Ohatu ka mona ouwa ngeenge otwe lididimikile okumona oixuna
“Ovo ve lididimika, ohatu va tale ovanelao.” — JAKOB 5:11.
1, 2. Oshike tashi ulike kutya Jehova ka li a lalakanena ovanhu va kale tava mono oixuna?
KAPE na omunhu ha kala a hala okumona oixuna, nOmushiti wetu Jehova Kalunga ina hala tu mone oixuna. Oushili wa tya ngaho ohatu dulu oku u mona ngeenge hatu konakona Eendjovo daye da nwefwa mo nokutala kwaasho sha li sha ningwa po eshi a shita ovanhu votete. Ombibeli otai ti: “Omwene Kalunga okwa mele omunhu mondwi yedu ndele okwa fudila meyulu laye omufudo womwenyo. Osho ngaha omulumenhu okwa ninga omwenyo u nomwenyo.” (Genesis 2:7) Omunhu wotete, Adam, okwa li a shitwa e na olutu nomadiladilo a wanenena, nokali ngeno ta ka vela ile a fye.
2 Adam okwa li a tulwa monhele ya tya ngahelipi? Ombibeli otai ti: “Omwene Kalunga okwa twika oshikunino muEden, moushilo, omo Ye a yandja komunhu ou e mu ma, onhele. Ndele Omwene Kalunga okwa menifa medu omiti dilili da wapala okutala nodinyenye okuliwa.” (Genesis 2:8, 9) Adam okwa li shili e na onhele iwa yokukala, noka li ta ka mona oixuna.
3. Ovalihomboli votete ova li ve na etimaumbwile lilipi?
3 Genesis 2:18 ota ti: “Omwene Kalunga okwa tile yo: Ke shiwa omunhu a kale aeke. Ame ohandi ke mu ningila ekwafo tali mu wapalele.” Jehova okwa li a shitila Adam omukainhu a wanenena, naasho osha li tashi ke shi ningifa tashi shiiva opo va kale netimaumbwile lokukala noukwaneumbo wa hafa. (Genesis 2:21-23) Ombibeli oya ti vali: “Kalunga okwe va nangeka noupuna ndele Kalunga okwe va lombwela: Dalafaneni nokuhapupala ndee yadifeni edu, lo nali kale mepangelo leni.” (Genesis 1:28) Ovalihomboli votete okwa li ve na oufembanghenda u kumwifi wokutamununa mo oshikunino shaEden fiyo osheshi edu alishe la ninga Oparadisa. Oludalo lavo ola li tali ka kala la hafa nokala li tali ka mona oixuna. Kaya li tuu onghalamwenyo iwa! — Genesis 1:31.
Nghee okumona oixuna kwa hovela
4. Ovanhu ove li monghalo ya tya ngahelipi ngeenge hatu tale kondjokonona?
4 Ngeenge hatu tale keenghalo dovanhu mondjokonona aishe, osha yela kutya opa ningwa sha osho sha ningifa eenghalo di naipale neenghono. Opa kala tapa ningwa oinima ii, novanhu ova kala tava mono oixuna neenghono. Oule womafelemido, oludalo alishe laAdam naEva ola kala tali kwatwa komikifi, tali kulupa nohali fi nokuli. Edu kali fi nandenande oparadisa i na ovanhu va hafa. Onghalo yovanhu oya hokololwa nawa mOvaroma 8:22 tava ti: “Oishitwa aishe ohai keme kumwe ndele oi nefeto lokudala fiyo paife.”
