Kala ho tambula ko outekuduliko waJehova
“Ino dina outekuduliko wOmwene.” — OMAYELETUMBULO 3:11.
1. Omolwashike tu na okutambula ko outekuduliko waKalunga?
OHAMBA Salomo yaIsrael shonale oya popya etomheno liwa li na sha nokutambula ko outekuduliko waKalunga, ya ti: “Omumwange, ino dina outekuduliko wOmwene, ino loloka Ye eshi te ku hanyene. Osheshi ou Omwene e mu hole Ye ote mu hanyene, heeno, ngaashi xe ta hanyene omona waye e mu hole.” (Omayeletumbulo 3:11, 12) Heeno, Xo yomeulu ohe ku pe outekuduliko molwaashi oku ku hole.
2. Oshitya “outekuduliko” otashi ti ngahelipi, nomunhu otashi dulika a pewe outekuduliko meenghedi dilipi?
2 Oshitya “outekuduliko” otashi ti okudenga noshimwati, okupukulula, okuyandja omalombwelo nosho yo okuhonga. Omuyapostoli Paulus okwa shanga a ti: “Edengo keshe pefimbo lalo katu li wete olo ehafo, ndelenee olo oluhodi, ndele komesho otali imikile ava va tekulwa kulo oshiimati shombili oshomouyuki.” (Ovaheberi 12:11) Okutambula ko outekuduliko waKalunga noku u tula moilonga otaku dulu oku ku kwafela u kale to longo osho sha yuka, nokungaho, oto ka ehena popepi elela naJehova Kalunga omuyapuki. (Epsalme 99:5) Otashi dulika Jehova e ku pukulule okupitila movaitaveli vakweni ile okupitila moilihongomwa oyo hai kundafanwa pokwoongala kwopaKriste nosho yo mokukonakona kwoye paumwene Eendjovo daYe noishangomwa ‘yelenga lidiinini.’ (Lukas 12:42-44, OB-1954) Kashi hafifa tuu okupewa epukululo shi na sha noshinima shonhumba omo wa pumbwa okuninga omalunduluko! Ndele mbela omunhu okwa pumbwa outekuduliko wa tya ngahelipi ngeenge okwa nyona sha kwata moiti?
Etomheno molwaashi vamwe hava kondwa mo meongalo lopaKriste
3. Oshike hashi ningifa omunhu a kondwe mo meongalo lopaKriste?
3 Ovakriste ove shii nawa oiteelelwa yaKalunga, molwaashi ohava konakona Ombibeli paumwene nosho yo oishangomwa yopaKriste. Kakele kaasho, ohave lihongo yo omifikamhango daye pokwoongala nopoyoongalele yavo inini naai ya kula. Nomolwaasho omunhu oha kondwa mo ashike meongalo ngeenge okwa nyono sha kwata moiti ndele ine livela ombedi.
4, 5. Oshihopaenenwa shilipi shopaMbibeli shi na sha nekondo sha kundafanwa moutendo ava, nomolwashike eongalo lomuKorinto la li la ladipikwa li alulile meongalo omunhu oo a li a nyona?
4 Tala koshihopaenenwa shimwe shopaMbibeli shi na sha nomunhu oo a li a kondwa mo meongalo. Eongalo lomuKorinto ola li le lipwililikila ‘oluhaelo olo nomovapaani la li ihali monika mo, eshi pa li pe na ou e kwete omukainhu waxe.’ Paulus okwa li a ladipika eongalo olo li ‘yandje omulumenhu oo momake aSatana, olutu laye li nyonaunwe po, opo omhepo [yeongalo] i xupifwe.’ (1 Ovakorinto 5:1-5, yelekanifa NW.) Ngeenge omunyoni a kondwa mo meongalo, kungaha, okwa yandjwa kuSatana, noha ningi vali oshitukulwa shounyuni waye. (1 Johannes 5:19) Okukondwa mo kwaye ohaku kufa mo enwefemo lii meongalo nohaku amene ‘omhepo’ yeongalo, sha hala okutya, oikala iwa yeongalo. — 2 Timoteus 4:22; 1 Ovakorinto 5:11-13.
5 Fimbo pa li inapa pita efimbo lile neenghono, Paulus okwa li a ladipika Ovakriste vomuKorinto va alulile meongalo omulumenhu oo a li a nyona. Omolwashike mbela? Paulus okwa ti kutya opo vaha “findwe kuSatana.” Osha yela kutya omunyoni oo okwa li e livela ombedi nokwa li a lundulula onghedi yaye yokukalamwenyo. (2 Ovakorinto 2:8-11) Ngeno Ovakorinto ova li va anya okwaalulila meongalo omulumenhu oo e livela ombedi, ngeno ova findwa kuSatana, sha hala okutya, ngeno ova kala ovakwanyanya noihava dimine po, ngaashi Satana a hala. Nopehe na omalimbililo, kava li va ongaonga ‘okudimina po nokuhekeleka’ omulumenhu oo e livela ombedi. — 2 Ovakorinto 2:5-7.
