Jehova okwa nkondopaleke Elia

Isebel oku uvu shoka sha ningilwa aapolofeti yaBaal, noshe mu geyitha noonkondo. Okwa tumine Elia etumwalaka tali ti: ‘Ongula oto si, ngaashi aapolofeti yaBaal mboka wa dhipaga.’ Elia okwa tila noonkondo, e ta fadhuka po u uka kombuga. Okwa galikana a ti: ‘Jehova, itandi vulu sha we, etha ndje ndi se.’ Elia okwa li a loloka noonkondo e ta kothele moshihwa.

Omuyengeli okwe mu pendutha nohenda a ti: ‘Penduka, wu lye.’ Elia okwa mono oshikwiila sha yothwa noshiyuma shomeya. Okwa li e ta nu e ta kotha ishewe. Omuyengeli okwa pendutha ishewe Elia ta ti: ‘Penduka wu lye, opo ondjila yaahe ku vule oonkondo.’ Elia okwa li e ta kuta. Opo ihe okwe ende omitenya 40 nomausiku 40, sigo a thiki kondundu Horeb. Kondundu hoka Elia okwa yi mekololo e ta kotha. Jehova okwe mu pula a ti: ‘Elia, oto ningi shike mpano?’ Elia okwa yamukula a ti: ‘Aaisraeli inaya gwanitha po euvaneko ndyoka ya ninga nangoye. Oya kumuna po iiyambelo yoye noya dhipaga aapolofeti yoye. Ngashingeyi otaya kambadhala okudhipaga ndje wo.’

Jehova okwe mu lombwele a ti: ‘Inda wu ka thikame kondundu.’ Tango, pekololo opwe ende ombepo ondhigu. Ombepo ndjoka oya landulwa kekakamo lyevi, nopo nduno olya landulwa komulilo. Lwahugunina, Elia oku uvu okapepo okapu. Elia okwa siikile oshipala she nelwaakani lye e ta kala a thikama posheelo shekololo. Opo ihe Jehova okwe mu pula kutya omolwashike ta fadhuka po. Elia okwa ti: “Ongame awike nda hupu ko.” Jehova okwe mu lombwele a ti: ‘Hangoye awike, oku na aantu 7 000 muIsraeli mboka taya longele ndje natango. Inda wu ka gwayeke Elisa a ninge omupolofeti pehala lyoye.’ Mbalambala Elia okwa yi e ta ningi shoka Jehova e mu lombwele. Mbela nangoye Jehova ote ke ku kwathela ngaa, ngele owa ningi shoka a hala wu ninge? Osha yela kutya ote ke ku kwathela. Natu taleni shoka sha li sha ningwa po pethimbo lyondjala.