Jehova okwa li i idhidhimikile Jona

Aantu yomuNinive, oshilandopangelo shaSiria, oya li aakolokoshi. Jehova okwa li a tumu omuhunganeki gwe, Jona, opo a ka londodhe Aaninive ya lundulule iikala yawo. Pehala lyokuya kuNinive, Jona okwa yi nondjila yilwe. Okwa londo osikepa yu uka kuSpania, e ta yi nayo.

Manga osikepa yi li molweendo, mefuta omwa tukuluka oshikungulu oshinene, shoka sha tilitha aaniilonga yomosikepa. Oya galikana kiikalunga yawo, taya pula taya ti: “Olye e tu etithile omupya nguka?” Lwanima Jona okwe ya lombwele a ti: ‘Ombedhi oyandje. Otandi fadhuka po oshilonga shoka Jehova a lombwele ndje ndi ninge. Umbilii ndje mefuta, notali loto.’ Aaniilonga yomosikepa kaya li ya hala okuumbila Jona mefuta, ihe okwe ya thiminike ye shi ninge. Sho ye mu umbile mo, oshikungulu osha loto.

Jona okwa li ta dhiladhila kutya ota ka sa. Sho te ende ta ningine muuleeleka wefuta, okwa galikana kuJehova. Okuza mpono Jehova okwa tumu ohi onene yi nine po Jona. Oye mu nina po, ihe Jona ina sa. Sho Jona e li mela lyohi okwa galikana a ti: ‘Otandi gwanitha po aluhe shoka nde ku uvanekela.’ Jehova okwa kala nokugamena Jona mela lyohi uule womasiku gatatu. Ohi oya ningi po shike? Oya kungile Jona komunkulo kuukukutu.

Osho she ende ngaaka, opo Jehova a hupithe Jona. Mbela sho Jona a hupithwa ina ka ya we kuNinive? Okwa ka ya ko. Jehova okwe mu tumu ko ishewe. Oshikando shino, Jona okwa ningi ngaashi a lombwelwa. Okwa yi e ku uvithile aantu mboka aakolokoshi ta ti: “Oku na omasiku omilongo ne, nena Ninive otashi ka hanagulwa po.” Okuza mpono opwa ningwa oshinima shoka sha li inaashi tegelelwa. Oshike mbela? Aaninive oya pulakene kuJona, e tayi itedhulula. Omukwaniilwa gwaNinive okwa lombwele aantu ye a ti: ‘Galikaneni kuKalunga, ne etheni omikalo dheni omiwinayi nuukolokoshi. Pamwe Kalunga ite ke tu hanagula po.’ Sho Jehova a mono kutya aantu oyi itedhulula, ina hanagula po we Ninive.

Jona okwa li a geya nayi sho oshilando inaashi hanagulwa po. Dhiladhila owala kutya: Jehova okwa li i idhidhimikile Jona noku mu sila ohenda, ihe Jona ka li e etela ohenda aantu yomuNinive. Pehala lyaashono, okwa ka kuutumba momunzile gwolumono kondje yoshilando, u umba omulungu. Olumono olwa si, oshinima shoka sha geyitha nayi Jona. Opo ihe Jehova okwe mu lombwele a ti: ‘Owu na ko nasha unene nolumono shi vulithe aantu yomuNinive. Ngame onde ya sile ohenda, notandi ya hupitha.’ Sho Jehova a menitha olumono, okwa li a hala okulonga Jona kutya aantu yomuNinive oya simanenena ye vulithe olumono.