Oohapu dhaJehova odhi na omwenyo
Omanenedhiladhilo okuza membo lyaNumeri
KONIMA yokuza kwawo muEgipiti, Aaisrael oya li yu unganekwa ya kale oshigwana. Nziya konima yaashoka, oya li ya vulu okuya mEvi lyEuvaneko, ihe inaya ya mo. Pehala lyaashono, oya li ye na okweendaenda uule woomvula 40 lwaampono ‘mombuga onene yiihuna.’ (Deuteronomium 8:15) Omolwashike? Ehokololo lyopandjokonona membo lyOmbimbeli lyaNumeri otali tu lombwele shoka sha ningwa po. Otu na oku shi uva ko kutya osha pumbiwa tu vulike kuJehova Kalunga nokusimaneka aakalelipo ye.
Embo lyaNumeri lya nyolwa kuMoses mombuga nosho wo komalushandja gaMoab, otali hokolola ethimbo lyoomvula 38 noomwedhi 9—okuza mo 1512 K.E.N. sigo omo 1473 K.E.N. (Numeri 1:1; Deuteronomium 1:3) Edhina lyalyo olya za komayalulo gaali gAaisrael, gi ipitithila po oomvula 38 lwaampono. (Ontopolwa 1-4, 26) Ehokololo olya topolwa miitopolwa itatu. Oshitopolwa shotango otashi hokolola iiningwanima mbyoka ya ningwa kondundu Sinai. Oshitiyali otashi hokolola shoka sha ningwa pethimbo lyokweendaenda kwaIsrael mombuga. Noshitopolwa shahugunina otashi konakona iiningwanima mbyoka yokomalushandja gaMoab. Ngele to lesha ehokololo ndika, otashi vulika to kala wa hala okwiipula to ti: ‘Mbela iiningwanima mbika otayi longo ndje shike? Mbela membo ndika omu na omakotampango ngoka taga kwathele ndje nena?’
KONDUNDU SINAI
(Numeri 1:1–10:10)
Lyotango lyomomayalulo gaali olya li lya ningwa manga Aaisrael ya li natango pekota lyondundu Sinai. Aalumentu yoomvula 20 okuuka pombanda, kakele kAalevi, oya li ye thike po 603 550. Osha yela kutya eyalulo olya ningwa omolwomalalakano ge na ko nasha nuukwiita. Omwaalu gwaantu ayehe yomontanda, mwa kwatelwa aakiintu, aanona nAalevi, otashi vulika gwa li gwa konda paantu omamiliyona gatatu.
Konima yeyalulo, Aaisrael oya pewa omalombwelo ge na ko nasha nelandulathano lyokweenda, uuyelele u na ko nasha niilonga yAalevi niilonga yometsalihangano, omalombwelo ge na ko nasha neikalekelo noompango dhi na ko nasha nuukodhi nomauvaneko ngoka ga li ga ningwa kAanasiri. Ontopolwa onti-7 otayi gandja uuyelele u na ko nasha nokuninga omayambo kwezimo lyomalenga shi na ko nasha neyapulo lyoshiyambelo, nontopolwa onti-9 otayi kundathana edhano lyOpaasa. Oshigongi osha li wo sha pewa omalombwelo kombinga yankene oontanda dhi na okuungwa nonkene dhi na okudhikulwa po.
Omapulo gopamanyolo taga yamukulwa:
2:1, 2 (KB)—‘Omandhindhiliko’ mpoka omazimo gatatu ga li ge na okuunga oontanda mombuga oga li shike? Ombimbeli inayi hokolola kutya omandhindhiliko ngoka oga li shike. Ihe kaga li ga talika ko ge li omandhindhiliko omayapuki nenge kaga li ge na eityo lyopalongelokalunga. Omandhindhiliko oga li ga longithwa omolwelalakano li na oshilonga—okukwathela omuntu a mone kutya ehala lye montanda oli li naanaa peni.
5:27—‘Okupwina po kwomatundji’ gomukiintu ngoka a hondele otaku ti shike? Uutumbulilo ‘omatundji’ otau longithwa mpaka okuulika kiilyo yoluvalo. (Genesis 46:26, KB) ‘Okupwina po’ kwago otaku ulike kwokwaalonga we kwiilyo ye mbika yoluvalo, opo ka li ta wapa we okuninga omusimba.
