Omageelo gatatu gotango

Aaisraeli oya li taya thiminikwa ya longe iilonga iidhigu ye li aapika. Jehova okwa tumu Moses naAaron kuFarao netumwalaka tali ti: ‘Etha aantu yandje ya ye, opo ya ka longele ndje mombuga.’ Farao okwa yamukula nuuntsa a ti: ‘Kandi na ko nasha naashoka Jehova ta ti noite laleke Aaisraeli ya ye.’ Farao okwe ya thiminike ya longe iilonga iidhigu shi vulithe nale. Jehova okwa li te ka longa Farao oshilongwa. Mbela owu shi kutya okwe shi ende ngiini? Okwe etele Aaegipiti Omageelo Omulongo. Jehova okwa lombwele Moses a ti: ‘Farao okwa tindi okupulakena ndje. Ongula ota ka kala pomulonga gwaNiili. Inda kuye e to mu lombwele kutya molwaashoka ine etha aantu yandje ya ye, omeya gomomulonga Niili otaga ka shituka ombinzi.’ Moses okwa vulika e ta yi kuFarao. Farao okwa li a tala sho Aaron ta dhenge nondhimbo omulonga Niili, omeya e taga shituka ombinzi. Omulonga ogwa tameke okunika, oohi odha sile mo nomeya kaga li we taga vulu okunuwa. Nonando ongawo, Farao onkene ngaa a tinda okweetha Aaisraeli ya ye.

Konima yomasiku gaheyali, Jehova okwa tumu ishewe Moses kuFarao netumwalaka tali ti: ‘Ngele ito etha aantu yandje ya ye, Egipiti otashi ku udha omafuma.’ Aaron okwa yelutha ondhimbo ye nomafuma oga tameke okusiikila evi. Aantu oya adha omafuma momagumbo gawo, moombete dhawo nomiiyaha yawo. Omafuma oga li kehe pamwe. Farao okwa pula Moses i indile kuJehova a hulithe po egeelo ndyoka. Farao oku uvaneke kutya ote ke etha Aaisraeli ya ye. Onkee Jehova okwa hulitha po egeelo ndyoka, nAaegipiti oya gongele omafuma moondumba oonene ngoka ga sa. Oshilongo osha tameke okunika. Ihe natango Farao ka li a pitike aantu ya ye.

Konima yethimbo Jehova okwa lombwele Moses a ti: ‘Aaron na dhenge ondhimbo ye pevi, nontsi otayi ka shituka oomwe nenge uudhi uushona hawu lyana.’ Oomwe odha li kehe pamwe. Aantu yamwe yaFarao oye mu lombwele ya ti: ‘Omageelo ngaka oga zi kuKalunga.’ Ihe natango Farao ka li e etha Aaisraeli ya ye.