Mbela owu li etalaleko kuyalwe?
KUUMBUGANTU woondundu hadhi ithanwa Anti-Libanon oku na ondundu yaHermon yi na uule woometa 2 814 lwaampono kombanda yondjalo yefuta. Konyala uule womvula ayihe, ondungu yondundu yaHermon oya li hayi kala ya siikilwa kolumi nomolwaashoka ombepo yuusiku ya pupyala ohayi ningitha ku kale ku na omume. Omume oya li hayi gwile kombanda yomiti dhomisendeli nodhiiyimati ndhoka dhi li kiikulundundu nosho wo kiikokola yomiviinu mbyoka yi li pevi lyondundu. Pethimbo lyokwenye muIsraeli shonale, iimeno oya li hayi kokithwa unene tuu komume ndjoka ontalaleki.
Meimbilo lya nwethwa mo kuKalunga, uukumwe uutalaleki mokati kaalongeli yaJehova owa faathanithwa ‘nomume yokondundu Hermon tayi gwile kondundu Sioni.’ (Episalomi 133:1, 3) Ngaashi owala ondundu yaHermon tayi gandja omume ontalaleki kiimeno, natse otatu vulu okukala etalaleko kwaambono tatu tsakanene nayo. Ongiini tatu vulu oku shi ninga?
Oshiholelwa shaJesus tashi talaleke
Jesus Kristus okwa li a gumu aantu komitima. Nokuli nonando omuntu owa tsakanene naye paufupi ota vulu oku ku talaleka. Pashiholelwa, omunyoli gwEvaangeli Markus okwa ti: “[Jesus uunona] okwe u papata momaako ge nokwe u tenteke iikaha ye e te u yambeke.” (Markus 10:16) Kasha li tuu etalaleko kaanona mbono!
Muusiku we wahugunina kombanda yevi e li omuntu, Jesus okwa li a yogo oompadhi dhaalongwa ye. Eifupipiko lye olya li lya gumu omitima dhawo. Opo nduno Jesus okwa li e ya lombwele a ti: “Ongame nde mú pe oshiholelwa, opo mu ninge naanaa ngaashika nde mú ningile.” (Johannes 13:1-17) Eeno, nayo oya li ya pumbwa okwiifupipika. Aayapostoli kaya li yu uva ko mbala oohapu dhe ndhoka nokonima yethimbo uusiku owo tuu mboka oya li ya tameke okuludhika kutya olye gwomuyo omukuluntu e vule yakwawo. Nonando ongawo, Jesus ine ya geela. Pehala lyaashono, okwa li a tompathana nayo neidhidhimiko. (Lukas 22:24-27) Nokuli Jesus “ina tuka mboka ye mu tuku.” Odhoshili kutya “naasho a hepekwa, ina sa ondjahi, ihe okwi inekele Kalunga, omupanguli omuyuuki.” Oshiholelwa shaJesus tashi talaleke osha gwana okuholelwa.—1 Petrus 2:21, 23.
Jesus okwa ti: “Itsikeni ondjoko yandje, ne mu tseye ndje, oshoka ongame omunambili nomomutima ondi ishonopeka; notamu imonene evululuko.” (Mateus 11:29) Dhiladhila ando to longwa kuJesus ye mwene. Mboka ya za moshitopolwa shaandjawo konima sho ya li ye mu uvu ta longo aantu mosinagoga, oya li ya kumwa e taya ti: “Oondunge ndhika niilongankondo okwe yi adha peni?” (Mateus 13:54) Ngele tatu lesha kombinga yonkalamwenyo nuukalele waJesus otashi tu longo oshindji shi na ko nasha nokukala tu li etalaleko kuyalwe. Natu taleni nkene Jesus a tula po oshiholelwa sha dhenga mbanda mokupopya hoka taku tungu nosho wo mokukala ha kwathele yalwe.
Kala ho popi iinima mbyoka tayi tungu
Oshi li oshipu okuhanagula po etungo shi vulithe okutunga po limwe epe. Oshi li wo sha faathana shi na ko nasha nokupopya kwetu hoka taku vulu okutunga nenge taku vulu okuteya. Tu li aantu inaaya gwanenena, atuheni ohatu ningi omapuko notu na omaunkundi. Omukwaniilwa Salomo okwa ti: “Kombanda yevi kaku na omuyuuki ngoka ta longo uuwanawa auke ye ita yono.” (Omuuvithi 7:20) Oshi li oshipu okumona omapuko gagumwe noku mu ula omalaka ngoka tage mu ehameke omolwago. (Episalomi 64:2-4) Mepingathano naashoka, okukala hatu popi aluhe oohapu ndhoka tadhi tungu otashi pula oondunge.
