Mbela oho tale ko oinima iyapuki ngaashi Jehova he i tale ko?
‘Litaleni, paha kale nande umwe omuhaeli ile oo ehe na olupandu loinima iyapuki.’ — OVAHEBERI 12:15, 16, yelekanifa NW.
1. Ovapiya vaJehova ohava henuka oikala ilipi oyo i li apeshe kunena?
OVANHU vahapu mounyuni kave na ko na sha noinima iyapuki. Omushiivinghalo umwe Omufransa, wedina Edgar Morin, okwa ti: “Oinima aishe oko kwe likolelela eenghedi, sha hala okutya, Kalunga, oushitwe, oilongo, ondjokonona nosho yo eendunge, inai fimanekwa vali. . . . Ovanhu ohava hoolola kuvo vene omafinamhango oo va hala okudulika kuo.” Osho otashi ulike kutya ovanhu ova nwefwa mo ‘komhepo younyuni’ ile ‘komhepo yomupangeli ou ta longo paife movana vokuhadulika.’ (1 Ovakorinto 2:12; Ovaefeso 2:2) Ndelenee ovapiya vaJehova ve mu liyapulila nohava dulika nehalo liwa kounamapangelo waye, inava nwefwa mo komhepo younyuni ya tya ngaho. (Ovaroma 12:1, 2) Ponhele yaasho, ove shii nawa onghandangala ya fimanenena oyo ouyapuki tau dana mokulongela kwavo Jehova. Mbela oinima ilipi tu na okukala twa tala ko iyapuki mokukalamwenyo kwetu? Ohatu ka kundafana oinima itano oyo iyapuki kovapiya vaKalunga aveshe moshitukulwa eshi. Moshitukulwa tashi landula ohatu ka konakona shi na sha nouyapuki wokwoongala kwopaKriste. Ndele mbela oshitya “ouyapuki” otashi ti naanaa shike?
2, 3. (a) Omishangwa otadi divilike ngahelipi ouyapuki waJehova? (b) Omolwashike tu na okutala ko edina laJehova li li liyapuki?
2 MOshiheberi shopaMbibeli, oshitya “ouyapuki” otashi yandje ediladilo loshinima she likalekelwa. Melongelokalunga, “ouyapuki” otau ulike koshinima osho sha yooloka ko kuikwao ile sha talika ko shiyapuki. Jehova omuyapuki filufilu, nomolwaasho Ombibeli tai mu ifana “Omuyapukielela.” (Omayeletumbulo 9:10; 30:3, NW) MuIsrael shonale, omupristeri omukulunhu okwa li ha djala embale li na okapapa koshingoli ka shangwa eendjovo tadi ti: “Ouyapuki owaJehova.” (Exodus 28:36, 37, NW) Ovakerubi novaserafi vomeulu ova popiwa mOmishangwa kutya ove li ofika komesho yolukalwapangelo laJehova tava ti: “Omuyapuki, Omuyapuki, Omuyapuki, Omwene Kalunga.” (Jesaja 6:2, 3; Ehololo 4:6-8) Eshi ovaengeli va popya tava endulula eendjovo odo otashi ulike kutya Jehova oye omuyapuki a shiya ko nokwa koshoka filufilu. Doshili, Jehova oye Odjo youyapuki.
3 Edina laJehova oliyapuki, nomolwaasho omupsalme umwe okwa popya shi na sha nalo a ti: “Nava fimaneke edina laye eli linene, litilifa, [noliyapuki, NW].” (Epsalme 99:3) Jesus okwe tu honga tu kale hatu ilikana hatu ti: “Tate yetu ou u li meulu! Edina loye nali yapulwe.” (Mateus 6:9) Maria ina yaJesus okwa popya a ti: “Omwenyo wange otau hambelele pombada Omwene. Osheshi Omunaenghono a ningila nge oinima inene, nedina laye olo oliyapuki.” (Lukas 1:46, 49) Tu li ovapiya vaJehova, ohatu tale ko edina laye li li liyapuki nohatu henuka okuninga keshe osho tashi dulu okushekifa edina olo. Kakele kaasho, otu na etaleko la fa laJehova li na sha noinima iyapuki. — Amos 5:14, 15.
