ziza nawa. Okwa yi kehala hoka naanegumbo lye.

Aantu yomuSodom noyomoshilando shopopepi, Gomorra, nayo oya li aawinayi noonkondo. Onkee ano, Jehova okwa tokola a hanagule po iilando mbyoka. Ihe okwa li a hala a hupithe Lot naanegumbo lye. Onkee ano, okwa tumu aayengeli yaali ye ya londodhe taya ti: ‘Yambukeni! Zii mo moshilando! Jehova ote ke shi hanagula po.’

Lot ina za mo pethimbo mpoka. Okwa kala to ongaonga. Aayengeli oya kwata Lot mokwaako nomukadhi nosho wo oyanakadhona yaali, e taye ya pititha mo moshilando, taya ti: ‘Fadhukii po, ka hupitheni oomwenyo dheni, inamu tala konima. Ngele mwa tala ko, otamu ka sa.’

Sho ya thiki moshilando Zoar, Jehova okwa lokithile Sodom naGomorra omulilo nosulufuli. Iilando ayihe mbyoka iyali oya li ya hanagulwa po thiluthilu. Omukulukadhi gwaLot okwa tala konima e ta shituka oshaanda shomongwa, oshoka ina vulika kuJehova. Ihe Lot noyana oya hupithwa, molwaashoka oya vulika kuJehova. Oye na okukala ya li yu uvite nayi noonkondo, sho omukulukadhi gwaLot inaa vulika. Nonando ongawo, oya li ya nyanyukwa, sho ya pulakene komalombwelo gaJehova.