Teelela efiku laJehova nelididimiko

‘Keitavelo leni wedei ko elididimiko.’ — 2 PETRUS 1:5, 6, NW.

1, 2. Elididimiko oshike, nomolwashike Ovakriste va pumbwa okukala ovalididimiki?

EFIKU linene laJehova oli li popepi neenghono. (Joel 1:15; Sefanja 1:14) Tu li Ovakriste, otwa tokola toko okukanyatela oudiinini wetu kuKalunga notwa teelela nodjuulufi eshi ounamapangelo waye tau ka yukipalifwa. Ndele nande ongaho, otu tondike, ohatu shekwa, ohatu hepekwa navamwe vomufye ohava file eitavelo. (Mateus 5:10-12; 10:22; Ehololo 2:10) Onghee hano, otwa pumbwa okukala tu na elididimiko, sha hala okutya, oukwatya wokudula okuungaunga nomaupyakadi nopehe na okusholola. Omuyapostoli Petrus okwe tu kumaida a ti: ‘Keitavelo leni wedei ko elididimiko.’ (2 Petrus 1:5, 6, NW) Otwa pumbwa okukala hatu lididimike molwaashi Jesus okwa ti: “Ou te lididimike fiyo exulilo, oye ta xupifwa.” — Mateus 24:13.

² Ohatu yahama, ohatu filwa ovaholike vetu nohatu hangwa yo komayeleko e lili noku lili. Satana ota ka kala a hafa ngeenge otwa efa po eitavelo letu. (Lukas 22:31, 32) Ndele kekwafo laJehova ohatu dulu okulididimikila omayeleko e lili noku lili. (1 Petrus 5:6-11) Natu ka konakoneni oimoniwa yavamwe oyo tai ulike kutya ohatu dulu okuteelela efiku laJehova tu na elididimiko nosho yo eitavelo la kola.

Omauyahame ina e va efifa po okulongela Jehova

3, 4. Yandja oshihopaenenwa osho tashi ulike kutya omunhu ota dulu okulongela Jehova noudiinini nonande ota ehama.

³ Kunena Kalunga ihe tu velula pashikumwifilonga, ndele ohe tu pe eenghono opo tu lididimikile omauyahame. (Epsalme 41:2-4) Omukainhu umwe wedina Sharon okwa ti: “Onda kala mokatemba onghalamwenyo yange aishe. Onda dalwa noulema wonhumba womouluvi oo hau imbi eenhumba dolutu di kale tadi longele nawa kumwe nouluvi, naasho osha imba nge ndi hafele onghalamwenyo yange yokounona.” Eshi Sharon a li e lihonga kombinga yaJehova nosho yo yomaudaneko aye e na sha noukolele wa wanenena oshe mu kwafele a kale e na eteelelo. Nonande oha popi noha ende noudjuu, oukalele wopaKriste ohau mu etele ehafo. Omido 15 da pita, Sharon okwa li a popya a ti: “Nonande oukolele wange otashi dulika u naipale, osho sha fimanenena kwaame osho ekwatafano lange naKalunga nosho yo okukala nde mu lineekela. Onda hafa eshi ndi li mokati koshiwana shaJehova nokukala alushe handi kwafwa kuye.”

⁴ Omuyapostoli Paulus okwa li a ladipika Ovakriste vokuTessalonika a ti: “Popyeni nehekeleko neemwenyo da polimana.” (1 Ovatessaloniki 5:14, NW) Omunhu oo a nyematekwa neenghono ota dulu okukwatwa kepolimano. Mo 1993, Sharon okwa ti: ‘Onda li ndi udite ndihe na oshilonga shasha nonda li nda polimana neenghono oule womido nhatu. Ovakulunhuongalo ova li va hekeleka nge nova pa nge omayele. Okupitila mOshungonangelo, Jehova ohe tu pe pahole ouyelele u na sha nanghee hatu dulu okuungaunga nepolimano la kwata moiti. Oshoshili kutya Jehova oha kala e uditile oshiwana shaye oukwao wananghali nohe shi file oshisho.’ (1 Petrus 5:6, 7) Sharon ota twikile natango okulongela Jehova noudiinini ofimbo a teelela efiku laYe linene.

5. Oshihopaenenwa shilipi tashi ulike kutya Ovakriste otava dulu okulididimikila eenghalo odo hadi etifwa koimoniwa yomonakudiwa?