6. Okukonda mo ovanyoni inave livela ombedi meongalo ohaku eta oidjemo ya tya ngahelipi?
6 Okukonda mo ovanyoni inave livela ombedi meongalo ohaku eta oidjemo ya tya ngahelipi? Ohaku kwafele opo edina laJehova liyapuki liha shekwe nohaku amene edina liwa loshiwana shaye. (1 Petrus 1:14-16) Ohaku tumbalekifa omifikamhango daKalunga nohaku amene oukoshoki wopamhepo weongalo. Otaku dulu yo okukwafela omunyoni ine livela ombedi a mone kutya okwa nyona sha kwata moiti.
Omunhu okwa pumbwa okulivela ombedi opo a dule okwaalulilwa meongalo
7. David okwa li a mona oilanduliko ilipi eshi a li a holeka enyono laye?
7 Ovakriste vahapu ovo hava nyono sha kwata moiti ohave livele ombedi shili, naasho ohashi va kwafele vaha kondwe mo meongalo. Ndele nande ongaho, ihashi kala shipu okulivela ombedi shili. Tala koshinima shi na sha nohamba David yaIsrael shonale, oyo ya shanga Epsalme 32. Eimbilo olo otali ulike kutya David okwa li a holeka enyono laye la kwata moiti oule wefimbo, tashi dulika eshi a li a nyona naBatseba. Omolwokuholeka enyono laye, okwa li a nyika oluhodi fiyo a kanifa ondjungu yaye, ngaashi ashike oupyu wokwenye hau lembeke omafo omiti. Okwa kala e udite ouyahame palutu nosho yo pamaliudo, ndele eshi a li a ‘hepaululila Omwene omanyono aye, okwe mu kufila po omatimba aye.’ (Epsalme 32:3-5) Nomolwaasho David okwa imba a ti: “Omulumenhu omunelao oye ou Omwene ite mu valulile owii waye.” (Epsalme 32:1, 2) David ka li tuu a hafa eshi a filwa onghenda kuKalunga!
8, 9. (a) Omunhu oo a nyona oku na okuulika ngahelipi kutya okwe livela ombedi? (b) Omolwashike omunhu a pumbwa okulivela ombedi opo a dule okwaalulilwa meongalo lopaKriste?
8 Oshimoniwa shaDavid otashi ulike nawa kutya opo omunyoni a filwe onghenda oku na okukala e livela ombedi shili. Ndele ohoni ile outile wokumonika mo hayo tai ufa kutya omunhu okwe livela ombedi. Elivelombedi otali ulike kokulundulula kwomunhu oikala yaye yopamadiladilo shi na sha nenyono laye omolwokulipa oushima. Omunhu oo e livela ombedi oha kala e na ‘omutima wa teyauka nowa alamekwa’ noha kala a hala “okuyukifa osho sha puka” ngeenge otashi shiiva. — Epsalme 51:19; 2 Ovakorinto 7:11, NW.
9 Omunhu okwa pumbwa filufilu okulivela ombedi opo a dule okwaalulilwa meongalo lopaKriste. Omunhu oo a kondwa iha alulilwa ashike ngahenya meongalo molwaashi pa pita efimbo lonhumba. Oku na okuninga omalunduluko manene momutima waye wopafaneko fimbo ina alulilwa meongalo. Oku na okudimina kutya okwa nyona sha kwata moiti nonokutya okwa shekifa edina laJehova nosho yo eongalo. Oku na okulivela ombedi, okwiilikana a mana mo opo a diminwe po, noku na okukala metwokumwe noiteelelwa yaKalunga youyuki. Ngeenge okwa hala okwaalulilwa meongalo, oku na okuulika kutya okwe livela ombedi shili noku na okukala ta ‘longo oilonga oyo ya wapalela elidilululo.’ — Oilonga 26:20.
Omolwashike omunhu oo a nyona e na okuhepaulula enyono laye?
10, 11. Omolwashike tuhe na okukendabala okuholeka omanyono etu?
