‘Omanyolo agehe oga nyolwa ge tu longe’

OMUUVITHI 12:12 ota ti: “Okunyola omambo ogendji ihaku hulu.” Iileshomwa oyindji mbyoka tayi monika kunena otayi ulike kutya oohapu ndhika odhoshili ngaashi naanaa dha li pethimbo ndyoka sho opo dha nyolwa. Ongiini ano omuleshi omunawino e na okutokola kutya oshike a pumbwa okugandja eitulomo kusho?

Aaleshi oyendji ohaya kala ya hala okutseya omauyelele kombinga yaangoka a nyola embo manga inaaya tokola kutya otaye ke li lesha nenge itaye ke li lesha. Aanyanyangidhi otashi vulika ya kwatele mo membo okatendo okafupi hoka ke na edhina lyoshilando moka omunyoli a valelwa, oondondo dhelongo lye nosho wo omusholondondo gwomambo ngoka a nyola. Uukwatya womunyoli owu li wa simana, ngaashi shi iwetikile mwaashoka sha li hashi ningwa momathelemimvo gonale sho aanyoli aakiintu olundji ya li haya nyola taya longitha omadhina giifundja goshilumentu opo aaleshi kaaya tale ko omambo gawo nondhino molwaashoka owala ga nyolwa kaakiintu.

Mupya munene, ngaashi sha tumbulwa moshitopolwa sha tetekele, aantu yamwe oya dhina Omanyolo gOshihebeli molwaashoka oyi itaala kutya Kalunga ngoka ta popiwa mo oku li kalunga e na onyanya ngoka a li ha hanagula po aatondi ye nopwaahe na ohenda.a Natu taleni shoka Omanyolo gOshihebeli nOmanyolo gopaKriste gOshigreka tage tu lombwele kombinga yOmunyoli gwOmbiimbeli.

Kombinga yOmunyoli gwOmbiimbeli

Kalunga okwa li a lombwele oshigwana shaIsraeli mOmanyolo gOshihebeli a ti: “Ongame OMUWA, itandi lunduluka.” (Maleaki 3:6) Oomvula 500 konima yaashoka, omunyoli gwOmbiimbeli Jakob okwa li a nyola kombinga yaKalunga a ti: “Puye kapu na nando elunduluko nenge epingathano lyuuyelele nomilema.” (Jakob 1:17) Omolwashike ano kuyamwe tashi monika sha fa pu na eyooloko pokati kaKalunga ngoka ta popiwa mOmanyolo gOshihebeli naangoka ta popiwa mOmanyolo gopaKriste gOshigreka?

Eyamukulo olyo kutya omaukwatya gaKalunga ga yoolokathana otaga popiwa miitopolwa yi ili noyi ili yOmbiimbeli. Membo lyaGenesis omo amuke, ota hokololwa kutya ‘ohe ehamekwa momutima gwe,’ e li “omushiti gwegulu nevi” nosho wo e li “Omupanguli guuyuni auhe.” (Genesis 6:6, KB; 14:22; 18:25) Mbela omautumbulilo ngaka ga yoolokathana otaga popi ngaa Kalunga gumwe? Eeno.

Oku shi thaneka: Omupanguli gwomoshitopolwa okwa tseyika nawa kwaamboka a li a pangula kutya oha pangula a kwata miiti naanaa ngaashi shi li pampango. Ihe nonando ngaaka, aanona ye oye shi shi kutya tate gwawo oku li omunahole nomunambili. Ookuume ke kopothingo oye shi kutya ye omulumentu omunambili noha ningi iiyolitha. Shino otashi ulike kutya omuntu oha vulu okukala e na omaukwatya ga yoolokathana. Oshi li ngawo molwaashoka omaukwatya ge gi ili nogi ili ohaga monika poompito dha yoolokathana.

