Jesus ta shuna megulu

Jesus okwa tsakanene naalongwa ye muGalilea. Okwa li e ya pe elombwelo lya simana tali ti: ‘Indeni ka ningeni aantu ayehe aalongwa yandje. Ya longeni ayihe mbyoka nde yi mu lombwele, ne mu ya ninginithe.’ Opo ihe okwe ya uvanekele a ti: ‘Dhimbulukweni kutya otandi ka kala aluhe pamwe nane.’

Uule womasiku 40, konima sho Jesus a yumudhwa, okwi ihololele aalongwa ye omathele muGalilea nomuJerusalem. Okwe ya longo iinima ya simana nokwa li a longo iikumithalonga oyindji. Opo nduno Jesus okwa tsakanene naayapostoli ye kOndundu yOoholivi, oshikando sha hugunina. Okwe ya lombwele a ti: ‘Inamu za mo muJerusalem, ihe tegeleleni, mu pewe shoka Tate e shi uvaneka.’

Aayapostoli kaya li yu uvite ko kutya Jesus okwa hala okutya shike. Oye mu pula ya ti: ‘Ongoye to ka ningwa Omukwaniilwa gwAaisraeli?’ Jesus okwa ti kuyo: ‘Kali shi natango ethimbo lyaJehova lyokuninga ndje Omukwaniilwa. Masiku otamu ka pewa oonkondo, uuna ombepo ondjapuki tayi ka tililwa mune notamu ka ninga oonzapo dhandje. Indeni mu ku uvithe muJerusalem, muJudea nomuSamaria sigo omiilongo ayihe yokombanda yevi.’

Jesus okwa yeluthwa pombanda e ta yi moshikogo. Aalongwa ye oya kala ya tala kegulu, ihe kaya li we ye mu wete.

Aalongwa oya zi po pOndundu yOoholivi, e taya yi kuJerusalem. Oya kala aluhe haya gongala pamwe mondunda yopombanda, opo ya galikane. Oya li ya tegelela Jesus e ya pe omalombwelo ga gwedhwa po.