Okukala kwetu oupafi oshinima sha endelela neenghono
“Opo nee hano kaleni oupafi, osheshi kamu shi shii efiku lilipi po Omwene weni te uya.”—MATEUS 24:42.
1, 2. Oshike tashi ulike kutya otu li pefimbo lexulilo longhalelo yoinima yopaife?
OMUSHANGI Bill Emmott okwa ti: “Komesho yaaishe, efelemudo etimilongo mbali okwa li la nwefwa mo koita.” Nonande okwa dimina kutya omafimbo aeshe mondjokonona yovanhu okwa mona oilanduliko yoita nelongifo leenghono, okwa weda ko a ti: “Efelemudo etimilongo mbali kala li la yooloka ko shi na sha noiningwanima, ndele okwa li la yooloka ko shi na sha nouhapu woinima. Olo la li efelemudo lotete okukala nelipumomumwe olo la kuma shili ounyuni aushe . . . Natango, opo oshitwa shi kale sha fa sha divilikwa, kamwa li ashike elipumomumwe lopaunyuni limwe alike ndele avali.”
2 Oita oyo ya kwatela mo ‘okufikamenafana kwoiwana noiwana, nosho yo oshilongo noshilongo,’ oya xunganekwa kuJesus Kristus. Ndelenee oyo oi li ashike oshitukulwa shimwe po shomoitukulwa ‘yedidiliko lokukala po kwaKristus nolexulilo longhalelo yoinima.’ Mexunganeko olo linene, Jesus okwa tumbula yo eendjala, omaudu olutapo nosho yo omakakamo edu. (Mateus 24:3, 7, 8, yelekanifa NW; Lukas 21:6, 7, 10, 11.) Meenghedi dihapu, omaupyakadi a tya ngaho okwa hapupala nokwa kwata moiti. Owii wovanhu owa hapupala, ngaashi shi liwetikile moikala yovanhu shi na sha naKalunga nosho yo novanhu vakwao. Okuxutuka kweenghedi nosho yo okuhapupala kwekaulonyanga nelongifo leenghono oi liwetikile. Ovanhu ova ninga ovaholi voimaliwa ponhele yokuhola Kalunga, va fukila omalihafifo. Oinima aishe oyo otai ulike kutya otu li ‘momafimbo madjuu.’—2 Timoteus 3:1-5.
3. Ongahelipi “omadidiliko omafimbo” e na oku tu kuma?
3 Mbela oho tale ko ngahelipi okunaipala kwoinima yopanhu? Vahapu kave na ko nasha nova fifa omaliudo avo nokuli shi na sha noiningwanima inyikifa oluhodi yokunena. Ovanenenhu novanaendunge vounyuni kave shii kutya “omadidiliko omafimbo” otaa ti shike; novawiliki vomalongelokalunga inava yandja ewiliko la yuka moshinima osho. (Mateus 16:1-3) Ndele Jesus okwa ladipika ovashikuli vaye a ti: “Opo nee hano kaleni oupafi, osheshi kamu shi shii efiku lilipi po Omwene weni te uya.” (Mateus 24:42) Apa Jesus ite tu ladipike ashike tu kale twa pashuka oule wokafimbo konhumba ndele otu twikile okukala oupafi. Opo tu kale oupafi otu na okukala twa lungudja. Osho otashi pula shihapu shi he fi ashike okudimina kutya otu li momafiku axuuninwa nonokutya omafimbo omadjuu. Otu na okukala tu na eitavelo la pama kutya “exulilo loinima aishe oli li popepi.” (1 Petrus 4:7) Mokuninga ngaho opo ashike hatu ka kala oupafi tu wete kutya efimbo ola endelela. Onghee hano, epulo olo tu na okulipula ololo kutya: ‘Oshike tashi ke tu kwafela tu pameke eitavelo letu kutya exulilo ola ehena popepi?’
4, 5. (a) Oshike tashi ka pameka eitavelo letu kutya exulilo longhalelo ei youkolokoshi oli li popepi, nomolwashike? (b) Efaafano limwe lilipi li li pokati kefimbo laNoa nolokukala po kwOmona womunhu?