⁵ Ovakriste vamwe ohava kwatwa komahaluhalu omolwoimoniwa yomonakudiwa. Pashihopaenenwa, Harley okwa li a mona omalwoodi madjuu oo a li a luwa pefimbo lOita Itivali yOunyuni nokwa li ha tu eendjodi dii di na sha noita oyo. Ngeenge kwa li a kofa okwa li ha ingida ta ti: “Takamifa! Lungama!” Ngeenge a penduka mo okwa li ha kala a tuta koshinhwi. Ndele okwa li a dula okukaleka onghalamwenyo yaye metwokumwe nehalo laKalunga, nokonima yefimbo ina ka kala vali ha tu eendjodi odo.

6. Omukriste umwe okwa li a ungaunga ngahelipi nomukifi wopamaliudo?

⁶ Omukriste umwe oo a li a kwatwa komukifi wopamadiladilo okwa li a mona shidjuu neenghono okuudifa eumbo neumbo. Ndele nande ongaho, okwa kala ta twikile okuudifa molwaashi okwa li e shii kutya ngeenge okwa kala ta udifa ota ka mona omwenyo waalushe nosho yo ovo tave mu pwilikine. (1 Timoteus 4:16) Omafimbo amwe ka li ha kala ta dulu okukonghola pomuvelo, ndele nande ongaho okwa ti: “Mokweendela ko kwefimbo, onda ka dula okukala handi pangele omaliudo ange ngeenge handi longo eumbo neumbo. Eshi nda kala handi kufa ombinga moukalele osha kwafela nge ndi kale ndi na oupamhepo muwa.” Okukala pokwoongala okwa li yo eshongo kuye, ndele omumwatate oo okwa li e shii kutya eendafano lopaKriste ola fimana. Onghee hano, okwa li a ninga eenghendabala da mana mo opo a kale ha kala pokwoongala. — Ovaheberi 10:24, 25.

7. Ovakriste vamwe ohava ulike ngahelipi elididimiko nonande ohava kala va tila okupopya moipafi yovanhu ile okukala pokwoongala?

⁷ Ovakriste vamwe ove na omukifi hau ifanwa phobia, oumbada wa pitilila u na sha neenghalo donhumba ile oinima yonhumba. Pashihopaenenwa, otashi dulika hava kala va tila okupopya moipafi yovanhu ile va tila nokuli okukala pokwoongala. Ohashi kala shidjuu kuvo okuyandja omatyekosha pokwoongala kwopaKriste ile okuyandja oipopiwa mOfikola yOukalele woPauteokratika. Ndele nande ongaho, otave lididimike nohatu tuwa omukumo kokukala kwavo pokwoongala nokukufa ombinga muko.

8. Oshike hashi kwafele unene omunhu ngeenge ta ungaunga noupyakadi wopamaliudo?

⁸ Okutulumukwa nokukofa sha wana otaku dulu okukwafela omunhu e lididimikile omukifi wopamaliudo. Otashi dulika yo omunhu a pumbwa ouhaku wopaunamiti. Ndele osho hashi kwafele unene osho okwiilikana kuKalunga nelineekelo. Epsalme 55:23 otali ti: “Omutengi woye u undulila kOmwene, Ye ote ku kalele noshisho. Oye ita efa nande omuyuki a kale alushe nokutengauka.” Onghee hano, “nomutima woye aushe lineekela Omwene.” — Omayeletumbulo 3:5, 6.

Nghee hatu dulu okulididimikila oluhodi ngeenge twa filwa

9-11. (a) Oshike tashi dulu oku tu kwafela tu lididimikile oluhodi ngeenge twa filwa omuholike wetu? (b) Ongahelipi oshihopaenenwa shaHanna tashi dulu oku tu kwafela tu lididimikile oluhodi ngeenge twa filwa omuholike wetu?

⁹ Ngeenge oshilyo shoukwaneumbo sha fya, oukwaneumbo ohau kala wa nyika oluhodi neenghono. Eshi Sara a fya, Abraham okwa li e mu lila. (Genesis 23:2) Omulumenhu a wanenena Jesus naye ‘okwa li a lila’ eshi kaume kaye Lasarus a fya. (Johannes 11:35) Onghee hano, oshi li paushitwe okunyika oluhodi ngeenge twa filwa omuholike. Ndele nande ongaho, Ovakriste ove shii kutya otaku ka kala enyumuko. (Oilonga 24:15) Nomolwaasho ihava ‘nyika oluhodi ngaashi venya vamwe vehe na eteelelo.’ — 1 Ovatessaloniki 4:13.