5. Ovakulunhu vetu votete ova kwatelwa mo ngahelipi mokweetifa okumona oixuna?
5 Jehova haye a etifa okumona oixuna kuhapu oko kwa kala po efimbo lile. (2 Samuel 22:31) Ovanhu navo ova etifa okumona oixuna molwaashi ‘oilonga yavo oififahoni noya nyonauka.’ (Epsalme 14:1) Ovakulunhu vetu votete ova li ve na onghalamwenyo iwa pehovelo. Ova li ashike ve na okukala tava dulika kuJehova opo va twikile nonghalamwenyo iwa ya tya ngaho, ndele nande ongaho, Adam naEva ova li va hoolola okukala va manguluka ko kuye. Molwaashi ovakulunhu vetu votete ova li va ekelashi Jehova, kava li vali tava ka kala va wanenena. Okwa li tava ka xutuka ndele tava fi. Kungaho, otwa fyuulula okuhawanenena kuvo. — Genesis 3:17-19; Ovaroma 5:12.
6. Satana okwa dana onghandangala ilipi mokweetifa okumona oixuna?
6 Oshishitwa shopamhepo osho sha ka ninga Satana Ondiaboli osha etela yo ovanhu okumona oixuna. Satana okwa li a shitwa nemanguluko lokuninga omatokolo, ndele okwa li e li longifa nai molwaashi okwa li a hala okukala ta ilikanwa. Ndele nande ongaho, Jehova oye ashike e na okwiilikanwa ndele haishitwa yaye. Satana oye a li a heka Adam naEva va hoolole okukala va manguluka ko kuKalunga opo ngeno vati va “shiive ngaashi Kalunga ouwa nowii.” — Genesis 3:5.
Jehova oye aeke e na oufemba wokukala omupangeli
7. Oilanduliko younashibofa womuEden oo wa li wa tukululilwa Jehova otai ulike shike?
7 Oilanduliko ii oyo ya etifwa kounashibofa womuEden otai ulike kutya Jehova, Omunamapangelo aeshe, oye aeke e na oufemba wokukala omupangeli nonokutya epangelo laye olo alike la yuka. Omido omayovi da pita oda ulika kutya Satana oo e li “omupangeli wounyuni ou” okwa etifa po omapangelo, oo haa pangele shihe li pauyuki, omakwanyanya noitaa etele nandenande ovanhu ouwa. (Johannes 12:31) Okuhapangela nawa kwovanhu oule womido ve li koshi yenwefemo laSatana okwa ulika yo kutya ovanhu itava dulu okupangela pauyuki. (Jeremia 10:23) Onghee hano, onghedi yokupangela keshe oyo tai hetekelwa kovanhu va manguluka ko kuJehova itai ka pondola. Ondjokonona yovanhu oya ulika oushili woshinima osho.
8. Jehova ota ka ningila shike omapangelo aeshe opanhu, note ke shi ninga ngahelipi?
8 Molwaashi Jehova okwa efa pa pite omido omayovi opo ovanhu va kale tave lipangele va manguluka ko kuye, osha yeleka eshi ta ka hanauna po omapangelo aeshe oo e li kombada yedu ndele ta eta po epangelo laye. Ombibeli oya xunganeka shi na sha naasho ya ti: “Pomafiku eehamba dinya [omapangelo opanhu] Kalunga ou komeulu ota ka dika ouhamba [epangelo laye lomeulu olo li li momake aKristus] itau ka teka po fiyo alushe. . . . Ndele owo otau ka nyanyaula notau ka teyaula omauhamba aeshe noku a xulifa po, ndelenee owo vene tau ka kala fiyo alushe.” (Daniel 2:44) Epangelo leendemoni nolovanhu otali ka xula po, ndele Ouhamba waKalunga womeulu oo auke tau ka kala po fiyo alushe nokupangela edu. Kristus oye ta ka kala Ohamba, nota ka pangela pamwe no 144 000, ovanhu ovadiinini ovo va dja kombada yedu. — Ehololo 14:1.
Okumona oixuna otaku dulu oku tu etela ouwa
9, 10. Jesus okwa mona ouwa ulipi omolwokumona oixuna oko a li e lididimikila?