4 Konakona eenghalo odo da li apeshe pefimbo olo kwa li la tetekela oshiningwanima shikonekwedi mondjokonona yovanhu—Eyelu linene lopefimbo laNoa. Ovanhu okwa li ovakolokoshi unene nomolwaasho Jehova okwa “yahama momutima waye.” Okwa ti: “Ovanhu ava nde va shitile, onda hala oku va komba po kombada yedu.” (Genesis 6:6, 7) Ndele osho naanaa a ninga. Mokufaafanifa efimbo olo naalo lopaife, Jesus okwa ti: “Ngaashi sha li pomafiku aNoa, osho tuu taku ka kala [pokukala po, NW] kwOmona wOmunhu.”—Mateus 24:37.
5 Oshi li pandunge okudiladila kutya Jehova oku uditile ounyuni wopaife ngaashi a li e uditile ounyuni oo wa tetekela Eyelu. Molwaashi okwa li a xulifa po ounyuni wovahenakalunga wopefimbo laNoa, ota ka xulifa po yo ounyuni wopaife oo wa kolokosha. Okukala tu udite ko nawa omafaafano oo e li pokati kefimbo linya noletu oku na okupameka eitavelo letu kutya exulilo lounyuni wopaife oli li popepi. Mbela omafaafano oo oelipi? Ope na atano oo hatu ka kundafana. Lotete ololo kutya opa li elondwelo la yela li na sha neuyo lehanauno.
Va londwelwa shi na sha ‘noinima inai monika natango’
6. Jehova okwa li a tokola toko okuninga shike pefimbo laNoa?
6 Pefimbo laNoa, Jehova okwa ti: “Omhepo yange itai ka pangela meni lomunhu fiyo alushe, osheshi ye ombelela. Ndelenee efimbo laye nali ninge omido 120.” (Genesis 6:3) Etokolo olo laKalunga lomo 2490 K.O.P. ola li ehovelo lexulilo lounyuni wouhenakalunga wopefimbo olo. Diladila ashike kutya osho okwa li sha hala okutya shike kovanhu vopefimbo olo. Okwa li ashike ku na omido 120 opo Jehova a yelulife “edu eyelu, opo [a] hanaune po ombelela aishe i nomufudo [womwenyo] koshi yeulu,” ngaashi a lombwela Noa komesho yefimbo.—Genesis 6:17.
7. (a) Noa okwa li e linyenga ngahelipi kelondwelo li na sha nEyelu? (b) Otu na okulinyenga ngahelipi komalondwelo e na sha nexulilo longhalelo ei?
7 Noa okwa li a pewa elondwelo li na sha noshiponga shinene osho kwa li tashi ke uya omido omilongo komesho yefimbo, nokwa longifa neendunge efimbo okulilongekidila exupifo. Omuyapostoli Paulus okwa ti: “Eshi [Noa] a shiivifilwa inya inai monika natango, metilo liyapuki okwa tunga ongulu yomomeva, a xupife eumbo laye.” (Ovaheberi 11:7) Ongahelipi kombinga yetu? Paife opa pita omido 90 lwaapo okudja eshi omafiku axuuninwa onghalelo ei yoinima a hovela mo 1914. Otu li shili ‘mefimbo lexulilo.’ (Daniel 12:4) Mbela otu na okulinyenga ngahelipi komalondwelo oo twa pewa? Ombibeli otai ti: “Ou ta longo ehalo laKalunga, oye ta kala alushe.” (1 Johannes 2:17) Onghee hano, paife olo efimbo lokulonga ehalo laJehova nokukala tu wete kutya efimbo ola endelela neenghono.
8, 9. Omalondwelo elipi a yandjwa kunena, nongahelipi omalondwelo oo taa shiivifwa?