¹⁰ Ongahelipi hatu dulu okulididimikila oluhodi ngeenge twa filwa? Natu tale kefaneko olo tali dulu oku tu kwafela. Luhapu ngeenge kaume ketu ta i molweendo lonhumba ihatu kala twa nyika oluhodi efimbo lile molwaashi otu shii kutya ohatu ke mu mona natango ngeenge a aluka. Sha faafana, itatu ka kala twa nyika oluhodi unene ngeenge Omukriste omudiinini a fya molwaashi otu shii kutya okwa teelela enyumuko. — Omuudifi 7:1.

¹¹ Okukala twe lineekela filufilu ‘Kalunga kehekeleko alishe’ otashi ke tu kwafela tu lididimikile oluhodi ngeenge twa filwa. (2 Ovakorinto 1:3, 4) Okudilonga kombinga yoshihopaenenwa shomufiyekadi womefelemudo lotete Hanna otashi ke tu kwafela yo tu lididimike. Hanna okwa li a filwa omushamane waye konima ashike yomido heyali eshi va hombola. Ndele eshi a li e na omido 84 okwa li natango ta longele Jehova motembeli. (Lukas 2:36-38) Nopehe na omalimbililo, eliyandjo lometilokalunga la tya ngaho ola li le mu kwafela e lididimikile oluhodi nosho yo oudja oo a li e udite. Okukufa ombinga pandjikilile momalipyakidilo opaKriste, mwa kwatelwa oilonga yokuudifa Ouhamba, otashi ke tu kwafela tu lididimikile oluhodi ngeenge twa filwa.

Nghee hatu dulu okuungaunga nomayeleko e lili noku lili

12. Ovakriste vamwe ohave lididimikile omayeleko elipi momaukwaneumbo?

¹² Ovakriste vamwe ohave lididimikile omayeleko momaukwaneumbo avo. Pashihopaenenwa, ngeenge kaume umwe kopahombo okwa i moluhaelo otashi ka ehameka oukwaneumbo. Kaume kopahombo oo ehe na ondjo otashi dulika a kale ita dulu okukofa nota kwena neenghono omolwokuhaluka nokuuda nai unene. Otashi dulika shi kale shidjuu kuye okulonga oilonga yanafangwa notashi dulika a ninge omapuko ile a etife oshiponga. Kaume kopahombo oo ehe na ondjo otashi dulika yo a kale ina hala okulya, a utame notashi dulika a hangwe koupyakadi wopamadiladilo. Otashi dulika yo shi kale shidjuu kuye okukufa ombinga momalipyakidilo opaKriste. Onghalo ya tya ngaho otai ka kuma yo neenghono oludalo lavo.

13, 14. (a) Etwomukumo lilipi hatu mono meilikano laSalomo li na sha neyapulo lotembeli? (b) Omolwashike twa pumbwa okwiilikana tu pewe omhepo iyapuki?

¹³ Ngeenge tu li momayeleko ngaashi oo a tumbulwa metetekelo, Jehova ohe tu kwafele. (Epsalme 94:19) Kalunga oha udu omailikano oshiwana shaye, ngaashi sha li sha ulikwa meilikano lohamba Salomo li na sha neyapulo lotembeli yaJehova. Salomo okwa ilikana a ti: “Ngenge mefimbo olo omunhu umwe, keshe ou, ile ovanhu voye aveshe Ovaisrael tava ilikana nokwiindila onghenda yoye, vo eshi ve udite oudjuu womaliudo ndee tava yelula omaoko avo kongulu ei, uda hano meulu, monhele yoye u dime po, ndee u alulile keshe umwe pailonga yaye, shaashi Ove wa shiiva omutima waye — osheshi Ove auke wa shiiva omitima dovanhu aveshe — vo opo ve ku tile fimbo hava kala moshilongo eshi we shi yandja kootate yetu.” — 1 Eehamba 8:38-40.

¹⁴ Okukala hatu ilikana tu pewe omhepo iyapuki otashi ke tu kwafela neenghono. (Mateus 7:7-11) Oshiimati shomhepo osha kwatela mo omaukwatya ngaashi ehafo nombili. (Ovagalati 5:22) Ihatu kala tuu tu udite twa pepelelwa ngeenge Tate yetu womeulu a nyamukula omailikano etu! Kungaho, ohatu kala twa hafa notu na ombili, ponhele yokukala tu udite oluhodi nouyahame.

