Aavali, onakuyiwa ya tya ngiini mwa halela aanona yeni?
“Aamati naakadhona [naya] hambelele edhina lyOMUWA.”—Episalomi 148:12, 13.
1. Aavali ohaya kala tayi ipula nashike shi na ko nasha naanona yawo?
MBELA opu na ngaa aavali ihaayi ipula shi na ko nasha nonakuyiwa yaanona yawo? Okuza pokuvalwa kwokanona—nenge nokuli manga inaaka valwa—aavali ohaya tameke okukala tayi ipula shi na ko nasha nonkalonawa yako. Mbela otaka ka kala tuu ke na uukolele? Mbela otaka ka koka ngaa ke li nawa? Sho okanona taka koko, ohapu holoka omaipulo ga gwedhwa po. Olundji aavali ohaya kala ya halela aanona yawo shoka oshiwanawa.—1 Samuel 1:11, 27, 28; Episalomi 127:3-5.
2. Omolwashike aavali oyendji nena ya halelela aanona yawo ya kale ye na onkalamwenyo ombwanawa ngele ya koko?
2 Ihe muuyuni wonena, oshi li oshidhigu kaavali okupa aanona yawo shoka oshiwanawa. Aavali oyendji oya pita momathimbo omadhigu—giita, gomapiyagano gopapolotika, gokumona iihuna kwopamahupilo nokwopalutu nenge kwopamaiyuvo, nosho tuu. Dhoshili, oya halelela nomutima aguhe opo aanona yawo kaaya mone omaupyakadhi ga fa ngoka ya mona. Miilongo mbyoka iiyamba, aavali otashi vulika ya mone aanona aamati naakadhona yookuume kawo noyaapambele yawo taye shi enditha nawa momaithano guuyuni notaya monika ya fa ye na onkalamwenyo tayi ende nawa. Onkee ano, ohaya kala ye uvite kutya oye na okuninga kehe shimwe shoka taya vulu okuninga opo ya kale ye na uushili kutya aanona yawo nayo otaya ka kala taya vulu okunyanyukilwa onkalamwenyo ombwanawa noya gamenwa ngele ya koko.—Omuuvithi 3:13.
Nkene taku hogololwa onkalamwenyo ombwanawa
3. Aakriste oya ninga ehogololo lini?
3 Molwaashoka Aakriste oye li aalanduli yaJesus Kristus, oya hogolola okuyapulila onkalamwenyo yawo Jehova. Oya pulakena koohapu dhaJesus tadhi ti: “Ngele ku na ngoka a hala okulandula ndje, oye ni idhimbwe ye mwene, ni itsike [omuti gwomahepeko, NW] gwe esiku kehe, ye na landule ndje.” (Lukas 9:23; 14:27) Osha yela kutya, onkalamwenyo yOmukriste oya kwatela mo eiyambo. Ihe kayi shi onkalamwenyo yoluhepo noyoluhodhi. Mepingathano naashoka, oyo onkalamwenyo yokukala wu uvite elago nowa nyanyukwa—onkalamwenyo ombwanawa—molwaashoka oya kwatela mo okugandja, nongaashi Jesus e shi popya: “Okugandja oku na elago ku vule okutaamba.”—Iilonga 20:35.
4. Jesus okwa li a ladhipike aalanduli ye ya konge shike?
4 Aantu yopethimbo lyaJesus oya li moonkalo oondhigu noonkondo. Kakele kokwiikongela omboloto, oya li ye na okwiidhidhimikila epangelo lyonyanya lyAaroma nomutengi omudhigu gwaakwatelikomeho yomalongelokalunga yopethimbo ndyoka kaaye na ondjele. (Mateus 23:2-4) Kakele kaashono, aantu oyendji mboka ya li taya pulakene kuJesus oya li ye etha po nehalo ewanawa omaipyakidhilo gawo gopaumwene—nokuli nomaithano gawo—e taya ningi aalanduli ye. (Mateus 4:18-22; 9:9; Aakolossa 4:14) Mbela aalongwa mboka oya li ya tula onkalamwenyo yawo muudhigu nonakuyiwa yawo moshiponga? Ndhindhilika oohapu dhaJesus tadhi ti: “Nokehe tuu a thigile ko egumbo nenge aamwayina aalumentu nenge aamwayina aakiintu nenge he nenge yina nenge oyana nenge epya omolwandje, ote ke yi mona lwethele yi vule mbika, nomwenyo gwaaluhe ote gu pewa.” (Mateus 19:29) Jesus okwa li a shilipaleke aalanduli ye kutya He gwomegulu oku shi shoka ya pumbwa. Onkee ano okwa li e ya ladhipike a ti: “Tangotango kongeni [uukwaniilwa waKalunga, KB] nuuyuuki we, nena mbika ayihe otamu yi gwedhelwa ko.”—Mateus 6:31-33.