8 Kunena, ovakonakoni vOmbibeli vashili ove lihonga mOmishangwa da nwefwa mo kutya onghalelo ei otai ka hanaunwa po. Mbela otwe shi itavela? Didilika osho Jesus Kristus a popya sha yela nawa, a ti: “Otapa kala oudjuu unene, inau kala ko okehovelo lounyuni fiyo opaife, ndele ngaashi itau uya vali.” (Mateus 24:21) Jesus okwa ti yo kutya ote ke uya e li Omutokoli a nangekwa po kuKalunga nota ka yoolola ovanhu moovakwao ngaashi omufita ta yoolola eedi moikombo. Ovo tava ka monika kutya inava wana otava “i mokuhandukilwa kwaalushe, ndele ovayuki omomwenyo waalushe.”—Mateus 25:31-33, 46.
9 Jehova ota londwele natango oshiwana shaye nomadimbulukifo e li pefimbo okupitila meendja dopamhepo odo tadi yandjwa ‘komupiya omudiinini nomunaendunge.’ (Mateus 24:45-47) Kakele kaasho, oiwana aishe nomihoko adishe nomalaka aeshe novanhu aveshe otava pulwa va ‘tile Kalunga, noku mu fimaneka, osheshi efimbo letokolo laye ole uya.’ (Ehololo 14:6, 7) Oshitukulwa sha fimanenena shetumwalaka lOuhamba olo tali udifwa kongonga yedu alishe kEendombwedi daJehova osho elondwelo kutya Ouhamba waKalunga mafiku otau ka hanauna po omapangelo opanhu. (Daniel 2:44) Elondwelo olo kali na okutalika ko li li longaho. Kalunga Omunaenghono adishe oha ningi alushe ngaashi a udaneka. (Jesaja 55:10, 11) Osho a ninga pefimbo laNoa osho ta ka ninga pefimbo letu.—2 Petrus 3:3-7.
Omilele da nyata tadi hapupala
10. Oshike tashi dulu okutiwa shi na sha nomilele da nyata pefimbo laNoa?
10 Efimbo letu ola faafana naalo laNoa monghedi vali imwe. Jehova okwa lombwela omulumenhu nomukainhu wotete va ‘yadife edu’ noludalo lavo mokulongifa nefimaneko oukwatya wokudula okuya momilele oo wa shitilwa muvo kuye, melongekido lohombo. (Genesis 1:28) Pefimbo laNoa, ovaengeli ovo inava dulika ova nyateka ounhu nomilele di he fi dopaushitwe. Ove uya kombada yedu nokulundulukila momalutu opambelela ndele tava nangala novakainhu vawa, ndele tava dala oludalo lovanhu neendemoni, hali ifanwa Ovanefilim. (Genesis 6:2, 4, yelekanifa NW.) Enyono lovaengeli ovo kwa li ve na okahalu koipala ola faafanifwa nenyonauko olo la li muSodom naGomorra. (Judas 6, 7) Nomolwaasho omilele da nyata okwa li da hapupala pefimbo olo.
11. Eenghalo dilipi dopaenghedi tadi ningi efimbo letu li kale la faafana naalo laNoa?
11 Mbela onghalo i na sha neenghedi oi li ngahelipi kunena? Momafiku aa axuuninwa, okukalamwenyo kwavahapu oku na sha unene nomilele. Paulus okwa yelifa nawa ovanhu va tya ngaho kutya molwaashi ova “fifa omaliudo avo,” vahapu ove liefela “mouhalu okuwanifa ashishe osho sha nyata molwisho.” (Ovaefeso 4:19) Omafano oipala, okuya momilele komesho yohombo, okuningwa nai pamilele kwounona nosho yo oushenge oi li apeshe. Vamwe ova “mona [nale] muvo vene ondjabi ye va yeleka” molupe lomikifi odo hadi tandavele pamilele, okuteka po kwonghalamwenyo youkwaneumbo nosho yo omaupyakadi e lili noku lili opanghalafano.—Ovaroma 1:26, 27.
