Nkene eso lyaJesus tali vulu oku ku hupitha

OOMVULA 2 000 lwaampono dha piti, pOpaasa yOshijuda yomo 33 E.N., omulumentu kee na ondjo okwa li a dhipagwa opo aantu ya vule okukala nomwenyo. Omulumentu ngoka okwa li lye? Okwa li Jesus Omunasaret. Oolye taya mono uuwanawa moshinima shoka oshiwanawa? Aantu ayehe. Ovelise ya tseyika nawa yOmbiimbeli otayi ngongo eyambo ndyoka tali hupitha oomwenyo tayi ti: “Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.”—Johannes 3:16.

Nonando oyendji oya tseya enyolo ndyoka, aashona yowala ye uvite ko eityo lyalyo. Ohayi ipula taya ti: ‘Omolwashike twa pumbwa eyambo lyaKristus? Ongiini eso lyomulumentu gumwe tali vulu okuhupitha aantu kiilanduliko yeso lyaaluhe?’ Ombiimbeli otayi gandja omayamukulo ga yela notaga mbilipaleke komapulo ngoka.

Nkene she ende opo eso li pangele aantu

Aantu yamwe oyi itaala kutya aantu oya shitwa ya kale nomwenyo ethimbo efupi kombanda yevi, okumona omaupyakadhi, okunyanyukilwa onkalamwenyo nokonima e taya si nokuya kehala limwe li li nawa. Pakudhiladhila kwawo, eso oli li elalakano lyaKalunga li na ko nasha naantu. Ihe Ombiimbeli otayi shi popi kutya eso ohali hepeke aantu omolwetompelo lyi ili. Otayi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Aaroma 5:12) Ovelise ndjika otayi ulike kutya aantu ohaya si omolwuulunde. Ihe olye ‘omuntu gumwe’ ngoka e etele aantu uulunde mboka tawu ya dhipaga?

Embo The World Book Encyclopedia otali ti kutya aanongononi oyendji oyi itaala kutya aantu ayehe oya za monzo ya faathana, nOmbiimbeli otayi shi popi sha yela kutya onzo ndjoka oyi li ‘omuntu gumwe.’ MuGenesis 1:27 otatu lesha taku ti: “Kalunga okwa shiti omuntu oshifetha she, e ya shiti omulumentu nomukiintu.” Kungeyi Ombiimbeli otayi popi kutya aantu mboka yotango oya shitwa ye li eadhimo lyeshito lyaKalunga Omunankondoadhihe.

Ehokololo lyaGenesis otali gandja natango uuyelele kombinga yonkalamwenyo yaantu konima sho Jehova Kalunga a shiti aantu yotango. Oshindhindhilikwedhi mehokololo alihe ndyoka osho kutya Kalunga ina tumbula mo nando eso, kakele owala ngele oya kala inaaya vulika. (Genesis 2:16, 17) Okwa halele aantu ya kale moparadisa ombwanawa kombanda yevi, ya nyanyukwa noye na uukolele sigo aluhe. Ka li a hala ya mone iihuna omolwuukulupe nokonima taya si. Mbela oshe ende ngiini opo eso li kale tali pangele aantu ayehe?

Genesis ontopolwa onti-3 otayi hokolola nkene aaihokani yotango ya tokola owina kaaya vulike kwaangoka e ya pa omwenyo, Jehova Kalunga. Onkee ano, Kalunga okwa li e ya pe egeelo ndyoka a li e ya lombwela nale komeho yethimbo. Okwa li a lombwele omulumentu a ti: “Owa kuthilwe mevi nou na okushuna mevi.” (Genesis 3:19) Oohapu dhaKalunga odha li dha gwanithwa molwaashoka oonakwaahavulika mboka yaali oya si konima yethimbo.

Ihe eyono ndyoka kalya li owala lya hepeke aaihokani yotango. Okwaahavulika kwawo okwa yono wo etegameno lyonkalamwenyo ya gwanenena ndyoka oluvalo lwawo lwa li lu na okunyanyukilwa. Jehova melalakano lye okwa li a kwatela mo naantu mboka ya li inaaya valwa natango sho a lombwele Adam naEva a ti: “Valathaneni, ne mu indjipale nokuudha evi alihe. Li tuleni mepangelo lyeni; pangeleni oohi dhomefuta noondhila dhokegulu niinamwenyo ayihe tayi inyenge kombanda yevi.” (Genesis 1:28) Konima yethimbo, aantu oya li ye na okuudhitha evi alihe nokunyanyukilwa lela onkalamweyo nopwaahe na eso. Ihe hekulululwa gwawo Adam, sha hala okutya, ‘omuntu gumwe’ okwe ya landitha po muupika wuulunde mboka we ye etele eso itali vulu okuhenukwa. Omuyapostoli Paulus ngoka e li oluvalo lwomulumentu ngoka gwotango okwa nyola a ti: ‘Onda landithwa po ndi kale omupika gwuulunde.’—Aaroma 7:14.