5. Aavali yamwe otaya dhiladhila ngiini shi na ko nasha noohapu dhaJesus dheshilipaleko kutya Kalunga ota ka sila oshimpwiyu aapiya ye?
5 Nena iinima inayi lunduluka naanaa. Jehova okwa tseya shoka twa pumbwa, naamboka taya pititha komeho iinima yUukwaniilwa monkalamwenyo yawo, unene tuu mboka ye li miilonga yethimbo lyu udha, oye na uushili owo tuu mboka kutya Jehova ote ke ya sila oshimpwiyu. (Maleaki 3:6, 16; 1 Petrus 5:7) Ihe aavali yamwe kaye na uushili mwaashika. Kombinga yimwe, oya hala okumona aanona yawo taya ningi ehumokomeho miilonga yaJehova, notashi vulika ya ye miilonga yethimbo lyu udha ngele ya mana osikola. Kombinga onkwawo, ngele taya tala konkalo yopamahupilo noyiilonga muuyuni wonena, oye wete kutya osha simana aagundjuka ya mone tango elongo ewanawa opo ya ka mone oonzapo ndhoka dha pumbiwa okumona iilonga iiwanawa nenge nokuli opo ya vule oku dhi longitha ngele sha pumbiwa. Aavali ya tya ngaaka olundji otaya dhiladhila kutya elongo ewanawa otali ti elongo lyopombanda.
Nkene taku ilongekidhilwa onakuyiwa
6. Omomukalo guni uutumbulilo “elongo lyopombanda” tau longithwa moshitopolwa shika?
6 Omulandu gwelongo ogwa yooloka moshilongo noshilongo. Pashiholelwa, moNamibia elongo lyopetameko moosikola dhepangelo ohali longwa uule woomvula 12. Konima yaashoka, aailongi otashi vulika ya hogolole okuya kounivesiti nenge kokolindji uule woomvula ne nenge dhi vulithe po, opo ya mone onkatu yotango younivesiti nenge ya tsikile nokwiilonga omolwomaithano guunamiti, guutseyiveta, guuindjiniya, nosho tuu. Ngele uutumbulilo “elongo lyopombanda” tau longithwa moshitopolwa shika, otau ulike kelongo lyokounivesiti lya tya ngaaka. Mepingathano naashoka, opu na oosikola dhuungomba nodhomaithanolongo ndhoka hadhi gandja ookersesa dhethimbo efupi nohadhi gandja onzapo nenge odiploma miilonga yontumba yokomake nenge miilonga yokuyakula.
7. Aanasikola yokoosekundosikola otaya thininikwa ya ninge shike?
7 Pethimbo lyongashingeyi oosekundosikola nenge oosikola dhopombanda odhi hole okulongekidhila aanasikola yadho elongo lyopombanda. Opo dhi adhe omalalakano gadho, oosekundosikola odhindji ohadhi ukitha eitulomo kiilongwa mbyoka tayi kwathele aanasikola ya mone iitsa yi li nawa momakonakono gokuya kounivesiti, pehala lyokuukitha eitulomo kookersesa ndhoka tadhi longekidhile aanasikola okumona iilonga. Aanasikola yokoosekundosikola nena otaya thininikwa unene kaalongi, kaagandjimayele nosho wo kaanasikola ooyakwawo opo ya lalakanene okwiinyolitha koounivesiti ndhoka dha dhenga mbanda, hoka ye na etegameno lyoku ka mona oonkatu ndhoka tadhi vulu oku ya monitha iilonga mbyoka tayi ya yele notayi ya futu nawa.