12. Omolwashike tu na okukulika outondwe wokutonda osho shii?
12 Pefimbo laNoa, Jehova okwa li a tuma Eyelu linene nokuxulifa po ounyuni wopefimbo olo oo kwa li wa nyonauka komilele. Inatu dimbwa nandenande kutya omafiku aa okwa faafana lela naao opefimbo laNoa. “Oudjuu unene” oo tau uya otau ka hanauna po kombada yedu ‘ovahaeli, ovanyoni vohombo, omashenge novahaeli vomashenge.’ (Mateus 24:21; 1 Ovakorinto 6:9, 10; Ehololo 21:8) Inashi endelela tuu okukulika outondwe wokutonda osho shii nokuhenuka eenghalo odo tadi dulu okutwala fiyo omoluhaelo!—Epsalme 97:10; 1 Ovakorinto 6:18.
Edu la “yada oukolokoshi”
13. Pefimbo laNoa, omolwashike edu kwa li la “yada oukolokoshi”?
13 Mokuulika natango koukwatya umwe vali wopefimbo laNoa, Ombibeli oya ti: “Edu la nyonauka koshipala shaKalunga. Nedu la yada oukolokoshi.” (Genesis 6:11) Oukolokoshi kawa li oshinima shipe lela. Omonamati waAdam, Kain, okwa dipaa omumwainamati omuyuki. (Genesis 4:8) Shi na sha noikala youkolokoshi yopefimbo laye, Lamek okwa tota po okatevo te litade shi na sha nanghee a dipaa omulumenhu omunyasha, molwokuliamena vati. (Genesis 4:23, 24) Osho kwa li shipe pefimbo laNoa oshosho kutya oukolokoshi owa li wa kwata moiti neenghono. Eshi ovanamati vaKalunga ovaengeli ovo inava dulika va hombola ovakainhu kombada yedu ndele tava dala oludalo—Ovanefilim—oukolokoshi owa li wa kwata moiti neenghono inashi monika nande onale. ONew World Translation otai ulike kutya oshitya shOshiheberi shopetameko osho tashi ulike kovatongolume ovo ovakolokoshi otashi ti “Ovawifi”—“ovo hava wifa ovanhu vakwao.” (Genesis 6:4) Oshidjemo, edu ola ‘yadifwa oukolokoshi.’ (Genesis 6:13) Diladila koupyakadi oo Noa a li a taalela eshi a li ta tekula oukwaneumbo momudingonoko wa tya ngaho! Ndelenee Noa okwa li ‘omuyuki koshipala shOmwene mepupi olo.’—Genesis 7:1.
14. Osha enda ngahelipi opo ounyuni kunena u kale wa “yada oukolokoshi”?
14 Oukolokoshi owa kala po momukokomoko wondjokonona yovanhu. Ndele ngaashi sha li pefimbo laNoa, nopefimbo letu oukolokoshi owa hapupala yo inashi monika nande onale. Ohatu udu luhapu shi na sha nelongifo leenghono moukwaneumbo, oilonga youkulo, oikonga yomadipao opamihoko nosho yo okudipawa kwovanhu vahapu kovanhu tava umbu eendjebo nokaku shiivike etomheno lela laasho. Natango ope na etileshi lohonde moita. Edu natango ola yada oukolokoshi. Omolwashike mbela? Oshike sha etifa ehapupalo loukolokoshi la tya ngaho? Enyamukulo otali holola efaafano natango limwe olo li li pokati kefimbo letu naalo laNoa.
15. (a) Oshike sha xumifa komesho elongifo leenghono kunena? (b) Oshidjemo shilipi twe lineekela kutya otashi ka holoka?