Sha faathana, Omanyolo gOshihebeli otaga hokolola Jehova e li ‘Kalunga omunamutimahenda, omunalukeno nomutalanteni, ihaa geye mbala noku udha esilohenda nuudhiginini.’ Natango otatu ilongo kombinga ye kutya ‘ite etha okugeela omayono.’ (Eksodus 34:6, 7) Omaukwatya ngoka otaga holola eityo lyedhina lyaKalunga. Edhina “Jehova” otali ti lelalela kutya “Oha ningitha.” Shika otashi ti kutya Kalunga oha vulu okuninga shoka sha pumbiwa opo a gwanithe omauvaneko ge. (Eksodus 3:13-15) Ihe iha lunduluka. Jesus okwa ti: “Omuwa Kalunga ketu oye awike Omuwa.”—Markus 12:29.

Mbela Omanyolo gOshihebeli oga pingenwa po?

Oshi li sha ha kunena okumona omambo taga pingenwa po uuna pwa monika uuyelele uupe nenge uuna edhiladhilo ndyoka lya li li holike tali lunduluka. Mbela Omanyolo gOshigreka nago oga pingena po Omanyolo gopaKriste gOshihebeli? Aawe.

Andola Jesus okwa li e na edhiladhilo kutya ondjokonona yuukalele we nosho wo shoka sha nyolwa kaalongwa ye otayi ka pingena po Omanyolo gOshihebeli, nopwaahe na omalimbililo ando okwe shi popya. Ihe shi na ko nasha naJesus omanga inaa londa megulu, ehokololo muLukas 24:27 otali ti: ‘Opo Jesus okwa fatululile aalongwa ye yaali shoka sha tiwa kombinga ye mOmanyolo agehe okutameka momambo gaMoses sigo omomambo agehe gaahunganeki [mOmanyolo gOshihebeli].’ Konima yaashono, Jesus okwa li a holokele aayapostoli ye aadhiginini naantu yalwe. Ehokololo otali tsikile tali ti: “Oye okwa ti kuyo: ‘Iinima mbika oyo tuu mbyoka nde mú lombwelele, sho nda li pune, nda ti: Ayihe mbyoka ya nyolwa mompango yaMoses tayi popi ndje nenge momanyolo gaahunganeki nenge momapisalomi, oyi na okugwanithwa.’” (Lukas 24:27, 44) Omolwashike Jesus a li ta longitha natango Omanyolo gOshihebeli pehulilo lyuukalele we kombanda yevi andola oga li kaage na we oshilonga?

Konima sho egongalo lyopaKriste lya li lya totwa po, aalanduli yaJesus oya li ya tsikile nokulongitha Omanyolo gOshihebeli okutsa omuthindo omahunganeko ngoka ga li inaaga gwanithwa natango. Oye ga longitha okutsa omuthindo omakotampango ngoka ga li ga longo aantu iiyilongomwa yi na ongushu okuza mOmpango ndjoka ya li ya pewa Moses noya li wo ye ga longitha okuladhipika Aakriste ya kale aadhiginini moku ya hokololela iiholelwa iiwanawa yaapiya yaKalunga yonale. (Iilonga 2:16-21; 1 Aakorinto 9:9, 10; Aahebeli 11:1–12:1) Omuyapostoli Paulus okwa nyola a ti: ‘Enyolo kehe olya nyolithwa kombepo yaKalunga noli na oshilonga.’b (2 Timoteus 3:16) Oshike tashi ulike kutya Omanyolo gOshihebeli oge na oshilonga kunena?

Omayele gonkalamwenyo yakehe esiku

Tala kuupyakadhi wokunena wokatongotongo kopamihoko. Omulumentu gwoomvula 21 Omuetiopia ngoka e li moshilando shimwe shi li mUuzilo waEuropa okwa ti: “Ngele otwa hala tu ye pehala lyontumba, otu na okuya tu li ongundu, molwaashoka ngele tu li ongundu otashi vulika itaaye ke tu ponokela.” Okwa gwedha ko a ti: “Ihatu ende we ngele ohamano yokomatango ya dhenge, unene tuu momashina gokolutenda ngoka hage ende kohi yevi. Uuna aantu taye tu tala, ohaya tala owala kolwaala lwoshipa shetu.” Mbela Omanyolo gOshihebeli otaga popi sha kombinga yuupyakadhi mbuka wa kwata miiti?