9 Oshihokwifa okukonakona kombinga yoiteelelwa yaavo tava ka kala ovapangeli mOuhamba womeulu. Shotete, Kristus Jesus okwa ulika kutya okwa wana okukala Ohamba. Oule womido dihapudihapu okwa kala pamwe naXe ta longo ehalo laye, e li “omulongi onghulungu.” (Omayeletumbulo 8:22-31, NW) Eshi Jehova a li e mu tuma kombada yedu, Jesus okwa li a dulika nehalo liwa. Eshi a li kombada yedu okwa kala e lipyakidila neenghono okulombwela ovanhu kombinga younamapangelo waJehova nosho yo Ouhamba waYe. Jesus okwe tu tulila po oshihopaenenwa sha denga mbada shi na sha nokukala hatu dulika filufilu kounamapangelo waJehova. — Mateus 4:17; 6:9.
10 Jesus okwa li a hepekwa nokudipawa. Ndele pefimbo loukalele waye okwa li a didilika kutya ovanhu ove li monghalo i etifa onghenda. Ouwa ulipi Jesus a li a mona eshi a mona oixuna naashi a mona ovanhu tava mono oixuna? Ovaheberi 5:8 otava ti: “Nande Oye Omona [waKalunga] okwe lilonga eduliko okouyahame ou e u humbata.” Oimoniwa yaJesus eshi a li kombada yedu oye mu ningifa a kale ha yavelele noha kenukile ovanhu. Jesus okwa li a shakeneka omashongo oo haa shakenekwa kovanhu monghalamwenyo. Onghee hano, oha kala e tu uditile oukwao wananghali ngeenge hatu mono oixuna noku udite ko nawa onghandangala oyo ta dana moku tu kwafela. Didilika nghee omuyapostoli Paulus a divilika oshinima osho membo lOvaheberi a ti: “Ye okwa li e nokufafana novamwaxe moinima aishe, opo a ninge omupristeri omukulunhu omunamutimanghenda nomudiinini moilonga yaye yopuKalunga, Ye a longele ovanhu edimepo lomatimba. Osheshi Oye mwene, eshi a yahamekwa nokwa hongaulwa, ota dulu okukwafa ava tava hongaulwa.” “Omupristeri wetu omukulunhu haye ou, e he uditile oungone wetu olukeno, ndelenee oye ou a shindwa moinima aishe ngaashi fye, ndelenee ke netimba. Tu yeni hano kolukalwa lefilonghenda tu neyombamo, tu talwe nonghenda fye tu mone efilonghenda loku tu kwafa pefimbo liwa.” — Ovaheberi 2:17, 18; 4:14-16; Mateus 9:36; 11:28-30.
11. Ovo tava ka pangela ve li eehamba novapristeri ohava mono ouwa ulipi moimoniwa yavo yokombada yedu?
11 Ovanhu 144 000 ovo “va kulilwa movanhu,” okudja kombada yedu va ka pangele pamwe naKristus Jesus mOuhamba womeulu navo ova mona yo oixuna. (Ehololo 14:4) Ova dalwa ve li ovanhu vopambelela kombada yedu, ova kulila mounyuni omo ovanhu hava mono oixuna navo vene ohava mono oixuna. Vahapu vomuvo ova li va hepekwa, navamwe ova dipawa nokuli omolwokukanyatela oudiinini wavo kuJehova nomolwokushikula Jesus nehalo liwa. Ndele inava ‘fya ohoni okuhepaulula Omwene wavo, mokuhumbata kumwe oudjuu omolwevangeli.’ (2 Timoteus 1:8) Oimoniwa oyo va pita muyo eshi va li kombada yedu oye va kwafela va kale va wana filufilu oku ka pangela ovanhu okudja meulu. Ove lihonga okukala hava udile ovanhu vakwao oukwao wananghali, have va kenukile nokukala nehalo loku va kwafela. — Ehololo 5:10; 14:2-5; 20:6.
Ovo ve na eteelelo loku ka kala kombada yedu ovanelao
12, 13. Ovo ve na eteelelo loku ka kala kombada yedu ohava mono ouwa washike ngeenge tava mono oixuna?