8. Omahogololo geni aavali Aakriste ya taalela?
8 Aavali Aakriste oye na ano okuninga shike? Osha yela kutya oya hala aanona yawo ya ninge nawa mosikola noyi ilonge okulonga sha opo ya vule okwiikwathela momasiku gokomeho. (Omayeletumbulo 22:29) Ihe mbela oye na okweetha owala aanona yawo ya nwethwe mo kombepo yethigathano yokumona omaliko noku shi enditha nawa? Mbela omalalakano geni haya ladhipikile aanona yawo, pakupopya nenge noshiholelwa shawo? Aavali yamwe ohaya longo nuudhiginini nokupungula iimaliwa opo ya vule okutuma aanona yawo kiiputudhilolongo yelongo lyopombanda ngele ethimbo lyoku shi ninga lya thiki. Yalwe ohaya li nokuli oongunga omolwelalakano ndyoka. Ihe okuninga etokolo lya tya ngaaka, osha pumbiwa opo u tale kiinima oyindji mbyoka ya kwatelwa mo, itoo tala owala kofuto yako. Mbela elongo lyopombanda nena ohali pula shi thike peni?—Lukas 14:28-33.
Shoka tashi pulwa kelongo lyopombanda
9. Oshike tashi vulu okutiwa shi na ko nasha nofuto yopashimaliwa yelongo lyopombanda nena?
9 Ngele tatu popi kutya oshinima otashi pula ingapi, olundji ohashi tu dhiladhilitha ofuto yopashimaliwa. Miilongo yimwe, elongo lyopombanda ohali futwa kepangelo, naailongi mbono ya taambwa mulyo ihaya futu elongo ndyoka. Ihe momahala ogendji elongo lyopombanda oli na ondilo notali ende tali ndilopala unene. Oshitopolwa moshifokundaneki New York Times otashi ti: “Elongo lyopombanda olya li lya talika ko li li sha tashi gandja oompito dhokuninga sha. Ngashingeyi olya talika ko tali koleke eyooloko ndyoka li li pokati kaayamba naamboka kaaye shi aayamba.” Niitya yimwe, elongo lyopombanda li na ongushu otali endelele okuninga oshinima shaayamba noshaanenentu, mboka aanona yawo oyo haye li mono nohaya kala ye na uushili kutya nayo otaya ka kala aayamba naanenentu monkalelo ndjika. Mbela aavali Aakriste oye na okuhogololela aanona yawo elalakano lya tya ngaaka?—Aafilippi 3:7, 8; Jakob 4:4.
10. Ongiini elongo lyopombanda li na naanaa ekwatathano nokuhumitha komeho iinima yonkalelo ndjika yongashingeyi?
10 Nokuli naampoka elongo lyopombanda hali gandjwa oshali, otashi vulika pu na iitegelelwa yontumba kaayi holike. Pashiholelwa, oshifo The Wall Street Journal otashi kundaneke tashi ti kutya moshilongo shimwe shokuAsia lyokUuzilombugantu, epangelo oli na “omulandu gwowina gwosikola gwokuhumitha komeho aailongi mboka ye shi enditha nawa.” Shika otashi ti kutya hugunina ohaya taambwa miiputudhilo mbyoka ya dhenga mbanda—ngaashi Oxford naCambridge muIngilanda, oosikola dhaIvy League mIilongohangano nomiiputudhilo yilwe. Mbela omolwashike epangelo lya sa oshimpwiyu opo pu kale oprograma yoku ki ilonga kiilongo yokokule? Oshikundaneki otashi ti: “Opo li humithe komeho omahupilo goshigwana.” Elongo otashi vulika li kale lyoshali, ihe ohali pula opo aailongi ya longe nuudhiginini okuhumitha komeho iinima yonkalelo ndjika yongashingeyi. Nonando omukalo gwonkalamwenyo ya tya ngaaka ogwo tagu lalakanenwa noonkondo muuyuni, mbela ogwo aavali Aakriste ya halela aanona yawo?—1 Johannes 15:19; 1 Johannes 2:15-17.
11. Omahokololo giifokundaneki otagu ulike shike shi na ko nasha nokulongitha iikolitha sha pitilila nosho wo oluhondelo mokati kaailongi yokounivesiti?