15 Eshi Ouhamba waKalunga wopaMessias wa dikwa po meulu mo 1914, Ohamba ya nangekwa po, Jesus Kristus, oya katuka eenghatu dikumwifa mondjokonona. Satana Ondiaboli neendemoni daye ova umbwa mo meulu nokukulukila komudingonoko wedu. (Ehololo 12:9-12) Fimbo Eyelu inali uya, ovaengeli ovo inava dulika ova fiya po eenhele davo domeulu kuvo vene; ndelenee kunena, ova umbwa mo keenghono. Kakele kaasho, paife itava dulu vali okulundulukila momalutu opambelela opanhu kombada yedu opo ve lihafife nouhalu mwii wopambelela. Onghee hano molwaashi ova nyemata nova handuka nova tila etokolo olo li li popepi, ohava nwefa mo ovanhu nosho yo omahangano opo a longe oilonga inyanyalifi yekaulonyanga nelongifo leenghono oyo ya hapupala nokuli shi dulife pefimbo laNoa. Jehova okwa hanauna po ounyuni oo wa tetekela Eyelu konima eshi ovaengeli ovo inava dulika nosho yo oludalo lavo la yadifa ounyuni oo owii. Nope he na omalimbililo ota ka ninga sha faafana mefimbo letu. (Epsalme 37:10) Ndelenee ovo ve li oupafi kunena ove shi shii kutya exupifo lavo oli li popepi.
Etumwalaka otali udifwa
16, 17. Efaafano etine lilipi li li pokati kefimbo laNoa naali letu?
16 Oshitwa oshitine shi na sha nokufaafana kwefimbo lopaife naalo lounyuni oo wa tetekela Eyelu oshi liwetikile moilonga oyo Noa kwa li a lombwelwa a longe. Noa okwa tunga onguluwato inene. Okwa li yo “omuudifi.” (2 Petrus 2:5) Mbela okwa li a udifa etumwalaka la tya ngahelipi? Osha yela kutya okuudifa kwaNoa okwa li kwa kwatela mo eingido opo ovanhu ve livele ombedi nosho yo elondwelo li na sha nehanauno olo kwa li tali ke uya. Jesus okwa ti kutya ovanhu vopefimbo laNoa “inave shi shiiva, fiyo eyelu le uya nole va hanauna po aveshe.”—Mateus 24:38, 39.
17 Sha faafana, eshi Eendombwedi daJehova tadi wanifa po noudiinini oshilonga shado shokuudifa, etumwalaka lOuhamba waKalunga otali udifwa mounyuni aushe. Hanga moshitukulwa keshe kongonga yedu, ovanhu otava udu nokulesha etumwalaka lOuhamba momalaka avo vene. Oifo yOshungonangelo oyo tai shiivifa Ouhamba waJehova, ohai nyanyangidwa oshikando keshe omuvalu u dule po 25 000 000 ndele omomalaka e dule pe 140. Doshili, onghundana iwa yOuhamba waKalunga otai udifilwa “ounyuni aushe [i] ningile oiwana aishe ondombwedi.” Ngeenge oilonga oyo oya wanifwa po fiyo osheshi Kalunga e wete kutya osha wana, exulilo otali uya shili.—Mateus 24:14.
18. Ongahelipi elinyengo lavahapu koilonga yetu yokuudifa tali yelekwa naalo lovanhu vahapu ovo va li ko pefimbo laNoa?
18 Molwaashi ovanhu ovo va tetekela Eyelu kava li ve na ko nasha noinima yopamhepo nosho yo eenghedi, ohatu dulu okuuda ko kutya omolwashike oukwaneumbo waNoa wa li oiyolifa kovanhu ve he na eitavelo nokwa li va ulwa nai nokushekwa. Ndelenee exulilo ole ke uya. Sha faafana, “ovasheki tava shekaula” ova hapupala momafiku axuuninwa. “Ndelenee efiku lOmwene otali ke uya ngaashi omulunga,” ngaashi Ombibeli tai ti. (2 Petrus 3:3, 4, 10) Otali ke uya shili pefimbo lalo la nunwa. Itali ka tokelwa. (Habakuk 2:3, NW) Kashi li tuu pandunge okukala oupafi!
Ovanini ashike va xupa
19, 20. Efaafano lilipi tu wete pokati kEyelu nehanauno longhalelo yoinima yopaife?
