Sho Jesus e li omugundjuka

Josef naMaria, Jesus naanona yawo yalwe oya li haya kala muNasaret. Josef okwa kala omuhongi gwiipilangi, opo a sile aanegumbo lye oshimpwiyu. Okwe ya longo kombinga yaJehova noyOmpango Ye. Oya li haya yi kosinagoga pandjigilile ya ka longele Jehova noya li haya yi kuJerusalem omumvo kehe koshituthi shOpaasa.

Sho Jesus a li e na omimvo 12, okwa yi pamwe noyaandjawo molweendo olule lwokuya kuJerusalem ngaashi shito. Oshilando osha li shu udha aantu mboka ye ya koshituthi shOpaasa. Konima sho sha pu, Josef naMaria oya yi molweendo lwokushuna kegumbo noya li taya dhiladhila kutya Jesus oku li mongundu yaaendi. Ihe sho ye mu kongo mokati kaapambele yawo, inaye mu mona mo.

Oya shuna kuJerusalem noya kala taye mu kongo uule womasiku gatatu. Konima yomasiku gatatu, oye mu adha motempeli, a kuutumba mokati kaalongi Aajuda, te ya pulakene nawa ye te ya pula. Aalongi oya li ya kuminwa Jesus noya tameke oku mu pula omapulo. Oya li ya kuminwa omayamukulo ge. Oya li ye wete kutya Jesus oku shi Ompango yaJehova.

Josef naMaria oya li lela tayi ipula naJesus. Maria okwa ti: ‘Mumwandje, otwa kala tatu ku kongo kehe pamwe. Owa li peni?’ Jesus okwa ti: ‘Kamu shi shi nani kutya ondi na okukala megumbo lyaTate?’

Jesus okwa shuna naavali ye kegumbo kuNasaret. Josef okwa longo Jesus iilonga yokuhonga iipilangi. Mbela sho to dhiladhila, Jesus okwa li e na omaukwatya ga tya ngiini sho a li omugundjuka? Sho e ende ta koko, okwa kala e na oondunge odhindji nokwa kala a hokiwa kuKalunga nokaantu.