11 Opo nduno oshinima shilwe shoka shi na okudhiladhilwa osho eendathano. Kounivesiti nokokolindji oku na eihumbato ewinayi noonkondo—sha hala okutya, ohaku longithwa iingangamithi niikolitha sha pitilila, oluhondelo, okuyaka mekonakono, okutilitwa nosho wo iinima yilwe oyindji. Natu tale kokulongitha iikolitha sha pitilila. Oshifo New Scientist otashi kundaneke shi na ko nasha nokunwa nelalakano lyokukolwa tashi ti: “Konyala oopelesenda 44 [dhaailongi yokounivesiti mIilongohangano] ohadhi nu nelalakano lyokukolwa nokuli lumwe miiwike iyali.” Uupyakadhi wa faathana ou li apuhe mokati kaagundjuka muAustralia, Britania, Rusia nokehe pamwe. Shi na ko nasha noluhondelo, aailongi nena ohaya kundathana shi na ko nasha nokuya momilalo dhesiku limwe ndhoka tadhi hokololwa koshifokundaneki Newsweek kutya ‘ohaya yi miihole esiku ya tsakanena nomuntu ngoka inaaya tseyathana naanaa naye, sha hala okutya, taya hupitathana nenge taya lalathana nokuli, nonando kaye na edhiladhilo nokuli lyokupopya naye konima yaashono.’ Omakonakono otagu ulike kutya oopelesenda 60 sigo 80 dhaailongi ohadhi kutha ombinga meihumbato lya tya ngaaka. Omukonakoni gumwe ota ti: “Ngele ngoye omwiilongi gwokounivesiti, shoka oho shi ningi.”—1 Aakorinto 5:11; 6:9, 10.
12. Aailongi yokounivesiti otaya thininikwa koshike?
12 Kakele keendathano ewinayi, opu na wo ethininiko ndyoka hali etithwa kiilonga yosikola nokomakonakono. Osha yela kutya aailongi oya pumbwa okwiilonga nokulonga iilonga mbyoka ya pewa kosikola ye ke yi longele kegumbo opo ya vule okupita omakonakono. Yamwe otashi vulika ya pumbwa wo okukala ye na nokuli iilonga yetatasiku manga haya yi natango kosikola. Ayihe mbyoka otayi pula ethimbo noonkondo dhawo odhindji. Ano omaipyakidhilo gopambepo ohaga hupithilwa po ethimbo noonkondo dhi thike peni? Sho omathininiko tagi indjipala, oshike taye ke etha po? Mbela otaya ka pititha ngaa natango iinima yUukwaniilwa komeho, nenge otaye ke yi tula konima? (Mateus 6:33) Ombiimbeli otayi ladhipike Aakriste tayi ti: “Ikonakoneni ano nawa, nkene mu na okukala. Inamu kala ngashika omagoya, kaleni ngaashi aanandunge. Longitheni nawa ethimbo kehe mu li na, oshoka omasiku ngaka omawinayi.” (Aaefeso 5:15, 16) Kashi yemateka tuu sho yamwe yi iteka po eitaalo omolwokwiigandja kwaashoka tashi pula ethimbo lyawo nosho wo oonkondo dhawo nenge molwaashoka ya kwatwa ko keihumbato lyaahe li pamanyolo lyokounivesiti!
13. Omapulo geni aavali Aakriste ye na okwiipula?
13 Nonando ongaaka, iinima ngaashi oluhondelo, eihumbato ewinayi nomathininiko kayi li owala kokolindji nenge kounivesiti. Ihe aagundjuka oyendji yomuuyuni oya tala ko iinima ayihe mbyoka yi li owala oshitopolwa shelongo noitaya dhiladhila nando kutya opu na sha sha puka nayo. Mbela aavali Aakriste oye na okutula owina aanona yawo momahala ga tya ngaaka uule woomvula ne nenge tashi vulika dhi vulithe po? (Omayeletumbulo 22:3; 2 Timoteus 2:22) Uuwanawa mboka aagundjuka taya mono mo mbela owa simana noonkondo opo u ya falithe moshiponga shoka sha kwatelwa mo? Naashoka sha simanenena, mbela oshike aailongi aagundjuka hayi ilongo ko shi na ko nasha naashoka ye na okupititha komeho monkalamwenyo yawo?a (Aafilippi 1:10; 1 Aatessalonika 5:21) Aavali oye na okukonakona ya mana mo nopamwe negalikano omapulo ngoka, nosho wo okumona nkene sha nika oshiponga okutuma aanona yawo kosikola yokoshilando shilwe nenge yokoshilongo shilwe.