10 Ovakriste vamwe ovo va nyona otashi dulika va diladile kutya: ‘Ngeenge onda lombwele umwe kutya onda nyona, otashi dulika ndi pulwe omapulo a fifa ohoni notashi dulika ndi kondwe mo meongalo. Ndele ngeenge onda kala nda holeka enyono lange, ohandi ka henuka oinima oyo, nokape na oo te ke shi shiiva meongalo.’ Omunhu oo ta diladila ngaho otashi ulike kutya okwa dimbwa oinima yonhumba oyo ya fimana. Oinima oyo oilipi mbela?
11 Jehova oKalunga “omunefilonghenda, . . . omunanheni, nomunene mouwanghenda nomoudiinini, nouwanghenda waye te u diinine kovanhu omayovi, ou ta dimi po omanyonauno nomatauluko nomatimba.” Ndele nande ongaho oha handukile oshiwana shaye “nondjele.” (Exodus 34:6, 7; Jeremia 30:11) Ngeenge owa nyono sha kwata moiti, ongahelipi Kalunga ta dulu oku ku fila onghenda ngeenge oto kendabala okuholeka enyono loye? Jehova oha kala e wete omanyono a tya ngaho noite ke e lipwililikila. — Omayeletumbulo 15:3; Habakuk 1:13.
12, 13. Oshike tashi dulu okuningwa po ngeenge owa kendabala okuholeka enyono loye?
12 Ngeenge owa nyona sha kwata moiti, oshiwa okuhepaulula enyono loye, molwaashi otashi ke ku kwafela u kale vali u na eliudo liwa. (1 Timoteus 1:18-20) Ndele ngeenge owa holeke enyono loye, otashi dulu okunyateka eliudo loye, notashi dulu oku ku twala momanyono makwao mahapu. Dimbuluka kutya ito nyono ashike kovanhu vakweni nokeongalo, ndele oto nyono yo kuKalunga. Omupsalme umwe okwa imba a ti: “Omwene ou, e nolukalwapangelo laye li li meulu; omesho aye taa tale, neemhafu daye tadi konenene oludalo lovanhu. Omwene ota konakona ovayuki, ndelenee ovahenakalunga naau e hole owii, omwenyo waye otau mu tondo.” — Epsalme 11:4, 5.
13 Jehova ke na nande efiku a nangeke noupuna omunhu oo a holeka enyono la kwata moiti ndele ota kendabala okukala meongalo lopaKriste. (Jakob 4:6) Onghee hano, ngeenge owa nyona nowa hala okukala to longo osho sha yuka, ino ongaonga nande okuhepaulula enyono loye to popi oshili. Ngeenge ino shi ninga, oto ka kala u na eliudo li udite etimba, unene tuu ngeenge to lesha ile to udu omayele a yukila kenyono loye. Oshike tashi ka ningwa po ngeenge Jehova okwa kufa po omhepo yaye pwoove, ngaashi a li e i kufa pohamba Saul? (1 Samuel 16:14) Ngeenge Kalunga okwa kufa po omhepo yaye pwoove, otashi dulika u ye momanyono makwao a kwata moiti neenghono.
Kala we lineekela ovamwaxo ovadiinini
14. Omolwashike omunhu oo a nyona e na okutula moilonga omayele oo e li muJakob 5:14, 15?
14 Mbela omunyoni oo e livela ombedi oku na okuninga po shike? Ombibeli otai ti: “Oye na ifane ovakulunhu veongalo, ndele vo nave mu ilikanene ndele nave mu vaeke omaadi medina lOmwene. Neilikano leitavelo otali xupifa omunaudu, Omwene note mu yambukifa po.” (Jakob 5:14, 15) Oku ka popya novakulunhuongalo oyo onghedi imwe omo omunhu ta dulu ‘okwiimika oiimati oyo ya wapalela elidilululo.’ (Mateus 3:8) Ovalumenhu ovo ovadiinini novanamitimanghenda otave ‘ke mu ilikanena ndele tave mu vaeke omaadi medina lOmwene.’ Ngaashi omaadi a li haa longifwa pefimbo lOmbibeli okuvelula oipute, omayele avo opaMbibeli otaa ka hekeleka keshe oo e livela ombedi shili. — Jeremia 8:22.
15, 16. Ovakulunhuongalo Ovakriste ohava hopaenene ngahelipi oshihopaenenwa osho sha tulwa po kuKalunga, osho sha shangwa muHesekiel 34:15, 16?
15 Omufita wetu, Jehova, okwa tula po oshihopaenenwa shiwa shi na sha nokuulika ohole, eshi a li a mangulula Ovajuda moukwatwa waBabilon mo 537 K.O.P., nosho yo eshi a li a mangulula Israel shopamhepo ‘muBabilon shinene’ mo 1919 O.P. (Ehololo 17:3-5; Ovagalati 6:16) Kungaho, okwa li a wanifa po eudaneko laye olo tali ti: “Ame mwene ohandi ka lifa eedi dange, naame mwene handi ke di twala ketulumuko . . . Odo da kana, ohandi ke di konga, naado da halakanifwa, Ame ohandi ke di alula ko, naado da teka, ohandi ke di manga, naado da utama, ohandi ke di pameka.” — Hesekiel 34:15, 16.
