“Omhango yoye ondi i hole shi fike peni!”

“Omhango yoye ondi i hole shi fike peni! Efiku alishe ohandi i dilonga.” — EPSALME 119:97.

1, 2. (a) Omushangi wEpsalme 119 okwa li a shakeneka omashongo elipi? (b) Okwa li e linyenga ngahelipi kuo, nomolwashike?

OMUSHANGI wEpsalme 119 okwa li a shakeneka omashongo a kwata moiti. Ovatondi vaye ovalinenepeki ovo va li va dina omhango yaKalunga ova li ve mu sheka nova li ve mu lundila. Oidale oya li ya pangela omhangela i mu ningile owii noku mu hepeka. Pefimbo opo opa li ovakolokoshi vahapu, nomwenyo waye owa li monghuwo i na onghambe. Oinima aishe oyo oya li ye mu ningifa a kale a nyika ‘oluhodi.’ (Epsalme 119:9, 23, 28, OB-1986, 51, 61, 69, 85, 87, 161) Ndele nande okwa li meenghalo da tya ngaho, okwa imba a ti: “Omhango yoye ondi i hole shi fike peni! Efiku alishe ohandi i dilonga.” — Epsalme 119:97.

² Otashi dulika u lipule kutya: “Ongahelipi omhango yaKalunga ya li ya dula okuhekeleka omupsalme oo?” Okwa li a pamekwa molwaashi okwa li e na oushili kutya Jehova oku na ko nasha naye. Okutula moilonga omhango oyo ya li ya yandjwa kuKalunga pahole okwa li kwa ningifa omupsalme oo a kale a hafa, nonande okwa li ta fininikwa kovatondi vaye. Okwa li e shii kutya Jehova okwa li ta ungaunga naye panghenda. Kakele kaasho, okutula moilonga ewiliko lomhango yaKalunga okwa li kwa ningifa omupsalme oo a kale a nongopala e dule ovatondi vaye nokwa li nokuli kwa xupifa omwenyo waye. Okudulika komhango okwa li kwe mu kwafela a kale e na ombili nosho yo eliudo liwa. — Epsalme 119:1, 9, 65, 93, 98, 165.

3. Omolwashike shi li eshongo kOvakriste okudiinina omifikamhango daKalunga kunena?

³ Kunena, ovapiya vaKalunga vamwe navo ohava shakeneke omayeleko eitavelo a kwata moiti. Otashi dulika itatu ka hangwa keenghalo odo tadi pula omwenyo ile efyo ngaashi omupsalme, ndele otu li ‘momafimbo madjuu okukaliwa muo.’ Ovanhu vahapu ovo ve tu dingilila kave na ko nasha nomifikamhango daKalunga — otava lalakanene ashike oinima yopaumwene nosho yo omaliko, nove na oikala younhwa noyokuhenefimaneko. (2 Timoteus 3:1-5, yelekanifa NW.) Luhapu, ovanyasha Ovakriste ohava shakeneke eenghalo odo tadi yeleke oudiinini wavo ngeenge tashi ya pelihumbato lopaenghedi. Meenghalo da tya ngaho, ohashi kala shidjuu okuulika ohole yetu yokuhola Jehova nosho yo okulonga osho sha yuka. Ongahelipi hatu dulu okuliamena meenghalo da tya ngaho?

4. Omupsalme oo okwa li a ulika ngahelipi olupandu shi na sha nomhango yaKalunga, nongahelipi Ovakriste tava dulu okuninga sha faafana?

⁴ Osho kwa li sha kwafela omushangi wEpsalme 119 a kondjife omafininiko oo a li a shakeneka osha li okulitulila po efimbo lokudilonga nolupandu shi na sha nomhango yaKalunga. Kungaha, okwa li a kulika ohole yaye yokuhola omhango yaKalunga. Konyala ovelishe keshe yomEpsalme 119 oya popya shi na sha nomhango yaKalunga monghedi yonhumba.a Kunena, Ovakriste kave li koshi yOmhango yaMoses, oyo Kalunga a li a pa Israel shonale. (Ovakolossi 2:14) Ndele nande ongaho, omafinamhango oko kwe likolelela Omhango oyo otaa ti sha fiyo okunena. Omafinamhango oo okwa li a hekeleka omupsalme oo notaa dulu yo okuhekeleka ovapiya vaKalunga vokunena eshi tava ungaunga nomaupyakadi onghalamwenyo.

