Oonyothi otadhi holola oonkondo dhaKalunga
“Tala owala utale kegulu! Olye a shiti oonyothi ndhoka wa tala? Oye ngoka te dhi enditha dha fa etangakwiita. Adhihe okwe dhi tseya nawa, nokehe yimwe ote yi tumbula kedhina lyayo! Oonkondo dhe oonenenene, odha kolelela nokape na ndjoka e yi hunutha po.”—JESAJA 40:26.
ETANGO oli li owala onyothi yuunene wopokati. Nonando ongaaka, enene lwiikando 330 000 li vulithe unene wevi. Odhindji dhomoonyothi ndhoka dhi li popepi nevi odhi vulike ketango. Ihe oonyothi dhilwe odhi vule etango muunene lwiikando 27 lwaampono.
Etango ohali gandja oonkondo dhi thike peni? Dhiladhila owala andola wa thikama uule wookilometa 15 kokule neziko lyomulilo, ihe owu uvite natango uupyu womulilo ngoka. Etango oli li kokule nevi uule wookilometa omamiliyona 150. Ihe nonando ongaaka, uupyu walyo otawu vulu oku tu fika. Shoka tashi kumitha osho kutya oonkondo dhetango ndhoka hadhi thiki kevi odhi li owala okapambu okashona noonkondo. Nonando ongaaka, okapambu hoka okashona koonkondo dhetango oka gwana okukaleka po onkalamwenyo kombanda yevi.
Aanongononi oya yalulila kumwe oonkondo ndhoka hadhi zi ketango kutya odha gwana okukaleka po oopulanete dhi thike pevi dhi li omabiliyona 31. Natango okuyalula owala oonkondo ndhoka momukalo gulwe ishewe, Ehangano Space Weather Prediction Center (SWPC) olya popi moInternet kutya andola osha li tashi vulika oonkondo dhetango dhi gongelwe owala muule wosekonde yimwe, otali vulu okugandja kuAmerika “oonkondo dholusheno dha gwana dhi thike pwaandhoka haya longitha ngashingeyi uule woomvula 9 000 000 tadhi ya.”
Oonkondo dhetango ohadhi zi mondingandinga yalyo, moka ooatoma hadhi tatagulwa nokugandja oonkondo dhopalute. Etango enene noonkondo nolya thita unene shoka hashi ningitha opo oonkondo ndhoka tali gandja okuza mondingandinga yalyo dhi kuthe oomvula omamiliyona opo dhi thike kombanda yalyo. Ehangano SWPC olya popi moInternet tali ti: “Ngele etango olya kala itaali gandja we oonkondo okuza nena, iilanduliko yaashoka otatu ke yi mona owala konima yoomvula 50 000 000 kombanda yevi.”
Ngashingeyi dhiladhila koshinima shika: Uuna to tala kegulu uusiku oho mono oonyothi omayovi nomukehe yimwe yomudho ohamu zi oonkondo odhindji dha fa ndhoka dhetango. Aanongononi oya yalula oonyothi omamiliyona omayovi ogendjigendji ndhoka dhi li mewangandjo.
Oonyothi adhihe ndhoka odha za peni? Aakonakoni oyendji nonando kaye uvite ko kutya omolwashike, oyi itaala kutya ewangandjo olye ya po oomvula omamiliyona omayovi 14 lwaampono dha pita. Ombiimbeli otayi yelitha tayi ti: “Petameko Kalunga okwa shiti egulu nevi.” (Genesis 1:1) Nopwaahe na omalimbililo, Ngoka a shita oonyothi ndhoka hadhi gandja oonkondo oonenenene ota vulu okwiithanwa e li ‘omunankondo omunenenene.’—Jesaja 40:26.
Nkene Kalunga ha longitha oonkondo dhe
Jehova Kalunga oha longitha oonkondo dhe okuyambidhidha mboka taya longo ehalo lye. Pashiholelwa, omuyapostoli Paulus okwa li a longitha oonkondo dhe okulonga yamwe kombinga yaKalunga. Paulus okwa li owala omuntu ngaashi tse, ihe okwa li a vulu okulonga iilonga oyindji iiwanawa nonando opwa li omahepeko omadhigu. Ngiini mbela? Okwe shi zimine kutya okwa li a pewa “oonkondo” okuza kuKalunga.—2 Aakorinto 4:7-9.
Jehova Kalunga okwa li wo a longitha oonkondo dhe okuhanagula po mboka ya li ya yonene owina omithikampango dhe dhopamikalo. Jesus Kristus okwa li a popi ehanagulo lyaSodom naGomorra nosho wo Eyelu lyopethimbo lyaNoowa yi li iiholelwa yankene Jehova a longithile oonkondo dhe okuhanagula po owala mboka haya longo uuwinayi. Jesus okwa hunganeka kutya masiku Jehova ota ka longitha ishewe oonkondo dhe okuhanagula po mboka hayi ipwililikile omithikampango Dhe.—Mateus 24:3, 37-39; Lukas 17:26-30.
Oho kala wu uvite ngiini?
Konima yokutedhatedha kombinga yoonkondo dhaKalunga ndhoka dhi iwetikile moonyothi, otashi vulika wu kale wu uvite ngaashi omukwaniilwa David ngoka a ti: “Ngele te tala kegulu ndyoka we li shiti, komwedhi noonyothi mbyoka we yu uthile omahala gayo— omuntu omushike, sho ho mu dhimbulukwa; omushamba gwowala, nando u na oshimpwiyu naye?”—Episalomi 8:3, 4.
Eeno, otashi tu ifupipikitha okumona kutya tse aashona noonkondo uuna tatu yelekanithwa newangandjo ndyoka enenenene. Ihe inashi pumbiwa tu kale twa kumithwa unene koonkondo dhaKalunga. Jehova okwa nwetha mo omupolofeti Jesaja a nyole oohapu tadhi hekeleke tadhi ti: “[Kalunga] ota tsu omukumo oonakuvulwa naamboka yaa na oonkondo, oonkondo dhawo ote dhi indjipaleke odhindji. Aagundjuka ohaa vulwa nohaa adhika kuutongwe, aalumentu aagundjuka otaa punduka e taa ihata po, ihe mboka taa inekele OMUWA, ohaa mono oonkondo oompe. Oya fa omakodhi taga yelutha omawawa pombanda; otaa matuka yo itaa vulwa; otaye ende noitaa loloka.”—Jesaja 40:29-31.
Ngele owa hala okulonga ehalo lyaKalunga, kala wu na uushili kutya ote ku pe ombepo ye ondjapuki yi ku kwathele. Ihe owu na oku yi indila. (Lukas 11:13) Pakwatho lyaKalunga, oto vulu okwiidhidhimikila eyeleko kehe nokumona oonkondo okulonga shoka shu uka.—Aafilippi 4:13.
[Oohapu dha simana pepandja 7]
Pakwatho lyaKalunga, oto vulu okumona oonkondo okulonga shoka shu uka
[Omathano pepandja 7]
Pombanda okuza kolumoho: omulalawili gwedhina Whirlpool, ongundu yoonyothi Pleiades, Orion Nebula, omulalawili gwedhina Andromeda
[Omathano pepandja 7]
Etango enene lwiikando 330 000 li vulithe unene wevi
Omadhina gaathaneki yomathano pepandja 7]
Pleiades: NASA, ESA and AURA/Caltech; all others above: National Optical Astronomy Observatories