Aaisraeli yonale oya li ya lombwelwa taku ti: “Inamu hepeka aakwiilongo mboka ya kala mevi lyeni. Kaleni nayo, ngaashi mu li nOmuisraeli omukweni. Kaleni mu ya hole, ngaashi mu ihole ne yene. Dhimbulukweni kutya ne omwa li aakwiilongo muEgipiti.” (Levitikus 19:33, 34) Odhoshili kutya muIsraeli shonale ompango ndjoka oya li tayi pula aatembukilimo nenge “aakwiilongo” ya kale taya simanekwa notayi adhika mOmanyolo gOshihebeli. Mbela ito shi zimine kutya omakotampango ngoka ge li mompango ndjika otaga vulu okukandula po uupyakadhi wokatongotongo kopamihoko mboka wu li po kunena?

Nonando Omanyolo gOshihebeli itaga gandja omayele mukehe okanima nkene omuntu e na okulongitha iimaliwa ye, mugo omu na omayele taga longo gankene yi na okulongithwa noondunge. Pashiholelwa, mOmayeletumbulo 22:7 otatu lesha mo taku ti: ‘Omunangunga ota ningi omupika gwomulilwangunga.’ Aagandjimayele oyendji kombinga yiimaliwa oye shi zimina kutya okulanda moondjo shaahe li pandunge otaku vulu okuhanagula po eliko lyoye.

Kakele kaashono, okulalakanena uuyamba nopwaahe na okutala iilanduliko, hoka ku li apuhe muuyuni mbuka waantu ye hole eliko, okwa li kwa hokololwa nawa kugumwe gwomaalumentu aayamba lela mondjokonona, omukwaniilwa Salomo. Okwa nyola a ti: “Nakuhola iimaliwa ihe yi kuta, nanakuhola uuyamba iha gwana. Naashika owaleelela.” (Omuuvithi 5:10) Kali shi tuu ekumagidho li li pandunge!

Etegameno lyonakuyiwa

Ombiimbeli ayihe oyi na owala enenedhiladhilo limwe alike tali ti: Uukwaniilwa kohi yewiliko lyaJesus Kristus owo tau ka longithwa okuyukipalitha uunamapangelo waKalunga nokuyapulitha edhina lye.—Daniel 2:44; Ehololo 11:15.

MOmanyolo gOshihebeli, otatu ilongo mo uuyelele wu na ko nasha nonkalamwenyo kohi yUukwaniilwa waKalunga ndjoka tayi tu hekeleke notayi tu hedhitha popepi naJehova Kalunga, ngoka oye Onzo yehekeleko ndika. Pashiholelwa, omupolofeti Jesaja okwa hunganeke kutya otapu ka kala ombili pokati kaantu niinamwenyo, sho a nyola ta ti: “Embungu otali ka kala pamwe nokanzi, nongwe tayi kala ya lala pokakombwena. Okatana nokankoshona otau napele pamwe, nokamati okashona take u litha.” (Jesaja 11:6-8) Kali shi tuu etegameno ewanawa!

Mbela Omanyolo gOshihebeli otaga ti ngiini kombinga yaambono haya ningilwa iinima iiwinayi ngaashi okatongotongo kopamihoko nenge ye na uuwehame wa kwata miiti nenge ye li moonkalo dhopamahupilo itaadhi ende nawa? Omahunganeko ngoka ge li mo otaga popi kombinga yaKristus Jesus taga ti: “Ota hupitha ohepele ngo te mu lilile, omuthiminikwa ngo kee na ngo te mu kwatha. Ota sile oshimbembe nohepele olukeno note ya hupitha meso.” (Episalomi 72:12, 13) Omauvaneko ngoka oge na oshilonga molwaashoka otaga kwathele mboka yi itaala mugo ya kale ye na etegameno neinekelo monakuyiwa.—Aahebeli 11:6.

