Omupangeli omuyamba okwa li a ningi etokolo kaali li pandunge

OMUPANGELI omugundjuka omuyamba okwa li e hole okulonga uuwanawa, ha vulika kompango noku li omulongelikalunga. Okwa li e ya kuJesus nokwa tsu oongolo koshipala she e te mu pula a ti: “Muhongi, nandi longe uuwanawa washike, ndi mone omwenyo gwaaluhe?”

Jesus okwe mu yamukula kutya opo a mone omwenyo gwaaluhe okwa pumbwa okugwanitha po iipango yaKalunga. Sho a pula Jesus e yi mu lombwele kutya oyini po, Jesus okwa ti: “‘Ino dhipaga’, ‘Ino hondela,’ ‘Ino yaka,’ ‘Ino lundila,’ ‘Simaneka ho nanyoko,’ ‘Hola mukweni ngaashi ngoye wi ihole mwene.’” Mbyoka oyo ya li iipango ya simanenena mOmpango ndjoka ya li ya pewa Moses. Opo nduno omulumentu okwa ti kuye: “Ayihe mbika onde yi gwanitha. Oshike nde shi pumbwa natango?”—Mateus 19:16-20.

Jesus okwe mu “tala nohole” e ta ti kuye: “Owa pumbwa oshinima shimwe: Inda, u ka landithe po iinima yoye ayihe, iimaliwa e to yi pe oohepele, ngoye e to kala u na eliko megulu. Ila ihe, u landule ndje.”—Markus 10:17-21.

Omupangeli omugundjuka okwa li e na okuninga etokolo lya kwata miiti inee shi tegelela. Okwa li ta ka ninga shike? Mbela okwa li ta ka kala e na ehalo okugandja po eliko lye e ta landula Jesus, nenge okwa li ta ka kala naashoka e na? Mbela ota ka lalakanena eliko lyokombanda yevi nenge olyomegulu? Osha li etokolo edhigu kuye. Osha yela kutya okwa li e hole iinima yopambepo, molwaashoka okwa li ha gwanitha po Ompango nokwa li a pula kutya oshike ishewe e na okuninga opo a kale a hokiwa kuKalunga. Okwa li a tokola okuninga po shike? Okwa “zi po a nika oluhodhi, oshoka okwa li e na eliko olindji.”—Markus 10:22.

Etokolo lyomupangeli omugundjuka kalya li pandunge. Ando okwa ningile omulanduli gwaJesus omudhiginini, ando okwa mono shoka a li ta kongo, sha hala kutya, omwenyo gwaaluhe. Inatu lombwelwa shoka sha li sha ningilwa omulumentu nguka omugundjuka. Shoka tu shi osho owala kutya konima yoomvula 40 lwaampono, etangakwiita lyaRoma olya li lya hanagula po Jerusalem nosho wo oshitopolwa oshinene shaJudea. Aajuda oyendji oya li ya kanitha omaliko gawo nosho wo oomwenyo dhawo.

Mepingathano nomupangeli ngoka omugundjuka, omuyapostoli Petrus naalongwa yalwe oya li ya ningi etokolo lyopandunge. Oya li ya ‘thigi po iinima ayihe’ e taya landula Jesus. Etokolo ndyono kalya li tuu lye ya kwathela! Jesus okwa li e ya lombwele kutya otaya ka mona lwethele shi vulithe pwaambyoka ya thiga po. Kakele kaashono, otaya ka pewa omwenyo gwaaluhe. Oya li ya ningi etokolo ndyoka konima yethimbo inaaye ki ipa uusama omolwalyo.—Mateus 19:27-29.