12 Ovo ve na eteelelo loku ka kala nomwenyo waalushe moparadisa kombada yedu omo itamu ka kala vali ouyahame, oluhodi nosho yo efyo otava mono ouwa ulipi eshi tava mono oixuna paife? Kape na oo ha kala a hokwa ouyahame noluhodi olo hali etifwa kokumona oixuna. Ndele ngeenge otwe lididimikile okumona oixuna kwa tya ngaho, otashi ka xwepopaleka omaukwatya etu mawa notashi ke tu etela elao.
13 Diladila kwaasho Eendjovo daKalunga da nwefwa mo da popya shi na sha nokumona oixuna da ti: “Nande mu hepekelwe ouyuki, onye ovanelao.” “Onye ngenge tamu shekelwa edina laKristus, onye ovanelao.” (1 Petrus 3:14; 4:14) Natango Ombibeli oya ti: “Ovanelao onye, ovanhu ngenge tave mu sheke ndee tave mu taata ndee tave mu popile mowii aushe nokufufya molwange. Hafeni nye mu nyakukwe pombada, osheshi ondjabi yeni oinene meulu.” (Mateus 5:11, 12) Omuhongwa Jakob okwa ti: “Omulumenhu omunelao oye ou te lididimikile eshindo, osheshi ngenge a ninga omuduli walo, ota ka pewa oshishani shomwenyo.” — Jakob 1:12.
14. Omeityo lilipi ovapiya vaJehova hava kala va hafa ngeenge tava mono oixuna?
14 Okumona oixuna hako haku tu etele ehafo. Ndele ohatu kala twa hafa notwa wanenwa eshi tu shii kutya ohatu mono oixuna molwaashi ohatu longo ehalo laJehova nohatu landula oshihopaenenwa shaJesus. Pashihopaenenwa, mefelemudo lotete, ovayapostoli vamwe ova li va tulwa modolongo ndele tava twalwa momhangu yopombada yOvajuda novali va monika etimba omolwokuudifa kombinga yaJesus Kristus. Ova li va dengwa neeshokoto ndele tava mangululwa. Mbela ova li ve linyenga ngahelipi? Ombibeli otai hokolola tai ti: “Eshi va dja mo moshiongalele shovakulunhu, ova hafa eshi va talwa va wana okushekelwa edina laJesus.” (Oilonga 5:17-41) Kava li va hafela okudengwa nosho yo ouyahame oo va li ve udite, ndele ova li va hafa molwaashi ova li ve udite ko kutya ova li va ungaungwa navo ngaho molwaashi ova li va kanyatela oudiinini wavo kuJehova nova li tava shikula oshikoti shaJesus. — Oilonga 16:25; 2 Ovakorinto 12:10; 1 Petrus 4:13.
15. Ouwa ulipi hatu ka mona monakwiiwa eshi hatu lididimikile okumona oixuna paife?
15 Ngeenge otwe lididimikile omapataneko nosho yo omahepeko tu na oikala iwa, otashi tu kwafele tu kale ovalididimiki. Osho otashi ke tu kwafela yo tu lididimikile okumona oixuna oko taku ke tu hanga monakwiiwa. Ombibeli otai ti: “Ovamwatate, hafeni shili, ngenge tamu hangika komahongaulo opahapu, osheshi omu shi shii kutya, okuyelekwa kweitavelo leni otaku longo elididimiko.” (Jakob 1:2, 3) Ovaroma 5:3-5 navo otava ti: “Ohatu lifimanekele [omaudjuu] yo, shaashi tu shi shii [omaudjuu] otaa dala elididimiko, nelididimiko oudiinini, noudiinini eteelelo; ndele eteelelo itali fifa ohoni.” Onghee hano, apa ngoo pe fike okulididimikila omayeleko paife omolweitavelo letu lopaKriste, opo ngoo tapa ka kala pe fike okudula kwetu okulididimikila omayeleko makwao oo tae ke tu hanga monghalelo ei yoinima youkolokoshi.
