Jehova ohe tu xupifa momalulo omuteli weemwiyo

“[Jehova ote] ku xupifa melulo lomuteli womwiyo.” — EPSALME 91:3.

1. Olyelye ‘omuteli womwiyo,’ nomolwashike a nyika oshiponga?

OVAKRISTE vashili aveshe ohava kondjifa omutondi omunaenghono nomunamakoto. Omutondi oo okwa popiwa mEpsalme 91:3 kutya oku li ‘omuteli womwiyo.’ Omutondi oo oye lyelye? Okudja muJuni 1883, Oshungonangelo oya kala tai yelifa kutya omutondi oo oSatana Ondiaboli. Omutondi oo omunaenghono oha kendabala okupukifa nokuyula ovapiya vaJehova ta longifa oinheya, ngaashi naanaa omuteli woudila ha ningi.

2. Omolwashike Satana a faafanifwa nomuteli womwiyo?

² Pefimbo lOmbibeli, ovanhu ova li hava kwata oudila molwaashi hava imbi nawa ile molwewapalo lavo ile nelalakano lokulya nosho yo okuninga omayambo. Ndele nande ongaho, oudila ova lungudja novambada paushitwe, noshidjuu oku va yula. Onghee hano, omuyuli woudila okwa li ha konakona nawa tete omaukwatya nosho yo oikala youdila ovo a li ha kala a hala okuyula, opo nee ta longifa omakoto e va yule. Ombibeli oya faafanifa Satana nomuteli woudila, naasho otashi tu kwafele tu shiive nawa eenghedi odo ha longifa. Ondiaboli ohai tu konakona pauhandimwe opo nee tai shiiva oikala nosho yo omaukwatya etu nohai tu tele eemwiyo meholeko opo i tu yule. (2 Timoteus 2:26) Ngeenge oye tu yulu otashi ka nyona po ekwatafano letu naKalunga naasho otashi dulu oku tu ningifa tu ka hanaunwe po. Nomolwaasho otwa pumbwa okushiiva omakonda e lili noku lili ‘omuteli womwiyo’ oo opo tu kale twa amenwa.

3, 4. Satana oha ponokele ngahelipi ngaashi onghoshi ile onhoka?

³ Omupsalme okwa longifa efaneko la twa mokufaafanifa omakonda aSatana naao onghoshona ile onhoka. (Epsalme 91:13) Ngaashi onghoshi, omafimbo amwe Satana oha ponokele oshiwana shaJehova monghedi ya yukilila okupitila momayeleko ile a ningife omapangelo a shilike oilonga yasho. (Epsalme 94:20) Omaponokelo onyanya a tya ngaho otaa dulu okuningifa vamwe va efe po okulongela Jehova. Ndele luhapu omaponokelo a tya ngaho ihaa pondola nohaa hanganifa oshiwana shaKalunga. Ndele mbela ongahelipi shi na sha nomaponokelo aSatana a fa onhoka oo haa ningwa monanguwi?

⁴ Ngaashi eyoka loudiyo, Ondiaboli ohai longifa eenghedi domonanguwi opo i ponokele nonyanya oshiwana shaKalunga. Monghedi oyo, oya pondola okunyateka omadiladilo ovapiya vaKalunga vamwe, moku va pukifa va kale tava longo ehalo layo ponhele yokulonga ehalo laKalunga, naasho ohashi etifa oilanduliko i nyikifa oluhodi. Ndele nande ongaho, omakoto aye otu a shii. (2 Ovakorinto 2:11) Natu ka konakoneni eenghedi nhee da nyika oshiponga odo Satana ha longifa okuyula ovanhu, ngaashi odo hadi longifwa ‘komuteli womwiyo.’

Satana oha longifa oumbada wokutila ovanhu

5. Omolwashike omwiyo woumbada ‘wokutila ovanhu’ hau pondola neenghono?

⁵ ‘Omuteli womwiyo’ oku shii kutya ovanhu ohava kala va hala okukala va tambulwa ko nova hokiwa kovanhu vakwao. Ovakriste ove na ko nasha nomadiladilo nosho yo omaliudo avamwe. Molwaashi Ondiaboli oi shii onghalo ya tya ngaho, oya hala okulongifa okunakonasha kwavo opo va kale tave lipula kutya ovanhu vakwao ohave va tale ko ngahelipi. Pashihopaenenwa, ohai yulu ovapiya vaKalunga vamwe moku va ningifa va kale ve na oumbada ‘wokutila ovanhu.’ (Omayeletumbulo 29:25) Ngeenge ovapiya vaKalunga ova dopa okuninga osho Eendjovo daye tadi ti ile va hopaenene vamwe mokulonga owii molwaashi ve va tila, osha yela kutya ova yulwa ‘komuteli womwiyo.’ — Hesekiel 33:8; Jakob 4:17.

