Efalomo lyoshitopolwa oshi-6

Sho Aaisraeli ya thiki mEvi lyEuvaneko, etsalihangano olyo lya ningi ondingandinga yelongelokalunga lyashili. Aayambi oya li ya longo aantu Ompango, naatokolihapu oya wilike oshigwana. Oshitopolwa shika, otashi ulike nkene omatokolo noonkatu dhomuntu tayi vulu okunwetha mo unene yalwe. Omuisraeli kehe okwa li e na oshinakugwanithwa kuJehova nokaantu ooyakwawo. Tsa omuthindo nkene Debora, Naemi, Josua, Hanna, omwanakadhona gwaJefta nosho wo Samuel ya li oshiholelwa oshiwanawa kaantu yomomidhingoloko dhawo. Popya wo kutya naamboka kaaya li Aaisraeli, ngaashi Rahab, Rut, Jael nosho wo Aagibeon, oya li ya tokola ya game kombinga yAaisraeli. Oye shi ningi, molwashoka oya li ye shi kutya Kalunga okwa li pamwe nAaisraeli.