Etomheno molwaashi twa lenga Jesus
4. Omolwashike Ombibeli ya popya kutya Jesus “Omuyapuki”?
4 Jesus okwa shitwa omuyapuki, e li ‘ewifa’ laJehova Kalunga omuyapuki. (Johannes 1:14; Ovakolossi 1:15; Ovaheberi 1:1-3) Nomolwaasho Ombibeli tai mu popi e li “Omuyapuki waKalunga.” (Johannes 6:69) Eshi Jesus a li a dalwa kuMaria e li omunhu wokombada yedu, okwa li natango omuyapuki molwaashi Maria okwa li a ninga oufimba komhepo iyapuki. Omweengeli okwa li a lombwela Maria a ti: “Omhepo Iyapuki otai ku dile kombada . . . onghee hano omudalwa ou omuyapuki ota ka lukwa Omona waKalunga.” (Lukas 1:35) Eshi Ovakriste muJerusalem va li va ilikana kuJehova, ova popya lwomapa avali shi na sha nOmona waKalunga va ti: ‘Omona woye omuyapuki, Jesus.’ — Oilonga 4:27, 30.
5. Jesus okwa li e na okuwanifa po oshilonga shiyapuki shilipi kombada yedu, nomolwashike ohonde yaye i na ondilo?
5 Jesus okwa li e uya kombada yedu opo a wanife po oshilonga shiyapuki. Eshi a ninginifwa mo 29 O.P., okwa vaekwa a ninge Omupristeri Omukulunhu wotembeli inene yaJehova yopamhepo. (Lukas 3:21, 22; Ovaheberi 7:26; 8:1, 2) Natango, Jesus okwa li e na okufya efyo lopayambo. Ohonde yaye ya tika oya li tai ka kulila ovanhu ovalunde opo va dule okuxupifwa. (Mateus 20:28; Ovaheberi 9:14) Onghee hano, otu na okutala ko ohonde yaJesus i li iyapuki noina ‘ondilo.’ — 1 Petrus 1:19.
6. Ovakriste ohava tale ko Jesus Kristus ngahelipi, nomolwashike?
6 Omuyapostoli Paulus okwa ulika kutya otu na efimaneko linene shi na sha nOhamba yetu nOmupristeri Omukulunhu, Kristus Jesus, eshi a shanga a ti: “Kalunga okwe mu lenga [Omona waye], nokwe mu luka edina li li kombada yomadina aeshe, opo aveshe ve nokutwa eengolo medina laJesus naava vomeulu novokombada yedu naava vokoshi yedu, nelaka keshe li nokufimaneka Kalunga Xe nokuhepaulula, kutya Jesus Kristus Oye Omwene.” (Ovafilippi 2:9-11) Ohatu ulike kutya otu na etaleko la fa laJehova li na sha noinima iyapuki mokukala hatu dulika nehalo liwa kOmuwiliki nokOhamba yetu tai pangele, Kristus Jesus, e li Omutwe weongalo lopaKriste. — Mateus 23:10, OB-1986; Ovakolossi 1:18.
7. Ohatu ulike ngahelipi kutya ohatu dulika kuKristus?
7 Okudulika kuKristus okwa kwatela mo yo okufimaneka ovalumenhu ovo tava kwatele komesho oilonga yaye oyo ta wilike. Onghandangala oyo tai danwa kovavaekwa nomhepo ovo ve li Olutuwiliki nosho yo ovapashukili ovo va nangekwa po kOlutuwiliki moitaimbelewa, moitukulwa, moikandjo nosho yo momaongalo, oi na okutalwa ko i li oshinakuwanifwa shiyapuki. Onghee hano, otwa pumbwa okudulika nokuliyandja kuvo filufilu. — Ovaheberi 13:7, 17.
Oshiwana shiyapuki
8, 9. (a) Omeityo lilipi Ovaisrael va li va talika ko ve li oshiwana shiyapuki? (b) Jehova okwa li a ulikila ngahelipi Ovaisrael kutya ouyapuki owa fimana?
8 Jehova okwa li a ninga ehangano noshiwana shaIsrael, naasho osha li she va ningifa va kale ve na ondodo ye likalekelwa, ve li oshiwana shipe. Ova li oshiwana sha yapulwa ile she likalekelwa. Jehova okwa li e va lombwela a ti: “Nye mu nokukala ovayapuki, osheshi Aame Omwene Omuyapuki; ndele Ame onde mu tongola mo moiwana, mu kale vange mwene.” — Leviticus 19:2; 20:26.