Oshike tashi vulu okuhogololwa pehala lyelongo lyopombanda?
14, 15. (a) Nonando opu na omadhiladhilo ngoka ge holike apuhe, mbela omayele geni gOmbiimbeli taga longo nena? (b) Omapulo geni aagundjuka taya vulu okwiipula?
14 Nena edhiladhilo ndyoka li holike apuhe olyo kutya opo aagundjuka ya vule oku shi enditha nawa, ongele owala ya mona elongo lyokounivesiti. Ihe pehala lyokulandula shoka shi holike apuhe, Aakriste ohaya pulakene kekumagidho lyOohapu dhaKalunga tali ti: “Inamu faathana nonkalo yuuyuni mbuka, aawe, Kalunga ne mú shitulule meni lyeni nomomadhiladhilo geni. Nena otamu vulu ihe okutseya ehalo lyaKalunga naashoka oshiwanawa, she mu opalela nosha gwana.” (Aaroma 12:2) Kalunga mbela okwa halela shike oshigwana she, aagundjuka naakulupe, methimbo ndika lyahugunina lelalela? Paulus okwa ladhipika Timoteus a ti: “Itonatela nawa miinima ayihe, idhidhimikila omahepeko, longa oshilonga shomuuvithi gwelaka etoye, [gwanitha po thiluthilu uukalele woye, NW].” Oohapu ndhoka otadhi longo lela kutseni atuheni nena.—2 Timoteus 4:5.
15 Pehala lyokukala twa kwatwa kombepo yomaliko yuuyuni, atuheni otwa pumbwa ‘okwiitonatela nawa,’ sha hala okutya, okutonatela uupambepo wetu. Ngele ngoye omugundjuka, ipula to ti: ‘Mbela ohandi ningi ngaashi tandi vulu “okugwanitha po uukalele wandje,” opo ndi kale omukalele omunekeka gwOohapu dhaKalunga? Mbela edhiladhilo lyashike ndi na opo ndi gwanithe po uukalele wandje “thiluthilu”? Mbela onda dhiladhila okuninga iilonga yethimbo lyu udha eithano lyiilonga yandje?’ Omapulo ngoka kage shi omapu, unene tuu ngele to mono aagundjuka yalwe taya kutha ombinga momaipyakidhilo gokwiihola, tayi “ikongele iinima iinene” mbyoka taya dhiladhila kutya otayi ya fala monakuyiwa ombwanawa. (Jeremia 45:5) Onkee ano aavali Aakriste ohaya si oshimpwiyu noondunge opo okuza kuunona aanona yawo ya kale ya dheulwa pambepo noye endathane naamboka ya kola pambepo.—Omayeletumbulo 22:6; Omuuvithi 12:1; 2 Timoteus 3:14, 15.
16. Ongiini aavali Aakriste taya vulu okusa oshimpwiyu noondunge opo aanona yawo ya kale ye na eendathano ewanawa lyopambepo?
16 Omumati gwosheeli gwomaamati yatatu yomuukwanegumbo umwe moka mu na meme a kala omulongi gwethimbo lyu udha uule woomvula odhindji, ota ti: “Meme okwa li ha tonatele nawa eendathano lyetu. Inatu endathana naanasikola ooyakwetu ihe onaamboka owala yomegongalo mboka ye na omikalo omiwanawa dhopambepo. Okwa li wo ha hiya olundji kegumbo lyaandjetu mboka ye li miilonga yethimbo lyu udha—aatumwa, aaendi aatonateli, Aabetel naakokolindjila—opo tu endathane nayo. Mokupulakena kiimoniwa yawo nokutala kenyanyu lyawo oshe tu kwathele tu kokeke ehalo lyiilonga yethimbo lyu udha momitima dhetu.” Kashi nyanyudha tuu okumona nena oyanamati ayehe yatatu ye li miilonga yethimbo lyu udha—gumwe ota longo koBetel, gumwe okwa li kOsikola yOkudheula mUukalele nomukwawo omukokolindjila!
17. Ewiliko lini aavali taya vulu okupa aanona yawo mokuhogolola iilongwa yawo yokosikola nosho wo omalalakano ge na ko nasha nuungomba? (Tala oshimpungu pepandja 31.)