Ngaashi owala aahanaguli ya yonagula po omafano gongushu ethimbo opo lya piti, okuyona kwaAdam okwa yonagula po nayi eshito lyaKalunga ekumithi, sha hala kutya, aantu. Aanona yaAdam oya li ye na oyana, aatekulu nosho tuu. Kehe epipi lya ka landula ko olya li lya valwa e tali koko, lya vala oyana nolwahugunina olya si. Omolwashike alihe lya si? Omolwaashoka alihe olya za muAdam. Ombiimbeli otayi ti: “Aantu oyendji oya si omolwokuyona kwomuntu gumwe.” (Aaroma 5:15) Omikithi, uukulupe negamo lyokulonga shoka sha puka nosho wo eso oyo iilanduliko yiyemateka mbyoka Adam e etele uukwanegumbo we. Muukwanegumbo mboka atuheni otwa kwatelwa mo.

Omuyapostoli Paulus montumwafo ye ndjoka a li a nyolele Aakriste yokuRoma, okwa li a nyola kombinga yonkalo ombwinayi yaantu inaaya gwanenena moka naye a kwatelwa mo nosho wo okukondjitha iilanduliko yuulunde iiwinayi. Okwa ti: “Ongame omuntu omukweyi! Olye ta mangulula ndje molutu nduka talu e tele ndje eso?” Mbela kali shi tuu epulo lya simana? Olye a li ta ka hupitha Paulus naayehe mboka ye li pumbwa muupika wuulunde neso? Paulus okwa yamukula a ti: “Kalunga na hambelelwe omolwaJesus Kristus, Omuwa gwetu!” (Aaroma 7:14-25) Eeno, Omushiti gwetu okwa ninga elongekidho opo e tu hupithe okupitila mOmwana, Jesus Kristus.

Onkandangala ndjoka Jesus ta dhana mehupitho lyaantu kuKalunga

Jesus okwa hokolola onkandangala ndjoka ta dhana mokuhupitha aantu muupika wuulunde neso. Okwa ti: ‘Omuna gwOmuntu okwe ya okugandja omwenyo gwe, gu ninge iikulila yoyendji.’ (Mateus 20:28, OB-1954) Ongiini omwenyo gwaJesus gu li iikulila? Ongiini tatu vulu okumona uuwanawa meso lye?

Ombiimbeli otayi hokolola Jesus kutya “ke na nando ondjo” nosho wo kutya okwa “yoololwa maalunde.” Jesus okwa li a vulika lela kIipango yaKalunga monkalamwenyo ye ayihe. (Aahebeli 4:15; 7:26, OB-1954) Onkee ano eso lyaJesus kalya li oshilanduliko shuulunde nokwaahavulika ngaashi lyaAdam. (Hesekiel 18:4) Pehala lyaashono, Jesus okwa taamba ko eso ndyoka ini ilongela opo a gwanithe ehalo lyaHe, okuhupitha aantu muulunde neso. Ngaashi sha popiwa metetekelo, Jesus okwa li e ya nehalo ewanawa ‘okugandja omwenyo gwe, gu ninge iikulila.’ Nohole itaayi vulu okuyelekwa nasha mondjokonona, Jesus ‘okwa makele eso omolwaayehe’ nehalo ewanawa.—Aahebeli 2:9, OB-1954.

Omwenyo ngoka Jesus a li a yamba ogwa li gu thike lela pamwe nogwaAdam ngoka a hunutha sho a longo uulunde. Eso lyaJesus olya li lye e ta oshizemo shashike? Jehova okwa li a taamba ko eyambo ndyoka li li “iikulila yaantu ayehe.” (1 Timoteus 2:6) Shika otashi ti kutya Kalunga okwa li a longitha omwenyo gwaJesus gu na ongushu okugalula omwenyo ngoka nenge a kulile aantu muupika wuulunde neso.

Ombiimbeli otayi tumbula lwiikando oshilonga oshinene shika shohole okuza kOmushiti gwaantu. Paulus okwa li a dhimbulukitha Aakriste kutya oya ‘kulilwa niikulila yi na ondilo.’ (1 Aakorinto 6:20; 7:23) Petrus okwa nyola kutya Kalunga ina longitha oshingoli nenge oshisiliveli, ihe ombinzi yOmwana opo a hupithe Aakriste monkalamwenyo ndjoka hayi ya etele eso. (1 Petrus 1:18, 19) Okupitila mekuliloyambo lyaKristus, Jehova okwa ninga po elongekidho okuhupitha aantu meso lyaaluhe.