Jesus okwa li ha popi oohapu tadhi tungu aantu. Okwa li e ya talaleke pambepo moku yu uvithila onkundana ombwanawa yUukwaniilwa. (Lukas 8:1) Jesus okwa li wo a talaleke mboka ya ningi aalongwa ye moku ya hololela He ngoka e li megulu. (Mateus 11:25-27) Onkee ano, itashi kumitha sho aantu ya li ye na ehalo okuya kuJesus.
Mepingathano naashoka, aalongimpango nAafarisayi kaya li ye na ko nasha noompumbwe dhayalwe. Jesus okwa ti: “Oyo oye hole pomahala gaakuluntu miituthi nokiipundi ya simana moosinagoga.” (Mateus 23:6) Odhoshili kutya, oya li ya dhina aantu yowala, nohaya popi taya ti: “Aantu mbaka inaa tseya ompango yaMoses, onkee oye li kohi yethingo lyaKalunga.” (Johannes 7:49) Iikala mbyoka kaya li nando tayi talaleke oomwenyo dhaantu.
Okupopya kwetu olundji ohaku ulike nkene tu li meni nonkene hatu tala ko yalwe. Jesus okwa ti: “Omuntu omwaanawa ota holola mompungulo ombwanawa yomutima gwe uuwanawa. Osho wo omuntu omwiinayi ota holola mo uuwinayi mompungulo ye ombwinayi. Oshoka shoka shu udhilila momutima, okana ohake shi piitha mo.” (Lukas 6:45) Otu na okuninga shike opo tu shilipaleke kutya okupopya kwetu otaku talaleke yalwe?
Oshinima shimwe shoka tatu vulu okuninga osho okukala hatu dhiladhila manga inaatu popya. Omayeletumbulo 15:28 (KB) otaga ti: “Omutima gwomuyuuki otagu dhiladhila shoka tagu shi yamukula.” Okudhiladhila hoka inaku pumbwa okuningwa ethimbo ele. Ngele tatu dhiladhila manga inaatu popya, otashi vulu oku tu kwathela okumona nkene aantu taye ki inyenga kwaashoka tatu popi. Otatu vulu okwiipula ngeyi: ‘Mbela shoka nda hala okupopya oshopahole? Mbela oshoshili nenge oluhoko owala? Oshi li mbela “oohapu dho opala pethimbo lyu uka”? Mbela otashi ka talaleka notashi ka tunga mboka tandi shi lombwele?’ (Omayeletumbulo 15:23) Ngele otwa mono kutya oohapu ndhoka itadhi tungu nenge kadhi li pethimbo, inatu dhi popya nando. Pehala lyaashono, mbela omolwashike itaatu dhi pingene po naashoka tashi tungu notashi opalele? Oohapu inaadhi dhiladhilwa otadhi “ulula ngegongamwele,” omanga oohapu tadhi tungu tadhi ‘aludha.’—Omayeletumbulo 12:18.
Oshinima shilwe shoka tashi kwathele osho okuukitha eitulomo kwaashoka tashi ningi ooitaali ooyakwetu ya kale ye na ongushu momeho gaKalunga. Jesus okwa ti: “Kaku na nando omuntu ta vulu okuya kungame, okuninga Tate, nguka a tuma ndje, te mu eta kungame.” (Johannes 6:44) Jehova oha mono omaukwatya omawanawa ngoka ge li mukehe omupiya gwe omudhiginini, nokuli nomwaamboka tu wete shi li oshidhigu okulongela kumwe nayo. Ngele tatu ningi oonkambadhala okumona omaukwatya gawo omawanawa, otatu ka kala tatu ya popile muuwanawa.