6. Oshihopaenenwa shilipi tashi ulike kutya oshi na oupu ovanyasha va yulwe ‘komuteli womwiyo’?

⁶ Pashihopaenenwa, omunyasha wonhumba otashi dulika e liyandje komafininiko ovanafikola vakwao ndele ta shili omakaya. Otashi dulika omunyasha a tya ngaho ka li nande a diladila okushila omakaya efiku olo e shi a ya kofikola. Ndele ombadilila okwa ninga oshinima osho tashi nyono po oukolele waye notashi nyemateke Kalunga. (2 Ovakorinto 7:1) Osha enda ngahelipi opo a kokelwe monghalo ya tya ngaho? Otashi dulika a endafana nookaume vai nokwa li a tila va kale ve mu tonde. Ovanyasha, inamu efa nande ‘omuteli womwiyo’ e mu koke noku mu yula! Opo muha yulwe, inamu liyandja nandenande nokuli nomoinima inini. Dulikeni kelondwelo lOmbibeli li na sha nokuhenuka ookaume vai. — 1 Ovakorinto 15:33.

7. Ongahelipi Satana ta dulu okukanififa ovadali vamwe ondjele yavo yopamhepo?

⁷ Ovadali Ovakriste ove shii nawa oshinakuwanifwa shavo shopamishangwa shi na sha nokufila oshisho omaukwaneumbo avo palutu. (1 Timoteus 5:8) Ndele nande ongaho, Satana okwa hala okuningifa Ovakriste va kale tava yandje unene elitulemo kokufila oshisho eemhumbwe davo dopalutu. Otashi dulika Ovakriste vamwe va kale ve na ondjikilile yokufaula okwoongala molwaashi ove liyandja komafininiko ovayandji voilonga yavo opo va longe olutaima. Otashi dulika va kale va tila okupula efudo koilonga opo va ka kale poshoongalele shoshitukulwa omafiku aeshe atatu, va ka longele Jehova pamwe novamwaxe. Ndele opo ve liamene komwiyo wa tya ngaho, ove na ‘okulineekela Omwene.’ (Omayeletumbulo 3:5, 6) Natango, okudimbulukwa kutya atusheni otu li ovashitwa vaJehova nonokutya ote ke tu fila oshisho otashi tu kwafele tu kale tu na ondjele. Ovadali, mbela omwa itavela ngoo kutya Jehova ote ke mu fila oshisho pamwe nomaukwaneumbo eni monghedi yonhumba ile yongadi ngeenge otamu longo ehalo laye? Ile otamu ka yulwa kOndiaboli opo i mu ningife mu kale tamu longo ehalo layo molwaashi mwa tila ovanhu? Ohatu mu ladipike mu dilonge komapulo oo pamwe neilikano.

Satana oha longifa ohole yokuhola omaliko

8. Omonghedi ilipi Ovakriste vamwe tava dulu okukwatwa kohole yokuhola omaliko?

⁸ Omwiyo umwe vali oo Satana ha longifa opo e tu yule oo ohole yokuhola omaliko. Onghalelo yeengeshefa younyuni ou luhapu ohai xwaxwameke eemhangela di na sha nokulimonena oimaliwa mefimbo lixupi, odo tadi dulu okuyula vamwe vomovapiya vaKalunga. Omafimbo amwe, ovanhu vamwe otashi dulika va ladipikwe taku ti: “Longa noudiinini. Ngeenge owa ongele oimaliwa ihapu, oto ka kala to longo ngaashi wa hala nokuhafela onghalamwenyo. Oto dulu nokuli okukokola ondjila.” Ovakriste vamwe meongalo otashi dulika va ladipikile vakwao oinima ya tya ngaho ihe li pandunge molwaashi va hala okuxupila muvo. Diladila shi na sha nomunhu te liongelele oimaliwa ihapu opo a ka kale e na onghalamwenyo iwa komesho. Mbela osho itashi ulike oikala ya fa yoshipuna “elai” shomeyele laJesus? — Lukas 12:16-21.