17 Kakele kokusa oshimpwiyu opo aanona ye endathane naamboka ya kola pambepo, aavali oye na wo okugandja ewiliko li li nawa kehogololo lyaanona yawo lyiilongwa yokosikola nosho wo omalalakano gawo guungomba kuyele ngaashi tashi vulika. Omulumentu gulwe omugundjuka, ngoka ha longo ngashingeyi koBetel, ota ti: “Aavali yandje ayehe oya li aakokolindjila manga inaaya hokana noya li ya ningi ngaashi taya vulu okukokeka ombepo yuukokolindjila muukwanegumbo auhe. Sho twa li tatu hogolola iilongwa yokosikola nenge ngele tatu ningi omatokolo ngoka ga li taga ka guma onakuyiwa yetu, oya li aluhe ye tu ladhipike tu ninge ehogololo ndyoka tali ke tu pa ompito ombwanawa lela okumona iilonga yetatasiku nokukokola ondjila.” Pehala lyokuhogolola iilongwa mbyoka tayi fala kelongo lyokounivesiti, aavali naanona oya pumbwa okuhogolola ookersesa ndhoka tadhi kwathele aanona ya lalakanene eithano lyiilonga yopauteokratika.b
18. Okoompito dhiilonga dhini aagundjuka taya vulu okutala?
18 Omakonakono otagu ulike kutya miilongo oyindji omu na ompumbwe onene, hakwaamboka ya longwa kounivesiti, ihe okaantu mboka haya longo iilonga yokomake noyokuyakula. Oshifo USA Today otashi kundaneke kutya “70% dhaaniilonga moomvula omilongo twa taalela itaya ka kala ya pumbwa onkatu yoomvula ne kounivesiti, ihe pehala lyaashono oya pumbwa owala onkatu yoomvula mbali pokolindji yopomudhingoloko gwawo nenge onzapo yontumba yuungomba.” Iiputudhilolongo oyindji ya tya ngaaka ohayi gandja ookersesa dhethimbo efupi shi na ko nasha nokulonga mombelewa, okupangela iihauto, okupangela ookompiuta, okupangela ominino dhomeya, okulonga muukululilo niilonga yilwe oyindji yokomake. Mbela iilonga mbika iiwanawa? Eeno, iiwanawa lela! Otashi vulika kaayi shi iiwanawa ngaashi yamwe taya dhiladhila, ihe otayi gandja iimaliwa ya gwana nethimbo mbyoka ya pumbiwa kwaamboka eithanolongo lyawo lyashili olyo okulongela Jehova.—2 Aatessalonika 3:8.
19. Oshike osho ondjila ombwaanawa lela ndjoka tayi fala monkalamwenyo yi na enyanyu negwaneno?
19 Ombiimbeli otayi ti: “Aamati naakadhona [naya] hambelele edhina lyOMUWA; edhina lye olyo alike li na okusimanekwa; esimano lye oli li kombanda yevi nomegulu.” (Episalomi 148:12, 13) Kapu na omalimbililo kutya eithanolongo lyokulongela Jehova miilonga yethimbo lyu udha, olyo ondjila ombwaanawa lela tayi fala monkalamwenyo yi na enyanyu negwaneno, ngele tatu li faathanitha noondondo nosho wo noondjambi ndhoka uuyuni hau gandja. Pulakena keshilipaleko lyOmbiimbeli ndyoka tali ti: “Eyambeko lyOMUWA tali yambapaleke, nuupyakadhi wiilonga itau gwedhele ko sha.”—Omayeletumbulo 10:22.
[Omanyolo gopevi]
a Opo u mone iimoniwa yaamboka ya lenga elongo lyopakalunga komeho yaandyoka lyokounivesiti, tala Oshungonangelo (yOshiingilisa), 1 Mei 1982, epandja 3-6; 15 Aprili 1979, epandja 5-10; o-Awake! 8 Juni 1978, epandja 15 nosho wo 8 Auguste 1974, epandja 3-7.
b Tala o-Awake! 8 Oktoba 1998, “Okwa konga onkalamwenyo ya gamenwa,” epandja 4-6, nosho wo 8 Mei 1989, “Eithano lini ndi na okuhogolola?” epandja 12-14.
Oto vulu okuyelitha?
• Omushike Aakriste haya tula einekelo lyawo omolwokukala nonakuyiwa ya gamenwa?
• Omaudhigu geni aavali Aakriste ya taalela shi na ko nasha nonakuyiwa yaanona yawo?