Mbela oto ka mona uuwanawa mekulilo lyaKristus?

Kombinga yuuwanawa mboka itaawu vulu okuyelekwa nasha wekulilo lyaKristus, omuyapostoli Johannes okwa nyola a ti: “[Jesus] Kristus ye mwene oye eyambo lyokudhima po ondjo dhetu, lyo kali shi ashike lyoondjo dhetu, ihe nolyaandhoka wo dhaantu ayehe.” (1 Johannes 2:2) Eeno, ekulilo lyaKristus olya gandjwa omolwaantu ayehe. Mbela shika osha hala okutya kehe gumwe ota ka mona owala ngeya uuwanawa mekulilo ndika li na ondilo? Aawe. Dhimbulukwa ehupitho ndyoka lya popiwa moshitopolwa sha tetekele. Mboka ya li taya kambadhala okuhupitha aaniilonga yomomina mboka ya li ya thitikininwa komeya kokakololo oya li ya fala okambamba nongodhi puyo, ihe omuniilonga kehe okwa li e na okuya mo muko. Komukalo gwa faathana, mboka ya hala okumona uuwanawa mekuliloyambo lyaKristus itaya vulu owala okukala ya tegelela omalaleko nuuyamba gaKalunga. Oye na okuninga po sha.

Kalunga okwa hala tu ninge po shike? Johannes 3:36 ote tu lombwele ta ti: “Oongoka i itaala Omwana, oku na omwenyo gwaaluhe, ihe ngoka itaa vulika kOmwana, ita ka mona ko omwenyo, ihe ondjahi yaKalunga otayi kala kombanda ye.” Kalunga okwa hala tu kale tu na eitaalo meyambo lyaKristus. Opu na natango iitegelelwa yilwe. ‘Nopo mpoka tatu idhimbulula, twa tseya Jesus nge hatu dhiginine iipango ye.’ (1 Johannes 2:3, OB-1954) Osha yela kutya shoka sha simana opo tu hupithwe muulunde neso osho okukala neitaalo mekulilo lyaKristus nokuvulika kiipango ye.

Omukalo gumwe gwa simana nkene tu na okuulika eitaalo mekulilo lyaJesus ogwo okudhimbulukwa eso lye, tu na olupandu ngaashi e tu lombwela. Manga inaa sa, okwa li a li pamwe naayapostoli ye aadhiginini uulalelo mboka wu na shoka tawu thaneke, nokwe ya lombwele a ti: “Shi ningeni nokudhimbulukwa ndje.” (Lukas 22:19) Oonzapo dhaJehova odha lenga noonkondo uukuume wadho nOmwana gwaKalunga nohadhi vulika kelombwelo ndyoka. Nuumvo edhimbuluko lyeso lyaJesus Kristus otali ka dhanwa mOlyomakaya, mo 22 gaMaalitsa konima yeningino lyetango. Otatu ku hiya nenyanyu opo wu kale pokugongala hoka kwi ikalekelwa pavuliko kelombwelo lyaJesus. Oonzapo dhaJehova moshitopolwa sheni otadhi ke ku lombwela ethimbo nehala mpoka tapu ka ningilwa oshiningwanima shoka. PEdhimbuluko oto ki ilonga oshindji shoka wa pumbwa okuninga opo ekulilo lyaKristus li ku mangulule muulunde waAdam mboka we e ta eso.

Kunena aantu aashona owala ye na olupandu meyambo enene ndyoka Omushiti gwawo nOmwana ya ninga opo ye ya hupithe mehanagulo. Mboka ye na eitaalo mulyo oye na enyanyu lyi ikalekelwa. Omuyapostoli Petrus okwa nyola kombinga yAakriste ooyakwawo a ti: ‘Omwi itaala, Jesus onkee ano ohamu kala mu na enyanyu enene tali adhima notali nyengana okutumbulwa, oshoka otamu adha elalakano lyeitaalo lyeni, nokutya ehupitho lyoomwenyo dheni.’ (1 Petrus 1:8, 9) Mokukokeka ohole yokuhola Jesus Kristus nosho wo eitaalo mekuliloyambo lye, oto vulu okukala wu na enyanyu monkalamwenyo yoye ngashingeyi noto kala wu na etegameno lyokuhupithwa muulunde neso.

[Ethano pepandja 6]

Jesus okwa li a gandja omwenyo gwe opo a kuthe po iilanduliko yuulunde waAdam

[Ethano pepandja 7]

Edhimbuluko lyeso lyaJesus Kristus otali ka dhanwa mOlyomakaya, mo 22 gaMaalitsa 2008 konima yeningino lyetango