Jesus ta ningi Mesiasa

Johannes okwa kala tu uvitha ta ti: ‘Opu na ngoka e vule ndje moonkondo te ya.’ Sho Jesus a li e na omimvo 30 lwaampono, okwa yi  kuGalilea komulonga gwaJordan, hoka Johannes a li ta ninginitha aantu. Jesus okwa li a hala Johannes e mu ninginithe, ihe Johannes okwa ti: ‘Hangame ndi na oku ku ninginitha, ihe ongoye wu na okuninginitha ndje.’ Jesus okwe mu lombwele a ti: ‘Jehova okwa hala wu ninginithe ndje.’ Onkee ano, oya yi momulonga gwaJordan, na Johannes okwa tula Jesus thiluthilu kohi yomeya.

Sho Jesus a zi momeya, okwa galikana. Opo tuu mpoka egulu olye eguluka, nombepo yaKalunga ya fa onguti oye mu lambele. Opo nduno Jehova okwa popi okuza megulu a ti: “Ongoye Omumwandje omuholike, onde ku hokwa.”

Sho ombepo yaJehova ya lambele Jesus, okwa ningi Kristus nenge Mesiasa. Ngashingeyi ota vulu okutameka iilonga mbyoka Jehova e mu tumu a longe kombanda yevi.

Nziya konima sho Jesus a ninginithwa, okwa yi mombuga nokwa kala mo uule womasiku 40. Sho a galuka, okwa yi kuJohannes. Sho Johannes a mono Jesus u uka kuye, okwa ti: ‘Ndjoka Onzigona yaKalunga, tayi kutha po oondjo dhuuyuni.’ Johannes okwa popi oohapu ndhoka, opo a tseyithile aantu kutya Jesus oye Mesiasa. Owu shi kutya oshike sha ningilwa Jesus manga a li mombuga? Natu shi taleni.