9. Omolwashike Ovakriste vamwe tashi dulika va yulwe komwiyo wokukala va hala oinima yopamaliko?

⁹ Satana ota longifa onghalelo yaye yoinima youkolokoshi opo a nwefe mo ovanhu va kale va hala oinima yopamaliko. Ehalo la tya ngaho otali dulu okukuma nai onghalamwenyo yOmukriste, tali ka fininika eendjovo noku di ninga “oifete.” (Markus 4:19) Ombibeli otai tu ladipike tu kale twa wanenwa koipalwifa nokoikutu. (1 Timoteus 6:8) Ndele vahapu ohava yulwa ‘komuteli womwiyo’ molwaashi ihava tula moilonga omayele oo pauhandimwe. Mbela ounhwa oo hau va ningifa va kale va hala okukala nonghedi yokukalamwenyo yonhumba? Ongahelipi shi na sha nafye pauhandimwe? Mbela okukala twa hala oiniwe ohaku tu imbi okupitifa komesho oinima i na sha nelongelokalunga lashili? (Haggai 1:2-8) Shi nyikifa oluhodi, ngeenge pe na oudjuu wopamaxupilo, vamwe ohava yambe po oupamhepo wavo opo va kale nonghalamwenyo youdjeko, naasho ohashi hafifa ‘omuteli womwiyo.’

Satana oha longifa omalihafifo inaa koshoka

10. Omukriste keshe oku na okulipula epulo lilipi?

¹⁰ ‘Omuteli womwiyo’ oha longifa ekonda opo a nyone po eliudo lovanhu lopaushitwe li na sha naasho shiwa ile osho shii. Oikala ya fa oyo ya li muSodom naGomorra otai dana onghandangala kunena meengeshefa di na sha nomalihafifo. Nokuli noifo nosho yo eenghundana doko-TV ohai ulike elongifo leenghono nohai xwaxwameke omilele inadi koshoka. Oinima ihapu i na sha nomalihafifo oyo hai ulikwa moikundaneki ohai imbi ovanhu va dule “okutongola ouwa nowii.” (Ovaheberi 5:14) Ndele dimbuluka eendjovo daJehova odo a popya okupitila momuprofeti Jesaja a ti: “Woo ava, tava ti: Owii oo ouwa, nouwa oo owii.” (Jesaja 5:20) Mbela ‘omuteli womwiyo’ okwa nwefa mo nekonda okudiladila kwoye nomalihafifo inaa koshoka a tya ngaho? Osha fimanenena okulikonakona pauhandimwe. — 2 Ovakorinto 13:5.

11. Oshungonangelo oya yandja elondwelo lilipi shi na sha neeprograma doihole (eesopi)?

¹¹ Omido 25 lwaapo da pita, Oshungonangelo oya li ya londwela pahole ovalongelikalunga vashili shi na sha nokutala eeprograma doko-TV odo hadi ulikwa tadi twikile.a Pashihopaenenwa, Oshungonangelo imwe oya li ya ulika kunghee eeprograma doihole (eesopi) hadi dulu okuyula ovanhu, ya ti: “Ovanhu ohava yukipalifa elihumbato keshe omolwoihole. Pashihopaenenwa, moprograma imwe omunyasha umwe oo a mita okwa lombwela kaume kaye a ti: ‘Ondi hole Victor. Nghi na ko nasha. . . . Shimha ashike ndi na okaana kaye!’ Omusika iwa oyo hai kala tai danwa moprograma oyo ohai ningifa ovanhu vaha didilike mo kutya okakadona oko kake na eenghedi diwa. Ovo hava tale oprograma oyo navo ove hole Victor nohava kala ve uditile okakadona oko olukeno. Ohava kala va hokwa elihumbato laavo ve li moprograma. Omukainhu umwe oo a li ha tale eeprograma doihole ndele te di efa po okwa ti: ‘Oshikumwifa nghee omunhu ta dulu okuyukipalifa okudiladila kwaye. Otu shi shii kutya oluhaelo oshinima shii. . . . Ndele onde ke shi mona mo kutya onda li handi kufa ombinga moshinima sha tya ngaho pamadiladilo.’ ”

12. Omolwashike sha yuka okudulika kelondwelo li na sha nokutala eeprograma donhumba do-TV kunena?

¹² Okudja eshi oitukulwa oyo ya kala tai nyanyangidwa, eeprograma odo tadi dulu okunwefa mo nai omitima dovanhu oda hapupala neenghono. Moilongo ihapu, eeprograma da tya ngaho ohadi ulikwa eevili 24, efiku keshe. Ovalumenhu, ovakainhu nosho yo ovanyasha vahapu vomido omulongo nasha ohava yadifa luhapu omadiladilo nomitima davo nomalihafifo a tya ngaho. Ndele fye katu na nandenande okulifufya nokutomhafana kwoipupulu. Otashi ka kala shihe li pandunge okutomhafana kutya omalihafifo inaa koshoka a tya ngaho oo haa ulikwa meeprograma do-TV oku li xwepo e dule oinima oyo tu wete tai ningwa lelalela. Mbela Omukriste ota dulu ngoo shili okuhoolola okuhafifwa kovanhu ovo itaka shiva nande efiku limwe keumbo laye?