15. Omishangwa dilipi tadi dulu oku tu kwafela opo tuha kale noisho?

¹⁵ Osha yela kutya ohatu ka kala tu na oshisho shonhumba ngeenge hatu lididimikile omaupyakadi a kwata moiti. Ndele nande ongaho, eendjovo daJesus tadi landula otadi dulu oku tu kwafela tuha kale unene noshisho. Jesus okwa ti: “Inamu fila okukalamwenyo kweni oshisho, mu lye shike ile mu nwe shike, nomalutu eni mu djale shike. . . . Ndelenee kongeni tete ouhamba waKalunga nouyuki waye, opo tamu wedelwa ko ei aishe.” (Mateus 6:25, 33, 34) Omuyapostoli Petrus okwe tu kumaida a ti: ‘Oshisho sheni shi dikeni Kalunga, osheshi Oye te mu file oshisho.’ (1 Petrus 5:6, 7) Oshi li pandunge okuninga eenghendabala opo tu kandule po omaupyakadi. Ndele ngeenge owa ninga eenghendabala da tya ngaho, ino pumbwa vali okukala to lipula unene noupyakadi oo, ndele owa pumbwa okukala to ilikana kombinga youpyakadi oo molwaashi osho ashike tashi ke ku kwafela. Omupsalme okwa imba a ti: “Ondjila yoye i tula meke lOmwene, u mu lineekele; Oye note shi ningi.” — Epsalme 37:5.

16, 17. (a) Omolwashike itatu dulu okukala tuhe na oisho nandenande? (b) Oshike hatu ka mona ngeenge otwa tula moilonga Ovafilippi 4:6, 7?

¹⁶ Paulus okwa shanga a ti: “Kaleni mu he na nande oshisho shasha, ndelenee oufyoona weni u shiivifileni Kalunga momailikano nomomaindilo pamwe nomapandulo, nombili yaKalunga ei i dule eendunge adishe, otai ka amena omitima deni nomadiladilo eni muKristus Jesus.” (Ovafilippi 4:6, 7) Oludalo laAdam itali dulu okukala lihe na oisho nandenande, molwaashi inali wanenena. (Ovaroma 5:12) Ovakainhu vaEsau Ovaheti ova li va etela ovadali vaye ovatilikalunga Isak naRebekka “oudjuu muhapu.” (Genesis 26:34, 35) Ouyahame otashi dulika wa li wa etela Timoteus naTrofimus oisho. (1 Timoteus 5:23; 2 Timoteus 4:20) Paulus okwa li e na oshisho novaitaveli vakwao. (2 Ovakorinto 11:28) Ndelenee “omuudi womailikano” oha pwilikine alushe omailikano aavo ve mu hole. — Epsalme 65:3.

¹⁷ “Kalunga kombili” ote tu kwafele note tu hekeleke ofimbo twa teelela efiku laye. (Ovafilippi 4:9) Jehova “omunefilonghenda,” ‘oku na onghedi iwa nokuya di ekufilo’ noha “dimbulukwa nokutya fye ondwi yedu.” (Exodus 34:6; Epsalme 86:5; 103:13, 14) Onghee hano, ‘oufyoona wetu natu u shiivifileni Kalunga,’ opo nee, ohatu ka kala tu na ‘ombili yaye’ oyo tai ka ngungumaneka omadiladilo etu.

18. Ngaashi sha shangwa muJob 42:5, ongahelipi hatu dulu ‘okumona’ Kalunga?

¹⁸ Ohatu mono kutya Kalunga oku li pamwe nafye ngeenge a nyamukula omailikano etu. Konima eshi Job a li e lididimikila omayeleko, okwa ti: “[Jehova] nde ku udile ashishe omatwi, ndelenee paife omesho ange nde ku mona ko.” (Job 42:5) Omolweudeko li na sha nanghee Kalunga ta ungaunga nafye nosho yo olupandu letu loku mu pandula, ohatu ka kala tu mu ‘wete’ nawa nomesho eitavelo shi dulife nale kutya ohe tu file oshisho. Ekwatafano la tya ngaho naJehova itali ke tu etela tuu ombili yokomutima noyopamadiladilo!

19. Oshike tashi ka ningwa po ngeenge otwa ‘dike Jehova oisho yetu’?

¹⁹ Ngeenge otwa ‘dike Jehova oisho yetu aishe,’ ohatu ka dula okulididimikila omayeleko tu na omitima nomadiladilo a ngungumana. Omitima detu dopafaneko otadi ka kala da ngungumana nodi he na oumbada washa. Itatu ka kala tu na oshisho shasha.

20, 21. (a) Oshimoniwa shaStefanus otashi ulike ngahelipi kutya omunhu ota dulu okukala a ngungumana ngeenge ta hepekwa? (b) Yandja oshihopaenenwa shokunena shavamwe ovo va li ve lididimikila omayeleko ve shi ninga va ngungumana.