Iiyilongomwa kutse:
6:1-7. Aanasiri oya li ye na okwiidhilika omaviinu nokehe oshikolitha. Oya li ye na okweetha omafufu gawo ga ninge omale—endhindhiliko lyevuliko lyawo kuJehova, ngaashi naanaa aakiintu ya li ye na okuvulika kaasamane yawo nenge koohe. Aanasiri oya li ye na okukala ya yela mokwaaguma oshinima sha sa, nokuli nomudhimba gwomukwanezimo. Aakalele yethimbo lyu udha nena ohayu ulike ombepo yeiyambo uuna tashi ya pokwiidhilika nokuvulika kuJehova nokelongekidho lye. Iilonga yimwe otashi vulika ya kwatela mo okuya koshilongo shokokule, hoka tashi vulika nokuli ku shi ninge oshidhigu nenge itaashi wapa okugalukila kegumbo omolwefumviko lyomukwanezimo.
8:25, 26. Aalumentu aakulupe oya li ya lombwelwa ye ethe po iilonga tayi dhengele nokupenzelwa omolwuukulupe wawo noku shilipalekwe wo kutya aalumentu Aalevi mboka ya pyokoka oya pewa iilonga. Ihe oya li taya vulu okwiigandja okukwathela Aalevi yalwe. Nonando mokukala omuuvithi gwUukwaniilwa nena ihamu penzelwa omuntu, ekotampango lyompango ndjika otali tu longo oshiilongomwa shi na ongushu. Ngele Omukriste ita vulu okugwanitha po iinakugwanithwa yontumba omolwuukulupe, ota vulu okukutha ombinga miilonga yoludhi lwontumba mbyoka ye eleka oonkondo dhe.
OKUTEMBUKA PEHALA NEHALA MOMBUGA
(Numeri 10:11–21:35)
Sho lwahugunina oshikogo shi itumbu kombanda yetsalihangano, Aaisrael oya tameke olweendo ndoka lwa li lwe ye eta momalushandja gombuga yaMoab konima yoomvula 38 nomwedhi gumwe nenge mbali. Otashi vulika u mone shi li nawa okulandula ondjila yawo mokaalita hoka ke li pepandja eti-9 lyokabroshure “See the Good Land,” ka nyanyangidhwa kOonzapo dhaJehova.
Mondjila okuya kuKades, mombuga yaParan, opwa li nokuli omangongoto gatatu. Lyotango olya hulu po sho Jehova a tumu omulilo gu letheke po aantu yontumba. Opo nduno Aaisrael oya lilile onyama, Jehova nokwe ya pe oonkanga. Okupopya nayi Moses kwaMiriam naAaron okwa ningitha Miriam a kwatwe kuulepera uule wokathimbo.
Manga tayu ungu oontanda muKades, Moses ota tumu aalumentu 12 ya ka ndaadhe Evi lyEuvaneko. Oya galuka konima yomasiku 40. Molwaashoka oshigwana osha li shi itaala ehokololo ewinayi lyoondaadhi omulongo, osha li sha hala okudhipaga nomamanya Moses, Aaron noondaadhi oondhiginini Josua naKaleb. Jehova okwa ti kutya okwa hala okuumba aantu oshivu, ihe Moses okwe ya popile ko, Kalunga nokwa ti kutya otaya ka kala oondjendi mombuga uule woomvula 40—sigo mboka ya yalulwa ya si po.
Jehova okwa gandja omauthompango ga gwedhwa po. Korah nayalwe oya tsu ondumbo naMoses naAaron, ihe aanamapoye mboka oya hanagulwa po komulilo nayalwe yomuyo oya ninagulwa po kevi. Esiku lya landula oshigongi ashihe osha ngongotele Moses naAaron. Oshizemo, aantu 14 700 oya sile moshiponga sha tumwa kuJehova. Opo a tseyithe ehogololo lye okuhogolola omusaaseri gwe omukuluntu, Kalunga okwa tutumitha ondhimbo yaAaron oongala. Opo nduno Jehova okwa gandja oompango dhilwe natango dhi na ko nasha niinakugwanithwa yAalevi nodhi na ko nasha nuuyogoki woshigwana. Elongitho lyomutoko gwondema yoshiyala oshitiligane otali thaneke okuyogolwa keyambo lyaJesus.—Aaheberi 9:13, 14.
