Jonatan okwa li ependa nomudhiginini

Omwanamati gwosheeli gwomukwaniilwa Saul, Jonatan, okwa li omukwiita ependa. David okwa ti kutya Jonatan okwa li he endelele e vule ekodhi noku na oonkondo e vule onkoshi. Esiku limwe, Jonatan okwa mono aakwiita Aafilisti 20 ye li koshikulundundu. Jonatan okwa li a lombwele omuhumbati gwomatati ge a ti: ‘Otatu ke ya ponokela owala, ngele Jehova okwe tu pe endhindhiliko. Ngele Aafilisti oye tu lombwele tu ye kuyo koshikulundundu, nena otu shi shi kutya otu na okuya ko tu ya ponokele.’ Aafilisti oyi igidha Jonatan nomumati gwe ya ti: ‘Ileni huka tu kondjeni!’ Onkee ano, Jonatan nomumati gwe oya londo koshikulundundu noya sindi aakwiita Aafilisti.

Jonatan okwa li omwanamati gwaSaul gwosheeli, noye a li e na okuninga omukwaniilwa a landula ko. Ihe molwaashoka Jonatan okwa li e shi kutya Jehova okwa hogolola David oye a kale omukwaniilwa gwaIsraeli ta landula ko, ka li e mu tsile ondumbo. Jonatan naDavid oya li ya panga uukuume wopothingo. Ayehe yaali oyu uvaneke okugamenathana nokupopilathana. Jonatan okwa pe David elwaakani lye, egongamwele lye, uutati we nekwamo lye, yi kale endhindhiliko lyuukuume wawo.

Sho David a li ta fadhuka po Saul, Jonatan okwa yi kuye e te mu lombwele ta ti: ‘Kala wa kola nowu na omukumo. Jehova okwe ku hogolola wu ninge omukwaniilwa. Tate naye oku shi shi.’ Mbela owa hala okukala wu na kuume omwaanawa a fa Jonatan?

Jonatan okwa li a tula omwenyo gwe moshiponga iikando yi vulithe pushimwe, opo a kwathele kuume ke, David. Jonatan oku shi kutya omukwaniilwa Saul okwa li a hala okudhipaga David. Onkene Jonatan okwa lombwele he Saul a ti: ‘Oto ka kala wu na ondjo, ngele owa dhipaga David. Ina yona sha kungoye.’ Saul okwa li a geela noonkondo Jonatan. Saul naJonatan oya sile molugodhi konima yomimvo dhontumba dha piti.

Jonatan sho a si, David okwa li a kongo omwanamati gwaJonatan, Mefiboshet. David sho a mono Mefiboshet okwe mu lombwele a ti: ‘Otandi ke ku sila oshimpwiyu onkalamwenyo yoye ayihe, oshoka ho okwa li kuume kandje kopothingo. Oto ka kala mehala lyandje noto ka lya poshililo shandje.’ David ina dhimbwa nando kuume ke Jonatan.