5. Oiteelelwa yOmhango yaMoses ilipi hatu ka kundafaneni?

⁵ Natu taleni koiteelelwa itatu yOmhango yaMoses oyo tai dulu oku tu twa omukumo: elongekido lEshabata, efiloshisho lepupudululo nosho yo oshipango osho sha li tashi dilike okahalu. Eshi hatu ka tala koiteelelwa oyo kooshimwe, ohatu ka mona kutya okuuda ko omafinamhango oko kwe likolelela eemhango odo okwa fimanenena ngeenge otwa hala okuungaunga nomupondo nomashongo oo hatu shakeneke kunena.

Omhumbwe yetu yopamhepo

6. Ovanhu ova shitwa nomhumbwe ya fimanenena ilipi?

⁶ Ovanhu ova shitwa ve na eemhumbwe dihapu. Pashihopaenenwa, ova pumbwa oikulya, okunwa nosho yo eenhele dokukala, opo va kale noukolele muwa wopalutu. Kakele kaasho, ova pumbwa yo okufila oshisho “omhumbwe yavo yopamhepo.” Itava dulu okukala nehafo lashili ngeenge ihava file oshisho omhumbwe yavo yopamhepo. (Mateus 5:3, NW) Jehova oku shi shii kutya osha fimanenena okufila oshisho omhumbwe ya tya ngaho, nomolwaasho okwa li a lombwela oshiwana shaye shonale shiha longe oilonga yakwalukeshe oule wefiku limwe moshivike opo shi dule okuyandja elitulemo koinima yopamhepo.

7, 8. (a) Kalunga okwa li a yoolola ko ngahelipi Eshabata komafiku makwao oshivike? (b) Eshabata ola li la tulwa po nelalakano lashike?

⁷ Elongekido lEshabata ola li la ulika kutya osha fimanenena okuyandja elitulemo koinima yopamhepo. Oshitya “eshabata” osha popiwa oshikando shotete mOmbibeli eshi Ovaisrael va li tava lombwelwa shi na sha nefiloshisho lomanna fimbo va li mombuwa. Ovaisrael ova li va lombwelwa kutya nava kale hava ongele omungome oo wopashikumwifilonga omafiku ahamano moshivike. Mefiku etihamano, ova li ve na okwoongela “omungome womafiku avali,” molwaashi mefiku etiheyali kapa li hapa yandjwa omanna. Efiku etiheyali okwa li la nuninwa okukala “eshabata liyapuki lOmwene” omo kwa li ve na okukala peenhele davo. (Exodus 16:13-30) Shimwe shomOipango Omulongo osha li sha dilika Ovaisrael vaha longe nandenande mefiku lEshabata, molwaashi ola li efiku la yapulwa. Omunhu oo kwa li ta ka dina efiku olo okwa li ta ka pewa ehandukilo lefyo. — Exodus 20:8-11; Numeri 15:32-36.

⁸ Omhango i na sha nEshabata oya ulika kutya Jehova okwa li e na ko nasha nonghalonawa yopalutu noyopamhepo yoshiwana shaye shonale. Jesus okwa ti: “Eshabata ola shitilwa omunhu.” (Markus 2:27) Kala li ashike la pa Ovaisrael omhito yokufuda po koilonga yavo, ndele ola li yo le va pa omhito yokweehena popepi nOmushiti wavo nokuulika kutya ove mu hole. (Deuteronomion 5:12) Efiku olo ola li la yapulwa nelalakano lokuyandja ashike elitulemo koinima yopamhepo. Osho osha li sha kwatela mo elongelokalunga loukwaneumbo, omailikano nosho yo okudilonga shi na sha nOmhango yaKalunga. Elongekido olo ola li la kwafela Ovaisrael vaha longife efimbo lavo alishe nosho yo eenghono davo mokulalakanena oinima yopamaliko. Eshabata ola li hali va dimbulukifa kutya ekwatafano lavo naJehova olo oshinima osho sha fimanenena monghalamwenyo yavo. Jesus okwa li a endulula efinamhango olo tali kalelele, eshi a ti: “Okwa shangwa: Hakomungome auke omunhu ta kala e nomwenyo, ndelenee okondjovo keshe tai di mokanya kaKalunga.” — Mateus 4:4.