16 Jehova okwa li ha palula eedi daye dopafaneko noku di amena, nokukonga yo odo da kana. Sha faafana, ovafita Ovakriste ohava fi oshisho opo oshiunda shaKalunga shi kale sha paluka nawa pamhepo noshi kale meameno. Ohava kongo yo eedi odo da twalwatwalwa okudja meongalo. Ngaashi ashike Kalunga a li ‘ha mange eedi daye odo da teka,’ ovapashukili navo ohava ‘mange’ eedi odo da ningwa oipute kokupopya kwavamwe ile komanyono ado vene. Natango, ngaashi Kalunga a li ‘ha pameke eedi daye odo da utama,’ ovakulunhuongalo navo ohava kwafele ovo tava vele pamhepo, tashi dulika omolwomanyono avo vene.
Nghee ovafita hava yandje ekwafo
17. Omolwashike tuhe na nande okwoongaonga okukonga ekwafo lopamhepo kovakulunhuongalo?
17 Ovakulunhuongalo ohava tula moilonga nehalo liwa omayele oo taa ti: “Va fileni onghenda nokutila.” (Judas 23) Ovakriste vamwe ova nyona sha kwata moiti molwaashi va ya moluhaelo. Ndele ngeenge ove livele ombedi shili, nava kale ve na oushili kutya ovakulunhuongalo ove lilongekida oku va kwafela panghenda nopahole opo va veluke pamhepo. Paulus okwa popya shi na novakulunhuongalo, naye mwene e likwatela mo, a ti: “Hakutya fye twa hala okupangela eitavelo leni, ndelenee fye ovayakuli pamwe nanye omolwehafo leni.” (2 Ovakorinto 1:24) Onghee hano, ino ongaonga nandenande oku ka konga ekwafo lopamhepo kuvo.
18. Ovakulunhuongalo ohava ungaunga ngahelipi novaitaveli vakwao ovo va nyona?
18 Omolwashike u na okukala we lineekela ovakulunhuongalo, nonande owa nyona sha kwata moiti? Omolwaashi oshilonga shavo sha fimanenena osho okukala ovafita voshiunda shaKalunga. (1 Petrus 5:1-4) Kaku na omufita ha denge odjona yomoufita waye molwaashi ye limonifa oshiponga. Onghee hano, ngeenge ovakulunhuongalo tava ungaunga nomwiitaveli mukwao oo a nyona, kave na oku mu tala ko a fa omukaulinyanga oo a pumbwa okupewa ehandukilo, ndele ponhele yaasho, ove na okutala kenyono laye nokunghee tava dulu oku mu kwafela a veluke pamhepo, ngeenge otashi dulika. (Jakob 5:13-20) Ovakulunhuongalo ove na okutokola pauyuki nosho yo okukala ‘nonghenda noshiunda.’ (Oilonga 20:29, 30; Jesaja 32:1, 2) Ovakriste aveshe ove na ‘okuninga osho sha yuka nokuhola efilonghenda nokweenda nelininipiko pamwe naKalunga.’ (Mika 6:8) Ndele omaukwatya oo okwa fimanenena kovakulunhuongalo ngeenge tashi uya pokuninga omatokolo a kwatela mo onghalamwenyo nosho yo oilonga iyapuki ‘yeedi doufita’ waJehova. — Epsalme 100:3.
19. Ovakulunhuongalo Ovakriste ohava kendabala okukwafela omunhu oo a nyona nomhepo ya tya ngahelipi?
19 Ovafita Ovakriste ova nangekwa po komhepo iyapuki nohava kendabala okukala tava wilikwa kuyo. Ngeenge ‘omunhu okwa nyona’ ine shi nongela, ovalumenhu ovo va pyokoka pamhepo ohava kendabala oku ‘mu pukulula nomhepo yonheni.’ (Ovagalati 6:1; Oilonga 20:28) Ndokotola omunalukeno oha shuna ponhele noukeka ekipa lomunhu oo a teka opo ehe mu yahameke, ndele iha kala e na oumbada oku shi ninga. Sha faafana, ovakulunhuongalo ove na okupukulula omunhu oo a nyona nomhepo yonheni, ndele ove na oku shi ninga metwokumwe nomifikamhango daKalunga nopehe na oumbada. (Ovakolossi 3:12) Molwaashi ovakulunhuongalo ohava ilikana nokutala kOmishangwa ngeenge tava tokola kutya omunhu okwa wana okufilwa onghenda ile hasho, etokolo olo tava ka ninga ohali kala le likolelela kunghee Kalunga ha tale ko oinima. — Mateus 18:18.