Oyanamati yaIsrael oya galukile kuKades, hoka Miriam a sile. Oshigongi osha ngongotele ishewe Moses naAaron. Etompelo lyawo olya li shike? Ompumbwe yomeya. Molwashoka Moses naAaron inaya yapulitha edhina lyaJehova sho ya gandja omeya pashikumithalonga, oya kanitha uuthembahenda wokuya mEvi lyEuvaneko. Aaisrael oya tembuka mo muKades, na Aaron okwa sile pondundu yaHor. Manga Aaisrael ya li taye endaenda muEdom, oya li ya lulilwa noya popi nayi Kalunga naMoses. Jehova okwa tumu omayoka ge na uuzigo oku ya geela. Moses okwe ya popile ko ishewe, Kalunga nokwe mu lombwele a ninge eyoka lyoshiyela oshikushu e te li tsilike koshiti opo mboka taya lika kugo ya aluke ngele taya tala kulyo. Eyoka otali thaneke okweendjelekwa koshiti kwaJesus Kristus molwuuwanawa wetu waaluhe. (Johannes 3:14, 15) Israel okwa sindi Sihon naOg, aakwaniilwa yAayamori, e ta kwata ko iilongo yawo.
Omapulo gopamanyolo taga yamukulwa:
12:1—Omolwashike Miriam naAaron ya popi nayi Moses? Etompelo lyolela lyoku mu popya nayi osha yela kutya olya li omolwehalo lyaMiriam okuhala oonkondopangelo. Sho omukulukadhi gwaMoses, Sipora, e ya okukala pamwe naye mombuga, otashi vulika Miriam a li a tila kutya pamwe ita ka kala we a talika ko e li omukiintu a simana montanda.—Eksodus 18:1-5.
12:9-11—Omolwashike Miriam oye owala a kwatwa kuulepera? Osha yela kutya okwa li oye ngoka a hwahwameke okungongota nokwi itaalitha Aaron a game kombinga ye. Aaron oku ulike iikala yu uka mokuhempulula epuko lye.
21:14, 15—Oraamata ndjoka ya tumbulwa mpaka oshike? Omanyolo otagu ulike komambo gi ili nogi ili ngoka aanyoli yOmbimbeli ya longitha okumona uuyelele. (Josua 10:12, 13; 1 Aakwaniilwa 11:41; 14:19, 29) “Oraamata yiita yOmuwa” oyo ya li embo limwe lyomugo. Olya li li na ehokololo lyopandjokonona lyiita yoshigwana shaJehova.
Iiyilongomwa kutse:
11:27-29. Moses okwa gandja oshiholelwa sha dhenga mbanda shi na ko nasha nankene tu na okwiinyenga uuna yalwe taya pewa omauthembahenda miilonga yaJehova. Pehala lyokwiikongela nondumbo esimano, Moses okwa li a nyanyukwa sho Eldad naMedad ya tameke okulonga ye li aaprofeti.
12:2, 9, 10; 16:1-3, 12-14, 31-35; 17:6, 11-15 (16:41, 46-50, OB-1986). Jehova okwa tegelela aalongeli ye ya simaneke oonkondopangelo dha gandjwa kuye.
14:24. Oshinima sha simana okukondjitha omathininiko guuyuni ge na ko nasha nokuninga omapuko osho okukokeka “ombepo yilwe” nenge iikala yopamadhiladhilo. Oyi na okukala inaayi fa ndjoka yuuyuni.
15:37-41. Oondjendja dhi li shimwe shi ili dhoonguwo dhAaisrael odha li dha dhiladhililwa oku ya dhimbulukitha kutya oye li oshigwana shi ikalekelwa okulongela Kalunga nokuvulika kiipango ye. Tse katu na wo mbela okukala pamithikampango dhaKalunga nokukala twa tongomana twa yooloka ko kuuyuni?
KOMALUSHANDJA GAMOAB
(Numeri 22:1–36:13)
Sho oyanamati yaIsrael yu ungu oontanda mombuga momalushandja gaMoab, Aamoab oya li ye ya tila nokutililila. Onkee ano, omukwaniilwa gwaMoab Balak okwa pula Bileam e mu thingile Aaisrael. Ihe Jehova okwa ningitha Bileam e ya yambeke. Aakiintu Aamoab nAamidian oya longithwa nduno okuhekela aalumentu Aaisrael moluhondelo nomokulongela iikalunga. Oshizemo, Jehova okwa hanagula po aayoni 24 000. Hugunina oshiponga osha hulu po sho Pinehas a tindi okwiidhidhimikila iikalunga pehala lyaJehova.