9. Oshilihongomwa shilipi Ovakriste tave lihongo melongekido lEshabata?

⁹ Oshiwana shaKalunga shokunena inashi teelelwa shi kale hashi dimbuluka efiku leshabata, ndele osho inashi hala kutya elongekido lEshabata oli li ashike oshinima shopandjokonona shihokwifa. (Ovakolossi 2:16) Mbela itali tu dimbulukifa kutya nafye otwa pumbwa okupitifa komesho oinima yopamhepo? Okulalakanena omaliko ile omalihafifo kaku na nande okuya moshipala oinima yopamhepo. (Ovaheberi 4:9, 10) Onghee hano, oshiwa okulipula kutya: “Mbela oshike handi pitifa komesho monghalamwenyo yange? Mbela ohandi pitifa ngoo komesho ekonakono lopaumwene, okwiilikana, okukala pokwoongala kwopaKriste nosho yo okuudifa onghundana iwa yOuhamba? Ile ohandi efa oinima imwe i lili i ye moshipala omalipyakidilo oo opamhepo?” Jehova okwe tu shilipaleka kutya ngeenge otwa pitifa komesho oinima yopamhepo, itatu ka kala twa hepa oipumbiwa yomonghalamwenyo. — Mateus 6:24-33.

10. Ouwa ulipi hatu dulu okumona ngeenge otwe litulile po efimbo lokuninga oinima yopamhepo?

¹⁰ Okukala hatu litulile po efimbo lokukonakona Ombibeli nosho yo oileshomwa oyo ye likolelela kOmbibeli, nokukala hatu dilonga moule ketumwalaka layo otashi ke tu kwafela tu ehene popepi elela naJehova. (Jakob 4:8) Omumwameme Susan, oo a hovela okukala he litulile po efimbo lokukonakona Ombibeli pandjikilile omido 40 lwaapo da pita, okwa dimina kutya pehovelo ka li he ku hafele lela. Okwa li ha kala e wete shidjuu, ndele konima yefimbo eshi a twikila okukala ha lesha pandjikilile, okwa ka kala te ku hafele. Paife, ngeenge ekonakono laye lopaumwene ola iwa moshipala koshinima shonhumba, oha kala a nyemata. Omumwameme oo okwa ti: “Okukonakona okwa kwafela nge ndi ehene popepi naJehova. Onde mu lineekela nohandi popi naye okupitila meilikano nda manguluka. Oshikumwifi lela okumona kutya Jehova oku hole ovapiya vaye nokumona nghee ha kwafele nge nokufila nge oshisho pauhandimwe.” Nafye ihatu kala tuu twa hafa okufila alushe oshisho omhumbwe yetu yopamhepo!

Omhango yaKalunga i na sha nepupudululo

11. Elongekido lokupupudulula ola li hali longo ngahelipi?

¹¹ Oshiteelelwa oshitivali shomOmhango yaMoses osho tashi ulike kutya Kalunga okwa li e na ko nasha nonghalonawa yoshiwana shaye osho oufemba wokupupudulula. Jehova okwa li a lombwela Ovaisrael ovanamapya kutya ngeenge tava teya oilikolomwa yomomapya avo ove na okweefa eehepele di pupudulule konima yeteyo. Ovanamapya kava li ve na okuteya kominghulo domapya avo ndele taku pu filufilu nokava li ve na okukola ko omashila eeviinyu ile eemono odo da fyaala komiti. Omitwe doilya odo da dimbuwa momapya kada li di na okutoolwa mo koovene vomapya. Osho osha li hashi ningwa omolwelongekido lopahole lokufila oshisho eehepele, ovanailongo, eefiye novafiyekadi. Odoshili kutya okupupudulula nako okwa li taku pula oilonga, ndele nande ongaho, okwa li haku ningwa opo ovanhu va tya ngaho vaha kale tava ehela. — Leviticus 19:9, 10; Deuteronomion 24:19-22; Epsalme 37:25.

12. Elongekido lepupudululo ola li hali pe ovanamapya omhito ilipi?

¹² Omhango i na sha nepupudululo kaya li ya popya kondadalunde kutya omunepya oku na okufiya mo shi fike peni mepya laye opo eehepele di dule okupupudulula. Omunepya oye mwene a li ha tokola kutya ota fiye ko shi fike peni kominghulo depya laye. Kungaha, elongekido olo ola li hali hongo ovanhu va kale ve na oikala yokuyandja nehalo liwa. Ola li hali pe ovanamapya omhito yokuulika olupandu kOmushiti wavo oo ha punike eteyo, molwaashi ‘ou ta file onghenda ohepele ota fimaneke Omushiti waye.’ (Omayeletumbulo 14:31) Boas okwa li oshihopaenenwa shiwa moshinima osho. Omolwokuudila olukeno omufiyekadi Rut, okwa li ha fi oshisho opo Rut a pupudulule oilya ya wana mepya laye. Onghee hano, Jehova okwa li a nangeka noupuna Boas omolwoikala yaye yokuyandja nehalo liwa. — Rut 2:15, 16; 4:21, 22; Omayeletumbulo 19:17.