²⁰ Omuhongwa Stefanus okwa li a ngungumana eshi a li te lididimikile eyeleko linene leitavelo laye. Fimbo ina yandja oundombwedi waye waxuuninwa, aveshe ava va li mOsanhedrin ‘ova mona oshipala shaye sha fa oshipala shomwengeli.’ (Oilonga 6:15) Oshipala shaye osha li tashi ulike kutya oku na ombili a fa omweengeli, omutumwa waKalunga. Konima eshi Stefanus a popya kutya ovapanguli ove na etimba omolwefyo laJesus, eendjovo daye ‘oda li da lengula omitima davo ndele tave mu likweshele omayoo.’ Stefanus “okwa li e yadi omhepo iyapuki, nokwe liameka keulu ndele ta mono oshinge shaKalunga naJesus e li ofika kolulyo laKalunga.” Molwaashi Stefanus okwa li a pamekwa kemoniko olo, okwa li omudiinini fiyo okefyo. (Oilonga 7:52-60) Nonande ihatu mono omamoniko kunena, Kalunga ota dulu oku tu kwafela tu kale twa ngungumana ngeenge hatu patanekwa.

²¹ Natu konakoneni shi na sha nanghee Ovakriste vonhumba ovo va dipawa kepangelo laNazi, pefimbo lOita Itivali yOunyuni va li ve udite fimbo inava fya. Umwe womuvo okwa hokolola oshimoniwa shaye eshi a li momhangu a ti: “Eshi nda lombwelwa kutya onda tokolelwa efyo, onda ti, ‘Diinina fiyo okefyo,’ nonda popya vali eendjovo dinini dOmwene wetu, sha longwa sha pwa. Ndele inamu lipula naasho, ondi udite ombili inene nengungumano!” Omunyasha umwe Omukriste oo a li a teelela a ka dipawe ta tetwa omutwe okwa li a shangela ovadali vaye a ti: “Paife okeengulasha. Ondi na natango efimbo okulundulula omadiladilo ange. Ndele mbela ohandi ka kala ngoo nda hafa mounyuni ou ngeenge onde lidimbike Omwene wetu? Hasho nandenande! Paife omu na oushili kutya ohandi fi ndi na ehafo nombili.” Osha yela kutya Jehova oha yambidida ovapiya vaye ovadiinini.

Oto dulu okulididimika ngeenge to yelekwa

22, 23. Oto dulu okukala nelineekelo lilipi ofimbo wa teelela efiku laJehova nelididimiko?

²² Otashi dulika ito ka shakeneka amwe omomayeleko oo twa kundafana moshitukulwa eshi. Ndele omutilikalunga Job okwa popya sha yuka eshi a ti: “Omunhu a dalwa komwalikadi, ta kala po omafiku manini ndee ta kuta oupyakadi.” (Job 14:1) Otashi dulika u li omudali oo ta kendabala noudiinini okutekula ounona voye va kale ovatilikalunga. Ove na okulididimikila omayeleko kofikola, ndele ito ka kala tuu wa hafa ngeenge ova kala ovadiinini kuJehova nohava dulika komafinamhango aye ouyuki! Naave otashi dulika ho shakeneke omaupyakadi nomayeleko koilonga. Ndele eenghalo da tya ngaho otadi dulu okulididimikilwa molwaashi Jehova ‘oha humbata omaudjuu etu efiku nefiku.’ — Epsalme 68:19, OB-1986.

²³ Otashi dulika u kale we lidina, ndele dimbuluka kutya Jehova ita ka dimbwa nande oilonga oyo wa kala to mu longele nohole yoye yokuhola edina laye liyapuki. (Ovaheberi 6:10) Kekwafo laJehova, oto ka dula okulididimika ngeenge eitavelo loye tali yelekwa. Onghee hano, ngeenge to ilikana ile to litulile po omalalakano, kwatela mo yo okulonga ehalo laKalunga. Opo nee oto ka kala u na elineekelo kutya Kalunga ote ke ku nangeka noupuna note ke ku kwafa ofimbo wa teelela efiku laye nelididimiko.

Oto nyamukula ngahelipi?

• Omolwashike Ovakriste va pumbwa okukala ovalididimiki?

• Oshike tashi ke tu kwafela tu lididimikile omikifi nosho yo oluhodi ngeenge twa filwa ovaholike vetu?

• Eilikano ohali tu kwafele ngahelipi tu lididimikile omayeleko?

• Omolwashike hatu dulu okuteelela efiku laJehova nelididimiko?

[Efano pepandja 17]

Okukala twe lineekela muJehova otashi ke tu kwafela tu lididimikile oluhodi ngeenge twa filwa ovaholike vetu