9 Eshi Jehova a li a hoolola oshiwana shaIsrael, okwa li e shi pa efinamhango li na sha nouyapuki. Kava li nokuli ve na okukuma omhunda oko kwa li kwa yandjelwa Oipango Omulongo, molwaashi ngeenge ova kumu ko ova li tava ka fya. Kungaha, omhunda yaSinai oya li ya talwa ko iyapuki. (Exodus 19:12, 23) Ovapristeri, etwali nosho yo oinima aishe yometwali oya li yo i na okutalwa ko iyapuki. (Exodus 30:26-30) Ongahelipi shi na sha neongalo lopaKriste kunena?
10, 11. Omolwashike taku dulu okutiwa kutya eongalo lOvakriste ovavaekwa oliyapuki, naasho osha kuma ngahelipi ‘eedi dimwe’?
10 Eongalo lOvakriste ovavaekwa oliyapuki kuJehova. (1 Ovakorinto 1:2) Eongalo alishe lOvakriste ovavaekwa ovo ve li kombada yedu pefimbo keshe otali faafanifwa notembeli iyapuki, nonande kave fi otembeli inene yaJehova yopamhepo. Jehova oha kala motembeli oyo okupitila momhepo yaye iyapuki. Omuyapostoli Paulus okwa shanga a ti: “Muou [muKristus Jesus] etungo alishe tali kwatafana kumwe ndee tali kulu, tali ningi otembeli iyapuki omOmwene ndele muye nanye yo tamu tungwa, mu ninge eumbo laKalunga omOmhepo.” — Ovaefeso 2:21, 22; 1 Petrus 2:5, 9.
11 Natango Paulus okwa shangela Ovakriste ovavaekwa a ti: “Kamu shi shii nokutya, onye otembeli yaKalunga, Omhepo yaKalunga tai kala munye? . . . Osheshi otembeli yaKalunga iyapuki, nye otembeli ei.” (1 Ovakorinto 3:16, 17) Jehova oha ‘kala’ mokati kovavaekwa ‘noha ende mokati kavo’ okupitila momhepo yaye iyapuki. (2 Ovakorinto 6:16) Jehova ota twikile okuwilika “omupiya” waye omudiinini. (Mateus 24:45-47) ‘Eedi dimwe’ oda lenga oufembanghenda wokukala tadi endafana nongudu ‘yotembeli.’ — Johannes 10:16, OB-1986; Mateus 25:37-40.
Oinima oyo iyapuki monghalamwenyo yetu tu li Ovakriste
12. Oinima ilipi iyapuki monghalamwenyo yetu tu li Ovakriste, nomolwashike?
12 Itashi kumwifa eshi oinima ihapu oyo ya pamba okukalamwenyo kwoilyo yovavaekwa yeongalo lopaKriste nosho yo yoovakwao veedi dimwe ya talika ko iyapuki. Ekwatafano letu naJehova oli li oshinima shiyapuki. (1 Omafimbo 28:9; Epsalme 36:8) Onghee hano, inatu efa nandenande oshinima shonhumba ile omunhu wonhumba a nyone po ekwatafano letu naJehova Kalunga li na ondilo. (2 Omafimbo 15:2; Jakob 4:7, 8) Eilikano ohali dana onghandangala ya fimana mokukaleka po ekwatafano letu lopofingo naJehova. Omuprofeti Daniel okwa li a tala ko eilikano li li oshinima shiyapuki molwaashi okwa li e na onghedindjikilile yokwiilikana kuJehova, nokuli naashi omwenyo waye wa li moshiponga. (Daniel 6:8-12) “Omailikano ovayapuki,” sha hala okutya, Ovakriste ovavaekwa, otaa faafanifwa nomatwimino edimba liwa e na sha nelongelokalunga oo a li haa xwikwa motembeli. (Ehololo 5:8; 8:3, 4; Leviticus 16:12, 13) Efaneko la tya ngaho otali ulike kutya eilikano oliyapuki. Kashi fi tuu oufembanghenda okukala hatu dulu okupopya nOmupangeli weshito alishe! Nomolwaasho eilikano oli li oshinima shiyapuki monghalamwenyo yetu.
13. Eenghono dilipi da talika ko diyapuki kOvakriste, nongahelipi tu na okweefa eenghono odo di tu wilike mokukalamwenyo kwetu?
