OSHITSA 17

Popya iinima yi uvitiwe ko

1 Aakorinto 14:9

SHOKA WU NA OKUNINGA: Kwathela aapulakeni ya uve ko etumwalaka ndyoka to ya lombwele.

Konakona nawa uuyelele mboka to ka kundathana. Uva ko tango nawa oshikundathanwa shoye, opo wu vule oku shi yelithila yalwe momukalo omupu noniitya yoye mwene.
Longitha omatumbulo omafupi nomapu okuuviwa ko. Nonando omatumbulo omale ohaga longithwa melaka lyeni, longitha omatumbulo omafupi, sho to popi iitsa ya simana.

Ino gandja uuyelele inaawu pumbiwa mboka tashi vulika wu ngwangwaneke aapulakeni noku ya ningitha ya kale ya lulilwa. Longitha iitya iipu pehala lyokulongitha mbyoka ya kitakana.
Yelitha omautumbulilo ngoka kaage shiwike. Ino longitha unene omautumbulilo ngoka kaage shiwike kaapulakeni. Ngele oto ka popya iinima ngaashi uutumbulilo kaawu shiwike, omuntu a popiwa mOmbiimbeli, omuyalu gwopethimbo lyonale nenge omukalondjigilile gwontumba, yi yelithila nawa aapulakeni.