Etseyitho
Ekwatho omolwOokomitiye dhOlutuwiliki
Iilyo yOlutuwiliki lwOonzapo dhaJehova, mbyoka ngashingeyi yi li 12, otayi longo natango nuudhiginini miilonga yawo. Yo otaa pandula aluhe iilyo ‘yongundu onene’ mbyoka tayi indjipala mbyoka tayi ya ambidhidha nuuladhi. (Ehololo 7:9, 15) Okutala keindjipala enene ndyoka tali monika muuyuni auhe, osha yela kutya osho opala okupa Olutuwiliki ekwatho natango. Opwa tokolwa ano pu hiywe aakwatheli yamwe, unene tuu okuza miilyo yongundu onene, yi kale yi na ombinga mokugongala kehe kwookomitiye dwOlutuwiliki, sha hala okutya, okomitiye yAalongi, yOkunyanyangidha, yIilonga, yOkulonga aantu noyOkunyola. Ano omwaalu gwaamboka taya ka kala pomakugongala gokomitiye kehe ndjika, otagu ki indjipala okuza puyaheyali sigo yahetatu. Kohi yewiliko lyiilyo yookomitiye dhOlutuwiliki, aakwatheli mbaka otaa ka kala nombinga moonkundathana notaa ka longa iilonga yi ili noyi ili mbyoka taa ka pewa kokomitiye. Elongekidho ndika epe otali ka tameka okulonga muMai 1, 1992.
Omwaalu gwiihupe yOonzapo aagwayekwa ogwa kala tagu shuna pevi uule woomvula odhindji, omanga omwaalu gwongundu onene tagu londo noonkondo shi vulithe ngaashi twa tegamena. (Jesaja 60:22) Olupandu olu thike peni tu nine Jehova molweindjipalo ndino ekumithi! Sho edhina epe, Oonzapo dhaJehova, lya ziminwa mo 1931 nolupandu, oshitsa shopombanda shaauvithi yUukwaniilwa osha li 39 372, noyendji yomuyo oya ti kutya yo aamwahe aagwayekwa yaKristus. (Jesaja 43:10-12, NW; Aaheberi 2:11) Konima yoomvula omilongo hamano, mo 1991, oshitsa shopombanda shaauviithi muuyuni auhe osha li 4 278 820, moka mwa li owala 8 850 mboka ya ti kutya yo oyomoshihupe shaagwayekwa. Ngaashi twe shi tegelela muuyelele wOmanyolo, “ongundu onene” oyindji yi vule “okangundu” lwiikando 480. (Lukas 12:32, KB; Ehololo 7:4-9) Oshihupe osha pumbwa nosha pandula shili elongelokumwe lyongundu onene neambidhidho lyayo mokusila oshimpwiyu ekoko lyiinina yUukwaniilwa.
Ngaashi tashi yelithwa mOshungonangelo ndjika, opu na ongundu ndjoka tayi longo nena pamwe naIsrael yopambepo ndjoka tayi vulu okufaathanithwa nAanethinim naanona yaakalele yaSalomo mboka ya galuka pamwe noshihupe shAajuda muupika waBabilon; mboka kaaye shi Aaisrael oya li oyendji ye vule nokuli Aalevi mboka ya galuka. (Esra 2:40-58, NW; 8:15-20, NW) “Mboka ya gandjwa” mboka ye li nena mokati kongundu onene oyo aalumentu Aakriste ya pyokoka mboka ye na owino oundji mokutonatela molwashoka yo oya longa ye li aatonateli yiitayimbelewa, yiilonga yomalweendo nomomagongalo 66 000 ngoka ge li po ngashingeyi muuyuni auhe.
Omasiku ngano, oosikola dhuukalele wUukwaniilwa odha ningwa muuyuni auhe okulonga aakuluntugongalo naakwatheli yawo aayakuligongalo. MIilongohangano omo amuke osikola ndjika oya li ya kalwa kaakuluntugongalo ye thike po 59 420. “Aakuluntugongalo” mbaka oya gwana okugwanitha oshinakugwanithwa shawo komukalo omwaanawa lela.—1 Petrus 5:1-3, NW; faathanitha Aaefeso 4:8, 11, NW.
Yamwe “mboka ya gandjwa” oya longa mombelewa onene yOonzapo dhaJehova muBrooklyn uule woomvula odhindjidhindji. Yo oya kwatela mo aakuluntugongalo yomongundu onene ya pyokoka noonkondo mboka ye shi okulonga nawa noye na owino oundji. Ano Olutuwiliki olwa hogolola aakuluntugongalo yamwe ya tya ngawo ye ya kwathe mokugongala kwookomitiye dhOlutuwiliki. Itashi ti kutya yo oye li owala aakuluntugongalo mboka ya longa ethimbo ele noonkondo. Ihe aalumentu mboka ya pyokoka, ye na owino noya longekeka ya gwana okukwathela miitopolwa yontumba. Okupewa kwawo iilonga mbyoka ya longe pamwe nokomitiye itashi ya pe ondondo yi ikalekelwa. Ongaashi Jesus a popi kombinga yaalongwa ye: “One amuhe aantu naamwayinathana.” (Mateus 23:8) Ihe aalumentu mbaka otaa ka kala yi inekelelwa oshindji, notaa ka ‘pulwa ano oshindji.’—Lukas 12:48.
Tse otwa nyanyukilwa okuhuma komeho hoka ehangano lyaJehova tali ningi nena. Oomvula omulongo dha piti opwa li pu na eindjipalo konyala lyoopersenda 100 lyaamboka taa longo iilonga yeuvitho momapya metsokumwe nehunganeko li na ko nasha naDavid Omunene, Jesus Kristus: “Okwiindjipala kwelelo lye nokwombili itaku hulu po nando.” (Jesaja 9:6, King James Version) Komukalo ogwo tuu ngoka Aanethinim ya longo pamwe naasaseri okutungulula omakuma gaJerusalem, osho wo ehunganeko li na ko nasha nehangano lyaJehova nena tali gwanithwa: “Aakwiilongo otaa tungu omankolo goye.” (Jesaja 60:10; Nehemia 3:22, 26, NW) Aanethinim yonena oye na okupandulwa omolwuuladhi mboka tayu ulike mokutunga egalikano lyashili, taa kwathele “aasaseri yOmuwa” mukehe oshilonga shi na okulongwa mehangano lyaJehova muuyuni auhe.—Jesaja 61:5, 6.