Kwathela yalwe
Jesus okwa li u uvu ko oonkalo oondhigu dhaathininikwa. Odhoshili kutya “sho a tala oongundu dhaantu, okwa li e ya uvitile ohenda, oshoka oya li ya hepekwa noya loloka ya fa oonzi dhaa na omusita.” (Mateus 9:36) Jesus ka li owala e ya tala nohenda, ihe okwa li a ningi po sha oku ya kwathela. Okwa li e ya hiya a ti: “Ileni kungame amuhe mwa vulwa nomwa humbatekwa uudhigu, ongame notandi mú pe evululuko.” Okwa li wo e ya shilipaleke a ti: “Ondjoko yandje ombwanawa nomutenge gwandje omupu.”—Mateus 11:28, 30.
Kunena otu li ‘momathimbo omadhigu.’ (2 Timoteus 3:1) Aantu oyendji oyu uvite ya thindilwa pevi ‘kiimpwiyu yuuyuni mbuka.’ (Mateus 13:22) Yalwe oya gwililwa po koonkalo dhiyemateka. (1 Aatessalonika 5:14) Ongiini tatu vulu okugandja etalaleko kwaambono ye li muudhigu? Ngaashi Kristus, otatu vulu oku ya pupalekela omitenge dhawo.
Aantu yamwe ohaya kongo ehekeleko mokupopya kombinga yomaudhigu gawo. Uuna mboka ya teka omukumo taye ya kutse opo tu ya kwathele, mbela ohatu pulakene kuyo neitulomo? Okupulakena nohenda otashi pula eipangelo mwene. Osha kwatela mo okugandja eitulomo kwaashono omuntu ta popi, pehala lyokwiipula nankene to ka yamukula nenge nkene uupyakadhi we tawu ka kandulwa po. Otatu ulike kutya otu na ko nasha naye ngele tatu pulakene kuye neitulomo, tatu mu tala nokwiimemeha ngele tashi opalele.
Megongalo lyopaKriste omu na oompito odhindji okutsa omukumo ooitaali ooyakwetu. Pashiholelwa, uuna tu li pokugongala pOshinyanga shUukwaniilwa, otatu vulu okudhimbulula mo mboka kaaye na uukolele. Omathimbo gamwe otashi pula owala ominute omishona oku ya tunga noohapu dhetsomukumo manga okugongala inaaku tameka nenge konima yako. Otatu vulu wo okudhimbulula mo mboka inaaya holoka pEkonakono lyEmbo lyEgongalo noku ya dhengela ongodhi, tatu ya lombwele kutya otu na ko nasha nonkalonawa yawo noku ya pula ngele oya pumbwa ekwatho.—Aafilippi 2:4.
Aakuluntugongalo Aakriste oya humbata omutengi omudhigu gwiinakugwanithwa megongalo. Otatu vulu okuninga oshindji okupupaleka omutengi gwawo mokulongela kumwe nayo nokugwanitha po neifupipiko oshilonga kehe shono taye tu pe. Oohapu dhaKalunga otadhi tu ladhipike tadhi ti: “Vulikeni kaawiliki yeni, [ne] mu landule omalombwelo gawo. Oyo ohaa tonatele oomwenyo dheni yaa na evululuko, oshoka otaa ke dhi pulwa kuKalunga. Ngele otamu vulika, nena otaa longo iilonga yawo nenyanyu, ihe ngele hasho, nena otaa longo neyeme, naashika itashi mú kwatha sha.” (Aahebeli 13:17) Ngele tatu longo nehalo ewawana, otatu ka kala etalaleko kumboka ye li “aadhiginini mokulela egongalo.”—1 Timoteus 5:17, OB-1954.
Kaleni aluhe nokupopya oohapu tadhi tungu nokulonga iilonga tayi kwatha
Omume ontalaleki ohayi gu molupe lwuuta womeya uushona noonkondo wu li omayovi mboka ihaawu vulu okumonika mpoka tawu zi. Sha faathana, okutalaleka yalwe ihaku zi mokuningila owala yalwe oshinima shimwe oshiwanawa, ihe ohaku zi mokukala hatu ulike omaukwatya gopaKriste ethimbo kehe.
Omuyapostoli Paulus okwa nyola a ti: ‘Kaleni mu na ohole yuumwayinathana, ne mu lalakanene okusimanekathana.’ (Aaroma 12:10) Natu tuleni miilonga omayele gaPaulus. Natu kaleni hatu talaleke yalwe mokupopya kwetu nomiilonga yetu.
[Omathano pepandja 31]
Okupulakena nohenda otaku talaleke yalwe
[Ethano pepandja 32]
Omume ontalaleki yokondundu Hermon oya li hayi kokitha iimeno