13 Ovakriste ovavaekwa noovakwao veedi dimwe ohava wilikwa keenghono daKalunga nove di tala ko diyapuki. Eenghono daKalunga odo odo omhepo iyapuki. Molwaashi ohadi longo alushe metwokumwe nehalo laKalunga omuyapuki, oda yeleka lela okwiifanwa ‘omhepo iyapuki,’ ile ‘omhepo youyapuki.’ (Johannes 14:26; Ovaroma 1:4) Jehova oha pe ovapiya vaye eenghono okupitila momhepo iyapuki opo va dule okuudifa onghundana iwa. (Oilonga 1:8; 4:31) Jehova oha yandje omhepo yaye iyapuki ‘kwaaveshe ovo hava dulika kuye’ nohava ‘ende momhepo,’ ndele hamokahalu kombelela. (Oilonga 5:32; Ovagalati 5:16, 25; Ovaroma 8:5-8) Eenghono odo ohadi kwafele Ovakriste va imike ‘oshiimati shomhepo,’ sha hala okutya, omaukwatya mawa nova ende “meengeda diyapuki nomoilonga yometilokalunga.” (Ovagalati 5:22; 2 Petrus 3:11, NW) Ngeenge omhepo iyapuki oi li oshinima shiyapuki kufye, ohatu ka henuka okuninga keshe osho tashi dulu oku i nyikifa oluhodi ile keshe osho tashi dulu oku i imba i kale tai longo monghalamwenyo yetu. — Ovaefeso 4:30.
14. Oufembanghenda ulipi ovavaekwa va tala ko uyapuki, needi dimwe otadi dana onghandangala ilipi moufembanghenda oo?
14 Ovakriste ova tala ko oufembanghenda oo ve na wokuhumbata edina laKalunga omuyapuki, Jehova, nosho yo wokukala ve li Eendombwedi daye uyapuki. (Jesaja 43:10-12, 15, yelekanifa NW.) Ovakriste ovavaekwa ova longekidwa kuJehova ‘va kale ovayakuli vehangano lipe.’ (2 Ovakorinto 3:5, 6) Ove na oshinakuwanifwa shokuudifa ‘evangeli louhamba’ ‘nokuninga ovanhu aveshe ovahongwa.’ (Mateus 24:14; 28:19, 20) Otava wanifa po noudiinini oshinakuwanifwa shavo, novanhu omamiliyona ovo va fa eedi otava tambula ko etumwalaka olo, tava lombwele ovavaekwa pafaneko tava ti: “Ofye twa hala okweenda pamwe nanye, osheshi ofye twa uda, nokutya Kalunga e li pamwe nanye.” (Sakaria 8:23) Oohandimwe ovo ovalininipiki otava longo meityo lopamhepo ve li ‘ovanamapya novalongi voikokola yomiviinyu.’ Kungaha, otava yakula nehafo ovavaekwa, ovo ve li “ovapiya vaKalunga ketu.” Monghedi ya tya ngaho, eedi dimwe odi li ekwafo linene kovavaekwa mokuwanifa po oukalele wavo kongonga yedu alishe. — Jesaja 61:5, 6, yelekanifa OB-1986.
15. Oilonga ilipi omuyapostoli Paulus a li a tala ko iyapuki, nomolwashike nafye twe i tala ko iyapuki?
15 Otu na oshihopaenenwa shomuyapostoli Paulus oo kwa li a tala ko oukalele womoipafi u li oshinima shiyapuki. Okwa popya kutya oku li “omupiya waKristus mokati kovapaani, omoilonga iyapuki yevangeli laKalunga.” (Ovaroma 15:16) Eshi Paulus a li a shangela Ovakriste vomuKorinto, okwa popya kutya oukalele waye ou li “emona.” (2 Ovakorinto 4:1, 7) Ohatu udifa ‘eendjovo daKalunga diyapuki’ okupitila moukalele wetu womoipafi. (1 Petrus 4:11, yelekanifa NW.) Onghee hano, kashi na nee mbudi kutya otu li ovavaekwa ile eedi dimwe, otwa tala ko oufembanghenda wokukufa ombinga moilonga yokuyandja oundombwedi u li uyapuki.
“Tu wanifeni eyapulo mokutila Kalunga”