13. Omhango oyo ya li ya pewa Ovaisrael i na sha nepupudululo otai tu hongo shike?

¹³ Efinamhango olo kwe likolelela omhango i na sha nokupupudulula inali lunduluka. Jehova okwa teelela ovapiya vaye va kale hava yandje nehalo liwa, unene tuu keehepele. Apa ngoo pe fike okuyandja kwetu, opo ngoo tapa kala pe fike okunangekwa noupuna kwetu. Jesus okwa ti: “Yandjeni, nanye yo otamu ka pewa, oshiyelekifo shiwa sha fendwa, sha hekeshelwa, sha hekeshelekeka, tave shi mu pe mekolo leni, osheshi oshiyelekifo eshi tamu shi yelekifa, nanye yo tamu ke shi yelekifilwa.” — Lukas 6:38.

14, 15. Ongahelipi hatu dulu okuulika oikala yokuyandja nehalo liwa, nouwa ulipi hatu dulu okumona mo nosho yo ovo hatu kwafele?

¹⁴ Omuyapostoli Paulus okwe tu ladipika “tu ningileni aveshe ouwa, ndelenee unene tuu ovo oovakwetu vomeitavelo.” (Ovagalati 6:10) Onghee hano, otwa pumbwa okukala tu na oshisho opo Ovakriste vakwetu va mone eendja dopamhepo ngeenge eitavelo lavo tali yelekwa. Pashihopaenenwa, mbela kape na vamwe ovo tashi dulika va pumbwa ekwafo tali longo shi na sha nokuya kOlupale lOuhamba ile oku ka landa ko koinima yavo? Mbela meongalo leni kamu na ovanamido ile ovo vehe na oukolele ile ovo ihava dulu okudja mo momaumbo ovo tashi dulika va pumbwa etalelepo tali tu omukumo ile ekwafo lonhumba? Ngeenge otwa kala hatu udile oukwao wananghali ovo ve na omhumbwe, otashi dulika Jehova e tu longife mokunyamukula omailikano avo. Nonande okufilafana oshisho oku li oshinakuwanifwa shopaKriste, ohaku etele yo ouwa ovo tava kwafele ovo ve na omhumbwe. Okuulikila ovalongelikalunga vakwetu ohole yashili oku li odjo yehafo linene nosho yo embilipalelwo nohaku ningifa omunhu opo a kale a hokiwa kuJehova. — Omayeletumbulo 15:29.

¹⁵ Onghedi imwe vali ya fimana omo Ovakriste tava dulu okuulika oikala yokuhelihola mwene omokulongifa efimbo neenghono davo mokuudifila vamwe shi na sha nomalalakano aKalunga. (Mateus 28:19, 20) Keshe oo a dula okukwafela omunhu mukwao fiyo te liyapulile Jehova okwa mona oushili weendjovo daJesus odo tadi ti: “Okuyandja oku nelao komesho yokutambula.” — Oilonga 20:35.

Ino kala u na okahalu

16, 17. Oshipango oshitimulongo osha li sha dilika shike, nomolwashike?

¹⁶ Oshiteelelwa oshititatu shomOmhango yaKalunga oyo a li a pa Ovaisrael, osho hatu ka kundafana, osho oshipango oshitimulongo osho tashi dilike okahalu. Oshipango osho otashi ti: “Ino haluka eumbo lamukweni. Ino haluka omwalikadi womukweni, ile omupiya waye omulumenhu ile omukainhu ile ongobe yaye ile ondongi yaye ile keshe eshi shamukweni.” (Exodus 20:17) Kape na omunhu ta dulu okutulila po ovanhu vakwao oshipango sha tya ngaho, molwaashi ovanhu ihava dulu okumona osho shi li momitima davakwao. Ndele oshipango osho osha li sha ulika kutya Omhango yaKalunga oya li ya tumbala i dule kokule eemhango dopanhu di na sha nouyuki. Oshipango osho osha li sha kwafela Ovaisrael pauhandimwe va mone kutya ova li ve na okulihokolola odikilila kuJehova, oo ha dulu okumona osho shi li momitima dovanhu. (1 Samuel 16:7) Kakele kaasho, oshipango osho osha li tashi ungaunga noshietifi sho vene shoilonga ihapu yowii. — Jakob 1:14.