• Oshike shi na okutalika ngele taku yalulwa kutya elongo lyopombanda otali ka kosha shi thike peni?
• Ongiini aavali taya vulu okukwathela aanona yawo ya lalakanene eithano lyiilonga yaJehova?
[Oshimpungu pepandja 31]
Elongo lyopombanda oli na uuwanawa washike?
Aantu oyendji mboka hayi inyolitha kounivesiti ohaya kala ye na etegameno okumona onkatu ndjoka tayi ya vulitha okumona iilonga hayi futu nawa notayi kalelele. Ihe omahokololoningomwa gomapangelo otagu ulike kutya oopelesenda 25 lwaampono dhaamboka haya yi kounivesiti ohadhi mono onkatu yontumba muule woomvula hamano—omwaalu ngoka omushona noonkondo. Nonando ongaaka, mbela onkatu ndjoka oyi li eshilipaleko kutya oto ka mona iilonga iiwanawa? Ndhindhilika shoka omakonakono gomasiku ngano taga ti.
“Okuya [kounivesiti yaHarvard nenge yaDuke] itashi ti kutya oto ka mona owala ngeya iilonga iiwanawa notayi futu nawa. . . . Omahangano kage shi oshindji kombinga yaagundjuka mboka taya kongo iilonga. Onzapo yi li dhingi (yonkatu yokounivesiti yaIvy League) otashi vulika yi kumithe aantu. Ihe konima yaashono, shoka aantu taya vulu okulonga nenge shoka itaaya vulu osho lela tashi ti sha.—Newsweek, 1 Novomba 1999.
“Nonando iilonga yowala nena otayi pula ontseyo shi vulithe nale . . . , ontseyo ndjoka tayi pulwa omolwiilonga mbyoka oyo ontseyo ombwanawa ndjoka hayi monika koosekundosikola—ontseyo yomwaalu, yokulesha noyokunyola ndjoka hayi longwa mongundu ontimugoyi . . . , hantseyo yokounivesiti. . . . Aailongi inaya pumbwa okuya kounivesiti opo ya mone iilonga iiwanawa, ihe oya pumbwa ontseyo ndjoka hayi monika kosekundosikola.”—American Educator, pOthinge yomo 2004.
“Oounivesiti odhindji ihadhi longo naanaa aailongi yadho shoka ye na okulongwa opo dhi ya longekidhe ya ka ninge aaniilonga ya pyokoka ngele ya piti mudho. Pethimbo lyongashingeyi opu na aantu oyendji noonkondo ya hala koosikola dhuungomba. . . . Mboka hayi inyolitha mo oyi indjipala 48% okuza mo 1996 sigo omo 2000. . . . Pethimbo opo tuu mpoka, oonzapo dhokounivesiti ndhoka dhi na ondilo nodha mana po ethimbo ihadhi kala we dhi na ongushu naanaa.”—Time, 24 Januali 2005.
“Oshikondo shIilonga shomo-U.S. osha holola oshinima oshitilithi shoka tashi vulika shi ningwe momumvo aguhe gwo 2005 osho kutya nokuli oshititatu shaailongi [oopelesenda 33 lwaampono] mboka ya longwa oomvula ne kounivesiti itaya ka mona iilonga mbyoka yi ilongela.”—The Futurist, Juli/Auguste 2000.
Mokutala kwaashihe shono, aandungikilongi oyendji oya limbililwa noonkondo shi na ko nasha nuuwanawa welongo lyopombanda lyonena. Oshifokundaneki Futurist otashi nyenyeta tashi ti: “Aantu otaya longwa okulalakanena omalalakano inaago opala.” Mekondjithathano naashoka, ndhindhilika shoka Ombiimbeli tayi ti kombinga yaKalunga, sho tayi ti: “Ongame OMUWA Kalunga koye, ngoka tii ku [longo, OB-1954] shoka she ku opalela noku ku ulukila ondjila u na okweenda nayo. Ando to pulakene shili iipango yandje, andola omayambeko otage ku kungulukile ga fa omulonga tagu tondoka omeya, nuuyuuki otau tookele kungoye wa fa omakuthikuthi gomefuta.”—Jesaja 48:17, 18.
[Ethano pepandja 28]
Oya tula omaipyakidhilo gopaumwene konima