Eyalulo etiyali otali ulike kutya kapwa li gumwe gwomaalumentu mboka ya yalulwa tango e na omwenyo natango, kakele kaJosua naKaleb. Josua okwa li a lombwelwa a kale omulanduli gwaMoses. Aaisrael oya pewa omalombwelo gankene omayambo gi ili nogi ili ge na okuningwa mokuninga omauvaneko. Oshigwana shaIsrael osha galulile wo uuwinayi Aamidian. Ruben, Gad netatazimo lyaManasse oya tula kuuzilo womulonga gwaJordan. Aaisrael oya li ya pewa omalombwelo gankene ye na okutaaguluka Jordan nokutopola oshilando. Oongamba dhoshilongo odha tendwa nuukeka. Iithigululwatendelwa oya li yi na okutokolwa pashihogololitho. Aalevi oya li ya pewa iilongo 48, nii-6 yomuyo oya li yi na okukala iiholamenolando.
Omapulo gopamanyolo taga yamukulwa:
22:20-22—Omolwashike ondjahi yaJehova ya hwamene Bileam? Jehova okwa li a lombwele omuprofeti Bileam kutya ke na okuthinga Aaisrael. (Numeri 22:12) Ihe omuprofeti okwa yi pamwe naalumentu yaBalak e na lela elalakano okuthinga Aaisrael. Bileam okwa li a hala okunyanyudha omukwaniilwa gwAamoab nokwa pewa ondjambi kuye. (2 Petrus 2:15, 16; Judas 11) Nokuli sho Bileam a li a ningithwa a yambeke Aaisrael pehala lyoku ya thinga, okwa li a lalakanene okuhokiwa komukwaniilwa a tye kutya aakiintu mboka haya galikana Baal oye na okulongithwa okupukitha aalumentu Aaisrael. (Numeri 31:15, 16) Onkee ano Kalunga okwa li a geyele omuprofeti Bileam molwolwiho lwe lunyanyalitha.
30:6-8—Omulumentu Omukriste ota vulu mbela okukaleka omauvaneko gomukiintu gwe? Shi na ko nasha nomauvaneko, Jehova ngashingeyi ohe endathana naalongeli ye pauhandimwe. Pashiholelwa, okwiiyapulila Jehova oku li euvaneko lyopaumwene. (Aagalati 6:5) Omusamane ke na uuthemba okukaleka euvaneko lya tya ngaaka. Ihe omukulukadhi oku na okuyanda okuninga euvaneko ndyoka tali kondjithathana nOohapu dhaKalunga nenge niinakugwanithwa mbyoka a pumbwa okukwathela omusamane gwe.
Iiyilongomwa kutse:
25:11. Pinehas ine tu tulila po tuu oshiholelwa oshiwanawa shokukala omulaadhi omolwegalikano lyaJehova! Ehalo lyokukaleka egongalo lya yela kali na mbela oku tu inyengitha tu tseyithile aakuluntugongalo yopaKriste oluhondelo kehe tatu mono talu ningwa?
35:9-29. Oshili kutya nakudhipaga omuntu kaashi shi owina oku na okuza mo megumbo lye nokuya ontuku koshiholamenolando nokukala uule wethimbo, otayi tu longo kutya omwenyo omuyapuki nonokutya otu na oku gu simaneka.
35:33. Evi lya nyatekwa kombinzi ya tilwahi kaayi na ondjo otali vulu owala okukulilwa kombinzi yaamboka ye yi tilehi. Inashi eleka tuu sho Jehova ta ka hanagula po uukolokoshi manga evi inaali ninga oparadisa!—Omayeletumbulo 2:21, 22; Daniel 2:44.
Oohapu dhaKalunga odhi na oonkondo
Otu na okusimaneka Jehova nosho wo mboka a langeka poondondo dhiinakugwanithwa mokati koshigwana she. Embo lyaNumeri otali yelitha nawa oshili ndjika. Oshiilongomwa shokukaleka ombili nuukumwe megongalo nena inashi simana tuu!
Iiningwanima mbyoka ya hokololwa muNumeri otayi ulike nkene mboka taye etha ya talale pambepo taya vulu okugwila mepuko nuupu, ngaashi okungongota, oluhondelo nokulongela iikalunga. Yimwe yomiiholelwa niiyilongomwa yomembo ndika lyOmbimbeli otayi vulu okulongithwa yi li iitopolwa yoompumbwe dhegongalo pOkugongala kwoPailonga momagongalo gOonzapo dhaJehova. Dhoshili, “Oohapu dhaKalunga odhi na omwenyo noonkondo” monkalamwenyo yetu.—Aaheberi 4:12.
[Ethano pepandja 30, 31]
Okupitila moshikogo shopashikumithalonga kombanda yetsalihangano, Jehova okwa wilike okuungwa kontanda yAaisrael nokudhikulwa po kwayo
[Omathano pepandja 32]
Jehova oye twa gwana okuvulika kuye nokwa tegelela tu simaneke aakalelipo ye