¹⁷ Oshipango osho sha li sha dilika okahalu osha li sha ladipika oshiwana shaKalunga shiha kale nohole yokuhola omaliko, olwisho nosho yo oikala yokungongota shi na sha nonghalamwenyo. Osha li yo she va kwafela vaha kale ve na eamo lokuvaka ile lokuya moluhaelo. Odoshili kutya, otapa ka kala alushe ovanhu ovo ve na oinima yopamaliko oyo tai tu hokwifa ile ovo tava monika va fa tava pondola monghedi yonhumba ile yongadi ve tu dule. Ngeenge otwa kala itatu pangele omadiladilo etu meenghalo da tya ngaho, otashi dulika tu ka kanife ehafo letu nokukala twa twila vamwe ondubo. Ombibeli otai ulike kutya omunhu oo e na okahalu oha kala e na ‘eendunge dii.’ Onghalamwenyo yetu otai ka kala i li xwepo ngeenge katu na okahalu. — Ovaroma 1:28-30.

18. Oikala ilipi i li apeshe mounyuni kunena, nohai etifa oidjemo ii ilipi?

¹⁸ Ounyuni kunena otau xumifa komesho ohole yokuhola omaliko nomhepo yefiyafanepo. Eengeshefa ohadi xwaxwameke ovanhu okupitila momashiivifo opaipindi va kale va hala oilongomwa ipe nohadi ningifa luhapu ovanhu va kale ve udite kutya itava ka kala nonghalamwenyo ihafifa ngeenge kave na oinima ya tya ngaho. Oikala ya tya ngaho oyo naanaa ya li ya tokolwa kOmhango yaJehova. Oshinima shimwe vali osho sha pambafana naasho osho ehalo lokukala nonghalamwenyo youdjeko, kashi na neembudi kutya otashi pula shike, nosho yo okukala wa hala okupunapala. Omuyapostoli Paulus okwa londwela a ti: “Ava va hala okupunapala, otava wile momahongaulo nomomwiyo nomouhalu uhapu woulai nowoiponga, tau ninginifa ovanhu menyonauko nomekano. Osheshi olwisho loimaliwa olo efina lowii aushe, nomoku li haluka vamwe va puka mo meitavelo, ve lityuulifa [nomaudjuu] mahapu.” — 1 Timoteus 6:9, 10.

19, 20. (a) Oshike osho ovo ve hole omhango yaJehova va lenga neenghono? (b) Oshike tashi ka kundafanwa moshitukulwa tashi landula?

¹⁹ Ovo ve hole oipango yaKalunga ove shii kutya ohole yokuhola omaliko oya nyika oshiponga nova amenwa koilanduliko yayo. Pashihopaenenwa, omupsalme okwa ilikana kuJehova a ti: “Omutima wange u ehenifa [komahepaululo] oye, . . . u ha ehene kolwisho lemona loulunde. Omhango yokanya koye oya wapalela nge, i dule oitetela yoingoldo noisilveri omayovi nomayovi.” (Epsalme 119:36, 72) Okwiitavela oushili weendjovo odo otaku tu kwafele tu kale tu na ondjele notu henuke omwiyo wokuhola omaliko, olwisho nosho yo okukala inatu wanenwa kwaasho tu na. “Etilokalunga” olo eliko linene kuhe na vali, ndele hakukala nomaliko mahapu. — 1 Timoteus 6:6.

²⁰ Omafinamhango oko kwe likolelela Omhango oyo Jehova a li a pa Israel shonale otaa ti sha yo nokufye ava tu li momafimbo madjuu kunena. Ngeenge otwa kala hatu tula omafinamhango oo moilonga mokukalamwenyo kwetu, ohatu ka kala twe a lenga nohatu ka kala yo twa hafa neenghono. Omhango oi na oilihongomwa ihapu oyo tai ti sha kufye, nohatu dulu okulihonga oilihongomwa oyo ya fimana mokukonakona onghalamwenyo noimoniwa yovanhu vopefimbo lOmbibeli. Imwe yomoilihongomwa oyo otai ka kundafanwa moshitukulwa tashi landula.

[Omashangelo opedu]

[Efano pepandja 13]

Omhango yEshabata oya li ya ulika ngahelipi osho sha li sha fimanenena monghalamwenyo yOvaisrael?

[Efano pepandja 15]

Omhango i na sha nepupudululo otai tu hongo shike?

[Efano pepandja 16]

Oto nyamukula ngahelipi?

• Omolwashike omushangi wEpsalme 119 a li e hole omhango yaJehova?

• Ovakriste otave lihongo shike melongekido lEshabata?

• Oshilihongomwa sha fimanenena shilipi hatu lihongo momhango yaKalunga i na sha nepupudululo?

• Ongahelipi oshipango osho sha li tashi dilike okahalu tashi dulu oku tu amena?