Omuyengeli Gabriel ta talele po Maria

Elisabet okwa li e na omupambele omugundjuka gwedhina Maria, ngoka a li ha kala moshilando shaGalilea, Nasaret. Maria okwa li a yalekwa kuJosef, omuhongi gwiipilangi. Sho Elisabet e li metegelelo lyoomwedhi hamano, omuyengeli Gabriel okwe ya kuMaria. Okwa ti: ‘Ombili nayi kale nangoye! Jehova okwe ku hokwa.’ Maria ka li u uvite ko kutya okwa hala okutya shike. Opo ihe Gabriel okwe mu lombwele a ti: ‘Oto ka ninga omusimba e to vala okanona okamati nowu na oku ka luka Jesus. Oye ota ka ninga Omukwaniilwa, nUukwaniilwa we otawu ka kala sigo aluhe.’

Maria okwa ti: ‘Shika otashi vulika ngiini? Ngame omukadhona natango.’ Gabriel okwa ti: ‘Kaku na shoka tashi nyenge Jehova. Ombepo ondjapuki otayi ku lambele noto ka mona okanona okamati. Omunezimo lyoye, Elisabet, naye ngashingeyi omusimba.’ Opo nduno Maria okwa ti: ‘Ngame omupiya gwaJehova. Nandi ningwe ngaashi wa ti.’

Maria okwa yi koshilando shi li koondundu, a ka talele po Elisabet. Sho Maria a popitha Elisabet, okanona oka nyulukuta mela lye. Elisabet oku udha ombepo ondjapuki, e ta ti: ‘Maria, Jehova okwe ku yambeka. Oshi li uuthembahenda okukala ndi na yina yOmuwa gwandje megumbo lyandje.’ Maria okwa ti: ‘Otandi hambelele Jehova nomutima gwandje aguhe.’ Maria okwa kala puElisabet oomwedhi ndatu, opo ihe okwa shuna kaandjawo kuNasaret.

Sho Josef a tseya kutya Maria omusimba, okwa li a hala oku mu etha po. Ihe omuyengeli okwe mu ihololele mondjodhi, e ta ti: ‘Ino tila okuhokana Maria. Ina ninga sha sha puka.’ Onkee ano, Josef okwa hokana Maria nokwe mu eta megumbo lye.