19 Efaafano pokati kefimbo laNoa naalo letu kali na sha ashike nowii wovanhu nosho yo ehanauno lavo. Ngaashi pa li ovaxupipo pEyelu, otapa ka kala yo ovo tava ka xupa eshi onghalelo yoinima yopaife tai ka xula po. Ovaxupipo pEyelu ova li ovalininipiki ovo inava kala ngaashi ovanhu vahapu va li. Vo ova dulika kelondwelo laKalunga nova li va yooloka ko kounyuni mwii wopefimbo olo. Ombibeli otai ti: “Noa okwa mona onghenda momesho Omwene. . . . Nokwa li e he noshipo mokati kovanhu vomounyuni waye.” (Genesis 6:8, 9) Mokati kovanhu aveshe, “vamwe aveke, nokutya ovanhu va-8, va xupifwa komeva,” oukwaneumbo ashike umwe. (1 Petrus 3:20) Na Jehova Kalunga okwe va lombwela ta ti: “Dalafaneni, hapupaleni, nye mu yadife edu.”—Genesis 9:1.
20 Eendjovo daKalunga otadi tu shilipaleke kutya “ongudu inene” otai ka “dja moudjuu unene.” (Ehololo 7:9, 14, yelekanifa NW.) Vangapi tava ka kala mongudu inene? Jesus okwa popya ta ti: “Oshivelo oshinini nondjila oya finana ei tai twala momwenyo, novanini vongaho ovo tave i mono.” (Mateus 7:13, 14) Mokuyelekanifa nomamiliyona omayovi ovanhu ovo ve li kombada yedu paife, ovaxupipo moudjuu unene oo tau uya otava ka kala vanini. Ndele otashi dulika tava ka kala ve na oufembanghenda wa faafana naao kwa li wa pewa ovaxupipo pEyelu. Ovaxupipo ovo tava ka kala oshitukulwa shoulikumwe wovanhu mupe wokedu otashi dulika tava ka kala oule wokafimbo tava dulu okumona ounona.—Jesaja 65:23.
“Kaleni oupafi”
21, 22. (a) Ouwa ulipi wa mona mo mekonakono eli li na sha nehokololo lEyelu? (b) Omushangwa womudo 2004 ulipi, nomolwashike tu na okudulika komayele oo tau yandje?
21 Nonande Eyelu otashi dulika tu kale tu wete la fa oshinima osho shi he na eityo shi na sha nefimbo letu, oli li lela elondwelo olo tu he na nande oku li lipwililikila. (Ovaroma 15:4) Omafaafano oo e li pokati kefimbo laNoa noletu oku na oku tu linyengifa tu kale tu shii nawa eityo loiningwanima oyo tai ningwa nokukala oupafi shi na sha neuyo laJesus la fa omulunga te uya, eshi te uya okutokola ovakolokoshi.
22 Kunena, Jesus Kristus ota wilike oilonga inene yokutunga pamhepo. Omolweameno nexupifo lovalongelikalunga vashili, ope na onguluwato yopafaneko, oparadisa yopamhepo. (2 Ovakorinto 12:3, 4) Opo tu xupifwe moudjuu unene, otu na okukala moparadisa oyo. Oparadisa oyo yopamhepo oya dingililwa kounyuni waSatana, oo we lilongekida okuxwaka po keshe oo ta kofa pamhepo. Osha fimanenena ‘okukala oupafi’ nokukala twe lilongekidila efiku laJehova.—Mateus 24:42, 44.
Oto dimbuluka?
• Ekumaido lilipi Jesus a yandja shi na sha nokuuya kwaye?
• Jesus okwa faafanifa efimbo lokukala po kwaye nashike?
• Omeenghedi dilipi efimbo letu la faafana nefimbo laNoa?
• Okukonakona omafaafano oo e li pokati kefimbo laNoa noletu oku na okukuma ngahelipi okukala tu wete kutya efimbo olo tu li mulo ola endelela?
[Eendjovo dididilikwedi pepandja 14]
Omushangwa womudo 2004 otau ka kala: “Kaleni oupafi . . . Kaleni mwe lilongekida.”—Mateus 24:42, 44.