Itashi kumitha sho omuyapostoli Paulus a nwethwa mo a nyole ta ti: ‘Ashihe shoka sha nyolwa mOmanyolo, osha nyolwa, shi tu longe, opo tu kale tu na etegameno tali zi mokwiidhidhimika notu mone omukumo, ngele tatu lesha oohapu dhaKalunga.’ (Aaroma 15:4) Eeno, Omanyolo gOshihebeli oge li natango oshitopolwa sha simana shOohapu dhaKalunga dha nwethwa mo, Ombiimbeli. Natango oge na lela ongushu kutse kunena. Otu na einekelo kutya oto ka kambadhala okwiilonga oshindji kombinga yomalongo gashili gomOmbiimbeli ayihe nokuhedha popepi nOmunyoli gwayo, Jehova Kalunga.—Episalomi 119:111, 112.

[Omanyolo gopevi]

[Oshimpungu pepandja 6]

MBELA ETESTAMENDI EKULU NENGE OMANYOLO GOSHIHEBELI?

Uutumbulilo ‘Etestamendi Ekulu’ otau adhika mAakorinto aatiyali 3:14 mOmbiimbeli yOshindonga yomo 1954. Menyolo ndika oshitya ‘etestamendi’ oshi lile po oshitya shOshigreka di·a·theʹke. Ihe omatoloko ogendji omape, ngaashi Ombiimbeli yOshindonga yomo 1986, otayi toloka oshitya di·a·theʹke shi li ‘ehangano’ pehala lyokulongitha ‘etestamendi.’ Omolwashike?

Omunyoli gwembwiitya Edward Robinson okwa ti: “Molwaashoka ehangano ekulu oli li momambo gaMoses, [di·a·theʹke] oshi lile po embo lyehangano, omanyolo gaMoses, sha hala okutya, ompango.” MAakorinto aatiyali 3:14, omuyapostoli Paulus okwa li ta popi Ompango yaMoses, ndjoka oyo owala ya li oshitopolwa shOmanyolo ngoka ga tetekele Uukriste.

Ano mbela oshitya shini sho opalela okwiithanwa omambo 39 gopetameko gOmbiimbeli Ondjapuki? Pehala lyokutya oshitopolwa shika shOmbiimbeli itashi longo we nenge osha kulupa, Jesus Kristus naalanduli ye oya li ya popi kutya omambo ngoka oge li ‘Omanyolo’ nosho wo ‘Omanyolo omayapuki.’ (Mateus 21:42; Aaroma 1:2) Onkee ano, metsokumwe noohapu ndhika dha nwethwa mo, Oonzapo dhaJehova ohadhi ithana Etestamendi Ekulu kutya olyo Omanyolo gOshihebeli molwaashoka oshitopolwa shoka shOmbiimbeli petameko osha li sha nyolwa unene tuu mOshihebeli. Sha faathana, shoka haku tiwa aniwa Etestamendi Epe ohadhi li ithana Omanyolo gOshigreka, molwaashoka elaka lyOshigreka olyo lya li lya longithwa kaalumentu mboka ya li ya nwethwa mo kuKalunga okunyola oshitopolwa shoka shOmbiimbeli.

[Omathano pepandja 4]

Omulumentu otashi vulika a kale a tseyika kutya oku li omupanguli ha pangula a kwata miiti, tate omunahole nosho wo kuume omwaanawa

[Ethano pepandja 5]

Jesus okwa li a longitha Omanyolo gOshihebeli muukalele we auhe

[Omathano pepandja 7]

Mbela omakotampango gOmbiimbeli geni taga vulu okukwathela omuntu a ninge omatokolo ge li mondjila?