13, 14. Vamwe ova ti ngahelipi kombinga youwa oo va mona melondwelo li na sha nokutala o-TV?

¹³ Vahapu ova li va mona ouwa eshi va li va tula moilonga elondwelo olo la li la yandjwa ‘komupiya omudiinini nomunaendunge.’ (Mateus 24:45-47) Vamwe ova li va shangela kehangano eshi va lesha omayele a yukilila nokwe likolelela kOmbibeli, va popya nghee oitukulwa oyo ye va kwafela pauhandimwe.b Umwe okwa li a popya a ti: “Onda kala nda pikwa kokutala eeprograma doihole oule womido 13. Onda li handi diladila kutya oupamhepo wange otau ka kala u li nawa shimha ashike handi i kokwoongala kwopaKriste nokukala handi kufa ombinga moilonga yomomapya omalufe. Ndele onda li nda tambula ko oikala younyuni oyo handi mono meesopi kutya ngeenge omushamane woye ohe ku ningi nai ile u wete ehe ku hole, owa manguluka okuya moluhaelo, molwaashi omushamane oye e na ondjo. Opo nee eshi nda li ndi udite kutya onda manguluka okuninga ngaho, onda li nda ya moluhaelo ndele handi nyono kuJehova nosho yo kukaume kange kopahombo.” Omukainhu oo okwa li a kondwa mo meongalo lopaKriste, nokonima yefimbo okwa ka dimina kutya okwa ninga epuko, ndele te livele ombedi nokwa li a alulilwa meongalo. Oitukulwa oyo ya li tai londwele shi na sha neesopi oya li ye mu kwafela a efe po okukala te lihafifa noinima oyo Jehova e tonde. — Amos 5:14, 15.

¹⁴ Omuleshi umwe oo a li a kumwa keeprograma odo okwa ti: “Okwa li handi kala handi kwena ngeenge nda li handi lesha oitukulwa oyo, molwaashi onda li nda didilika kutya kanda li handi longele Jehova nomutima aushe. Onda li nda udanekela Jehova kutya itandi ka tala vali nandenande eeprograma odo.” Omukainhu umwe Omukriste oo a li a pikwa kokutala eeprograma odo okwa li a ulika olupandu laye shi na sha noitukulwa oyo a ti: “Onda li handi lipula . . . ngeenge ekwatafano lange naJehova inali nyonwa po. Ongahelipi handi dulu okukala noukaume novanhu ovo hava dana eesopi nopefimbo opo tuu opo ondi li kaume kaJehova?” Ngeenge eeprograma do-TV da tya ngaho oda li da nwefa mo nai omitima dovanhu omido omilongo 25 da pita, mbela kunena itadi dulu okunwefa mo ovanhu neenghono? (2 Timoteus 3:13) Otu na okukala twa lungama omwiyo waSatana womalihafifo inaa koshoka oludi keshe, kutya nee pamwe eesopi odo hadi ulikwa ko-TV, oudano weevidio u na sha nelongifo leenghono ile ouvidio veemusika da nyata.

Satana oha longifa okuhaudafana

15. Ovanhu vamwe ova yulwa ngahelipi komwiyo wOndiaboli?

¹⁵ Satana oha longifa okuhaudafana ku li omwiyo opo a ete etukauko mokati koshiwana shaJehova. Ohatu dulu okuyulwa komwiyo wa tya ngaho, ka shi na nee mbudi kutya otu na omaufembanghenda elipi moilonga yaJehova. Vamwe ova yulwa kOndiaboli molwaashi ova efa okuhaudafana ku nyone po ombili noukumwe oo u li mokati koshiwana shaJehova. — Epsalme 133:1-3.

16. Satana okwa kala ta kendabala ngahelipi nekonda okunyona po oukumwe woshiwana shaJehova?

¹⁶ Pefimbo lOita yotete yOunyuni, Satana okwa li ta kendabala okuxulifa po oshitukulwa shehangano laJehova shokombada yedu mokuninga omaponokelo a yukilila ndele ina pondola. (Ehololo 11:7-13) Okudja opo, okwa kala ta kendabala monghedi yekonda okunyona po oukumwe wetu. Ngeenge otwa efa okuhaudafana ku nyone po oukumwe wetu, kungaho otwa yulwa ‘komuteli womwiyo.’ Osho otashi ka imba omhepo iyapuki i kunguluke ya manguluka monghalamwenyo yetu nosho yo meongalo. Ngeenge osho osha ningwa, Satana ota ka kala a hafa, molwaashi ngeenge meongalo ka mu na ombili noukumwe oilonga yokuudifa itai ka xuma komesho. — Ovaefeso 4:27, 30-32.