Jehova ota ka pa ondjabi ovo tava mono oixuna
16. Jehova ota ka ningila shike eehamba novapristeri vomonakwiiwa omolwoixuna oyo va mona?
16 Nonande otu kanife oiniwe yetu eshi hatu patanekwa ile hatu hepekwa omolwokudiinina eitavelo letu lopaKriste, otwa hafa molwaashi otu shii kutya Jehova ote ke tu pa ondjabi inene. Pashihopaenenwa, omuyapostoli Paulus okwa li a shangela vamwe vomwaavo ve na eteelelo lokuya meulu va ka kale ovapangeli vOuhamba waKalunga a ti: “[Okunyekwa ko] kwoinima yeni mwe ku humbata nehafo nokushiiva nokutya, onye omu na emona liwa meulu li dule eli.” (Ovaheberi 10:34) Diladila ashike kunghee tava ka kala va hafa eshi tava ka longifwa kuJehova nokuKristus mokweetela ovanhu ovo tava ka kala mounyuni mupe omanangeko noupuna makumwifi. Eendjovo domuyapostoli Paulus odo a shangela Ovakriste ovo ovadiinini odoshili eshi a ti: “Ohandi ti: omauyahame omefimbo lopaife kae shii kuyelekwa noshinge eshi tashi ka holoka mufye.” — Ovaroma 8:18.
17. Jehova ota ka ningila shike ovo ve na eteelelo loku ka kala kombada yedu notave mu longele noudiinini paife?
17 Kashi na nee mbudi kutya ovo ve na eteelelo loku ka kala kombada yedu ova kanife shike ile ova ninge omaliyambo ashike opo va longele Jehova, ote ke va pa yo ondjabi inene monakwiiwa. Ote ke va pa omwenyo waalushe wa wanenena moparadisa kombada yedu. Mounyuni mupe, Jehova ota ka “feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali.” (Ehololo 21:4) Kali fi tuu eudaneko likumwifi! Oshinima keshe osho hatu kanifa paife ile eliyambo keshe olo hatu ningi omolwokulongela Jehova itashi dulu okuyelekwa nonghalamwenyo ya denga mbada oyo te ke tu pa omolwokulididimikila okumona oixuna nokukala ovadiinini.
18. Eudaneko tali hekeleke lilipi olo Jehova e tu udanekela mEendjovo daye?
18 Okumona oixuna kwoludi keshe oko tashi dulika hatu ke lididimikila itaku ka kuma okuhafela kwetu omwenyo waalushe mounyuni mupe waKalunga. Okumona oixuna akushe otaku ka pingenwa po keenghalo diwa odo tadi ka kala mounyuni mupe. Jesaja 65:17, 18 ota ti: “Inya yonale itai dimbulukuwa vali, nongaashi kape na ou te i diladila momutima waye. Ndelenee otamu ka kala alushe nokukuwilila nokunyakukilwa ei handi ke i shita.” Onghee hano, osha yuka eshi omumwaxe waJesus, Jakob, a popya a ti: “Ovo ve lididimika, ohatu va tale ovanelao.” (Jakob 5:11) Ngeenge otwe lididimikile noudiinini okumona oixuna paife, ohatu ka mona ouwa paife nosho yo monakwiiwa.
Oto nyamukula ngahelipi?
• Osha enda ngahelipi opo ovanhu va kale hava mono oixuna?
• Ovapangeli vomonakwiiwa nosho yo ovo tava ka kala kombada yedu otava dulu okumona ouwa ulipi omolwokumona oixuna?
• Omolwashike hatu dulu okukala twa hafa paife nonande ohatu mono oixuna?
[Efano pepandja 18]
Ovakulunhu vetu votete ova li ngeno tava ka kala nonakwiiwa iwa
[Efano pepandja 20]
Okumona oixuna okwa kwafela Jesus a kale Ohamba iwa nOmupristeri Omukulunhu
[Efano pepandja 22]
Ovayapostoli ‘ova li va hafa eshi va li va talwa va wana okushekelwa’ eitavelo lavo