16. Oshike tashi ke tu kwafela tu henuke okukala ‘tuhe na olupandu loinima iyapuki’?
16 Omuyapostoli Paulus okwa londwela Ovakriste vakwao va henuke okukala ‘vehe na olupandu loinima iyapuki.’ Ponhele yaasho, okwe va ladipika va ‘lalakanene eyapulo,’ nokwa weda ko a ti: ‘Litaleni, paha tutume nande omudi woululu mokati keni ndele tau eta edundakano ndele vahapu tava nyatekwa kuo.’ (Ovaheberi 12:14-16) Outumbulilo “omudi woululu” otau ulike kovanhu vonhumba meongalo lopaKriste ovo tashi dulika va kale hava kembaula shi na sha nanghee oinima tai ningwa meongalo. Pashihopaenenwa, otashi dulika va kale va dina etaleko laJehova li na sha nouyapuki wohombo ile shi na sha noukoshoki wopaenghedi. (1 Ovatessaloniki 4:3-7; Ovaheberi 13:4) Ile otashi dulika va popye nokutandavelifa omapopyo oushunimonima, sha hala okutya, “eendjovo da nyata nomapopyaano ongaho,” tava popi eendjovo daavo ‘va kanduka mo moshili.’ — 2 Timoteus 2:16-18.
17. Omolwashike Ovakriste ovavaekwa ve na okuninga alushe eenghendabala opo va ulike kutya ove na etaleko la fa laJehova li na sha nouyapuki?
17 Paulus okwa li a shangela ovamwaxe ovavaekwa a ti: “Ovaholike, tu likosheni kedilo keshe naali lombelela naali lomhepo, fye tu wanifeni eyapulo mokutila Kalunga.” (2 Ovakorinto 7:1) Eendjovo odo otadi ulike kutya Ovakriste ovavaekwa, ovo ve na ‘eifano lomeulu,’ ove na okuninga alushe eenghendabala opo va kale ve na etaleko la fa laJehova li na sha noinima iyapuki meembinga adishe dokukalamwenyo kwavo. (Ovaheberi 3:1) Omuyapostoli Petrus okwa li yo a kumaida ovamwaxe ovavaekwa nomhepo a ti: “Ngaashi ovana hava dulika, mokukala kweni inamu shikula vali omauhalu mwe a wanifa nale mokuhashiiva kweni. Ndelenee hopaeleleni Omuyapuki ou e mu ifana, nye mu ninge yo ovayapuki mokukala kweni akushe.” — 1 Petrus 1:14, 15.
18, 19. (a) Oilyo ‘yongudu inene’ ohai ulike ngahelipi kutya oi na etaleko la fa laJehova li na sha noinima iyapuki? (b) Oshinima shimwe osho Ovakriste va tala ko shiyapuki mokukalamwenyo kwavo shilipi hatu ka konakona moshitukulwa tashi landula?
18 Mbela ongahelipi shi na sha noilyo ‘yongudu inene’ oyo tai ka xupa “moudjuu munene”? Nayo oi na okukala i na etaleko la fa laJehova li na sha noinima iyapuki. Oya hokololwa membo lEhololo kutya otai mu longele “oilonga iyapuki” moshihale shokombada yedu shotembeli yaye yopamhepo. Oi na eitavelo tali longo mekuliloyambo laKristus ‘noya kosha oikutu yayo pafaneko noku i yelifa mohonde yOdjona.’ (Ehololo 7:9, 14, 15, yelekanifa NW.) Osho oshe i ningifa i kale ya koshoka koshipala shaJehova noi na ‘okulikosha kedilo keshe naali lombelela naali lomhepo, nokuwanifa eyapulo mokutila Kalunga.’
19 Oshinima shimwe osho sha fimana monghalamwenyo yOvakriste ovavaekwa nosho yo oovakwao veedi dimwe, osho okukala pokwoongala kwopaKriste nopehe na okufaula opo va longele Jehova nokukonakona Eendjovo daye. Jehova oha tale ko okwoongala keshe kwoshiwana shaye kuyapuki. Moshitukulwa tashi landula ohatu ka konakona kutya ongahelipi nomolwashike tu na okukala tu na etaleko la fa laJehova li na sha noinima oyo iyapuki ngeenge tashi uya pokwoongala.
[Efano pepandja 23]
MuIsrael shonale, ovapristeri, etwali nosho yo oinima aishe yometwali oya li i na okutalwa ko iyapuki
[Efano pepandja 24]
Ovakriste ovavaekwa ovo ve li kombada yedu ove li otembeli iyapuki
[Efano pepandja 25]
Eilikano nosho yo oilonga youkalele womoipafi oi li omaufembanghenda mayapuki
[Efano pepandja 26]
Omapulo eendululo
• Ovapiya vaJehova ohava henuka oikala younyuni ilipi?
• Omolwashike Jehova oye Odjo youyapuki aushe?
• Ohatu ulike ngahelipi kutya otwa fimaneka ouyapuki waKristus?
• Oinima ilipi tu na okukala twa tala ko iyapuki mokukalamwenyo kwetu?