20. Omeenghalo dilipi tashi ka kala sha yuka okushiivifila eongalo kutya omunhu wonhumba okwa handukilwa moipafi?
20 Ngeenge enyono olo ola shiivika kuvamwe ile pamwe osha yela kutya otali ka shiivika kuvahapu, eongalo oli na okushiivifilwa kutya omunhu oo a nyona okwa handukilwa moipafi, opo edina liwa leongalo liha nyatekwe. Natango eongalo otali dulu okushiivifilwa kutya omunhu okwa handukilwa moipafi ngeenge ope na omatomheno amwe e lili oo taa ufa ku ningwe eshiivifo la tya ngaho. Omunhu oo a handukilwa pamhangu ota dulu okufaafanifwa nomunhu oo a mona oshiponga palutu, oo omalipyakidilo aye haa kala a ngabekwa oule wefimbo. Onghee hano, osha yuka opo omunyoni oo e livela ombedi a kale ashike ta pwilikine pokwoongala oule wefimbo, ponhele yokuyandja omilombo, ofimbo ta veluka pamhepo. Otashi dulika ovakulunhuongalo va pule omuudifi umwe a konakone naye Ombibeli opo e mu kwafele a xwepopale pamhepo noku kale vali e li “nawa meitavelo.” (Titus 2:2) Aishe oyo ohai ningwa omolwohole ndele hanelalakano lokuhandukila nonyanya omunyoni oo.
21. Omanyono amwe oku na okuungaungwa nao ngahelipi?
21 Ovakulunhuongalo otava dulu okuyandja ekwafo lopamhepo meenghedi di lili noku lili. Pashihopaenenwa, natu tye nee ngeno omumwatate wonhumba oo a li e na nale oupyakadi wokunwa okwa kolwa oshikando shimwe ile ivali fimbo a li ta nu oye aeke meumbo. Ile natu tye nee omumwatate wonhumba oo a efa po nale okushila omakaya okwa shila omakaya oshikando shimwe ile ivali meholeko omolwounghundi wopakafimbo. Nonande omunhu a tya ngaho otashi dulika a ilikana shi na sha naasho a ninga nokwa itavela kutya Kalunga okwe mu dimina po, oku na okukonga ekwafo kovakulunhuongalo opo aha twikile okunyona. Omukulunhuongalo umwe ile vavali otava dulu okuungaunga noshinima osho. Ndele ovakulunhuongalo ovo ove na oku shi shiivifila omupashukili omuunganeki, molwaashi otashi dulika pa kale pe na oinima imwe vali oyo ya kwatelwa mo.
Twikila okutambula ko outekuduliko waKalunga
22, 23. Omolwashike u na okutambula ko alushe outekuduliko waKalunga?
22 Opo tu kale twa hokiwa kuKalunga, otu na okutambula ko outekuduliko waye. (1 Timoteus 5:20) Onghee hano, tambula ko epukululo keshe olo to mono mokukonakona Omishangwa paumwene nosho yo okupitila moishangomwa yopaKriste ile ngeenge to udu omayele oo haa kundafanwa pokwoongala nosho yo poyoongalele yopaKriste inini naai ya kula. Katuka alushe metwokumwe nehalo laJehova. Nokungaho, outekuduliko waKalunga otau ke ku kwafela u kale meameno lopamhepo, sha hala okutya, mepopilongulu lopafaneko olo tali ke ku amena uha nyone.
23 Okutambula ko outekuduliko waKalunga otaku ke ku kwafela u kale mohole yaye. Oshoshili kutya vamwe ova kondwa mo meongalo lopaKriste, ndele oto dulu okuhenuka okukondwa mo ngeenge owa ‘amene omutima woye’ nokukala to ‘ende ngaashi omunaendunge.’ (Omayeletumbulo 4:23; Ovaefeso 5:15) Ngeenge owa kondwa mo nale meongalo lopaKriste, omolwashike ito ningi eenghendabala u alulilwe mo? Kalunga okwa hala aveshe ovo ve mu liyapulila ve mu longele noudiinini nosho yo ‘nenyaku lokomutima.’ (Deuteronomion 28:47) Oto dulu okulongela Jehova noudiinini nonehafo fiyo alushe ngeenge owa kala ho tambula ko outekuduliko waJehova. — Epsalme 100:2.