17. Ovo ve na okuhaudafana pokati kavo ove na okuninga po shike opo ve ku kandule po?

¹⁷ Ou na okuninga po shike ngeenge pokati koye nOmukriste mukweni opa holoka okuhaudafana? Oshoshili kutya eenghalo ohadi kala da yoolokafana, ndele nonande ope na oinima ihapu oyo hai etifa omaupyakadi, osho inashi hala okutya okuhaudafana itaku dulu okukandulwa po. (Mateus 5:23, 24; 18:15-17) Omayele oo e li mEendjovo daKalunga okwa nwefwa mo nokwa wanenena, nongeenge okwa tulwa moilonga ohaa kwafa filufilu.

18. Omolwashike okuhopaenena Jehova taku tu kwafele tu pongolole po okuhaudafana?

¹⁸ Jehova oku “yadi ekufilo” noha ‘kufile po’ ovanhu. (Epsalme 86:5; 130:4) Ohatu ulike kutya otu li ovana vaye ovaholike ngeenge hatu mu hopaenene. (Ovaefeso 5:1) Atusheni ohatu nyono notwa pumbwa okudiminwa po kuJehova. Onghee hano, otu na okukala twa lungama ngeenge otu na oikala yokuhadimina po vamwe. Oshi na oupu tu kale tu na oikala ya fa yomupiya womeyele laJesus oo kwa li ina hala okudimina po omupiya mukwao eendjo odo da li dinini elela mokuyelekanifa naado omupiya oo a li a diminwa po komwene waye. Eshi omwene womupiya oo a li a uda shi na sha naasho, okwa li a tulifa omupiya oo modolongo. Jesus okwa li a xulifa eyele olo neendjovo tadi ti: “Osho yo Tate meulu te mu ningile, ngenge itamu dimine po okomitima deni keshe tuu omumwaina.” (Mateus 18:21-35) Okudilonga kombinga yeyele olo nosho yo shi na sha nanghee Jehova a kala te tu dimine po lwoikando nehalo liwa, otashi ke tu kwafela neenghono ngeenge hatu pongolola po okuhaudafana pokati ketu novamwatate. — Epsalme 19:15.

Kala “meameno laau wOkombadambada”

19, 20. Otu na okutala ko ngahelipi ‘eameno’ nosho yo ‘omudidimbe’ waJehova momafimbo aa a nyika oshiponga?

¹⁹ Otu li momafimbo a nyika oshiponga. Ngeno katwa li twa amenwa kuJehova pahole, ngeno Satana okwe tu hanauna po nale atusheni. Opo tu henuke okuyulwa ‘komuteli womwiyo,’ otu na okukala monhele yeameno yopafaneko, sha hala okutya, “meameno laau wOkombadambada” nokukala “momudidimbe wOmunaenghono adishe.” — Epsalme 91:1.

²⁰ Natu kale alushe tu shii kutya omadimbulukifo nosho yo ewiliko laJehova otai tu kwafele tu kale twa amenwa ndele itai tu ngabeke. Atusheni ohatu kondjifa omutondi omunamakoto. Nopehe na ekwafo laJehova lopahole, itatu ka dula okuhenuka eemwiyo daye. (Epsalme 124:7, 8) Onghee hano, natu ilikaneni opo Jehova e tu amene ‘komuteli womwiyo.’ — Mateus 6:13.

[Omashangelo opedu]

Oto dimbuluka?

• Omolwashike oumbada ‘wokutila ovanhu’ u li omwiyo wa nyika oshiponga?

• Ondiaboli ohai longifa ngahelipi eheka lohole yokuhola omaliko?

• Ongahelipi vamwe va yulwa komwiyo waSatana u na sha nomalihafifo inaa koshoka?

• Ondiaboli ohai longifa omwiyo ulipi opo i nyone po oukumwe wovapiya vaJehova?

[Efano pepandja 29]

Vamwe ova yulwa koumbada ‘wokutila ovanhu’

[Efano pepandja 30]

Mbela oho lihafifa noinima oyo Jehova e tonde?

[Efano pepandja 31]

Ou na okuninga po shike ngeenge pokati koye nOmukriste mukweni opa holoka okuhaudafana?